1, 2. а) Хайдағ сыйыхты иң аарлығ тирҷіксер? б) Ноға толығны Худай пирген сыйхтарның иң аарлығ сыйии тирге чарир?

ХАЙДАҒ сыйыхты сірер иң чахсы сыйых тіп санирҷыхсар? Сірерге ӧрініс ағылчатхан паза кирек полчатхан сыйыхты аарлығ тирҷіксер. Ол сыйых кӧп ахчаа турбаза даа, сірерге аарлығ полар.

² Худай піске кӧп сыйых сыйлап пирген. Че пір сыйых прай сыйыхтардаң аарлығ полған. Ол сыйых прайзына кирек полған нооза. Пу пастағда Иегова позының Оолғын, Иисус Христосты, чирзер ысханнаңар паза кізілер мӧгі чуртазыннар тіп, Иисус позының чуртазын пирібіскеннеңер піліп аларбыс. (Матфей 20:28 хығырыбызыңар.) Иегова, Иисусты толығ идіп, чирзер ызып, піске сынап хынчатханын кӧзіткен.

3. Ноға кізілер ӱрепчелер?

³ Толығ — ол, Иегова кізілерні чазыхтаң паза ӧлімнең осхырып алар ӱчӱн, тӧлеен тӧлегнің паазы (Ефестегілерге 1:7). Ноға толығ кирек полғанын піліп алар ӱчӱн, муңар чыллар мының алнында Эдем тіп садта ниме пол парғанын кӧр кӧреелер. Адамнаң Ева, пістің ӧбекелерібіс, чазых ит салған ӱчӱн ӱреп парғаннар. Піс Адамнаң Евадаң чазых ӱлӱске алғабыс, аннаңар ӱрепчебіс. (9 приложениені кӧріңер.)

4. Библиядаң Адамнаңар ниме піліп алчабыс?

 ⁴ Иегова Адамны, пастағы кізіні, чазых чох чайап салған. Аның сағызы паза ит-сӧӧгі ідӧк толдыра, чазых чох полған. Ол хаҷан даа ағырбасчых, кирібесчік паза ӱребесчік. Иегова Адамны чайап салған, аннаңар ол аның пабазы полған (Лука 3:38). Иегова анынаң удаа чоохтасчаң. Аннаңар Худай аннаң ниме сағыпчатханын Адам чахсы пілген. Иегова ағаа хынығ тоғыс пирген (Бытие 1:28—30; 2:16, 17).

5. Адам Худайның омазына тӧӧй чайалған теені ниме таныхтапча?

⁵ Адам Худайның омазына тӧӧй чайалған (Бытие 1:27). Иегова — хынчатхан, хыйға, сын тудыныстығ паза кӱстіг Худай. Адамны ол позының хылиина тӧӧй хылыхтығ паза пос чуртастығ чайап салған. Орта алай саба тудынарын Адам позы пӧкчең. Ол робот полбаан. Адам Худайның чооғын искен полза, райда мӧгі чуртирҷых.

6. Адам Худайның чооғын испеен ӱчӱн ниме чідір салған? Хайди анзы пістің чуртазыбысха теңен?

⁶ Худайның чооғын испеен ӱчӱн, Адам ӧлімге чарғылатхан, іди ол Иегованаң чағын палғалызын паза райдағы мӧгі чуртазын чідір салған (Бытие 3:17—19). Худайның чооғын испеске пӧгін алып, Адамнаң Ева мӧгі чуртирға ізеністі чідір салғаннар. Адам чоох испеен ӱчӱн, «тилекейге чазых кірген. Чазыхнаң хада, тізең, ӧлім килген. Іди ӧлім прай кізілерге килген. Прайзы чазых ит салған нооза» (Римдегілерге 5:12). Худайның чооғын испин, Адам позын паза прай кізілерні чазыхха паза ӧлімге садыбысхан тирге чарир (Римдегілерге 7:14). Че піске ізеніс пар ба? Йа, пар.

7, 8. Толығ нимедір ол?

⁷ Толығ нимедір ол? Толығ — ол пірее хулға кір  парған кізіні позыдып алҷаң алай пірее нимені нандыра садып алҷаң тӧлег. Толығ толып аларға кирек нименің паазына тиң поларға кирек.

⁸ Адам, чазых ит салып, чідір салған нимені пір дее кізі толып полбасчых. Че Иегова пісті чазыхтаң паза ӧлімнең толып алҷаң оңдай таап алған. Толығ хайди тӧлел парғанын паза анзы піске хайдағ туза поларын кӧр кӧреелер.

9. Кем толығ пол поларҷых?

⁹ Адам чідір салған чазых чох, толдыра чуртасты пір дее кізі толып полбас. Ноға? Піс прайзыбыс чазыхтығбыс нооза (Псалом 49:7, 8). Иисус, Адам осхас, толдыра, чазых чох кізі полған. Аннаңар ол «позын прайзының ӱчӱн толығ иткен» (1 Тимофейге 2:5—6).

10. Толығ тӧлир ӱчӱн, Иегова ниме иткен?

¹⁰ Толығ тӧлир ӱчӱн, Иегова ниме иткен? Иегова позының иң пастағы чайаағын, аарлығ Оолғын, Иисус Христосты, чирзер ысхан (1 Иоанның 4:9, 10). Иисус, тізең, тигірдегі чуртын паза Пабазын артыс саларға тимде полған (Филипптегілерге 2:7). Иегова Оолғының чуртазын тигірдең чирзер ағыл салған, іди ол чирде, чазых чох кізі полып, тӧреен (Лука 1:35).

11. Хайди пір кізі прай кізілернің ӱчӱн толығ тӧлеп поларҷых?

¹¹ Адам, Худайның чооғын испин, позын на нимес, че прай кізілерні мӧгі чуртас чох артыс салған. Кізілерні ӧлімнең піреезі осхыр поларҷых па? Йа. (Римдегілерге 5:19 хығырыбызыңар.) Иисус Христос, позының толдыра чуртазын толыға пиріп, прайзын ӧлімнең осхырып алған (1 Коринфтегілерге 15:45).  Іди Адамның прай тӧліне ӧлімнең позып аларға оңдай пирілген (1 Коринфтегілерге 15:21, 22).

12. Иисус Христосха ноға ирееленерге кирек полған?

¹² Иисус Христос ӧлер алнында хайди ирееленгеннеңер Библияда пазылча: аны хамҷынаң соғып алып, тӧгее хазап салып, ирееленіп ӧлерге артыс салғаннар (Иоанн 19:1, 30). Ноға Иисусха іди ирееленерге кирек полған? Сайтан ноо даа кізі, сынағларға тоғас парза, Худайға киртістіг халбас теен. Чазых чох, толдыра кізі, хатығ сынағларға тоғас парза даа, Худайға киртістіг хал поларын Иисус Христос кӧзіт пирген. Сағын на кӧріңер, хайди Иегова Иисусха поғдархаан полар! (Притчи 27:11; 15 приложениені кӧріңер).

13. Толығ хайди тӧлелген?

¹³ Толығ хайди тӧлелген? П. э. 33 чылында еврейлернің календарьындағы 14 нисанда Иисусты ӧдірібіскеннер (Еврейлерге 10:10). Ӱс кӱн пазынаң Иегова Иисусты тірілдіріп алған. Тірілген соонда Иисус кізі полбаан, че харахха кӧрінмес хут полған. Иисустың чазых чох, толдыра кізі чуртазына правозы халған. Тигірзер нандыра киліп, ол правозын Пабазына пирібіскен. Іди толығ тӧлел парған (Еврейлерге 9:24). Толығ тӧлел парған ӱчӱн, Адамның прай тӧлінің чазыхтаң паза ӧлімнең позып аларға оңдай пол парған. (Римдегілерге 3:23, 24 хығырыбызыңар.)

14, 15. Пістің чазыхтарыбыс тасталар ӱчӱн, ниме идерге кирек?

¹⁴ Толығ Худайның иң аарлығ сыйии полчатханын піліп алдыбыс. Ам, тізең, толығ амғы даа, полар даа чуртазыбысха хайдағ туза ағыларын кӧр кӧреелер.

 ¹⁵ Чазыхтар позыдылча. Кізі чуртас тооза, алҷаас итпин, орта тудын полбинча. Піс прайзыбыс алҷаастар итчебіс: саба чоохтаныбысчабыс алай хомай кирек ит салчабыс (Колосстағыларға 1:13, 14). Пістің пыроларыбыс тасталар ӱчӱн, ниме идерге кирек? Саба тудынғаныбыс ӱчӱн прай чӱреебіснең ачырғанчатсабыс паза Иеговадаң, пістің пыробысты тастазын тіп, пазымнығ сурынчатсабыс, ол пістің чазыхтарыбысты позыдарында ікінҷілебеске чарир (1 Иоанның 1:8, 9).

16. Совесть арығ ползын тіп, ниме идерге кирек?

¹⁶ Арығ совесть. Пірее саба ниме итчетсебіс, совесть пісті пыролапча. Постарыбысты пыролапчабыс паза ит салған нимені тӱзет полбаспыс тіп сағынчабыс. Че ізеніс пар. Иеговадаң, пыроларыбысты тастазын тіп, алданып сурынчатсабыс, ол пісті истер паза пыробысты тастир (Еврейлерге 9:13, 14). Иегова пісті ағаа позыбыстың сидіктерібістеңер, читпес сариларыбыстаңар паза алҷаастарыбыстаңар чоохтазыннар тіп хынча (Еврейлерге 4:14—16). Іди тудынзабыс, Худайның нанҷызы поларбыс.

17. Христос чуртазын тайыға пирген ӱчӱн, хайдағ алғастар аларбыс?

¹⁷ Мӧгі чуртасха ізеніс. «Чазыхтың тӧлее ӧлім, нооза. Худайның сыйии, тізең, Хан-пигібіс Иисус Христоста мӧгі чуртас» (Римдегілерге 6:23). Христос пирген тайығ піске, хаҷан даа ағырбин, мӧгі чуртирға оңдай пирче (Азых чоох 21:3, 4). Пу алғастарны алар ӱчӱн, ниме идерге кирек?

18. Иегова піске хынчатханын хайдаң пілчебіс?

¹⁸ Сірерге сыйых сыйлаанда, сірернің чӱрееңерде  ниме полғанын сағысха кир кӧріңер. Хайди піліп алдыбыс, иң аарлығ сыйых — ол толығ. Піске толығның ӱчӱн Иеговаа алғыстығ поларға кирек. Иоанн 3:16-да чоохталча: «Худай, прай кізілерге тың хынғаннаңар, Позының чалғыс Оолғын даа ӧлімге ысхан». Иегова піске тың хынча, аннаңар позының аарлығ Оолғын, Иисус Христосты, пістің ӱчӱн ӧлімге пирібіскен. Иисус, ідӧк піске хынча, ол пістің ӱчӱн ӧлімге парған нооза (Иоанн 15:13). Толығ тӧлеп салып, Иегова паза Иисус піске хынчатханнарын кӧзіт пиргеннер (Галат чиріндегілерге 2:20).

19, 20. а) Хайди Иегованың нанҷызы полып аларға? б) Христостың толығ полчатхан тайиина киртінчеткенібісті хайди кӧзіт поларбыс?

¹⁹ Иегованың хынызы пісті аның нанҷызы поларға кӧӧктірче. Кізіні чахсы таныбинчатсабыс, ағаа нанҷы пол полбаспыс. Аннаңар Иоанн 17:3-те Иеговадаңар пілістер аларға кирек тіп чоохталча. Хайди? Библияны ӱгренерін тохтатпаңар. Андада Иеговаа хынызыңар пик арах полар, сірер аны ӧріндірерге хынарзар. Пола-пола сірер аның нанҷызы пол парарзар (1 Иоанның 5:3).

²⁰ Иисус Христостың толығ полчатхан тайиина киртініңер. Библияда чоохталча: «Худайның Оолғына киртінчеткен кізінің мӧгі чуртазы пар» (Иоанн 3:36). Иисус Христосха киртінчеткенібісті хайди кӧзідерге? Иисустың ӱгредиинің хоостыра чуртирға кирек (Иоанн 13:15). Иисусха киртінчем теені ле асхынах полар, ниме-де идерге кирек. Иаковтың 2:26-да чоохталча: «Киректері чох киртініс тее ідӧк ӧліг». Христостың тайиина киртінчеткенібіс пістің киректерібістең кӧрінер.

21, 22. а) Ноға сағысха кирҷең Иирдегі азыраныста чыл сай пол турарға кирек? б) 6 паза 7 пастағларда ниме ӱзӱрербіс?

 ²¹ Христостың ӧлгенін сағысха кирҷең Иирдегі азыраныста пол турыңар. Иисус позының ӧлген кӱнін сағысха кир турарға чахаан. Чыл сай ол кӱнде піс сағысха кирҷең Иирдегі азыранысты алай «Хан-пигні сағынып азыранғанын» таныхтапчабыс (1 Коринфтегілерге 11:20; Матфей 26:26—28). Иисус пісті аның толдыра, чазых чох чуртазын пістің ӱчӱн толыға пирібіскенін ундутпазыннар тіп хынған. Ол теен: «Мынзын, Мині сағысха киріп, ит турыңар». (Лука 22:19 хығырыбызыңар.) Иирдегі азыраныста пол турзабыс, Иегованың паза Иисус Христостың хыныстарының ӱчӱн алғызыбысты читірчеткенібісті паза толығны аарлыға санапчатханыбысты кӧзідербіс. (16 приложениені кӧріңер.)

²² Ікінҷілес чоғыл, толығ — иң илбек сыйых (2 Коринфтегілерге 9:14, 15). Толығ ӱреен дее кізілерге туза полар. Хайди ол оларға туза поларын 6 паза 7 пастағлардаң піліп аларбыс.