1, 2. (a) Cén cineál bronntanas is fearr leat? (b) Cén fáth gurb í an éiric an bronntanas is fearr a thug Dia dúinn?

CÉARD é an bronntanas is fearr a fuair tú riamh? Ní gá do bhronntanas a bheith daor le go mbeadh meas agat air. Nuair a fhaigheann tú bronntanas a chuireann áthas ort, nó a theastaíonn go géar uait, bíonn tú an-bhuíoch.

² Thar na bronntanais ar fad atá tugtha ag Dia dúinn, tá ceann amháin a theastaíonn go géar uainn. Is é an bronntanas is fearr é a thug Dia don duine. Chuir Iehova a mhac, Íosa Críost, uaidh sa gcaoi is go mbeadh muid in ann maireachtáil go deo. (Léigh Matha 20:28.) Chruthaigh Iehova go bhfuil grá aige dúinn nuair a chuir sé Íosa ar fáil dúinn mar cheannach, nó mar éiric.

3. Cén fáth a bhfaigheann an duine bás?

³ Is í an éiric an modh fuascailte a chur Iehova ar fáil chun an duine a shaoradh ón bpeaca agus ón mbás. (Eifisigh 1:7) Chun a fháil amach cén fáth a raibh an éiric ag teastáil ní mór dúinn dul siar go dtí na heachtraí a tharla na mílte bliain ó shin i nGairdín Éidin. Pheacaigh ár gcéad sinsir, Ádhamh agus Éabha. Fuair siad bás mar gur pheacaigh siad. Faigheann muidne bás freisin, mar go bhfuair muid an peaca mar oidhreacht ó Ádhamh agus Éabha.—Féach Aguisín 9.

4. Cérbh é Ádhamh agus cén sórt saoil a bhí amach roimhe?

 ⁴ Nuair a chruthaigh Iehova an chéad fhear, Ádhamh, thug sé rud an-luachmhar dó. Thug sé beatha fhoirfe dó. Bhí a intinn agus a cholainn foirfe. Ní bheadh sé tinn, ní thiocfadh seanaois air, agus ní bhfaigheadh sé bás choíche. Bhí Iehova mar athair ag Ádhamh, mar is é a chruthaigh é. (Lúcás 3:38) Labhair Iehova leis go rialta. Thug Dia treoracha soiléire d’Ádhamh, agus thug Sé obair shásúil dó le déanamh.—Geineasas 1:28-30; 2:16, 17.

5. Céard a chiallaíonn sé gur cruthaíodh Ádhamh “ar dheilbh Dé”?

⁵ Cruthaíodh Ádhamh “ar dheilbh Dé.” (Geineasas 1:27) Chruthaigh Iehova é leis na tréithe céanna atá Aige féin, ina measc grá, eagna, cóir, agus cumhacht. Thug sé saorthoil d’Ádhamh. Ní róbat a bhí ann. Chuir Dia ar a chumas a bheith in ann an mhaith nó an t-olc a roghnú. Dá roghnódh Ádhamh a bheith umhal do Dhia, d’fhéadfadh sé maireachtáil go deo i bParthas.

6. Céard a chaill Ádhamh nuair a bhí sé easumhal do Dhia? Cén tionchar atá aige sin orainne?

⁶ D’íoc Ádhamh go daor as a chuid easumhlaíochta nuair a daoradh chun báis é. Chaill sé an cairdeas speisialta a bhí aige le hIehova, a bheatha fhoirfe, agus a áit chónaithe i bParthas. (Geineasas 3:17-19) Ós rud é gur roghnaigh Ádhamh agus Éabha a bheith easumhal do Dhia ní raibh aon dóchas ann dóibhsean. Mar thoradh ar an rud a rinne Ádhamh “tháinig an peaca isteach sa saol trí aon duine amháin agus an bás isteach tríd an bpeaca, sa tslí sin leath an bás i measc cách uile de bhrí go ndearna cách uile an peaca.” (Rómhánaigh 5:12) Nuair a pheacaigh Ádhamh, dhíol sé é féin agus muidne mar sclábhaithe faoi chuing an pheaca agus an  bháis. (Rómhánaigh 7:14) An bhfuil aon dóchas ann dúinne? Tá.

7, 8. Céard a chiallaíonn an éiric?

⁷ Céard atá i gceist le héiric? Is praghas í a íoctar chun duine a shaoradh nó chun rud a cheannach ar ais. Chomh maith leis sin, clúdaíonn sí nó íocann sí costas rud éigin.

⁸ Ní fhéadfadh aon duine íoc as an damáiste ollmhór a rinne Ádhamh nuair a pheacaigh sé agus thug an bás isteach sa saol. Chuir Iehova bealach fuascailte ar fáil dúinn chun muid a shaoradh ón bpeaca agus ón mbás. Breathnóidh muid anois ar an gcaoi a n-oibríonn an éiric agus an chaoi a dtéann sí chun tairbhe dúinn.

9. Cén chaoi a bhféadfaí an éiric a íoc?

⁹ Ní raibh sé ar chumas aon duine éiric a thabhairt ar son na beatha foirfe a chaill Ádhamh. Cén fáth? Mar níl aon duine foirfe. (Salm 49:8, 9 [49:7, 8 i mBíoblaí eile]) Bhí beatha fhoirfe eile ag teastáil chun an éiric a íoc. Chaithfeadh an luach céanna a bheith ar an éiric is a bhí ar an mbeatha a chaill Ádhamh.

10. Cén chaoi ar chuir Iehova an éiric ar fáil?

¹⁰ Cén chaoi ar chuir Iehova an éiric ar fáil? Chuir Iehova a Mhac muirneach go dtí an talamh. Ba é an Mac seo, Íosa, an chéad neach a chruthaigh sé. (1 Eoin 4:9, 10) Bhí Íosa sásta a Athair agus a áit chónaithe ar neamh a fhágáil. (Filipigh 2:7) D’aistrigh Iehova Íosa ó neamh go dtí an talamh, agus saolaíodh é mar dhuine foirfe, gan pheaca.—Lúcás 1:35.

11. Cén chaoi a bhféadfadh fear amháin a bheith ina éiric ar son an chine dhaonna go léir?

 ¹¹ Níl beatha fhoirfe ag an gcine daonna de bhrí go raibh an chéad fhear, Ádhamh, easumhal d’Iehova. An bhféadfadh fear eile clann Ádhaimh a shaoradh ón mbás? D’fhéadfadh. (Léigh Rómhánaigh 5:19.) Thug Íosa, nár pheacaigh riamh, a bheatha fhoirfe mar éiric. (1 Corantaigh 15:45) D’fhéadfaí a bheatha fhoirfe a úsáid chun an bás a chur ar ceall ar son chlann Ádhaimh.—1 Corantaigh 15:21, 22.

12. Cén fáth a raibh ar Íosa an oiread sin a fhulaingt?

¹² Déanann an Bíobla cur síos ar an méid a d’fhulaing Íosa sula bhfuair sé bás. Sciúrsáladh é agus tairneáladh ar chuaille é. (Eoin 19:1, 16-18, 30) Cén fáth a raibh ar Íosa an oiread sin a fhulaingt? Mar bhí Sátan ag maíomh nach bhfanfadh aon duine umhal do Dhia dá gcuirfí a dhóthain brú air. Chruthaigh Íosa go bhféadfadh fear foirfe fanacht dílis do Dhia fiú dá mbeadh go leor le fulaingt aige. Nach é Iehova a bhí bródúil as Íosa!—Seanfhocail 27:11; féach Aguisín 15.

13. Cén chaoi ar íocadh an éiric?

¹³ Cén chaoi ar íocadh an éiric? Thug Íosa luach a bheatha d’Iehova. Sa mbliain 33, ar Níosán 14 de réir fhéilire na nGiúdach, lig Iehova do naimhde Íosa é a mharú. (Eabhraigh 10:10) Trí lá ina dhiaidh sin, thóg Iehova Íosa ó na mairbh, ní mar dhuine, ach mar phearsa spioraid. Níos déanaí, nuair a d’fhill Íosa ar neamh go dtína Athair, thug sé luach a bheatha fhoirfe d’Iehova mar éiric. (Eabhraigh 9:24) Anois ó tharla go bhfuil an éiric íoctha, tá deis againn fuascailt a fháil ón bpeaca agus ón mbás.—Léigh Rómhánaigh 3:23, 24.

14, 15. Céard a chaithfidh muid a dhéanamh chun maithiúnas a fháil inár bpeacaí?

¹⁴ Tá an éiric ag dul chun tairbhe dúinn cheana féin. Breathnóidh muid ar an gcaoi a dtéann sí chun tairbhe dúinn anois, agus ar an gcaoi a rachaidh sí chun tairbhe dúinn sa todhchaí.

¹⁵ Tá ár bpeacaí maite. Tá sé deacair an rud ceart a dhéanamh an t-am go léir. Is minic linn an rud mícheart a rá agus a dhéanamh. (Colosaigh 1:13, 14) Cén chaoi ar féidir linn maithiúnas a fháil? Ba cheart dúinn aiféala a bheith orainn agus maithiúnas a iarraidh ar Iehova. Ansin is féidir linn muinín a bheith againn go bhfuil ár bpeacaí maite.—1 Eoin 1:8, 9.

16. Céard nach mór dúinn a dhéanamh chun coinsias glan a bheith againn?

¹⁶ Is féidir linn coinsias glan a bheith againn. Mothaíonn muid go dona nuair a thugann ár gcoinsias le fios dúinn go bhfuil rud éigin mícheart déanta againn. Ach ní gá dúinn ár gcás a thabhairt suas. Má impíonn muid ar Iehova maithiúnas a thabhairt dúinn, is féidir linn a bheith cinnte go n-éistfidh sé linn agus go maithfidh sé dúinn é. (Eabhraigh 9:13, 14) Tá Iehova ag iarraidh orainn labhairt leis faoinár bhfadhbanna agus ár laigí. (Eabhraigh 4:14-16) Dá bhrí sin is féidir linn a bheith ar ár suaimhneas le Dia.

17. Cé na beannachtaí atá le fáil mar thoradh ar bhás Íosa?

¹⁷ Tá an deis againn maireachtáil go deo. “Mar phá ón bpeaca is ea an bás, ach tabhartas ó Dhia is ea an bheatha shíoraí in Íosa Críost ár dTiarna.” (Rómhánaigh 6:23) Is féidir linn maireachtáil go deo agus  sláinte fhoirfe a bheith againn. (Apacailipsis 21:3, 4) Ach céard a chaithfidh muid a dhéanamh chun na beannachtaí sin a fháil?

18. Cén chaoi a bhfuil a fhios againn go bhfuil grá ag Iehova dúinn?

¹⁸ Ardaíonn ár gcroí nuair a fhaigheann muid bronntanas álainn ó dhuine éigin. Ba cheart go mbeadh muid fíorbhuíoch d’Iehova as ucht na héirice, mar is í an bronntanas is luachmhaire ar fad í. Tá sé ráite in Eoin 3:16 gur “ghráigh Dia an domhan chomh mór sin gur thug sé a Aonghin Mic uaidh.” Chomh maith leis sin tá a fhios againn go bhfuil grá ag Íosa dúinn, mar bhí sé sásta bás a fháil ar ár son. (Eoin 15:13) Bí cinnte go bhfuil grá ag Iehova agus ag Íosa duitse.—Galataigh 2:20.

19, 20. (a) Cén chaoi ar féidir leat a bheith i do chara ag Iehova? (b) Cén chaoi ar féidir leat a thaispeáint go nglacann tú leis an éiric?

¹⁹ Anois ó tá a fhios agat faoi ghrá Dé, cén chaoi ar féidir leat a bheith mar chara aige? Níl sé éasca grá a thabhairt do dhuine nach bhfuil aon aithne agat air. Tá sé ráite in Eoin 17:3 gur féidir linn aithne a chur ar Iehova. De réir mar a dhéanann tú é seo, méadóidh do ghrá dó, beidh tú ag iarraidh é a shásamh, agus beidh tú i do chara aige. Mar sin lean ort ag foghlaim faoi Dhia trí bheith ag staidéar an Bhíobla.—1 Eoin 5:3.

²⁰ Glac le héiric Íosa. Deir an Bíobla: “An té a chreideann sa Mhac tá an bheatha shíoraí aige.” (Eoin 3:36) Céard a chiallaíonn sé creideamh a bheith againn “sa Mhac”? Ciallaíonn sé go ndéanann muid mar a d’iarr Íosa orainn. (Eoin 13:15) Tá níos mó i gceist ná a bheith ag rá go gcreideann muid in Íosa. Chun glacadh leis an éiric ní mór dúinn oibreacha a dhéanamh a léiríonn ár  gcreideamh. Mar a léann muid i Séamas 2:26, “Tá an creideamh marbh gan dea-oibreacha.”

21, 22. (a) Cén fáth ar cheart dúinn freastal ar Chuimhneachán Bhás Chríost gach bliain? (b) Cé eile a bhainfidh tairbhe as an éiric?

²¹ Déan freastal ar Chuimhneachán Bhás Chríost. An oíche sula bhfuair sé bás dúirt Íosa linn a bhás a chomóradh. Déanann muid é seo gach bliain, agus tugtar Cuimhneachán Bhás Chríost air. (1 Corantaigh 11:20; Matha 26:26-28) Is mian le hÍosa go gcoinneodh muid i gcuimhne gur thug sé a bheatha fhoirfe mar éiric ar ár son. Dúirt sé: “Déanaigí é seo mar chuimhne orm.” (Léigh Lúcás 22:19.) Nuair a fhreastalaíonn tú ar an gCuimhneachán taispeánann tú go bhfuil tú ag coinneáil na héirice agus an grá atá ag Iehova agus ag Íosa dúinn i gcuimhne.—Féach Aguisín 16.

²² Is í an éiric an bronntanas is luachmhaire a d’fhéadfadh muid a fháil. (2 Corantaigh 9:14, 15) Bainfidh na milliúin duine atá básaithe fiú, tairbhe as an mbronntanas seo. Déanfar cur síos ar seo i gCaibidlí 6 agus 7.