KAPÍTLU 5
Resgati é midjór prezenti ki Deus da-nu
1, 2. (a) Pa bo, kuzê ki é un prezenti di valor? (b) Pamodi ki resgati é prezenti más grandi ki Deus da-nu?
KAL ki é midjór prezenti ki dja bu resebe? Un prezenti ka meste ser karu pa el ten valor pa bo. Óras ki bu dadu un kuza ki bu gosta ô ki bu sta meste, bu ka ta fika rei di kontenti?
2 Di tudu prezenti ki Deus dja da-nu, ten un ki nu meste más txeu. El é midjór prezenti ki Deus dja da umanus. Na es kapítlu li, nu ta ben prende ma Jeová manda se Fidju, Jizus Kristu, pa nu pode vive pa tudu ténpu. (Lé Mateus 20:28.) Manda Jizus pa Téra kómu resgati foi un manera di Jeová prova ma el ta ama-nu di verdadi.
KUZÊ KI É RESGATI?
3. Pamodi ki nu ta móre?
3 Resgati é manera di Jeová liberta umanus di pekadu i di mórti. (Efésios 1:7 ) Pa nu ntende pamodi ki nu mesteba di resgati, nu meste sabe kuzê ki kontise na jardin di Éden. Nos primeru pai ku mai, Adon ku Eva, peka. Pamodi kel pekadu es kaba pa móre. Nos tanbê nu ta móre pamodi nu erda pekadu di Adon ku Eva. — Djobe párti PRENDE MÁS nu 9.
4. Ken ki éra Adon i kuzê ki el tinha?
4 Kantu Jeová kria primeru ómi Adon, el da-l un kuza di grandi valor. Adon tinha un vida perfetu, un menti perfetu ku un korpu perfetu. Adon nunka ka ta fikaba duenti, nen el ka ta biraba bédju i nunka el ka ta moreba. Jeová ki faze Adon, nton El éra sima un pai pa el. (Lucas 3:38 ) Jeová ta papiaba ku Adon manenti. El splika-l dretu kuzê ki El kreba pa Adon fazeba i El da-l un trabadju sábi pa el faze. — Génesis 1:28-30; 2:16, 17.
5. Bíblia ta fla ma Adon kriadu sima un ‘imaji di Deus’. Kuzê ki kel-li krê fla?
5 Adon kriadu sima un ‘imaji di Deus’. (Génesis 1:27 ) Kel-li krê fla ma Jeová da Adon kualidadis igual ku di sel, sima amor, sabedoria, justisa i puder. El da Adon liberdadi di skodje. Adon ka éra sima un mákina ki meste di algen pa kontrola-l. Deus kria-l ku kapasidadi di skodje kuzê ki é dretu i kuzê ki é mariadu. Si Adon skodjeba obi ku Deus el ta viveba na Paraízu pa tudu ténpu.
6. (a) Kuzê ki Adon perde kantu el ka obi ku Deus? (b) Modi ki nu fika prujudikadu?
6 Adon paga karu pa pekadu ki el faze, el dadu kondenason di mórti. El perde se amizadi spesial ku Jeová, se vida perfetu i kel Paraízu ki Jeová daba el. (Génesis 3:17-19 ) Adon ku Eva skodje ka obi ku Deus, nton ka tinha ninhun speransa pa es. Pamodi kuza ki Adon faze, ‘pekadu entra na mundu i mórti entra djuntu ku pekadu, dipôs mórti spadja pa mundu interu, pamodi tudu algen ta peka.’ (Romanos 5:12 ) Kantu Adon peka, é sima si el ‘bende’ se kabésa djuntu ku nos kabésa, pa nu ser skravu di pekadu i mórti. (Romanos 7:14 ) Ten algun speransa pa nos? Sin, Jeová da-nu un resgati.
7, 8. Kuzê ki é resgati?
7 Kuzê ki é resgati? Ideia di un resgati ta nvolve dôs kuza prinsipal. Primeru, resgati é présu ki ta pagadu pa liberta un algen ô pa kunpra algun kuza di vólta. Sugundu, resgati é présu ki ta paga valor izatu di algun kuza.
8 Ninhun umanu ka pode pagaba kel grandi stragu ki Adon faze, kantu el peka i el traze mórti pa mundu. Má Jeová ranja un manera di liberta-nu di pekadu i di mórti. Nu ben odja modi ki resgati ta funsiona i modi ki el pode djuda-nu.
MODI KI JEOVÁ PAGA RESGATI
9. Ki tipu di resgati mesteda?
9 Ninhun di nos nunka ka ta pode pagaba resgati pa ganha kel vida perfetu ki Adon perde. Pamodi? Pamodi nos tudu é pekador. (Salmo 49:7, 8 ) Pa paga resgati mesteba un otu vida perfetu ô sen pekadu. É pur isu ki el ta txomadu ‘resgati di mésmu valor’. (1 Timóteo 2:6 ) Resgati tinha ki ten mésmu valor ki kel vida ki Adon perde.
10. Kuzê ki Jeová faze pa paga resgati?
10 Kuzê ki Jeová faze pa paga resgati? Jeová manda se Fidju ki el ta ama más txeu pa Téra. Es Fidju, Jizus, foi primeru kuza ki el kria. (1 João 4:9, 10) Ningen ka obriga Jizus dexa se Pai i se morada na Séu, el ben di se livri vontadi. (Filipenses 2:7 ) Jeová panha vida di Jizus na Séu i el pô-l na Téra i Jizus nase perfetu, sen pekadu. — Lucas 1:35.
Jeová da se Fidju ki el ta ama más txeu kómu resgati pa nos
11. Modi ki un ómi pode paga resgati pa tudu algen?
11 Primeru ómi, Adon, perde vida perfetu pa tudu umanus kantu el ka obi ku Jeová. Algun otu ómi ta konsigi libraba tudu fidjus di Adon di mórti? Sin. (Lé Romanos 5:19.) Jizus ki nunka ka peka, resgata-nu ku se vida perfetu. (1 Coríntios 15:45 ) Se vida perfetu pode sérba uzadu pa libra tudu fidjus di Adon di mórti. — 1 Coríntios 15:21, 22.
12. Pamodi ki Jizus tevi ki sufri txeu si?
12 Bíblia ta mostra ma Jizus sufri txeu antis di el móre. El dadu ku xikóti di runhéza, el pregadu na un staka di tortura pa el móre poku-poku i ku txeu dór. (João 19:1, 16-18, 30 ) Pamodi ki Jizus tevi ki sufri txeu si? Pamodi Satanás flaba ma ninhun umanu ka ta konsigiba ser lial pa Deus si el pasa pa txeu provason. Jizus prova ma un ómi perfetu pode ser lial pa Deus sikrê el sufri txeu. Imajina modi ki Jeová fika orgulhozu di Jizus! — Provérbios 27:11 ; djobe párti PRENDE MÁS nu 15.
13. Modi ki pagadu resgati?
13 Modi ki pagadu resgati? Jeová dexa inimigus di Jizus mata-l na dia 14 di mês di nizan di anu 33, di kalendáriu di judeus. (Hebreus 10:10 ) Três dia dipôs, Jeová da Jizus vida otu bês kómu pesoa spritual i nau kómu ómi sima el éra antis. Jizus nunka ka peka, pur isu el ka perde direitu di vive kómu algen perfetu na Téra. Dipôs, kantu Jizus volta pa se Pai na Séu, el paga Deus resgati pa salva-nu ku valor di se vida perfetu ki el tinha li na Téra. (Hebreus 9:24 ) Jeová seta es resgati, nton nu ten xansi di fika livri di pekadu i di mórti. — Lé Romanos 3:23, 24.
MODI KI RESGATI PODE DJUDA-U?
14, 15. Kuzê ki nu meste faze pa nos pekadus purduadu?
14 Resgati é midjór prezenti ki Deus dja da-nu. Nu ben odja modi ki el ta djuda-nu gósi i modi ki el ta ben djuda-nu na futuru.
15 Nos pekadus ta purduadu. É ka faxi faze kel ki é dretu tudu óra. Nu ta era, i txeu bês nu ta fla i nu ta faze kuzas mariadu. (Colossenses 1:13, 14 ) Modi ki nu pode purduadu? Nu debe rapende di korason di kuza mariadu ki nu faze i ku umildadi pidi pa Jeová purdua-nu. Si nu faze si, nu pode kúnfia ma nos pekadus ta purduadu. — 1 João 1:8, 9.
16. Óras ki nu peka, kuzê ki nu meste faze pa nu ten un konsénsia linpu?
16 Nu ta ten un konsénsia linpu. Si nos konsénsia fla-nu ma nu faze algun kuza mariadu, talvês nu ta xinti kulpadu, ô ti dizanimadu i sen valor. Má nu ka meste dizisti. Si nu inplora perdon di Jeová, nu pode ten sérteza ma el ta obi-nu i ma el ta purdua-nu. (Hebreus 9:13, 14 ) Jeová krê pa nu pâpia ku el di kalker prubléma i pontu fraku ki nu ten. (Hebreus 4:14-16 ) Asi, nu ta pode sta na pas ku Deus.
17. Ki bensons nu pode resebe pamodi Jizus móre pa nos?
17 Nu ten speransa di vive pa tudu ténpu. ‘Pagamentu di pekadu é mórti, má prezenti ki Deus ta da é vida itérnu através di Kristu Jizus, nos Sinhor.’ (Romanos 6:23 ) Nu pode ben vive pa tudu ténpu i goza vida ku saúdi perfetu pamodi Jizus móre pa nos. (Apocalipse 21:3, 4 ) Má, kuzê ki nu meste faze pa nu resebe kes benson li?
BU TEN FÉ NA RESGATI?
18. Modi ki nu sabe ma Jeová ta ama-nu?
18 Pensa na modi ki bu ta fika kontenti óras ki un algen ta da-u un prezenti bunitu. Ka ten ninhun prezenti ki ten más valor ki resgati, i nu debe agradise Jeová di fundu di nos korason. João 3:16 ta fla-nu ma ‘Deus ama mundu di tal manera ki el da se Fidju unijénitu’. Sin, Jeová ta ama-nu di tal manera ki el da-nu se Fidju, Jizus, ki ten txeu valor pa el. I nu sabe ma Jizus ta ama-nu tanbê, pamodi ningen ka obriga-l móre pa nos, el móre di se livri vontadi. (João 15:13 ) Resgati é un prezenti ki debe da-u sertéza ma Jeová ku Jizus ta ama-u di verdadi. — Gálatas 2:20.
Sima nu ta ba ta prende sobri Jeová, nu ta bira se amigu i nos amor pa el ta fika más fórti
19, 20. (a) Modi ki bu pode bira amigu di Jeová? (b) Modi ki bu pode mostra ma bu ten fé na sakrifisiu di resgati di Jizus?
19 Gósi ki dja bu prende sobri grandi amor ki Deus ten pa nos, modi ki bu pode bira se amigu? É ka faxi ama algen ki bu ka konxe. João 17:3 ta fla-nu ma nu pode konxe Jeová. Sima bu ta ba ta faze si, bu amor pa el ta bira más fórti, bu ta krê faze kel ki El krê i bu ta bira se amigu. Nton, kontínua ta studa Bíblia pa bu prende más sobri Jeová. — 1 João 5:3.
20 Ten fé na sakrifisiu di resgati di Jizus. Bíblia ta fla ma ‘ken ki mostra ma el ten fé na Fidju, ta ten vida itérnu’. (João 3:36 ) Kuzê ki siginifika mostra fé? Kel-li krê fla ma nu debe faze kel ki Jizus inxina-nu. (João 13:15 ) Nu ka pode sô fla ma nu ta kridita na Jizus. Pa nu mostra ma nu ta seta resgati, nu debe faze algun kuza ku nos fé. Tiago 2:26 ta fla: ‘Fé sen óbra sta mortu.’
21, 22. (a) Pamodi ki tudu anu nu debe sisti Komemorason di mórti di Kristu? (b) Kuzê ki nu ta ben odja na kapítlus 6 ku 7?
21 Sisti Komemorason di mórti di Kristu. Na noti antis di Jizus móre, el inxina-nu ma nu debe faze un komemorason pa lenbra di se mórti. Tudu anu nu ta faze-l i nu ta txoma-l di Komemorason di mórti di Kristu ô ‘Seia di Sinhor.’ (1 Coríntios 11:20; Mateus 26:26-28 ) Jizus krê pa nu lenbra ma el da se vida perfetu kómu resgati pa nos. El fla: ‘Nhos faze si di gósi pa dianti pa nhos lenbra di nha mórti.’ (Lé Lúkas 22:19, BPK.) Óras ki bu ta sisti Komemorason bu ta mostra ma bu ka skese di resgati i nen di grandi amor ki Jeová i Jizus ten pa nos. — Djobe párti PRENDE MÁS nu 16.
22 Resgati é prezenti más grandi ki nu pode resebe. (2 Coríntios 9:14, 15 ) Es grandi prezenti pode djuda mésmu kes milhon di algen ki dja móre. Na kapítlus 6 ku 7 nu ta ben odja modi ki kel-li é posível.
