1, 2. (a) Kasanom a maikuna a napateg ti maysa a regalo? (b) Apay a ti subbot ti kapatgan a regalo ti Dios?

ANIA ti kasayaatan a regalo a naawatmo? Saan a masapul a nangina ti maysa a regalo tapno makuna a napateg. No maragsakanka iti maysa a regalo wenno kasapulam unay, agyamanka iti dayta.

² Iti amin a regalo ti Dios kadatayo, adda maysa a kasapulantayo unay. Dayta ti kapatgan a regalona iti tao. Iti daytoy a kapitulo, maammuantayo nga imbaon ni Jehova ti Anakna a ni Jesu-Kristo tapno makapagbiagtayo nga agnanayon. (Basaen ti Mateo 20:28.) Pinaneknekan ni Jehova nga ay-ayatennatayo babaen ti panangibaonna ken Jesus ditoy daga kas subbot.

3. Apay a matay ti tao?

³ Ti subbot ket pamay-an ni Jehova a mangwayawaya kadagiti tattao iti basol ken ipapatay. (Efeso 1:7) Tapno maawatantayo no apay a kasapulan ti subbot, masapul nga ammuentayo no ania ti napasamak idiay hardin ti Eden rinibu a tawenen ti napalabas. Nagbasol ti umuna a nagannaktayo a da Adan ken Eva. Gapu ta nagbasolda, natayda. Mataytayo met ta natawidtayo ti basol kadakuada.​—Kitaen ti Endnote 9.

4. Asino ni Adan, ken ania dagiti adda kenkuana?

⁴ Idi pinarsua ni Jehova ti umuna a tao a ni Adan, adda nakapatpateg nga intedna kenkuana. Inikkanna ni  Adan iti perpekto a biag. Perpekto met ti panunot ken bagina. Saan nga agsakit, lumakay, ken matay. Gapu ta pinarsua ni Jehova ni Adan, nagbalin ni Jehova a kasla amana. (Lucas 3:38) Regular a makisarsarita kenkuana ni Jehova. Inlawlawag ti Dios ken ni Adan no ania ti namnamaenna kenkuana ken inikkanna iti makaparagsak a trabaho.​—Genesis 1:28-30; 2:16, 17.

5. Ania ti kayat a sawen ti ibagbaga ti Biblia a naaramid ni Adan iti ‘ladawan ti Dios’?

⁵ Naparsua ni Adan iti ‘ladawan ti Dios.’ (Genesis 1:27) Inikkan ni Jehova ni Adan kadagiti kualidad a kas kadagiti kualidadna, a pakairamanan ti ayat, sirib, kinahustisia, ken pannakabalin. Inikkanna iti wayawaya nga agpili. Saan a robot ni Adan. Isu ket pinarsua ti Dios a mabalinna ti agpili no aramidenna ti naimbag wenno dakes. No pinili ni Adan ti agtulnog iti Dios, mabalinna koma ti agbiag nga agnanayon iti Paraiso.

6. Idi nagsukir ni Adan iti Dios, ania ti napukawna? Ania ti epekto dayta kadatayo?

⁶ Idi nagsukir ni Adan iti Dios ken nasentensiaan iti ipapatay, nagdakkel ti napukawna. Napukawna ti nagsayaat a pannakigayyemna ken Jehova, ti perpekto a biagna, ken ti Paraiso a pagtaenganna. (Genesis 3:17-19) Pinili da Adan ken Eva ti agsukir iti Dios isu nga awanen ti namnamada. Gapu iti inaramid ni Adan, “simrek ti basol iti lubong ken ti ipapatay babaen ti basol, isu a matay ti amin a tao ta nagbasolda amin.” (Roma 5:12) Idi nagbasol ni Adan, ‘inlakona’ ti bagina ken datayo iti pannakaadipen iti basol ken ipapatay. (Roma 7:14) Ngem adda kadi namnamatayo? Wen, adda.

7, 8. Ania ti subbot?

⁷ Ania ti subbot? Adda dua a kangrunaan a kaipapanan ti subbot. Umuna, ti subbot ket kuarta a maibayad  tapno mawayawayaan ti maysa a tao wenno masaka ti maysa a banag. Maikadua, ti subbot ket pangsukat, wenno pangbayad, iti gatad ti maysa a banag.

⁸ Awan ti tao a makabael a mangbayad iti nagdakkel a napukaw ni Adan idi nagbasol ken impatawidna ti ipapatay kadatayo. Ngem nangaramid ni Jehova iti pamay-an tapno mawayawayaantayo iti basol ken ipapatay. Adalentayo no kasano nga agepekto ti subbot ken no kasanotayo a magunggonaan iti dayta.

9. Ania a subbot ti kasapulan a maibayad?

⁹ Awan kadatayo ti makabael a mangsubbot iti perpekto a biag a napukaw ni Adan. Apay? Gapu ta imperpektotayo amin. (Salmo 49:7, 8) Masapul a perpekto met laeng a biag ti maibayad kas subbot. Dayta ti makagapu a naawagan dayta iti “katupag a subbot.” (1 Timoteo 2:6) Ti subbot ket masapul a katupag ti biag a napukaw ni Adan.

10. Kasano nga impaay ni Jehova ti subbot?

¹⁰ Kasano nga impaay ni Jehova ti subbot? Imbaon ni Jehova ditoy daga ti ipatpategna unay nga Anak. Daytoy nga Anak, ni Jesus, ti kaunaan a pinarsuana. (1 Juan 4:9, 10) Situtulok ni Jesus a nangpanaw ken Amana ken iti langit a paggigiananna. (Filipos 2:7) Manipud langit, imbaon ni Jehova ni Jesus ditoy daga. Gapuna, nayanak ni Jesus kas perpekto a tao, awan basolna.​—Lucas 1:35.

11. Kasano a masubbot ti maysa a tao ti amin a tao?

¹¹ Gapu ta nagsukir ken Jehova ti umuna a tao a ni Adan, napukawna ti perpekto a biag ti amin a tattao. Adda kadi tao a makaikkat iti ipapatay kadagiti amin nga annak ni Adan? Adda. (Basaen ti Roma 5:19.) Ni Jesus,  a saan a pulos nagbasol, intedna ti perpekto a biagna kas subbot. (1 Corinto 15:45) Ti perpekto a biagna ti mangikkat iti ipapatay kadagiti amin nga annak ni Adan.​—1 Corinto 15:21, 22.

12. Apay a masapul nga agpasar ni Jesus iti nakaro a rigat?

¹² Naisurat iti Biblia dagiti rigat a napasaran ni Jesus sakbay a natay. Nakaro ti pannakasapsaplitna, nailansa iti kayo a pagtutuokan, ken inibturanna ti in-inut ken naut-ot nga ipapatay. (Juan 19:1, 16-18, 30) Apay a masapul nga agsagaba ni Jesus iti kasta unay? Gapu ta imbaga ni Satanas nga awan ti tao nga agmatalek iti Dios no maipasango iti nakarigrigat a situasion. Pinaneknekan ni Jesus a makapagtalinaed a matalek iti Dios ti perpekto a tao uray no agrigat iti nakaro. Sigurado a naragsakan ni Jehova iti inaramid ni Jesus!​—Proverbio 27:11; kitaen ti Endnote 15.

13. Kasano a naibayad ti subbot?

¹³ Kasano a naibayad ti subbot? Inted ni Jesus ken ni Amana ti pateg ti biagna. Idi Nisan 14, tawen 33 C.E., iti kalendario dagiti Judio, impalubos ni Jehova a ni Jesus ket papatayen dagiti kabusorna. (Hebreo 10:10) Kalpasan ti tallo nga aldaw, pinagbiag manen ni Jehova ni Jesus, saan a kas tao, no di ket kas espiritu. Idi agangay, nagsubli ni Jesus ken ni Amana idiay langit, ket intedna ken Jehova kas subbot ti pateg ti perpekto a biagna kas tao. (Hebreo 9:24) Ita ta naibayaden ti subbot, adda gundawaytayon a mawayawayaan iti basol ken ipapatay.​—Basaen ti Roma 3:23, 24.

14, 15. Ania ti masapul nga aramidentayo tapno mapakawan dagiti basoltayo?

¹⁴ Nagunggonaantayon iti kapatgan a regalo ti Dios.  Kitaentayo no kasanotayo a magunggonaan ita ken iti masanguanan.

¹⁵ Mapakawan dagiti basoltayo. Saan a kanayon a nalaka nga aramiden ti naimbag. Agkamalitayo, ken no dadduma, makaibaga ken makaaramidtayo iti saan nga umiso. (Colosas 1:13, 14) Kasanotayo a mapakawan? Masapul a sipapasnek a pagbabawyantayo ti kamalitayo ken sipapakumbaba a dumawattayo iti pammakawan ni Jehova. Iti kasta, masiguradotayo a mapakawan dagiti basoltayo.​—1 Juan 1:8, 9.

16. Ania ti masapul nga aramidentayo tapno maaddaantayo iti nadalus a konsiensia?

¹⁶ Maaddaantayo iti nadalus a konsiensia. No makonkonsiensiatayo gapu ta nakaaramidtayo iti basol, mabalin a mariknatayo nga awanen ti namnamatayo ken awan serserbitayo. Ngem ditay sumuksuko. No ipakaasitayo ken Jehova a pakawanennatayo, masiguradotayo a denggen ken pakawanennatayo. (Hebreo 9:13, 14) Kayat ni Jehova nga ibagatayo kenkuana ti amin a problema ken pagkapuyantayo. (Hebreo 4:14-16) Kas resultana, maikappiatayo iti Dios.

17. Ania dagiti bendision a nagbalin a posible gapu iti ipapatay ni Jesus para kadatayo?

¹⁷ Maaddaantayo iti namnama nga agbiag nga agnanayon. “Ti bayad ti basol ket ipapatay, ngem ti sagut ti Dios ket biag nga agnanayon babaen ken Kristo Jesus nga Apotayo.” (Roma 6:23) Gapu ta natay ni Jesus para kadatayo, mabalintayo ti agbiag nga agnanayon ken maaddaan iti perpekto a salun-at. (Apocalipsis 21:3, 4) Ngem ania ti masapul nga aramidentayo tapno maawattayo dagita a bendision?

18. Kasanotayo nga ammo nga ay-ayatennatayo ni Jehova?

¹⁸ Panunotem no kasano a natukay ti pusom idi adda nangted kenka iti nagpintas a regalo. Ti subbot ti kapatgan iti amin a regalo, ket masapul a naimpusuan nga agyamantayo ken Jehova gapu iti dayta. Kuna ti Juan 3:16 a “kasta unay ti panagayat ti Dios iti lubong nga uray la intedna ti bugbugtong nga Anakna.” Wen, ay-ayatennatayo unay ni Jehova ta intedna kadatayo ti patpatgenna nga Anak a ni Jesus. Ken ammotayo met nga ay-ayatennatayo ni Jesus ta situtulok a natay para kadatayo. (Juan 15:13) Ti koma regalo a subbot ti mangkombinsir kenka a talaga nga ay-ayatennaka ni Jehova ken ni Jesus.​—Galacia 2:20.

19, 20. (a) Kasanoka nga agbalin a gayyem ni Jehova? (b) Kasanom a maipakita nga adda pammatim iti daton a subbot ni Jesus?

¹⁹ Ita ta ammomon ti maipapan iti naindaklan nga ayat ti Dios, kasanoka nga agbalin a gayyemna? Narigat nga ayaten ti saanmo nga am-ammo. Ibaga ti Juan 17:3 a mabalintayo nga am-ammuen ni Jehova. Bayat nga ar-aramidem dayta, umuneg ti panagayatmo kenkuana, kayatmo nga aramiden ti pagayatanna, ken agbalinka a gayyemna. Itultuloymo ngarud nga am-ammuen ni Jehova babaen ti panagadalmo iti Biblia.​—1 Juan 5:3.

²⁰ Awatem ti daton a subbot ni Jesus. Kuna ti Biblia a “ti mangipakita iti pammati iti Anak maaddaan iti biag nga agnanayon.” (Juan 3:36) Ania ti kayat a sawen ti panangipakita iti pammati? Kayatna a sawen nga aramidentayo ti insuro ni Jesus nga aramidentayo. (Juan 13:15) Saan nga umanay nga ibagatayo a mamatitayo ken Jesus. Tapno maipakitatayo nga awatentayo ti subbot, masapul nga adda aramidentayo iti pammatitayo.  Mabasatayo iti Santiago 2:26: ‘Natay ti pammati nga awanan aramid.’

21, 22. (a) Apay a masapul a tinawen nga atenderantayo ti Pananglaglagip iti ipapatay ni Kristo? (b) Ania ti mailawlawag iti Kapitulo 6 ken 7?

²¹ Umatenderka iti Pananglaglagip iti ipapatay ni Kristo. Iti rabii sakbay a natay ni Jesus, insurona a masapul a laglagipentayo ti ipapatayna. Tinawen nga ar-aramidentayo dayta, ket maawagan dayta iti Memorial wenno “Pangrabii ti Apo.” (1 Corinto 11:20; Mateo 26:26-28) Kayat ni Jesus a laglagipentayo nga intedna ti perpekto a biagna tapno masubbottayo. Kunana: “Itultuloyyo nga aramiden daytoy kas panglaglagip kaniak.” (Basaen ti Lucas 22:19.) No umatenderka iti Memorial, ipakpakitam a malaglagipmo ti subbot ken ti naindaklan nga ayat ni Jehova ken ni Jesus kadatayo.​—Kitaen ti Endnote 16.

²² Ti subbot ti kapatgan a regalo a mabalin a maawattayo. (2 Corinto 9:14, 15) Mabenepisiaran pay iti dayta a nagpateg a regalo ti minilion a tattao a natayen. Ilawlawag ti Kapitulo 6 ken 7 no kasano a posible dayta.