1, 2. (a) Ino nciinshi ceenga camupa kulumba abuumbi pacipo ncomwapekwa? (b) Ino nceebonshi nceenga twaambila ayi cilubula ncecipo cinene abuumbi kuswa kuli Lesa?

INO ncipo nshi cibotu abuumbi ncomwakatambulawo? Cipo taceelete kuba ciduulite kwaamba ayi mubone ayi cilayandika kulindimwe. Tulalumba abuumbi na cipo ncetwatambula ncintu citusangalasha nabi ncetwalinga kubulite.

² Pashipo shoonse Lesa nshaakatupa, pali cipo comwi ncetuyandika kwiinda cimwi cili coonse. Ncipo cinene abuumbi Lesa ncaakapa bantu. Mumutwi uyu, tutokwiiya ayi Yehova wakatuma Mwanaakwe, Yesu Klistu, kwaamba ayi tukacane buumi butamaani. (Amubelenge Mateyo 20:28.) Yehova wakatondesha ayi alitusuni abuumbi kwiinda mukutuma Yesu pacishi ca panshi mbuli cilubula.

3. Ino nceebonshi bantu balafwa?

³ Cilubula njenshila Yehova njaasebensesha kwaangulula bantu kuswa kububiibi alufu. (Bene Efeso 1:7) Kwaamba ayi tunyumfwishishe kuyandika kwa cilubula, tulyeelete kushiba shakacitika myaaka iinji yainda mumuunda wa Edeni. Bashali besu bakutaanguna Adamu aEfa, bakabisha. Aboobo bakafwa. Aswebo tulafwa mukwiinga twakapyana bubiibi kuswa kuli mbabo.—Amubone Makani Aamwi 9.

4. Ino muntu wakutaanguna wakalinga ani, alimwi nciinshi ncaakapekwa?

 ⁴ Yehova ndyaakalenga muntu wakutaanguna, Adamu, wakamupa cintu cimwi cibotu abuumbi. Wakamupa buumi busalalite. Wakalinga kucite miyeeyo isalalite amubili usalalite. Taakalinga kweelete kuciswa, kucembela, nabi kufwa. Yehova wakalinga mbuli mushali musankwa wakwe Adamu mukwiinga ngowakamulenga. (Luka 3:38) Yehova wakalinga kubandika anguwe lyoonse. Wakamusansulwita shoonse nshaakalinga kweelete kucita akumupa ncito isangalasha.—Matalikilo 1:28-30; 2:16, 17.

5. Ino Baibo ilasansulula nshi na yaamba ayi Adamu wakalengwa “mucikoshanyo cakwe Lesa”?

⁵ Adamu wakalengwa “mucikoshanyo cakwe Lesa.” (Matalikilo 1:27) Nkokwaamba ayi Yehova wakamupa mibo yakwe mbuli, lusuno, busongo, bululami, ankusu. Wakamupa ankusu shakulisalila. Adamu taakalinga anga ni mashini. Lesa wakamulenga ankusu shakusala pakati kacibotu acibiibi. Nakwiinga Adamu wakasala kunyumfwila Lesa, naakekala buumi butamaani muPaladaiso.

6. Ino Adamu wakasowa nshi ceebo cakutanyumfwila Lesa? Ino ici cilatukuma buyani?

⁶ Mukwiinga taakwe kunyumfwila Lesa wakoomboloshekwa ayi alaakufwa. Wakasowa bushicibusa bulibetele a Yehova, buumi busalalite, abuumi bwamu Paladaiso. (Matalikilo 3:17-19) Adamu a Efa bakasala kutanyumfwila Lesa, aboobo bakafwa kwakubula bulindilishi. Mukwiinga Adamu taakwe kunyumfwila, “Bubi bwakesa mucishi capanshi ceebo ca muntu womwi alimwi bubi ubo bwakaleta lufu. Mbweeke ubo lufu lwakashika kubantu boonse mukwiinga boonse bakabisha.” (Bene Loma 5:12) Adamu ndyaakabisha, “wakalyulisha”  mwiine aswebo soonse, kubusha bwa bubi alufu. (Bene Loma 7:14) Sa ici cilaamba ayi tatucitewo bulindilishi buli boonse? Sobwe, tulicite.

7, 8. Ino cilubula nciinshi?

⁷ Ino cilubula nciinshi? Cakutaanguna inga twaamba ayi cilubula ncifuta mulandu na maali alipilwa kwaamba ayi muntu akushikwe mujele na kuboosha cintu cimwi cakasoweka. Cabili, cilubula ngamalipilo alipilwa akwene muulo wacintu cakasoweka na cakanyonyoolwa.

⁸ Taakuwo muntu wakalinga kucikonsha kulipila nshaakanyonyoola Adamu ndyaakabisha akuleta bubi alufu. Nacibi boobo Yehova wakabamba nshila yakutwaangulula kuswa ku bubi alufu. Atwiiye cilubula mbocisebensa ampindu njetucana.

9. Ino nciinshi cakalinga kuyandika kwaamba ayi cilubula cilipilwe?

⁹ Taaku muntu nabi womwi wakalinga kucikonsha kulipila buumi busalalite Adamu mbwaakasowa. Ino nceebonshi? Mukwiinga soonse tatusalalite. (Kulumbaisha 49:7, 8) Cilubula cakalinga kuyandika, mbuumi bwa muntu umwi usalalite. Nceceeco nceciitwa ayi “cilubula ceelene.” (1 Timoti 2:6) Cilubula cakalinga kweelete kuba camweelo weelene abuumi Adamu mbwaakasowa.

10. Ino Yehova wakacita buyani kwaamba ayi atupe cilubula?

¹⁰ Ino Yehova wakacita buyani kwaamba ayi atupe cilubula? Yehova wakatuma Mwanaakwe ngwaasuni abuumbi pacishi. Mwaana uyo wakalinga Yesu, cilengwa cakutaanguna. (1 Joni 4:9, 10) Yesu wakasumina kuswa kwiculu akushiya Baishi. (Bene Filipi 2:7) Yehova wakalonsha buumi bwakwe Yesu kuswa kwiculu kusa pacishi ca panshi, aboobo Yesu wakesa mukushalwa mbuli muntu usalalite, utacite cibiibi.—Luka 1:35.

11. Ino muntu womwi wakalinga kucikonsha buyani kuba cilubula ca bantu boonse?

 ¹¹ Adamu musankwa wakutaanguna, ndyaatakwe kunyumfwila Yehova, wakasowa buumi busalalite bwa bantu boonse. Sa kwakalinga muntu umwi wakalinga kucikonsha kukusha lufu lwakesa pa baana bakwe Adamu? Ee. (Amubelenge Bene Loma 5:19.) Yesu, uyo utana kucitawo cibiibi, wakapa buumi bwakwe busalalite mbuli cilubula. (1 Bene Kolinto 15:45) Buumi bwakwe busalalite bwakalinga kucite nkusu shakukusha lufu Adamu ndwaakaleta pa bana bakwe boonse.—1 Bene Kolinto 15:21, 22.

12. Ino nceebonshi Yesu ncaakeendila mumapensho aanji?

¹² Baibo ilatusansulwita Yesu mbwaakapenga kaatana kufwa. Wakakwipwa, kupopwa pacisamu cakupenshesha, akufwa lufu lucisa abuumbi. (Joni 19:1, 16-18, 30) Ino nceebonshi Yesu ncaakeendila mumapensho oonse aya? Mukwiinga Satana wakaamba ayi taaku muntu weenga weendilisha kushomeka kuli Lesa na wacana mapensho. Yesu wakatondesha kwaamba ayi muntu usalalite inga wacikonsha kushomeka kuli Lesa nabi wacana mapensho anene buyani. Amuyeeyebo kushomeka kwakwe Yesu mbokwakasangalasha Yehova!—Tusimpi 27:11; amubone Makani Aamwi 15.

13. Ino cilubula cakalipilwa buyani?

¹³ Ino cilubula cakalipilwa buyani? Yesu wakapa Baishi mpindu ya buumi bwakwe. Mumwaaka wa 33 pabushiku bwa Nisani 14 kweelana akalenda ya baJuda, Yehova wakasuminisha ayi balwani bakwe Yesu bamucaaye. (Bene Ebulu 10:10) Ndipakeenda nshiku shotatwe, Yehova wakamubusha, kuteshi amubili wa buntu sombi amubili wamushimu. Mukuya kwaciindi, Yesu wakaboolela kwiculu kuli Baishi, akupa mpindu ya buumi bwakwe busalalite mbuli cilubula. (Bene Ebulu 9:24) Pacecino  ciindi tulicite coolwe cakwaangululwa kuswa kububi alufu, mukwiinga cilubula cakalipilwa.—Amubelenge Bene Loma 3:23, 24.

14, 15. Ino inga twacita buyani kwaamba ayi tulekelelwe shibiibi shesu?

¹⁴ Twakatalika kale kucana mpindu kuswa kucilubula. Atwiiye mpindu njetucana pacecino ciindi anjeshi tukacane kunembo.

¹⁵ Kulekelelwa shibiibi shesu. Nciyumu kucita shintu shiluleme lyoonse. Tulacita shilubo, alimwi cimwi ciindi tulaamba akucita shintu shitabete kabotu. (Bene Kolose 1:13, 14) Ino inga twacita buyani kwaamba ayi tulekelelwe shibiibi shesu? Tulyeelete kusumina na twalubisha akusenga cakuliceesha kuli Yehova kwaamba ayi atulekelele. Lyalo inga twashooma ayi shibiibi shesu shalekelelwa.—1 Joni 1:8, 9.

16. Ino inga twacita buyani kwaamba ayi tube a njeelacaamba ibotu?

¹⁶ Inga twaba a njeelacaamba isalalite. Na njeelacaamba yesu yatulwiita ayi twaciita cilubo, tulalinyumfwa kuba amulandu, mpashi cimwi ciindi akulinyumfwa ayi taakuwo mbotubete. Sombi tatweelete kuboolela mwisule. Na twasenga Yehova ayi atulekelele, inga twashooma ayi atootukutika akutulekelela. (Bene Ebulu 9:13, 14) Yehova alisuni kwaamba ayi tumulwiite mapensho esu ali woonse ashilubo shesu. (Bene Ebulu 4:14-16) Kucita boobo inga kwatucafwa kuba muluumuno a Lesa.

17. Ino nshoolwe nshi nsheenga twacaana ceebo ca lufu lwakwe Yesu?

¹⁷ Tulicite bulindilishi bwakuba abuumi butamaani. “Ceebo cilambu ca bubi ndufu, sombi cipo cakwe Lesa mbuumi butamaani kwiinda muli Klistu Yesu Mwaami wesu.” (Bene Loma 6:23) Mukwiinga Yesu wakatufwita,  inga twaba abuumi butamaani akusangalala abuumi busalalite. (Ciyubululo 21:3, 4) Ono ino nciinshi ncotweelete kucita kwaamba ayi tukatambule shoolwe ishi?

18. Ino tulishi buyani ayi Yehova alitusuni?

¹⁸ Amuyeeye mbomulinyumfwa na muntu umwi wamupa cipo cibotu. Cilubula ncipo cibotu abuumbi, aboobo tulyeelete kutondesha kulumba kunene kuli Yehova. Joni 3:16 ilatulwiita ayi “Lesa wakasunisha bantu boonse ba mucishi ca panshi abuumbi. Aboobo wakatuma Mwanaakwe wakashalwabo eenka kwaamba ayi uyo woonse umushoma ataloobi, sombi abe abuumi butamaani.” Ncakwiila, Yehova alitusuni abuumbi, ncaakatupeta Mwanaakwe ngwaasuni abuumbi, Yesu. Alimwi tulicishi kwaamba ayi Yesu alakwe alitusuni, mukwiinga wakasumina kutufwita. (Joni 15:13) Cipo ca cilubula cilyeelete kumucafwa kushoma cakutatoonsha kwaamba ayi Yehova a Yesu balimusuni.—Bene Galatiya 2:20.

19, 20. (a) Ino inga mwacita buyani kwaamba ayi mube shicibusa wakwe Lesa? (b) Ino inga mwatondesha buyani ayi mulashoma mulambu wacilubula cakwe Yesu?

¹⁹ Ino inga mwacita buyani kwaamba ayi mube shicibusa wakwe Lesa, pesule lyakwiiya sha lusuno lwakwe? Inga tatukoonshi kusuna muntu ngotuteshiwo. Joni 17:3 ilaamba ayi inga twamushiba Yehova. Kushiba Yehova kulaakumucafwa kumusuna, kucita shimusangalasha, akuba shicibusa wakwe. Aboobo amutolelele kwiiya pali Yehova kwiinda mukwiiya Baibo.—1 Joni 5:3.

²⁰ Amushome mulambu wacilubula cakwe Yesu. Baibo ilaamba ayi “uyo woonse ushoma Mwaana, ulicite buumi butamaani.” (Joni 3:36) Ino kushoma Mwaana cilaambanshi? Cilaamba kukonkela Yesu nshaakalinga kwiisha. (Joni 13:15) Inga tatwaambibo ayi tulashoma Yesu mpeeke kwamana, tulyeelete kutondesha lushomo  lwesu kwiinda mukucitawo comwi. Lilembo lyakwe Jemusi 2:26, lilaamba ayi: “Lushomo na talucite micito lulifwite.”

21, 22. (a) Ino nceebonshi tulyeelete kucanika kuCiibalusho ca lufu lwakwe Klistu mwaaka uli woonse? (b) Ino tulaakwiiya nshi mumitwi 6 a 7?

²¹ Amucanike kuCiibalusho ca lufu lwakwe Klistu. Mashiku Yesu kaatana kufwa, wakatwiisha ayi tulyeelete kucita ciibalusho ca lufu lwakwe. Tulacita boobo mwaaka uli woonse, alimwi ici cileetwa ayi Ciibalusho na “Mulalilo wa Mwaami.” (1 Bene Kolinto 11:20; Mateyo 26:26-28) Yesu alisuni ayi tunokwiibaluka ayi wakatupa buumi bwakwe busalalite mbuli cilubula. Wakaamba ayi: “Kamucita ceeci mukunjibaluka.” (Amubelenge Luka 22:19.) Na mwacanika kuCiibalusho, mulatondesha ayi mutokwiibaluka cilubula alusuno lunene Yehova a Yesu ndobacite palindiswe.—Amubone Makani Aamwi 16.

²² Cilubula ncipo cinene abuumbi ncetwakatambula. (2 Bene Kolinto 9:14, 15) Cipo cibotu ici cilaakuleta mpindu akubantu baanji bakafwa kale. Mitwi 6 a 7 ilaakusansulula mbweshi bubuke bukakonsheke.