1, 2. (a) Etẹwẹ nọ zọ́n bọ nunina de nọ họakuẹ to nukun towe mẹ? (b) Etẹwutu ofligọ lọ do yin nunina daho hugan Jiwheyẹwhe tọn na gbẹtọvi lẹ?

NUNINA daho hugan tẹwẹ a ko mọyi pọ́n? E ma biọ dọ nunina de ni vẹahi whẹpo do họakuẹ to nukun towe mẹ. Eyin nunina de hẹn homẹ towe hùn kavi súdo nuhudo towe de tọn, a nọ yọ́n pinpẹn etọn.

² To nunina he Jiwheyẹwhe na mí lẹpo mẹ, dopo tin bọ mí tindo nuhudo etọn hugan nudevo depope. Nunina daho hugan he Jiwheyẹwhe na gbẹtọvi lẹ wẹ. To weta ehe mẹ, mí na plọn dọ Jehovah do Visunnu etọn Jesu Klisti hlan, na mí nido sọgan nọgbẹ̀ kakadoi. (Hia Matiu 20:28.) Gbọn Jesu didohlan aigba ji taidi ofligọ de dali, Jehovah dohia dọ emi yiwanna mí nugbonugbo.

3. Naegbọn gbẹtọvi lẹ do nọ kú?

³ Ofligọ lọ wẹ aliho he Jehovah yizan nado tún gbẹtọvi lẹ dote sọn ylando po okú po si. (Efesunu lẹ 1:7) Nado mọnukunnujẹ nuhewutu mí do tindo nuhudo ofligọ lọ tọn mẹ, mí dona yọ́n nuhe jọ to owhe fọtọ́n susu die wayi to jipa Edẹni tọn mẹ. Mẹjitọ mítọn tintan lẹ, yèdọ Adam po Evi po, waylando. Na ylando yetọn wutu, yé kú. Mílọsu nọ kú, na mí dugu ylando tọn sọn Adam po Evi po dè wutu.—Pọ́n Nudọnamẹ Dogọ 9tọ.

4. Mẹnu wẹ yin Adam, podọ etẹwẹ Jiwheyẹwhe na ẹn?

 ⁴ Whenue Jehovah dá sunnu tintan lọ Adam, E na ẹn nuhọakuẹ de, enẹ wẹ ogbẹ̀ pipé de. Adam tindo ayiha pipé po agbasa pipé de po. E ma na jẹazọ̀n, poyọnho kavi kú gbede. Na Jehovah wẹ dá Adam wutu, Ewọ taidi otọ́ de na ẹn. (Luku 3:38) Jehovah nọ dọhona ẹn whẹwhẹ. Jiwheyẹwhe dọ nuhe donukun e te sọn Adam si na ẹn bo de azọ́n dagbe de na ẹn nado wà.—Jenẹsisi 1:28-30; 2:16, 17.

5. Etẹ na dọ wẹ Biblu te to whenue e dọ dọ Adam yin didá “to apajlẹ Jiwheyẹwhe tọn mẹ”?

⁵ Adam yin didá “to apajlẹ Jiwheyẹwhe tọn mẹ.” (Jenẹsisi 1:27) Jehovah na ẹn jẹhẹnu he nkọ Ewọ lọsu tindo lẹ, taidi owanyi, nuyọnẹn, whẹdida dodo po huhlọn po. E na Adam mẹdekannujẹ nudide bibasi tọn. Adam ma taidi maṣinu de. Jiwheyẹwhe dá ẹ to aliho de mẹ bọ e sọgan de nado wà dagbe kavi oylan. Eyin Adam ko de nado setonuna Jiwheyẹwhe wẹ, e sọgan ko nọgbẹ̀ kakadoi to Paladisi mẹ.

6. Whenue Adam vẹtolina Jiwheyẹwhe, etẹwẹ e hẹnbu? Nawẹ ehe gando mílọsu go gbọn?

⁶ Whenue Adam vẹtolina Jiwheyẹwhe bọ owhẹ̀ okú tọn yin didá na ẹn, onú daho wẹ e hẹngu. E hẹn haṣinṣan vonọtaun he e tindo hẹ Jehovah, ogbẹ̀ pipé etọn po Paladisi he mẹ e te lọ po bu. (Jenẹsisi 3:17-19) Adam po Evi po desọn ojlo mẹ nado vẹtolina Jiwheyẹwhe, enẹwutu todido depope masọ tin na yé ba. Nuṣiwa Adam tọn zọ́n bọ “ylando . . . biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè, na yemẹpo wẹ ko waylando wutu.” (Lomunu lẹ 5:12) Whenue Adam waylando, e ‘sà’ ede po mílọsu po do kanlinmọgbenu ylando po okú po tọn glọ.  (Lomunu lẹ 7:14) Be todido de tin na mí ya? Mọwẹ, todido tin.

7, 8. Etẹwẹ nọ yin yiylọdọ ofligọ?

⁷ Etẹwẹ nọ yin yiylọdọ ofligọ? To paa mẹ, ofligọ de nọ bẹ onú awe hẹn. Tintan, akuẹ he yin súsú nado tún mẹde dote kavi gọ̀ nude họ̀ nọ yin yiylọdọ ofligọ. Awetọ, akuẹ he yin zizejo do nude tamẹ kavi nado suahọ nude tọn sọ nọ yin yiylọdọ ofligọ.

⁸ Gbẹtọvi depope ma sọgan suahọ daho he Adam dù to whenue e hẹn ylando po okú po wá mí ji. Ṣigba, Jehovah ko deali de nado tún mí dote sọn ylando po okú po si. Gbọ mí ni gbadopọnna lehe ofligọ lọ nọ yinuwa gbọn, podọ lehe mí sọgan mọaleyi sọn e mẹ do.

9. Ofligọ wunmẹ tẹwẹ dona yin nina?

⁹ Depope to mí mẹ ma sọgan na ofligọ de do ogbẹ̀ pipé he Adam hẹnbu lọ tamẹ gbede. Etẹwutu? Na mímẹpo wẹ yin mapenọ. (Salmu lẹ 49:7, 8) Ofligọ he na yin zizejo lọ dona yin ogbẹ̀ gbẹtọvi pipé devo tọn. Enẹwutu wẹ e do yin yiylọdọ “ofligọ he sọzẹn de.” (1 Timoti 2:6) Ofligọ lọ dona sọzẹn hẹ ogbẹ̀ he Adam hẹnbu lọ.

10. Nawẹ Jehovah wleawuna ofligọ lọ gbọn?

¹⁰ Nawẹ Jehovah wleawuna ofligọ lọ gbọn? Jehovah do Visunnu he vẹna ẹn hugan hlan aigba ji. Visunnu ehe, yèdọ Jesu, wẹ yin nudida etọn tintan. (1 Johanu 4:9, 10) Jesu desọn ojlo mẹ nado jo Otọ́ etọn po fininọ etọn po do to olọn mẹ. (Filipinu lẹ 2:7) Jehovah diọtẹnna Jesu sọn olọn mẹ wá aigba ji bọ Jesu wá yin jiji taidi gbẹtọvi pipé de he ma tindo ylando depope.—Luku 1:35.

11. Nawẹ mẹdopo sọgan yin yiyizan taidi ofligọ de na gbẹtọvi lẹpo gbọn?

 ¹¹ Sunnu tintan lọ Adam hẹn ogbẹ̀ pipé bu na gbẹtọvi lẹpo to whenue e vẹtolina Jehovah. Be mẹdevo sọgan de okú sẹ̀ na ovi Adam tọn lẹpo ya? Mọwẹ. (Hia Lomunu lẹ 5:19.) Jesu, mẹhe ma waylando pọ́n, ze ogbẹ̀ pipé etọn jo taidi ofligọ. (1 Kọlintinu lẹ 15:45) Ogbẹ̀ pipé etọn sọgan yin yiyizan nado de okú sẹ̀ na ovi Adam tọn lẹpo.—1 Kọlintinu lẹ 15:21, 22.

12. Naegbọn Jesu dona jiya sọmọ?

¹² Biblu do obá he mẹ Jesu jiya whẹpo do kú jẹ hia. E yin hihò po kanyinylan po bo yin whiwhè do yatin de go bosọ doakọnna awufiẹsa susu whẹpo do wá kú. (Johanu 19:1, 16-18, 30) Naegbọn Jesu dona jiya sọmọ? Na Satani sọalọakọ́n dọ gbẹtọvi depope ma sọgan yin nugbonọ na Jiwheyẹwhe eyin e pehẹ whlepọn sinsinyẹn. Jesu dohia dọ gbẹtọ pipé de sọgan yin nugbonọ na Jiwheyẹwhe, eyin etlẹ biọ dọ ni jiya jẹ otẹn godo tọn mẹ. Pọ́n lehe homẹ Jehovah tọn na ko hùn do Jesu go do sọ!—Howhinwhẹn lẹ 27:11; pọ́n Nudọnamẹ Dogọ 15tọ.

13. Nawẹ ofligọ lọ yin súsú gbọn?

¹³ Nawẹ ofligọ lọ yin súsú gbọn? Jesu ze nuhọakuẹ-yinyin ogbẹ̀ etọn tọn jo na Otọ́ etọn. To Nisan 14tọ owhe 33 tọn, sọgbe hẹ sunzanhiawe Ju lẹ tọn, Jehovah dike bọ kẹntọ Jesu tọn lẹ hù i. (Heblu lẹ 10:10) Azán atọ̀n to okú Jesu tọn godo, Jehovah hẹn ẹn gọwá ogbẹ̀, e ma yin taidi gbẹtọvi de, ṣigba taidi nudida gbigbọnọ de. To godo mẹ, whenue Jesu lẹkọyi Otọ́ etọn dè to olọn mẹ, e ze nuhọakuẹ-yinyin ogbẹ̀ gbẹtọvi pipé tọn etọn donukọnna Jehovah taidi ofligọ. (Heblu lẹ 9:24) Todin he ofligọ lọ ko yin súsú, dotẹnmẹ lọ hundote na mí nado yin tuntundote sọn ylando po okú po si.—Hia Lomunu lẹ 3:23, 24.

14, 15. Etẹwẹ mí dona wà, na ylando mítọn lẹ nido yin jijona?

¹⁴ Mí ko to alemọyi sọn nunina daho hugan Jiwheyẹwhe tọn lọ mẹ. Gbọ mí ni gbadopọnna lehe mí nọ mọaleyi sọn e mẹ todin do podọ lehe mí na mọaleyi sọn e mẹ to sọgodo do.

¹⁵ Mí nọ mọ jona yí na ylando mítọn lẹ. E nọ vẹawu nado wà nuhe sọgbe to whelẹponu. Mí nọ ṣinuwa bosọ nọ ṣì hodọ to whedelẹnu. (Kolosinu lẹ 1:13, 14) Nawẹ mí sọgan mọ jona yí gbọn? Nuhe mí ṣiwà lọ dona vẹna mí sọn ahun mẹ wá bọ mí na gbọn whiwhẹ dali biọ dọ Jehovah ni jona mí. To whenẹnu, mí sọgan deji dọ ylando mítọn lẹ na yin jijona.—1 Johanu 1:8, 9.

16. Etẹwẹ mí dona wà nado tindo ayihadawhẹnamẹnu dagbe de?

¹⁶ Mí sọgan tindo ayihadawhẹnamẹnu dagbe. Eyin ayihadawhẹnamẹnu mítọn dọna mí dọ mí ko ṣì nude wà, mí nọ tindo numọtolanmẹ whẹhuhu kavi etlẹ yin todido matindo po nuvọ́nọ-yinyin po tọn. Ṣigba, e ma jẹ dọ mí ni gbọjọ. Eyin mí vẹ̀ Jehovah nado biọ jona, mí sọgan deji dọ e na dotó mí bo jona mí. (Heblu lẹ 9:13, 14) Jehovah jlo dọ mí ni nọ dọ nuhahun po awugbopo depope he mí sọgan tindo po na emi. (Heblu lẹ 4:14-16) Gbọnmọ dali, mí sọgan tin to jijọho mẹ hẹ Jiwheyẹwhe.

17. Dona tẹlẹ wẹ mí sọgan mọyi, na Jesu kú do ota mítọn mẹ wutu?

¹⁷ Mí tindo todido lọ nado nọgbẹ̀ kakadoi. “Ale ylando tọn wẹ okú, ṣigba nunina he Jiwheyẹwhe nọ namẹ wẹ ogbẹ̀ madopodo gbọn Klisti Jesu Oklunọ mítọn dali.” (Lomunu lẹ 6:23) Na Jesu kú do ota mítọn mẹ wutu, mí sọgan nọgbẹ̀ kakadoi bo duvivi agbasalilo pipé de tọn. (Osọhia 21:3, 4) Ṣigba, etẹwẹ mí dona wà nado mọ dona enẹlẹ yí?

18. Nawẹ mí wagbọn do yọnẹn dọ Jehovah yiwanna mí?

¹⁸ Yí nukun homẹ tọn do pọ́n lehe e nọ vivi na we do to whenue mẹde na we nunina dagbedagbe de. Ofligọ lọ wẹ yin nunina he họakuẹ hugan he mí sọgan mọyi, podọ mí dona dohia Jehovah dọ mí yọ́n pinpẹn etọn taun. Johanu 3:16 dọna mí dọ “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn.” Mọwẹ, Jehovah yiwanna mí sọmọ bọ e na mí Visunnu vivẹ́ etọn, Jesu. Mí sọ yọnẹn dọ Jesu lọsu yiwanna mí, na e desọn ojlo mẹ bo kú do ota mítọn mẹ wutu. (Johanu 15:13) Nunina ofligọ lọ tọn dona hẹn we kudeji dọ Jehovah po Jesu po yiwanna we taun.—Galatianu lẹ 2:20.

19, 20. (a) Nawẹ a sọgan lẹzun họntọn Jehovah tọn gbọn? (b) Nawẹ a sọgan dohia gbọn dọ a kẹalọyi avọ́sinsan ofligọ Jesu tọn?

¹⁹ Todin he a ko plọnnu gando owanyi sisosiso Jiwheyẹwhe tọn go, nawẹ a sọgan lẹzun họntọn etọn gbọn? E ma nọ bọawu nado yiwanna mẹde he yè ma yọnẹn. Johanu 17:3 dọ dọ mí sọgan wá yọ́n Jehovah. Dile a to mọwà, owanyi he a tindo na ẹn na siso dogọ bọ a na nọ jlo nado hẹn homẹ etọn hùn, podọ a na wá lẹzun họntọn etọn. Enẹwutu, zindonukọn nado to nuplọn gando Jehovah go gbọn Biblu pinplọn dali.—1 Johanu 5:3.

²⁰ Kẹalọyi avọ́sinsan ofligọ Jesu tọn. Biblu dọ dọ “mẹhe nọ do yise hia to Visunnu lọ mẹ tindo ogbẹ̀ madopodo.” (Johanu 3:36) Etẹwẹ e zẹẹmẹdo nado do yise hia? E zẹẹmẹdo nado nọ wà nuhe Jesu plọn mí nado nọ wà lẹ. (Johanu 13:15) E ma ko pé nado dọ poun dọ mí yí Jesu sè. Nado kẹalọyi ofligọ lọ, nude tin he mí dona  wà gando yise mítọn go. To Jakọbu 2:26 mẹ, mí hia dọ: “Yise matin azọ́n lẹ yin oṣiọ.”

21, 22. (a) Etẹwutu mí dona nọ yì Hùnwhẹ Oflin okú Klisti tọn to whemẹwhemẹ? (b) Etẹ ji wẹ mí na dọhodo to Weta 6tọ po 7tọ po mẹ?

²¹ Nọ yì Hùnwhẹ Oflin okú Klisti tọn. To ozán he jẹnukọnna okú Jesu tọn mẹ, e plọn mí dọ mí dona nọ flin okú emitọn. Mí nọ wà ehe to whemẹwhemẹ bọ e nọ yin yiylọdọ Hùnwhẹ Oflin tọn kavi “Tenu-Núdùdù Oklunọ tọn.” (1 Kọlintinu lẹ 11:20; Matiu 26:26-28) Jesu jlo dọ mí ni nọ flindọ ewọ ze ogbẹ̀ pipé etọn jo taidi ofligọ de do ota mítọn mẹ. E dọmọ: “Mì nọ wà ehe to oflin ṣie mẹ.” (Hia Luku 22:19.) Eyin a nọ yì Hùnwhẹ Oflin tọn, a na dohia dọ a flin ofligọ lọ gọna owanyi sisosiso he Jehovah po Jesu po tindo na mí.—Pọ́n Nudọnamẹ Dogọ 16tọ.

²² Ofligọ lọ wẹ yin nunina daho hugan he mí sọgan mọyi. (2 Kọlintinu lẹ 9:14, 15) Nunina họakuẹ enẹ na tlẹ sọ hẹn ale wá na gbẹtọ livi susu he ko kú lẹ. To Weta 6tọ po 7tọ po mẹ, mí na dọhodo lehe enẹ yọnbasi gbọn ji.