1, 2. (a) Yisinke ayi ninkisa sininke vana ku pe si kare nomulyo koge? (b) Morwasinke sizoweseso sa karera sigava somulyo po?

SININKE musinke somulyo va ku pa? Aso kapi sa hepa kukara ndiro yipo si kare nomulyo, nye nsene sa ku hafesere ntani wa si hepere, aso mulyo.

² Kwanayinye eyi ga tu pa Karunga, pwa kara simwe esi twa hepa unene. Aso sigava somulyo po ga gava Karunga kovantu. Megaununo eli ngatu lironga asi Jehova kwa tumine Munwendi Jesus Kristusa a ya tu fire, yipo ngatu ka paruke narunye. (Resa Mateusa 20:28.) Pokutuma Jesus pevhu ngosizoweseso, Jehova kwa likida asi ga tu hara unene.

3. Morwasinke atu fire?

³ Jehova kwa geve sizoweseso mokuzowora vantu kononzo nokonomfa. (Vaefeso 1:7) Mokukwata egano eyi twa hepera sizoweseso, twa hepa kudiva eyi ya horokere nare mosipata saEdeni. Apa va zonene Adamu naEva, awo kwa fire. Nose kufa morwa twa pinga nzo zaAdamu naEva.—Tara Mauzera 9.

4. Eparu musinke ga kere nalyo Adamu?

 ⁴ Apa Jehova ga sitire Adamu, age kwa mu pere eparu lyokusikilira mo. Adamu kwa kere nonondunge ntani norutu rokusikilira mo. Age ngano kapi ga verere ndi a kurupe ndi a fe. Morwa Jehova yige ga sitire Adamu, Karunga kwa kere ngwendi oguhwe. (Rukasa 3:38) Jehova nga uyunga nage nkenye apa. Karunga ga fatwilire Adamu eyi ga here a rugane ntani ga mu pere yirugana eyi ga haferere.—Genesis 1:28-30; 2:16, 17.

5. Yisinke ayi tanta apa Bibeli azi uyunga asi Adamu kwa mu ungire “a fane Karunga”?

⁵ Adamu kwa mu ungire “a fane Karunga.” (Genesis 1:27) Eyi kutanta asi Jehova kwa pere Adamu yikara ngwendi yendi, eharo nounongo nouhungami ntani nononkondo. Kwa pere hena Adamu emanguruko a ture po matokoro gamwene. Adamu kapi ga kere ehina. Age ga vhulire kutokora kurugana uwa ndi udona. Ngano ga horowere kukarera Karunga ngano ga parukire narunye moParadisa.

6. Apa Adamu ga dilire kulimburukwa, yisinke ga zumbanesere?

⁶ Apa Adamu ga dilire kulimburukwa, ga zumbanesere ukaume wendi naJehova neparu lyendi lyokusikilira mo ntani Paradisa. (Genesis 3:17-19) Adamu naEva kapi ngava paruka hena morwa kwa nyokere kulimburukwa mowina.

7, 8. Nzo zaAdamu, ngapi za tu kundama?

⁷ Adamu kwa retere nzo mouzuni, “ano nzo zendi kwa reta mo nomfa. Nomfa yiyo da lihanena movantu mudima, morwa vantu navenye kwa  zona.” (Varoma 5:12) Apa ga zonene Adamu age kwa ‘lirandesere’ mwene ntani nose moupika wononzo nonomfa. (Varoma 7:14) Nye nampili ngoso, twa kara nehuguvaro.

⁸ Vantu kapi tava vhuru kulizowora vene moupika wononzo nonomfa edi ga retesa po Adamu. Nye Jehova kwa tulire po ewapaiko a tu zowore. Ngesi tatu ka lironga kuhamena sizoweseso nomu natu gwanena mo uwa.

9. Yisinke ya hepere po mokufuta sizoweseso?

⁹ Morwa kapi twa sikilira mo, ose nokuvhura si kugava sizoweseso tu gwane eparu lyokusikilira mo eli ga zumbanesere Adamu. (Episarome 49:7, 8) Mokufuta sizoweseso, pwa hepere muntu gokusikilira mo ngwendi Adamu.

10. Ngapi Jehova ga geve sizoweseso?

¹⁰ Ngapi Jehova ga geve sizoweseso? Age kwa tumine pevhu Jesus, Munwendi ogu ga hara unene, sisitwa sendi sokuhova. (1 Johanesa 4:9, 10) Jesus ga tambwire kusiga oGuhwe nevega lyendi meguru. (Vafilipi 2:7) Jehova yipo ga tumine Jesus pevhu, va ya mu hampuruke ngomuntu gokusikilira mo ga hana nzo.—Rukasa 1:35.

11. Kuvhura muntu gumwe a zowore vantu navenye ndi?

¹¹ Apa ga zonene Adamu, age kwa zumbanesere eparu lyokusikilira mo lyovantu navenye. Nye kuvhura muntu gumwe a zowore vantu navenye konomfa ndi? Yimo. (Resa Varoma 5:19.) Jesus, ogu ga dilire kuzona, kwa geve eparu lyendi lyokusikilira  mo ngosizoweseso. (1 Vakolinte 15:45) Eparu lyendi lyokusikilira mo kuvhura kuzowora vantu navenye konomfa.—1 Vakolinte 15:21, 22.

12. Morwasinke ya kererere hepero asi Jesus a hepe unene?

¹² Bibeli kufaturura omu Jesus ga hepere nokufa nomfa donondona. Age kwa mu sopwere dogoro ta gerauka, tava mu pampara nonomboha, kwa hepere siruwo sosire komeho a ka fe. (Johanesa 19:1, 16-18, 30) Morwasinke ya kererere hepero asi Jesus a hepe unene? Morwa Satana kwa tente asi kwato muntu gokulimburukwa Jehova momaudigu gomanene. Nye Jesus ga yi likidire asi muntu gokusikilira mo kuvhura kulimburukwa Karunga nampili va mu hepeke unene. Ulimburukwi waJesus wa hafesere Jehova.—Yisewe 27:11; tara Mauzera 15.

13. Ngapi va si geve sizoweseso?

¹³ Ngapi va si geve sizoweseso? Jehova kwa pulisilire Munwendi va mu dipage momvhura 33 mezuva 14 mokwedi koVajuda Nisani. (Vahebeli 10:10) Apa pwa pitire mazuva gatatu, Jehova ga pindwire Jesus koufe, kapisi norutu ropanyama hena, nye norutu ropampepo. Konyima, apa ga ya tengwire koGuhwe meguru, Jesus yipo ga ka geve nzambo zeparu lyendi lyokusikilira mo kwaJehova ngosizoweseso. (Vahebeli 9:24) Jehova ga tambwire sizoweseso. Ose ngesi kuvhura kumanguruka kononzo nokonomfa.—Resa Varoma 3:23, 24.

14, 15. Yisinke natu rugana yipo va tu gusire po nonzo detu?

¹⁴ Ose kuna kugwanena mo uwa mosizoweseso  nampili ngesi. Tu konakone mauwa natu gwanene mo ngesi naga ngatu gwana komeho.

¹⁵ Kutugusira po nonzo detu. Ayo udigu kurugana yininke yoyiwa nkenye apa. Ose kuzona, pamwe kweyi atu uyunga neyi atu rugana. (Vakorosi 1:13, 14) Yisinke natu rugana yipo va tu gusire po? Twa hepa kulivera kweyi tuna rugana nokuhundira Jehova a tu gusire po. Makura kuvhura tu kare nehuguvaro asi ngava tu gusira po nonzo detu.—1 Johanesa 1:8, 9.

16. Yisinke natu rugana yipo tu kare nezwi lyewa lyomomutjima?

¹⁶ Kukara nezwi lyewa lyomomutjima. Nsene ezwi lyetu lyomomutjima li tu tantera asi tuna rugana epuko, ose kulizuvha unzoni ntani pamwe kulitara asi kwato mulyo. Nye nsene tu likwambera kwaJehova a tu gusire po, age nga tu zuvha nokutugusira po. (Vahebeli 9:13, 14) Jehova kuna hara tu mu tantere maudigu nomaupirankondo getu nagenye. (Vahebeli 4:14-16) Makura Karunga nga tu pa mbili zendi.

17. Yisinke ngatu ka gwana morwa Jesus ga tu fira?

¹⁷ Ehuguvaro lyomwenyo gwanarunye. “Mfeto zononzo nomfa, nye uhwi wonkenda waKarunga yiwo mwenyo gwanarunye mwaJesus Kristusa, Hompa gwetu.” (Varoma 6:23) Morwa Jesus ga tu fira, ngatu ka gwana mwenyo gwanarunye noukanguki wouwa. (Ehororo 21:3, 4) Nye yisinke natu rugana yipo tu ka gwane mauwa ogo?

18. Ngapi twa yi diva asi Jehova kwa tu hara?

¹⁸ Natuvenye kuhafa apa gumwe a tu pe sininke sosiwa. Twa hepa kupandura Jehova kosigava sosiwa po sosizoweseso. Johanesa 3:16 kutanta asi: “Karunga kwa here uzuni unene-nene, yiyo ga u pere Munwendi gelike a huru.” Jehova kwa tu hara yiyo ga tu pa Munwendi ogu ga hara unene. Ntani Jesus nage ga tu hara morwa ga tu fililire. (Johanesa 15:13) Pokugava sizoweseso, Jehova naJesus kwa likida asi va ku hara unene.—Vagarata 2:20.

19, 20. (a) Ngapi no kara kaume kaJehova? (b) Ngapi no yi likida asi wa tambura sizoweseso saJesus?

¹⁹ Ngesi ono lirongo asi Karunga kwa ku hara unene, yisinke no rugana yipo a kare kaume koge? Ayo kapisi ureru kuhara muntu ogu wa dira kudiva. Johanesa 17:3 kutanta asi ose kuvhura tu dive Jehova. Ngomu ono kudiva Jehova, ngo mu hara unene nokuhara kumuhafesa, makura ngo kara kaume kendi. Twikira kulironga kuhamena Jehova pokulironga Bibeli.—1 Johanesa 5:3.

²⁰ Tambura sizoweseso saJesus. Bibeli kutanta asi: “Ogu a pura Muna, kukara nomwenyo gwanarunye.” (Johanesa 3:36) Yisinke ayi tanta kupura Muna? Ayo kutanta asi kurugana eyi ga rongere Jesus. (Johanesa 13:15) Kapi ya gwanena po kutanta tupu asi twa pura mwaJesus, nye twa hepa kutambura sizoweseso ntani nokunkondopeka epuro lyetu. Jakopo 2:26 kutanta asi epuro “nsene li pira yirugana lya fa.”

21, 22. (a) Morwasinke natu karera poMurarero gwaHompa nkenye mvhura? (b) Yisinke ngali ka faturura Egaununo 6 neli 7?

 ²¹ Kara poMurarero gwaHompa. Komeho a ka fe Jesus, kwa tu tanterere tu diworoke nomfa dendi. Ose kudiworoka nomfa dendi nkenye mvhura, silika oso kusitumbura asi: ‘Murarero gwaHompa.’ (1 Vakolinte 11:20; Mateusa 26:26-28) Jesus kuna tu harere tu diworoke asi ga geve eparu lyendi lyokusikilira mo ngosizoweseso. Age kwa tente asi: “Omu yi rugane tomu diworokere nge po.” (Resa Rukasa 22:19.) Nsene o kara poMurarero gwaHompa to likida asi kuna kudiworoka sizoweseso ntani eharo lyenene eli ga tu likida Jehova naJesus.—Tara Mauzera 16.

²² Sizoweseso kuna kara sigava sosiwa po esi twa gwana. (2 Vakolinte 9:14, 15) Sizoweseso ngasi retera mauwa hena kovantu wovanzi ava va fa nare. Egaununo 6 neli 7 ngaga ka yi faturura.