1, 2. (a) Na iloloma vakacava o na vakavinakavinakataka vakalevu? (b) Na cava e iloloma uasivi kina ni Kalou na keda ivoli?

VAKASAMATAKA mada na veika sa bau lolomataki oti vei iko, na iloloma cava e talei duadua? E sega ni tukuni me dua sara na iloloma saulevu mo qai vakamareqeta. O na vakavinavinakataka vakalevu na iloloma e vakamarautaki iko, qai soli vei iko ena gauna sara ga o vinakata tu kina.

² E levu na iloloma sa solia vei keda na Kalou. Ia e dua vei ira na iloloma qori e talei duadua, e nona iloloma uasivi vua na kawatamata. Eda na raica ena wase qo ni o Jiova e tala mai na Luvena o Jisu Karisito me rawa nida bula tawamudu. (Wilika Maciu 20:28.) E vakadinadinataka o Jiova ni lomani keda dina ena nona talai Jisu mai vuravura me keda ivoli.

3. Na cava eda mate kina?

³ E vakarautaka o Jiova na ivoli meda sereki kina na kawatamata mai na ivalavala ca kei na mate. (Efeso 1:7) Ke da kila na ka e yaco ena vica vata na udolu na yabaki sa oti ena were o Iteni, sa na qai matata na vuna e gadrevi kina na ivoli. Erau valavala ca na vuda o Atama kei Ivi, rau mani mate. Eda mate tale ga ni sa takavi keda na nodrau ivalavala ca o Atama kei Ivi.—Raica na iKuri ni iVakamacala 9.

4. O cei o Atama? Na cava e soli vua?

 ⁴ Dua na ka talei e solia o Jiova vua na imatai ni tamata o Atama ena gauna e buli koya kina, na bula uasivi. Ni uasivi na nona vakasama, uasivi tale ga na yagona, ena sega kina ni tauvimate, qase, se mate. E rawa ni tukuni ni tamai Atama o Jiova ni a buli koya. (Luke 3:38) E dau vosa vua o Jiova ena levu na gauna. E vakamatatataka vua na veika e vinakata me cakava, e lesia tale ga vua na cakacaka marautaki.—Vakatekivu 1:28-30; 2:16, 17.

5. Ni tukuni ena iVolatabu ni a buli o Atama “me ucuya na Kalou,” na cava na kena ibalebale?

⁵ A buli o Atama “me ucuya na Kalou.” (Vakatekivu 1:27) Kena ibalebale e rawa ni vakaraitaka o koya na itovo i Jiova me vaka na loloma, vuku, lewadodonu, kei na kaukaua. Ni soli tale ga vei Atama na galala ni vakatulewa, e sega kina ni vaka na misini e porokaramutaki na ka me cakava. E solia na Kalou vua na galala me digia me cakava na veika vinaka se veika ca. A rawa sara ga ni bula tawamudu ena Parataisi o Atama ke a digia me talairawarawa vua na Kalou.

6. Na cava e sotava o Atama ena vuku ni nona talaidredre? E tarai keda vakacava qori?

⁶ Na cava e sotava o Atama ni tau na kena itotogi ena vuku ni nona talaidredre? Erau sa sega ni veitokani vinaka kei Jiova, kau laivi vua na bula uasivi, qai vakatalai mai na Parataisi a vakaitikotiko voli kina. (Vakatekivu 3:17-19) E sega tale ni dua na nodrau inuinui o Atama kei Ivi ni rau digia me rau talaidredre vua na Kalou. Na ka e cakava o Atama “e curu kina i vuravura na ivalavala ca, kei na mate ena vuku ni ivalavala ca, mani dewa na mate vei ira na tamata kece ga ni sa valavala ca na tamata kece ga.” (Roma 5:12) E “volitaki” koya o Atama, e volitaki keda tale ga meda bobula ina ivalavala ca kei na mate ena vuku ni nona valavala ca. (Roma 7:14) Ia e tiko na noda inuinui, oya na ivoli e vakarautaka o Jiova.

7, 8. Na cava na ibalebale ni ivoli?

 ⁷ Na cava na ibalebale ni ivoli? E rua na vakasama e vakavotui kina. Kena imatai, na ivoli e rawa ni ilavo e soli me sereki se vakasukai mai kina e dua na ka. Kena ikarua, na ivoli e rawa tale ga ni ilavo e soli me isau ni dua na ka e vakacacani.

⁸ E sega ni sauma rawa e dua na tamata na dinau vakaitamera e binia o Atama ena vuku ni nona valavala ca, kei na mate e vakadewa vei keda. Ia e vakarautaka o Jiova na sala meda sereki kina mai na ivalavala ca kei na mate. Meda raica mada se vakarautaki vakacava na keda ivoli, kei na kena yaga vei keda.

9. Na ivoli vakacava e dodonu me vakarautaki?

⁹ E sega ni dua vei keda e rawa ni volia lesu na bula uasivi e kau laivi vei Atama nida ivalavala ca kece. (Same 49:7, 8) E rawa ga qori ena nona solia na nona bula e dua e uasivi tale ga. Qori na vuna e vakatokai kina me “ivoli veirauti.” (1 Timoci 2:6) Na ivoli e vakarautaki e dodonu me veiraurau vinaka kei na bula uasivi a vakayalia o Atama.

10. E vakarautaka vakacava o Jiova na keda ivoli?

¹⁰ E vakarautaka vakacava o Jiova na keda ivoli? A talai Jisu mai vuravura, na luvena vakamareqeti duadua qai imatai ni nona ibulibuli. (1 Joni 4:9, 10) E yalo rawarawa o Jisu me rau veitalatala kei Tamana, me biuta tale ga nona itikotiko vakalomalagi. (Filipai 2:7) Ni tokitaka mai vuravura o Jiova na bula vakalomalagi i Jisu, e mai sucu kina me dua na tamata uasivi qai sega ni ivalavala ca.​—Luke 1:35.

11. E rawa vakacava ni keda ivoli kece e dua ga na tamata?

¹¹ Ena vuku ni nona talaidredre vei Jiova e dua ga na tamata, o Atama, eda ivalavala ca kece kina na nona kawa. Ena vukuna tale ga e dua na tamata, sa rawa nida sereki kece na kawa i Atama mai na mate. (Wilika Roma 5:19.) E sega ni ivalavala ca o Jisu, e rawa gona ni solia na nona bula uasivi me keda ivoli. (1 Korinica 15:45) Qori sa rawa nida sereki kece kina na kawa i Atama mai na mate.​—1 Korinica 15:21, 22.

12. Na cava e sotava kina o Jisu na veika rarawa?

¹² E vakamacalataka na iVolatabu na veika rarawa a sotava o Jisu ni bera nona mate. E kuitalaki, vako ina kaunirarawa, qai mosimosi na veika e vakayacori vua me yacova sara nona vakamatei vakaloloma. (Joni 19:1, 16-18, 30) Na cava e sotava kina o Jisu na veika rarawa? Baleta e kaya o Setani ni na tawayalodina e dua vua na Kalou ke vakatovolei. E qai vakadinadinataka o Jisu ni rawa ni yalodina vua na Kalou e dua e uasivi, ke mani sotava mada ga e levu na ka rarawa. Sa wacava na nona sakitaki Jisu o Jiova!—Vosa Vakaibalebale 27:11; raica na iKuri ni iVakamacala 15.

13. E saumi vakacava na keda ivoli?

¹³ E saumi vakacava na keda ivoli? Ena ika14 ni Naisani 33 G.V., ena nodra ivolanivula na Jiu, e vakatara o Jiova mera vakamatei Jisu na meca. (Iperiu 10:10) Oti e tolu na siga, e vakaturi Jisu o Jiova ina yago vakayalo. Ni lesu i lomalagi o Jisu, e lai cabora vei Tamana na bula uasivi a solia me kedra ivoli na kawa i Atama. (Iperiu 9:24) E ciqoma o Jiova na isoro i Jisu, qai vakayagataka meda sereki kina na kawatamata mai na noda bobula tu ina ivalavala ca kei na mate.​—Wilika Roma 3:23, 24.

14, 15. Na cava meda cakava me vosoti kina noda cala?

¹⁴ Sa yaga tiko vei keda na iloloma uasivi ni Kalou. Meda raica mada na kena yaga vei keda ena gauna qo kei na gauna se bera mai.

¹⁵ Vosoti noda ivalavala ca. E ka ni sasaga meda cakava tiko ga na ka vinaka. Eda dau cala, qai vakadinadinataki qori ena so na gauna ena ka eda tukuna se cakava. (Kolosa 1:13, 14) Na cava meda cakava me vosoti kina noda cala? E bibi meda veivutuni dina, meda yalomalumalumu qai kerei Jiova me vosoti keda. Nida cakava qori, ena qai rawa ni vosoti noda cala.​—1 Joni 1:8, 9.

16. Na cava meda cakava me vinaka kina noda lewaeloma?

¹⁶ Vinaka noda lewaeloma. Ke tukuna vei keda noda lewaeloma nida cala, e dau ora na lomada, rawa nida yalolailai se nanuma nida tawayaga. Ia meda kua ni soro. Ke da kerea na veivosoti i Jiova, ena rogoci keda, ena vosoti keda tale ga. (Iperiu 9:13, 14) E vinakata o Jiova meda talaucaka kece vua na noda leqa kei na noda malumalumu. (Iperiu 4:14-16) Qori eda na veiyaloni kina kei na Kalou.

17. Na veivakalougatataki cava eda na marautaka ena vuku ni mate i Jisu?

¹⁷ iNuinui ni bula tawamudu. “Na isau ni ivalavala ca na mate, ia na iloloma ni Kalou na bula tawamudu ena vuku i Karisito Jisu na noda Turaga.” (Roma 6:23) Io, e rawa nida bula tawamudu da qai bula uasivi ena vuku ni nona mate ena vukuda o Jisu. (Vakatakila 21:3, 4) Ia eda na marautaka vakacava na veivakalougatataki qori?

18. Eda kila vakacava ni lomani keda o Jiova?

¹⁸ Dua na ka nomu marau ni soli vei iko e dua na iloloma totoka. Na ivoli e iloloma talei duadua, e dodonu gona meda vakavinavinakataka vakalevu qori vei Jiova. E kaya na Joni 3:16 ni “levu ni nona lomani vuravura na Kalou e solia kina na Luvena e duabau ga e bulia.” O Jisu e Luvena vakamareqeti o Jiova, ia e soli koya mai o Jiova ena levu ni nona lomani keda. Eda kila ni lomani keda tale ga o Jisu ni yalorawarawa me solia nona bula ena vukuda. (Joni 15:13) Na ivoli e dodonu me vakadeitaka vei iko ni rau lomani iko dina o Jiova kei Jisu.—Kalatia 2:20.

19, 20. (a) Na cava mo cakava mo drau veitokani kina kei Jiova? (b) O na vakaraitaka vakacava ni o vakabauta na isoro ni veivoli i Jisu?

¹⁹ Ni o kila ni lomani iko vakalevu na Kalou, na cava mo cakava mo drau veitokani kina? Ena rawarawa nomu lomana e dua ke o kilai koya vinaka. E kaya na Joni 17:3 ni rawa ni o kilai Jiova ena nomu vulica na veika me baleti koya. Ni o cakava qori, o na lomani koya vakalevu, o na via vakamarautaki koya, drau na veitokani tale ga. E bibi gona mo vulica tiko ga na veika me baleti Jiova ena iVolatabu.​—1 Joni 5:3.

²⁰ Vakabauta na isoro ni veivoli i Jisu. E kaya na iVolatabu ni na “bula tawamudu o koya e vakaraitaka ni vakabauta na Luvena.” (Joni 3:36) Ni tukuni meda vakaraitaka na vakabauta, cava na kena ibalebale? E dodonu meda cakava na ka e vakavulici keda kina o Jisu. (Joni 13:15) E sega ni rauta meda kaya ga nida vakabauti Jisu kei na ivoli, e bibi meda cakacakataka na noda vakabauta. E tukuni ena Jemesa 2:26: “Ena mate . . . na vakabauta e sega ni cakacakataki.”

21, 22. (a) Na cava meda dau tiko kina ena iVakananumi ni mate i Karisito e veiyabaki? (b) Na cava ena vakamacalataki ena Wase 6 kei na 7?

 ²¹ Tiko ena iVakananumi ni mate i Karisito. Ena yakavi ni bera na mate i Jisu, a tukuna meda dau vakananuma na nona mate. Eda cakava qori e veiyabaki, qai vakatokai na soqo qori me iVakananumi se “na iVakayakavi ni Turaga.” (1 Korinica 11:20; Maciu 26:26-28) E sega ni vinakata o Jisu meda guilecava na bula uasivi a solia me keda ivoli, mani kaya: “Dou dau cakava qo mo dou vakananumi au kina.” (Wilika Luke 22:19.) Eda vakaraitaka gona ena noda tiko ena iVakananumi nida sega ni guilecava na keda ivoli, kei na levu ni nodrau lomani keda o Jiova kei Jisu.—Raica na iKuri ni iVakamacala 16.

²² Na ivoli e iloloma talei duadua me bau soli vei keda. (2 Korinica 9:14, 15) Na iloloma talei qori ena yaga tale ga vei ira na vica vata na milioni era sa mate. Qori ena qai vakamacalataki ena Wase 6 kei na 7.