1, 2. (a) Ano nga klase sang regalo ang ginapabaloran mo gid? (b) Ngaa ang gawad amo ang pinakabilidhon nga regalo sang Dios?

ANO ang pinakamanami nga regalo nga imo nabaton? Indi kinahanglan nga mahal gid ang regalo para pabaloran mo ini. Nagapasalamat ka gid kon ang regalo nakapahalipay sa imo ukon kinahanglanon mo gid.

² Sa tanan nga regalo nga ginhatag sang Dios sa aton, may isa nga kinahanglan gid naton. Amo ini ang pinakabilidhon nga regalo sang Dios sa mga tawo. Matun-an naton sa sini nga kapitulo nga ginpadala ni Jehova ang iya Anak, si Jesucristo, para mabuhi kita sing wala katapusan. (Basaha ang Mateo 20:28.) Ang pagpadala ni Jehova kay Jesus sa duta bilang gawad nagapamatuod nga palangga gid niya kita.

3. Ngaa nagakapatay ang mga tawo?

³ Ang gawad amo ang paagi ni Jehova para mahilway ang mga tawo sa sala kag kamatayon. (Efeso 1:7) Para maintiendihan pa gid naton kon ngaa kinahanglan naton ang gawad, hibaluon naton ang natabo sang nagligad nga linibo ka tuig sa hardin sang Eden. Nakasala ang aton una nga mga ginikanan nga si Adan kag si Eva. Gani napatay sila. Nagakapatay man kita kay napanubli naton ang sala.—Tan-awa ang Endnote 9.

4. Sin-o si Adan, kag ano ang ginhatag sa iya?

 ⁴ Sang gintuga ni Jehova ang una nga lalaki nga si Adan, ginhatagan Niya sia sang bilidhon nga mga butang. Ginhatagan niya si Adan sang perpekto nga kabuhi. May perpekto sia nga pamensaron kag lawas. Indi sia magmasakit, magtigulang, kag mapatay. Bangod si Jehova ang nagtuga kay Adan, daw Sia na ang iya amay. (Lucas 3:38) Pirme sia ginaistorya ni Jehova. Ginsugid sang Dios kay Adan kon ano ang gusto niya nga himuon ni Adan kag ginhatagan niya sia sang makalilipay nga buluhaton.—Genesis 1:28-30; 2:16, 17.

5. Ano ang buot silingon sang Biblia nga gintuga si Adan “suno sa larawan sang Dios”?

⁵ Gintuga si Adan “suno sa larawan sang Dios.” (Genesis 1:27) Ginhatagan sia ni Jehova sang mga kinaiya nga pareho sa Iya, lakip ang gugma, kaalam, hustisya, kag gahom. Ginhatagan niya si Adan sang kahilwayan sa pagdesisyon. Indi sia robot. Gintuga sia sang Dios nga makapili kon bala ang iya himuon husto ukon sala. Kon ginpili ni Adan nga tumanon ang Dios, mahimo sia kuntani mabuhi sing wala katapusan sa Paraiso.

6. Ano ang nadula ni Adan sang wala sia nagtuman sa Dios? Ano ang epekto sini sa aton?

⁶ Sang wala nagtuman si Adan sa Dios kag ginsentensiahan sang kamatayon, daku gid ang kabaylo. Indi na sia abyan ni Jehova, nadula niya ang iya perpekto nga kabuhi, kag ang Paraiso nga iya ginaistaran. (Genesis 3:17-19) Ginpili ni Adan kag ni Eva nga indi magtuman sa Dios, gani wala na sila sing paglaum. Bangod sa ginhimo ni Adan, “nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo bangod sila tanan nakasala.” (Roma 5:12) Sang nakasala si Adan, “ginbaligya” niya ang iya  kaugalingon, pati na kita, sa sala kag kamatayon. (Roma 7:14) May paglaum pa bala kita? Huo, may ara gid.

7, 8. Ano ang gawad?

⁷ Ano ang gawad? May duha ka butang nga nalakip sa gawad. Una, ang gawad amo ang bili nga ginabayad para mahilway ang isa ka tawo ukon para mabawi ang isa ka butang. Ikaduha, ang gawad amo ang bili nga ginatabon, ukon ginabayad, para sa isa ka butang.

⁸ Wala sing tawo nga makabayad sang halit sang pagpakasala ni Adan nga nagresulta sa aton kamatayon. Pero naghimo si Jehova sing paagi para mahilway kita sa sala kag kamatayon. Hibaluon naton kon ano ang nahimo sang gawad kag kon paano kita makabenepisyo sa sini.

9. Paano mabayaran ang gawad?

⁹ Wala sa aton ang makagawad sa perpekto nga kabuhi nga nadula ni Adan. Ngaa? Kay tanan kita indi perpekto. (Salmo 49:7, 8) Dapat perpekto man nga kabuhi ang ibayad nga gawad. Amo nga gintawag ini nga “katumbas nga gawad.” (1 Timoteo 2:6) Ang bili sang gawad dapat nga pareho ang balor sa kabuhi nga nadula ni Adan.

10. Paano ginhatag ni Jehova ang gawad?

¹⁰ Paano ginhatag ni Jehova ang gawad? Ginpadala ni Jehova ang iya pinalangga nga Anak sa duta. Ining Anak nga si Jesus, amo ang una niya nga gintuga. (1 Juan 4:9, 10) Handa si Jesus nga bayaan ang iya Amay kag ang iya ilistaran sa langit. (Filipos 2:7) Ginsaylo ni Jehova si Jesus halin sa langit pakadto sa duta, kag ginbun-ag si Jesus bilang perpekto nga tawo.—Lucas 1:35.

11. Paano ang isa ka tawo mangin gawad para sa tanan?

 ¹¹ Sang wala gintuman ni Adan si Jehova, nadula niya ang perpekto nga kabuhi para sa tanan nga tawo. May tawo bala nga makadula sang kamatayon para sa tanan nga anak ni Adan? May ara. (Basaha ang Roma 5:19.) Ginhatag ni Jesus ang iya perpekto nga kabuhi bilang gawad. (1 Corinto 15:45) Paagi sa iya perpekto nga kabuhi, madula ang kamatayon sa tanan nga anak ni Adan.—1 Corinto 15:21, 22.

12. Ngaa dapat mag-antos gid si Jesus?

¹² Ginasugid sang Biblia ang grabe nga pag-antos ni Jesus antes sia napatay. Mapintas sia nga ginlatigo, ginlansang sa usok, kag madugay nga ginpaantos asta mapatay. (Juan 19:1, 16-18, 30) Ngaa dapat mag-antos gid si Jesus? Kay nagsiling si Satanas nga wala gid sing tawo nga mangin mainunungon sa Dios kon makaatubang sang grabe nga pag-antos. Ginpamatud-an ni Jesus nga puede mangin mainunungon sa Dios ang perpekto nga tawo bisan sa grabe nga pag-antos. Sigurado nga nalipay gid si Jehova sa ginhimo ni Jesus!—Hulubaton 27:11; tan-awa ang Endnote 15.

13. Paano ginbayad ang gawad?

¹³ Paano ginbayad ang gawad? Ginhatag ni Jesus sa iya Amay ang balor sang iya kabuhi. Sang tuig 33, Nisan 14 sang Judiyo nga kalendaryo, ginpasugtan ni Jehova nga patyon si Jesus sang iya mga kontra. (Hebreo 10:10) Pagligad sang tatlo ka adlaw, ginbanhaw ni Jehova si Jesus, indi bilang tawo, kundi bilang espiritu. Sang ulihi, sang nagbalik si Jesus sa iya Amay sa langit, ginpresentar niya kay Jehova ang balor sang iya perpekto nga kabuhi bilang gawad. (Hebreo 9:24) Nabayad na ang gawad, kag may tsansa na kita nga mahilway sa sala kag kamatayon.—Basaha ang Roma 3:23, 24.

14, 15. Ano dapat ang himuon naton para mapatawad ang aton mga sala?

¹⁴ Bisan subong nakabenepisyo na kita sa pinakabilidhon nga regalo sang Dios. Aton hibaluon kon paano kita makabenepisyo subong kag sa palaabuton.

¹⁵ Napatawad ang aton mga sala. Mabudlay gid himuon ang husto. Makasala kita, kag kon kaisa makahambal kita kag makahimo sing indi husto. (Colosas 1:13, 14) Paano kita mapatawad? Dapat maghinulsol gid kita sa aton nahimo nga sala kag mapainubuson nga mangayo sing patawad kay Jehova. Makasalig gid kita nga patawaron ang aton mga sala.—1 Juan 1:8, 9.

16. Ano ang dapat himuon para may matinlo kita nga konsiensia?

¹⁶ May matinlo kita nga konsiensia. Kon ang aton konsiensia nagasiling nga sala ang aton ginahimo, ginakonsiensia kita, mahimo nga nagakadulaan kita sing paglaum kag nagabatyag nga wala sing pulos. Pero indi kita dapat mangampo. Kon mangayo kita sing patawad kay Jehova, makasalig kita nga pamatian niya kita kag patawaron. (Hebreo 9:13, 14) Gusto ni Jehova nga isugid naton sa iya ang aton mga problema kag mga kaluyahon. (Hebreo 4:14-16) Paagi sini, mangin maayo ang aton relasyon sa Dios.

17. Bangod napatay si Jesus para sa aton, ano ang posible naton mabaton?

¹⁷ May paglaum kita nga mabuhi sing wala katapusan. “Ang bayad sa sala amo ang kamatayon, apang ang dulot nga ginahatag sang Dios amo ang kabuhi nga wala sing katapusan paagi kay Cristo Jesus nga aton Ginuo.” (Roma 6:23) Bangod napatay si Jesus para sa aton, posible na kita mabuhi sing wala katapusan nga may perpekto nga panglawas. (Bugna 21:3, 4) Pero paano naton ina mabaton?

18. Ngaa makasiling kita nga palangga kita ni Jehova?

¹⁸ Sigurado nga nalipay ka gid sang ginhatagan ka sang matahom nga regalo. Ang gawad amo ang pinakabilidhon nga regalo sa tanan, kag dapat naton pasalamatan si Jehova. Ang Juan 3:16 nagasiling sa aton nga “ginhigugma gid sang Dios ang kalibutan amo nga ginhatag niya ang iya bugtong nga Anak.” Palangga gid kita ni Jehova amo nga ginhatag niya ang iya pinalangga nga Anak nga si Jesus. Kag nakahibalo kita nga palangga man kita ni Jesus kay handa sia mapatay para sa aton. (Juan 15:13) Ang gawad nagapamatuod nga palangga ka gid ni Jehova kag ni Jesus.—Galacia 2:20.

19, 20. (a) Paano ka mangin abyan ni Jehova? (b) Paano mo mapakita nga ginabaton mo ang halad gawad ni Jesus?

¹⁹ Nahibaluan mo na subong nga palangga ka sang Dios, pero paano ka mangin abyan niya? Mabudlay palanggaon ang isa nga indi mo kilala. Ang Juan 17:3 nagasiling nga posible naton makilala si Jehova. Samtang ginahimo mo ini, mas palanggaon mo pa gid sia, mapahulag ka nga himuon ang makapahalipay sa iya, kag mangin abyan niya. Gani padayon nga tun-i ang parte kay Jehova paagi sa Biblia.—1 Juan 5:3.

²⁰ Batuna ang halad gawad ni Jesus. Ang Biblia nagasiling nga “ang isa nga nagatuo sa Anak makatigayon sang kabuhi nga wala sing katapusan.” (Juan 3:36) Ano ang buot silingon sang pagtuo sa Anak? Buot silingon nga himuon naton ang ginatudlo ni Jesus sa aton. (Juan 13:15) Indi lang kita basta magsiling nga nagapati kita kay Jesus. Para mabaton naton ang gawad, dapat may himuon kita sa aton pagtuo. Sa Santiago 2:26, aton mabasa: “Ang pagtuo nga wala sing mga buhat patay.”

21, 22. (a) Ngaa dapat kita magtambong sa Memoryal sang kamatayon sang Cristo kada tuig? (b) Ano ang binagbinagon naton sa Kapitulo 6 kag 7?

 ²¹ Magtambong sa Memoryal sang kamatayon sang Cristo. Gintudluan kita ni Jesus sang gab-i antes sia napatay nga dapat dumdumon ang iya kamatayon. Ginahimo naton ini kada tuig, kag ginatawag ini nga Memoryal ukon “Panihapon sang Ginuo.” (1 Corinto 11:20; Mateo 26:26-28) Gusto ni Jesus nga dumdumon naton nga ginhatag niya ang iya perpekto nga kabuhi bilang gawad para sa aton. Nagsiling sia: “Padayon ninyo nga himua ini sa pagdumdom sa akon.” (Basaha ang Lucas 22:19.) Kon magtambong ka sa Memoryal, ginapakita mo nga ginadumdom mo ang gawad kag ang daku nga gugma ni Jehova kag ni Jesus sa aton.—Tan-awa ang Endnote 16.

²² Ang gawad amo ang pinakabilidhon nga regalo nga mabaton naton. (2 Corinto 9:14, 15) Bisan ang minilyon nga napatay makabenepisyo sa sini. Mahibaluan naton sa Kapitulo 6 kag 7 kon paano ina nangin posible.