1, 2. (a) Oruṋe otjiyandjewa tji tji rira otjinanḓengu tjinene kove? (b) Ongwaye otjisuta tjonguturiro tji tji ri otjiyandjewa otjinenenene okuza ku Mukuru?

OTJIYANDJEWA tjiṋe otjiwa tji wa rora okupewa? Otjiyandjewa katji hepa okurira otjondiru okuraisa ounanḓengu watjo. Indu otjiyandjewa tji matji ku etere ouṋingandu poo tje ri otjiṋa tjoo hepa tjiri, ove u tji vara pondondo yokombanda.

² Moviyandjewa avihe Mukuru mbya rora okutupa, pe na tjimwe tji tji nonḓengu ndja kapita avihe. Otjo otjiyandjewa tjaMukuru otjinenenene tja yandja kovandu. Mekondwa ndi, matu kerihonga kutja Jehova wa hinda Omuna we, Jesus Kristus, kutja eṱe tu kare nomuinyo nga aruhe. (Lesa Mateus 20:28.) Mokuhinda Jesus kombanda yehi kutja me yekutuṱira, Jehova wa raisa kutja tjiri we tu suvera.

3. Ongwaye ovandu tji ve ṱa?

³ Otjisuta tjonguturiro omuano waJehova wokukutura ovandu kouvi nonḓiro. (Ovaefese 1:7) Kokutja tu zuve nawa kutja ongwaye otjisuta tjonguturiro tjaatji hepwa, matu sokutjiwa kutja ovikeṋa mbya tjitwa motjikunino tjaEden ozombura ozengi nḓa kapita. Ovanene vetu ovatenga ooAdam na Eva va tjita ouvi. Mena rokutja va tjita ouvi, owo va ṱa. Eṱe wina tu ṱa mena rokutja twa rumata ouvi okuza ku Adam na Eva.—Tara kOmambo wokehi 9.

4. Adam wa ri omungendu nu eye wa ri na tjike?

 ⁴ Indu Jehova tja mema omurumendu omutenga Adam, Eye we mu pa otjiṋa otjihuze. Jehova wa yandja omuinyo ohomonena ku Adam. Eye wa ungurwa norutu nouripura ouhomonena. Eye katja vera, katja kurupa nu katja koka. Mena rokutja Jehova ongwa uta Adam, Eye wa ri tjimuna ihe. (Lukas 3:38) Jehova aruhe aa hungire kuna ye. Nu we mu kahururira nawa ohunga noviṋa avihe mbyaa undjire ku ye nu we mu pa oviungura oviyorokise.—Genesis 1:28-30; 2:16, 17.

5. Ombeibela i heya tjike indu tji i tja Adam wa memwa “kombunikiro yaNdjambi”?

⁵ Adam wa memwa “otja kombunikiro yaNdjambi.” (Genesis 1:27) Jehova we mu pa ovikaṋena tjimuna imbi ovyE omuini, ovyo mbi ri orusuvero, ounongo, ousemba nomasa. Jehova we mu pa ousemba wokuritoororera omuini. Adam ka ri tjimuna omahina ndji yenena okuungura imbi mbi ya ungurirwa okutjita uriri. Mukuru we mu mema kutja ma yenene okuritoororera omuini ouwa nouvi. Andakuzu Adam wa toorora okupuratena ku Mukuru, eye atja hupa nga aruhe mOparadisa kombanda yehi.

6. Indu Adam tje ha puratenene ku Mukuru, eye wa pandjara tjike? Otjiṋa hi tja ṱuna vi ku eṱe?

⁶ Indu Adam tje ha puratenene ku Mukuru, eye wa muna omberero onene. Eye wa pandjara oupanga we kuna Jehova, omuinyo we ohomonena nomaturiro we wOparadisa. (Genesis 3:17-19) Adam na Eva va toorora okupirukira Mukuru, okutja kapa ri omaundjiro ku wo. Mena rotjiṋa Adam tja tjita hi, ‘ouvi we ya mouye, nonḓiro ai zu mouvi. Komuhingo mbwi onḓiro otji ya tuurunga movandu avehe, owo avehe tjinga ava tjita ouvi.’ (Ovaroma 5:12) Indu Adam tja tjita ouvi, eye we ‘rirandisa’ omuini na randisa eṱe moukarere wouvi nonḓiro. (Ovaroma 7:14) Pe nomaundjiro ku eṱe poo indee? Ii, pe nomaundjiro.

7, 8. Embo ndi otjisuta tjonguturiro ri heya tjike?

 ⁷ Embo ndi otjisuta tjonguturiro ri heya tjike? Embo ndi orini ri kamburira mo oviṋa vivari. Rutenga, otjisuta tjonguturiro otjimariva tji tji sutwa okukutura omundu poo okukotora otjiṋa tji tja pandjarere. Otjitjavari, otjisuta tjonguturiro otjimariva tji tji sutwa okuyarura po onḓengu konyonokero ndja tjitwa kotjiṋa.

⁸ Kape nomundu ngwaa yenene okusuta onyoneno Adam ndja eta indu tja tjita ouvi netu etere onḓiro. Nungwari Jehova wa paturura omuvero wokutukutura kouvi nonḓiro. Ngatu tare kutja otjisuta tjonguturiro tji ungura vi nokutja matji tu vatere vi.

9. Otjisuta tjonguturiro aatji sokusutwa vi?

⁹ Kape nomundu ngwaa yenene okusuta omuinyo ohomonena Adam mbwa pandjara. Omena ratjike? Omena rokutja atuhe kaweṱe ohomonena. (Epsalme 49:7, 8) Otjisuta tjaatji sokusutwa ya ri omuinyo warwe ohomonena. Jesus opa ‘zokuriyandjera omuini’ mena rokutja eye wari nomuinyo ohomonena tjimuna imbwi Adam mbwa pandjara. (1 Timoteus 2:6) Otjisuta tjonguturiro aatji sokukara nonḓengu imwe nomuinyo Adam mbwa pandjara.

10. Omomuano uṋe Jehova ma yandja otjisuta tjonguturiro?

¹⁰ Omomuano uṋe Jehova ma yandja otjisuta tjonguturiro? Eye wa hinda Omuna we omuhuze kombanda yehi. Omuna we, Jesus, ongwari otjiutwa tje otjitenga. (1 Johanes 4:9, 10) Jesus we riyandjera okuisa Ihe nomaturiro we womeyuru. (Ovafilipi 2:7) Jehova wa rundurura omuinyo waJesus okuza meyuru okuya kombanda yehi, nu Jesus wa kwatwa otjomundu ohomonena, ngu ha ri nouvi.—Lukas 1:35.

11. Pe ya vi omundu umwe ma rire onguturiro kovandu avehe?

 ¹¹ Indu Adam tja pirukira Jehova, ovandu avehe va pandjara omuinyo ohomonena. Nu hapo pa ri omundu warwe ngwaa yenene okuyama ovanatje vaAdam konḓiro poo indee? Ii. (Lesa Ovaroma 5:19.) Jesus, ngu hina wa tjitire ouvi wa yandja omuinyo we ohomonena otjotjisuta tjonguturiro. (1 Ovakorinte 15:45) Omuinyo we ohomonena ombwatja u yenena okukutura ovanatje vaAdam konḓiro.—1 Ovakorinte 15:21, 22.

12. Ongwaye tja ri ohepero ku Jesus okumuna ouzeu tjinene nao?

¹² Ombeibela i raisa ouzeu Jesus mbwa tjinda komurungu wonḓiro ye. Eye wa tonwa ozongora, a paperwa na ṱu onḓiro ombi nondetarise komuti. (Johanes 19:1, 16-18, 30) Ongwaye tja ri ohepero ku Jesus okumuna ouzeu tjinene nao? Mena rokutja Satan wa tja kape nomundu ngu ma rire omuṱakame ku Mukuru indu tje ri momarorero omanene. Jesus wa raisa kutja omundu ohomonena ma yenene okupanḓera pouṱakame we ku Mukuru nandarire tje ri kehi yomauzeu omanene. Ripura nomuano Jehova mbwa yoroka mena rouṱakame waJesus!—Omiano 27:11; Omambo wokehi 15.

13. Otjisuta tjonguturiro tja sutwa momuano uṋe?

¹³ Otjisuta tjonguturiro tja sutwa momuano uṋe? Jesus wa yandja onḓengu yomuinyo we ku Ihe. Meyuva oritja-14 komueze wOvajuda, Nisan, mombura 33 O.Z., Jehova wa yandjera kutja ovanavita na Jesus ve mu zepe. (Ovaheberi 10:10) Omayuva 3 kombunda yanao, Jehova wa pendura Jesus movakoke, otjomundu wombepo. Jesus tja yaruka ku Ihe keyuru, eye wa yandja onḓengu yomuinyo we ohomonena ku Mukuru otjotjisuta tjonguturiro. (Ovaheberi 9:24) Mena rokutja otjisuta tjonguturiro tja sutwa, eṱe nai matu yenene okukuturwa kouvi nonḓiro.—Lesa Ovaroma 3:23, 24.

14, 15. Eṱe tu sokutjita vi kutja tu isirwe omauvi wetu?

¹⁴ Eṱe nai tu muna ouwa okuza motjiyandjewa tjaMukuru otjinenenene hi. Ngatu tare kutja ouwa waye mbu tu muna nai nu matu kamuna ouwa waye moruyaveze.

¹⁵ Omauvi wetu ya isirwa. Ouzeu okutjita oviṋa imbi mbi ri ovisemba oruveze aruhe. Tu tjita ozondataiziro, nu povikando tjiva tu katuka momambo na movitjitwa. (Ovakolose 1:13, 14) Matu yenene vi okuisirwa? Matu sokuritanaura koviṋa mbi twa zunḓa nu nomerisusuparisiro atu ningire ondjesiro ku Jehova. Tji twa tjiti nao, matu yenene okukara nongamburiro kutja omauvi wetu ya isirwa.—1 Johanes 1:8, 9.

16. Matu sokutjita vi kutja tu kare nomeritjiviro omawa womomutima?

¹⁶ Matu kara nomeritjiviro omawa womomutima. Omeritjiviro wetu womomutima tji maye tu raere kutja twa zunḓa, tu rimuna ondjo, tu ngundipara nu ye tu tjita kutja tu rihahize. Nungwari kahepero okuyumba ohama. Indu tji twe riheke ku Jehova kutja me tu isire matu yenene okukara nongamburiro kutja ma puratene ku eṱe nu me tu isire. (Ovaheberi 9:13, 14) Jehova u vanga kutja tu hungire kuna ye ohunga nouzeu ngamwa mbu tu na wo noungundipare wetu. (Ovaheberi 4:14-16) Okutjita nai maku tu vatere kutja tu kare nohange kuna Mukuru.

17. Ozondaya zeṋe nḓu matu kaserwa mena ronḓiro yaJesus?

¹⁷ Tu nomaundjiro wokuhupa nga aruhe. “Omasutiro wouvi owo onḓiro; nungwari otjiyandjewa tjotjari tjaNdjambi otjo omuinyo waaruhe moruwano na Kristus Jesus oMuhona wetu.” (Ovaroma 6:23) Mena rokutja Jesus wa ṱira eṱe, matu yenene okuhupa nga aruhe natu yorokere ouveruke ouwa. (Omavandururiro 21:3, 4) Nu hapo matu sokutjita vi kutja tu serwe ozondaya nḓo?

18. Matu tjiwa vi kutja Jehova we tu suvera?

¹⁸ Ripura nomuano mbu u kara nondjoroka indu omundu tje ku pe otjiyandjewa otjiwa. Otjisuta tjonguturiro ootjiyandjewa otjihuze mu avihe nu matu sokukara nondangi yatjiri ku Jehova kutja we tu pa otjiyandjewa ho. Johanes 3:16 mari tja: “Orondu Ndjambi wa suverere ouye tjinene nai nga tja yandja Omuna we omukwatwaerike.” Otjiperi, Jehova we tu suvera nomasa nga tja yandja Omuna we omuhuze Jesus. Nu matu tjiwa kutja Jesus wina we tu suvera, orondu we riyandjera kutja ma ṱire eṱe. (Johanes 15:13) Otjiyandjewa tjotjisuta tjonguturiro matji sokukupa ongamburiro kutja Jehova na Jesus ve ku suvera tjiri.—Ovagalate 2:20.

19, 20. (a) Mo yenene vi okurira epanga raJehova? (b) Omomuano uṋe mu mo yenene okuraisa kutja wa yakura ombunguhiro yaJesus yotjisuta tjonguturiro?

¹⁹ Ove nai tji wa tjiwa ohunga norusuvero rwaMukuru orunene, mo yenene vi okurira epanga re? Kaupupu okusuvera omundu ngu u he i. Johanes 17:3 mari tja matu yenene okutjiwa Jehova. Otja tji mo tjiti nao, orusuvero rwoye ku ye maru kuru, mo utu okuvanga okuyorokisa omutima we nu mo rire epanga re. Okutja kayende komurungu okurihonga ohunga na Jehova mokukonḓonona Ombeibela.—1 Johanes 5:3.

²⁰ Yakura ombunguhiro yaJesus yotjisuta tjonguturiro. Ombeibela mai tja: “Auhe ngwa kambura mOmuna, u nomuinyo waaruhe.” (Johanes 3:36) Okukambura mOmuna maku hee tjike? Maku hee kutja matu sokutjita oviṋa Jesus mbye tu honga okutjita. (Johanes 13:15) Kamaatu hungire motjinyo uriri kutja tu kambura mu Jesus. Okuyakura otjisuta tjonguturiro ku hepa kutja tu tjite otjiṋa ohunga nongamburiro yetu. Etjangwa raJakobus 2:26 mari tja: ‘Ongamburiro nokuhinoviungura ya koka.’

21, 22. (a) Omena ratjike tji twa sokukara pOmazemburukiro wonḓiro yaKristus ombura aihe? (b) Ovikeṋa mbi mavi kakahururwa mEkondwa 6 no 7?

 ²¹ Kara pOmazemburukiro wonḓiro yaKristus. Mongurova yokomurungu wonḓiro ye, Jesus we tu honga kutja matu sokukara nomazemburukiro wonḓiro ye. Tu tjita nao ombura aihe, nu omazemburukiro nga ye isanewa “Omariro Omayapuke waMuhona.” (1 Ovakorinte 11:20; Mateus 26:26-28) Jesus u vanga kutja tu zemburuke kutja eye wa punguha omuinyo we ohomonena otjotjisuta tjonguturiro mena retu. Eye wa tja: “Ihi tjiteye kokuzemburuka Ami.” (Lesa Lukas 22:19.) Indu tji wa kara pOmazemburukiro wonḓiro yaJesus, ove mo rasia kutja mo zemburuka otjisuta tjonguturiro norusuvero orunene Jehova na Jesus ndu ve na rwo ku eṱe.—Tara kOmambo wokehi 16.

²² Otjisuta tjonguturiro ootjiyandjewa otjinenenene tji twa yenena okupewa. (2 Ovakorinte 9:14, 15) Otjiyandjewa otjihuze hi wina matji yenene okueta ouwa kovandu ovengi mba ṱa. Ekondwa 6 no 7 maye ketukahururira kutja ihi matji yenenisiwa vi.