1, 2. (a) Wetin go mek gift impɔtant to yu? (b) Wetin mek di day we Jizɔs day fɔ wi na di bɛst gift we Gɔd dɔn gi wi?

WETIN na di bɛst gift we dɛn dɔn ɛva gi yu? Fɔ lɛ gift impɔtant to pɔsin, i nɔ min se di gift fɔ dia pasmak. Bɔt we dɛn gi yu di gift di tɛm we yu rili nid am, dat go mek yu gladi pasmak.

² Pan ɔl di gift dɛn we Gɔd dɔn gi wi, wan gift de we wi nid pas ɛni ɔda tin. Na di bɛst gift we Gɔd dɔn gi to mɔtalman. Insay dis chapta, wi go lan se Jiova bin sɛn in Pikin Jizɔs Krays so dat wi go gɛt layf we go de sote go. (Rid Matyu 20:​28.) Jiova bin sho se i rili lɛk wi bay we i sɛn Jizɔs na dis wɔl fɔ kam day fɔ wi.

3. Wetin mek mɔtalman de day?

³ Jiova sɛn in Pikin fɔ kam day fɔ wi, so dat i go pul wi pan sin ɛn day. (Lɛta Fɔ Ɛfisɔs 1:​7, NW) Fɔ ɔndastand wetin mek wi rili nid Jizɔs fɔ kam day fɔ wi, wi nid fɔ no wetin bin dɔn apin na di gadin we bin de na Idɛn. Wi fɔs mama ɛn papa we na Adam ɛn Iv, bin du wetin Gɔd tɛl dɛn nɔ fɔ du. Bikɔs dɛn nɔ bin obe Gɔd, dɛn bin day. Wisɛf de day bikɔs na dɛn bɔn wi.—Luk Ɛndnot 9 na pej 210.

4. Udat na bin Adam? Wetin i bin gɛt?

 ⁴ We Gɔd bin mek di fɔs man Adam, i gi am sɔntin we rili valyu. I bin gi am pafɛkt layf. I bin gɛt pafɛkt maynd ɛn pafɛkt bɔdi. I nɔ bin fɔ ɛva sik, ol, ɛn day. Bikɔs na Jiova mek Adam, I bin tan lɛk papa to am. (Lyuk 3:​38) Jiova bin de tɔk to am ɔltɛm. Gɔd bin ɛksplen klia wan to Adam wetin i bin want am fɔ du, ɛn i gi am wok we i bin de ɛnjɔy fɔ du.—Jɛnɛsis 1:​28-30; 2:​16, 17.

5. Wetin i min we di Baybul se Gɔd bin mek Adam lɛk insɛf?

⁵ Gɔd bin mek Adam “lɛkɛ insɛf.” (Jɛnɛsis 1:​27) Jiova bin gi am kwaliti dɛn we i gɛt, lɛk lɔv, sɛns, pawa, ɛn fɔ du tin tret. Gɔd bin alaw Adam fɔ disayd fɔ insɛf wetin i want fɔ du. Adam nɔto bin rɔbɔt. Gɔd bin mek am so dat i go ebul fɔ disayd fɔ du wetin rayt ɔ wetin rɔng. If Adam bin disayd fɔ obe Gɔd, i bin fɔ de na Paradays sote go.

6. We Adam nɔ bin obe Gɔd, wetin i bin lɔs? Aw dat afɛkt wi?

⁶ Adam bin day bikɔs i nɔ bin obe Gɔd. I bin lɔs in tayt padi biznɛs wit Jiova, in pafɛkt layf, ɛn Paradays. (Jɛnɛsis 3:​17-19) Adam ɛn Iv bin disayd nɔ fɔ obe Gɔd, so op nɔ bin de fɔ dɛn. Wetin Adam bin du mek “sin kam na [di] wɔl ɛn sin mek day kam pan mɔtalman. So, bikɔs ɔlman dɔn sin, day de mit ɔlman.” (Lɛta Fɔ Rom 5:​12) We Adam bin sin, i sɛl wi ɛn in as slev to sin ɛn day. (Lɛta Fɔ Rom 7:​14) Ɛni op de fɔ wi? Yɛs, op de.

7, 8. Wetin na di tu tin dɛn we Jizɔs in day du fɔ wi?

⁷ Na tu tin Jizɔs in day du fɔ wi. Fɔs, i bay mɔtalman bak. Sɛkɔn, i pe fɔ Adam in sin.

 ⁸ No mɔtalman nɔ go ebul pe fɔ wetin Adam bin lɔs we i sin ɛn we i mek wi de day. Bɔt Jiova bin mek we fɔ fri wi frɔm sin ɛn day. Lɛ wi si wetin mek Jizɔs kam day fɔ wi ɛn aw dat go bɛnifit wi.

9. Udat go ebul pe fɔ Adam in sin?

⁹ No mɔtalman nɔ go ebul pe fɔ di pafɛkt layf we Adam bin lɔs. Wetin mek? Na bikɔs wi ɔl nɔ pafɛkt. (Sam 49:​7, 8) Na pafɛkt pɔsin go ebul pe fɔ Adam in sin. Di pɔsin in layf fɔ ikwal to di layf we Adam bin gɛt bifo i sin. (Fɔs Lɛta To Timoti 2:​6) I fɔ gɛt di sem valyu lɛk di layf we Adam bin lɔs.

10. Wetin Jiova bin du fɔ bay mɔtalman bak?

¹⁰ Wetin Jiova bin du fɔ bay mɔtalman bak? Jiova bin sɛn in wangren Pikin we i lɛk pasmak na di wɔl. Dis Pikin we na Jizɔs, na in fɔs Jiova bin mek. (Jɔn In Fɔs Lɛta 4:​9, 10) Jizɔs bin rɛdi fɔ lɛf in Papa ɛn di say we i bin de na ɛvin. (Lɛta Fɔ Filipay 2:​7) Jiova bin sɛn Jizɔs na dis wɔl frɔm ɛvin, ɛn dɛn bin bɔn Jizɔs as pafɛkt mɔtalman, we nɔ gɛt wan sin.—Lyuk 1:​35.

11. Aw wan pɔsin go pe fɔ ɔlman in sin?

¹¹ Di fɔs man, Adam, bin lɔs di pafɛkt layf we ɔlman bin fɔ gɛt, we i nɔ bin obe Jiova. Yu tink se ɛni ɔda pɔsin go ebul pul day kɔmɔt pan Adam in pikin dɛn? Yɛs. (Rid Lɛta Fɔ Rom 5:​19.) Jizɔs, we nɔ ɛva sin, bin gi in pafɛkt layf fɔ pe fɔ Adam in sin. (Fɔs Lɛta Fɔ Kɔrint 15:​45) Na in pafɛkt layf Jiova  go yuz fɔ pul day kɔmɔt pan Adam in pikin dɛn.—Fɔs Lɛta Fɔ Kɔrint 15:​21, 22.

12. Wetin mek Jizɔs bin sɔfa?

¹² Di Baybul sho aw Jizɔs bin sɔfa bifo i day. Dɛn bin bit am, nel am pan stik, ɛn i bin bia di pen te i day. (Jɔn 19:​1, 16-18, 30) Wetin mek Jizɔs bin sɔfa da kayn we de? Na bikɔs Setan bin dɔn tɔk se nɔbɔdi nɔ go kɔntinyu fɔ de biɛn Jiova if i de rili sɔfa. Jizɔs bin pruv se pafɛkt mɔtalman go kɔntinyu fɔ de biɛn Jiova ilɛk i sɔfa bad bad wan. Imajin aw Jiova bin gladi fɔ Jizɔs!—Prɔvabs 27:​11; luk Ɛndnot 15 na pej 213.

13. Aw Jiova pul wi pan sin ɛn day?

¹³ Aw Jiova pul wi pan sin ɛn day? Jizɔs bin gi in Papa di pafɛkt layf we i bin sakrifays fɔ pe fɔ wi sin dɛn. Insay di de we mek 14 na di Ju pipul dɛn mɔnt we dɛn kɔl Naysan, insay di ia 33, Jiova bin alaw Jizɔs in ɛnimi dɛn fɔ kil am. (Di Ibru Pipul Dɛn 10:​10) Afta tri dez we Jizɔs day, Jiova gi am layf bak; bɔt na spirit layf Jiova bin gi am. Leta, we Jizɔs go to in Papa na ɛvin, i gi Jiova in pafɛkt layf we i bin sakrifays fɔ pe fɔ wi sin dɛn. (Di Ibru Pipul Dɛn 9:​24) Naw we Jizɔs dɔn sakrifays in layf, i dɔn pul wi kɔmɔt pan sin ɛn day.—Rid Lɛta Fɔ Rom 3:​23, 24.

14, 15. Wetin wi fɔ du fɔ mek Gɔd fɔgiv wi sin dɛn?

¹⁴ Wi dɔn bɛnifit frɔm di bɛst gift we Gɔd dɔn  gi wi. Lɛ wi si aw i de bɛnifit wi naw ɛn aw i go bɛnifit wi tumara bambay.

¹⁵ Gɔd de fɔgiv wi sin dɛn. I nɔ izi fɔ du wetin rayt ɔltɛm. Wi kin mek mistek, ɛn sɔntɛnde wi kin se ɔ du di rɔng tin. (Lɛta Fɔ Kɔlɔse 1:​13, 14) Wetin wi fɔ du fɔ mek Gɔd go fɔgiv wi? Wi fɔ rili fil sɔri fɔ di bad tin dɛn we wi de du ɛn put wisɛf dɔŋ fɔ beg Jiova fɔ mek i go fɔgiv wi. Wi fɔ biliv se Gɔd dɔn fɔgiv wi sin dɛn.—Jɔn In Fɔs Lɛta 1:​8, 9.

16. Wetin wi fɔ du fɔ gɛt klin kɔnshɛns?

¹⁶ Wi go gɛt klin kɔnshɛns. Wi kin fil bad we wi kɔnshɛns tɛl wi se wi dɔn du sɔntin we rɔng. Sɔntɛm wi kin ivin fil se wi nɔ gɛt wan valyu ɛn op igen. Bɔt wi nɔ fɔ giv-ɔp. If wi beg Jiova fɔ mek i fɔgiv wi, wi shɔ se i go lisin to wi ɛn fɔgiv wi. (Di Ibru Pipul Dɛn 9:​13, 14) Jiova want mek wi tɔk to am bɔt wi prɔblɛm dɛn ɛn usay wi nid ɛp. (Di Ibru Pipul Dɛn 4:​14-16) Dat go mek wi gɛt pis wit Gɔd.

17. Us blɛsin dɛn wi go ɛnjɔy bikɔs Jizɔs day fɔ wi?

¹⁷ Wi gɛt op fɔ gɛt layf we go de sote go. Di Baybul se: “Day na sin in pe, bɔt layf we go de sote go, nain Gɔd gi wi fri. Wi gɛt di layf we go de sote go bikɔs wi gɛt wanwɔd wit Jizɔs Krays we na wi Masta.” (Lɛta Fɔ Rom 6:​23) Bikɔs Jizɔs bin day fɔ wi, wi go gɛt layf we go de sote go wit wɛlbɔdi. (Rɛvɛleshɔn 21:​3, 4) Bɔt wetin wi fɔ du fɔ gɛt dɛn blɛsin dɛn ya?

18. Aw wi no se Jiova lɛk wi?

¹⁸ Tink bɔt aw yu kin fil we pɔsin gi yu fayn gift. Di day we Jizɔs day na di gift we valyu pas ɔl, ɛn wi fɔ sho Jiova se wi rili gladi fɔ dat. Insay Jɔn 3:​16 di Baybul se: “Gɔd so lɛk mɔtalman dat i gi in wangren Pikin we i lɛk.” Jiova rili lɛk wi na dat mek i bin gi wi in Pikin we i lɛk pasmak, we na Jizɔs. Ɛn wi no se Jizɔs sɛf lɛk wi, bikɔs i bin rɛdi fɔ kam day fɔ wi. (Jɔn 15:​13) Dis day we Jizɔs kam day fɔ wi fɔ mek wi biliv se Jiova ɛn Jizɔs rili lɛk wi.—Lɛta Fɔ Galeshya 2:​20.

19, 20. (a) Aw yu go bi Jiova in padi? (b) Aw yu go sho se yu gɛt fet pan di day we Jizɔs day?

¹⁹ Naw we yu dɔn lan se Gɔd rili lɛk mɔtalman, aw yu go bi in padi? I nɔ izi fɔ lɛk pɔsin we yu nɔ no. Jɔn 17:​3 se wi go ebul fɔ no Jiova. We yu du dis, dat go mek yu lɛk am mɔ, yu go want fɔ du wetin i want, ɛn yu go bi in padi. So kɔntinyu fɔ lan bɔt Jiova bay we yu de stɔdi di Baybul.—Jɔn In Fɔs Lɛta 5:​3.

²⁰ Sho se yu gɛt fet pan di day we Jizɔs day. Di Baybul se: “Ɛnibɔdi we biliv pan Gɔd in Pikin go gɛt layf we go de sote go.” (Jɔn 3:​36) Wetin i min fɔ biliv Gɔd in Pikin? I min se wi fɔ du wetin Jizɔs bin tɛl wi fɔ du. (Jɔn 13:​15) Wi nɔ fɔ jɔs se wi biliv Jizɔs. Wi fɔ du sɔntin fɔ sho se wi gɛt fet pan di day we Jizɔs day. Insay Jems 2:​26 wi rid se: “Pɔsin  we se in biliv Gɔd ɛn i nɔ de du dɛn tin we sho se i biliv am, nɔ biliv Gɔd at ɔl.”

21, 22. (a) Wetin mek wi fɔ go di Mɛmorial ɛni ia? (b) Wetin wi go lan na Chapta 6 ɛn 7?

²¹ Atɛnd di Mɛmorial. Di ivintɛm bifo Jizɔs day, i bin tich wi se wi fɔ de mɛmba in day. Wi kin du dis ɛni ia, ɛn dɛn kɔl am di Mɛmorial ɔ “di Ivintɛm It fɔ Mɛmba di Masta.” (Fɔs Lɛta Fɔ Kɔrint 11:​20, NW; Matyu 26:​26-28) Jizɔs want mek wi mɛmba se i bin gi in pafɛkt layf fɔ pul wi pan sin ɛn day. I se: “Una fɔ de it am fɔ mɛmba mi.” (Rid Lyuk 22:​19.) We yu atɛnd di Mɛmorial, yu de sho se yu mɛmba Jizɔs in day ɛn di kayn we aw Jiova ɛn Jizɔs lɛk wi.—Luk Ɛndnot 16 na pej 214.

²² Di day we Jizɔs day fɔ wi na di gift we pas ɔl di gift dɛn we wi dɔn ɛva gɛt. (Sɛkɛn Lɛta Fɔ Kɔrint 9:​14, 15) Dis fayn gift we Jiova gi wi de ivin bɛnifit di wan dɛn we dɔn day. Na dat wi go lan bɔt na Chapta 6 ɛn 7.