1, 2. (a) Kiebhi kia tokala kukala o ujitu ua valolo phala eie? (b) Mukonda diahi o kukúla, ujitu ua beta-o-kota ua Nzambi?

UJITU uahi ua beta-o-kota u ua tambuile kiá? O ujitu ki u bhingi kuta kalu iavulu phala kukala ni valolo phala eie. Se o ujitu u ku sangulukisa, mba kima ki ua bhindamena eie u sakidila kiavulu.

² Mu maujitu moso a tu bhana Nzambi, saí ujitu u tua bhindamena dingi, kima kioso-kioso ndenge. Iú o ujitu ua Nzambi ua beta-o-kota ua bhana ku athu. Mu kibatulu kiki, tua-nda dilonga kuila Jihova ua tumikisa Mon’ê Jezú Kristu phala tu tene kukala ni muenhu ua kalelaku. (Tanga Matesu 20:28.) Mu ku tumikisa Jezú mu ixi, kála sata ia kukúla Jihova ua londekesa kuila, ua tu zolo kiavulu.

3. Mukonda diahi o athu ene mu fuá?

³ O kukúla o ndunge ia sange Jihova phala kubhulula o athu ku ituxi ni kúfua. (Efezo 1:7) Phala kuijiia kiambote se mukonda diahi kua bhingile ku tu kúla, tua tokala kuijia ihi ia bhiti m’ukulu mu jaludim ia Edene. O jitata jetu ja dianga, Adá ni Eva, a tele kituxi. Mukonda dia kuta o kituxi, ene afu. Etu ué tu fuá, mukonda tua lundula o kituxi kia Adá ni Eva.—Tala o Kibandekesu 9.

4. Nanhi uexile Adá ni ihi ia kexile na-iu?

⁴ Kioso Jihova kia bhange o diiala dia dianga Adá,  muéne ua mu bhana kima kia valolo. Ua bhana kua Adá muenhu ua iuka. Ua kexile ni ibanzelu ni mukutu ua iuka. Muéne keji kata, ku kuka mba kufua. Mukonda Jihova muéne ua bhange Adá, Muéne uexile kála tat’ê. (Luka 3:38) Jihova ua kexile mu zuela né ithangana ioso. Nzambi ua mu tangela kiambote ihi ia tokalele kubhanga, iu ua mu bhanene kikalakalu kiambote.​—Dimatekenu 1:28-30; 2:16, 17.

5. O Bibidia iamba kuila, Adá a mu bhange mu ‘kidifuanganu kia Nzambi.’ Kiki ki lombolola ihi?

⁵ Adá a mu bhangele mu ‘kidifuanganu kia Nzambi.’ (Dimatekenu 1:27) Jihova ua mu bhangele ni idifua Iê, kála o henda, o unjimu, o kuiuka, ni kutena. Muéne ua bhana kua Adá o ufolo ua ku sola o ima. Adá kexile kála makina kana. Nzambi ua mu bhange ni ufolo ua kusola kubhanga o ima iambote mba o ima ia iibha. Se Adá ua solele kubelesela Nzambi, muéne ueji kala mu Palaízu katé ku hádia ni hádia.

6. Kioso Adá kia bhukumukina Nzambi, ihi ia texi? Kiebhi ki tuala etu?

⁶ Kioso kia bhukumukina Nzambi ia a mu balakala o kufua, Adá ua futu kalu iavulu. Muéne ua texi o ukamba uê ni Jihova, o muenhu uê ua kalelaku, ni dibhata diê mu Palaízu. (Dimatekenu 3:17-19) Adá ni Eva a solo kubhukumukina Nzambi, mukonda dia kiki ene ka kexile dingi ni kidielelu. Mukonda dia Adá kubhukumuka, ‘o ituxi [ia bokona] mu ngongo ku muthu umoxi, o kúfua kù kuejila mu ituxi; kiene ué kia bhiti o kúfua ku thandu dia athu oso, kuma ene oso ate a ituxi.’ (Loma 5:12) Kioso kia te o kituxi, Adá ua di “sumbisa” iu ua tu sumbisa ué, ku ubhika ua kituxi ni kúfua. (Loma 7:14) O kuila etu tuala ni kidielelu? Xê tuala.

7, 8. O kukúla ihi?

 ⁷ O kukúla ihi? O kukúla kubhinga ima iiadi. Kia dianga, o kukúla o kima kia futa phala kubhulula muthu. Kaiadi, o kukúla o kima kia futa phala kusumba kima.

⁸ Se-ku muthu ueji tena kufuta ioso ia texi Adá kioso kia te o kituxi kia tu bhekela o kalunga. Maji Jihova ua sange ndunge ia ku tu bhulula ku kituxi ni ku kalunga. Tua-nda di longa kiebhi kia tu kúla ni kiebhi ki tu tena kukatula mbote mu kukúla.

9. Kiebhi kia tokalele kúfuta o kukúla?

⁹ Se-ku muthu mudietu ueji tena kukúla o muenhu ua iuka ua texi Adá. Mukonda diahi? Mukonda etu enioso tu akua ituxi. (Jisálamu 49:7, 8) Kueji bhinga muthu ua iuka kála kiexile Adá, phala ku tu kúla. Mukonda dia kiki, o Bibidia ixana o ukexilu iú kuila ‘kukúla kua tokala.’ (1 Timote 2:6) O kukúla kua tokalele ku sokela ni muenhu ua iuka ua texile Adá.

10. Kiebhi Jihova kia tu kula?

¹⁰ Kiebhi Jihova kia tu kula? Jihova ua tumikisa mon’ê ua kazola mu ixi. O Mon’a iú, Jezú, muéne a dianga ku mu bhanga. (1 Nzuá 4:9, 10) Jezú ua kexile polondo phala kuxisa Tat’ê, ni dibhata diê ku diulu phala kuiza mu ixi. (Filipe 2:7) Jihova ua bhange madiuanu mu ku tumikisa Jezú mu ixi, anga Jezú a mu vuala sé kituxi.—Luka 1:35.

11. Kiebhi kieji tena o diiala dimoxi kukúla o mundu uoso?

¹¹ Kioso kia bhukumukina Jihova, o diiala dia dianga dia texi o muenhu ua iuka ua tokalele ku athu oso. O kuila kuexile diiala dieji tena kubhulula o an’â Adá  ku kalunga? Kua kexile. (Tanga Loma 5:19.) O diiala didi, Jezú, muéne kexile ni kituxi, ua bhana o muenhu uê phala ku kúla o athu. (1 Kolindo 15:45) O muenhu uê ua iuka uene ueji bhulula o an’â Adá ku kalunga.—1 Kolindo 15:21, 22.

12. Mukonda diahi Jezú ua tale hadi iavulu?

¹² O Bibidia i tanga o hadi ia bhiti na-iu Jezú ande dia kúfua. Muéne a mu beta, a mu phaphela ku taka, iu uáfu o kalunga ka hadi. (Nzuá 19:1, 16-18, 30) Mukonda diahi Jezú ua talele o hadi ioso íii? Mukonda Satanaji uambele kuila, se-ku muthu ueji kala fiiele kua Nzambi se a mu zukutisa. Jezú ua londekesa kuila o muthu ua iuka u tena kukala fiiele kua Nzambi, né muene se o hadi iavulu. Xinganeka kiebhi Jihova kia sangulukile ni Jezú!—Jisabhu 27:11; tala o Kibandekesu 15.

13. Kiebhi kia futu o kukúla?

¹³ Kiebhi kia futu o kukúla? Jezú ua bhana kua tat’ê o valolo ia muenhu uê. Ku muvu ua 33 mu kizuua kia 14, ku mbeji ia Nisã mu kalendaliu ka Jijudé, Jihova uehela kuila o jinguma ja Jezú ji mu jibha. (Jihebeleu 10:10) Mu kubhita izuua itatu, Jihova ua fukununa Mon’ê mu ukexilu ua nzumbi. Mu kubhita kithangana kioso kia vutuka ku diulu kua Tat’ê, muéne ua bhana o muenhu uê ua iuka kua Jihova phala kukúla o athu. (Jihebeleu 9:24) Kuma a tu kúla kiá, a tu bhulula ku kituxi ni ku kalunga.​—Tanga Loma 3:23, 24.

14, 15. Ihi i tua tokala o kubhanga phala ku tu loloka o ituxi ietu?

¹⁴ Etu tua katula kiá mbote iavulu ku ujitu uonene  ua Nzambi. Tu di longe kiebhi ki tu katula mbote lelu, ni ku hádia.

¹⁵ O ituxi ietu a tu loloka-iu. Ki tu bhonza kubhanga ima iambote ithangana ioso. Tuene mu lueza, saí ithangana tuene mu zuela ni kubhanga ima ia iibha. (Kolose 1:13, 14) Ihi i tua tokala o kubhanga phala ku tu loloka? Tua tokala kudiela o ituxi, ni kulenduka tu samba kua Jihova mu kubhinga o muloloki ua ituxi. Kienhiki tu tena kudielela kuila o ituxi ietu a tu loloka-iu.—1 Nzuá 1:8, 9.

16. Ihi i tua tokala o kubhanga phala kukala ni muxima ua zele?

¹⁶ Tu tena kukala ni muxima ua zele. Se o muxima uetu u tu tangela kuila tua bhange kima kia iibha, tu kuata kuditatela, tu luuala, tu dimona kala ki tuala ni valolo. Maji ki tu tokala kubhuila. Sé tu dionda o muloloki ua Jihova, tu tena kudielela kuila muéne ua-nda tuivua, ni ku tu loloka. (Jihebeleu 9:13, 14) Jihova ua mesena kuila tu mu tangela o maka oso u tua mu bhita nau ni iluezu ietu. (Jihebeleu 4:14-16) Se tu bhanga kiki, tua-nda kala ni kutululuka ku tu bhana Nzambi.

17. Mabesá-hi u tua-nda tambula mukonda dia Jezú kufuila bhu kididi kietu?

¹⁷ Etu tua dielela kukala ni muenhu ua kalelaku. ‘Kuma o futu ia ituxi kúfua. Maji o ujitu-phe ua Nzambi muenhu ki uabhua, mua Kristu Jezú, Ngana ietu.’ (Loma 6:23) Mukonda dia Jezú kufuila bhu kididi kietu, tu tena kukala ni muenhu ua kalelaku, sé kukata. (Dijingunuinu 21:3, 4) Maji ihi i tua tokala kubhanga phala kutambula o mabesá enhá?

18. Kiebhi ki tuejiia kuila Jihova ua tu zolo?

¹⁸ Xinganeka kiebhi ki u sanguluka ku muxima kioso kia ku bhana ujitu ua mbote. O kukúla o ujitu ua beta-o-kota, tua tokala kusakidila Jihova ua tu bhana-u. O divulu dia Nzuá 3:16, di tu tangela kuila, “Nzambi ua zola o mundu, katé kia suku mu kubhana Mon’ê umoxi-èlele.” Sé phata Jihova ua tu zola kiavulu, kiene kia mu bhangesa ku tu bhana Mon’ê ua kazola Jezú. Tuejiia kuila Jezú ua tu zola ué mukonda ua kexile polondo phala ku tu kúla. (Nzuá 15:13) O ujitu ua kukúla ua tokala ku ku xikinisa kuila Jihova ni Jezú a kuzola.—Ngalásia 2:20.

19, 20. (a) Kiebhi ki u tena kukala u dikamba dia Jihova? (b) Kiebhi ki u tena kulondekesa kuila ua xikana o sata ia kukula kua Jezú?

¹⁹ Kindala ki uejiia kiá o henda ionene ia Nzambi, kiebhi ki u tena kukala u dikamba diê? Ki bhonza kuzola muthu kua muijiia. Mu divulu dia Nzuá 17:3, a tu tangela kuila tu tena kuijiia Jihova. Mu kusuluka mu kuijiia Jihova, o henda iê kua muéne ia-nda dibandekesa, eie ua-nda mesena ku mu sangulukisa, kienhiki ua-nda kituka u dikamba diê. Kana kufula kudilonga ia lungu ni Jihova, mu kudilonga o Bibidia.—1 Nzuá 5:3.

²⁰ Xikina o sata ia kukula ia Jezú. O Bibidia i longa kuila, “uoso ua xikana o Mona, uala ni muenhu ki uábhua.” (Nzuá 3:36) Ihi ilombolola kuxikana? Kulombolola kubhanga ia tu longo Jezú. (Nzuá 13:15) Ki tua tokala kuzuela ngó kuila tua xikana Jezú. Phala kuxikina o kukula, tua tokala kubhanga kima phala kulondekesa kuila tuala ni kixikanu. O divulu dia Tiiaku  2:26, di zuela: “O kuxikana, kua di kalela sè ima ia kubhanga, kuafu.”

21, 22. (a) Mukonda diahi ua tokala kuia mu Lembalasa ia Kúfua kua Kristu mivu ioso? (b) Ihi i tua-nda di longa mu Kibatulu 6 ni 7?

²¹ Ndé mu Lembalasa ia kúfua kua Kristu. Mu usuku ande dia Jezú kúfua, muéne ua tu longo kuila tua tokala kulembalala o kúfua kuê. Tuene mu bhanga kiki mivu ioso, tuene mu i xana Lembalasa mba ‘Lembalasa ia Kúfua Kua Jezú.’ (1 Kolindo 11:20; Matesu 26:26-28) Jezú ua mesena tu lembalala kuila muéne ua bhana o muenhu uê ua iuka mu ku tu kúla. Muéne uambe: “Bhangenu jinga kienhiki mu ku ngi banza eme.” (Tanga Luka 22:19.) Mu kuia mu lembalasa, eie ua mu londekesa kuila, ua lembalala o kukula, ni henda ionene iene na-iu Jihova ni Jezú kokuetu.—Tala o Kibandekesu 16.

²² Se-ku ujitu ua beta-o-kota, o kukúla ndenge. (2 Kolindo 9:14, 15) O ujitu iú uonene, ua-nda kuatekesa ué o mazunda ni mazunda a athu áfu kiá. O kibatulu 6 ni 7 kia-nda tu tangela kiebhi kiki ki tena o kubhita.