1, 2. (a) N’nga yotuva inokala yofuneya vinjinji wanyo yakala yatundu wani? (b) Mwasiwa ngwan’ni ingumi ya Yesu yali yotuva yapama iwachele i-yo?

N’NGA chotuva iivi ilukulu yaromilenyo wachela? Yotuva chinofwanela kala ya pereso indendai ira ikale yofuneya. Yotuva inokala yofuneya akala ira inouva-ani imwerumweru, venango yakala yongo yeniyo inofunechechanyo vinjinji. Mo-okaikela nyo munosimba mwasa wa yotuviyo.

² Nlungu utoniva-a yotuva inafuneela i-yo kwaranya yongo iliyothene. Chini? Yohova atomruma mwanee Yesu Kristu vailambo yavathi, ira avelele ingumee wa i-yo. (Muleri Mateu 20:28.) Yen’na chotuva ilukulu iwachele i-yo kumela wa Nlungu mwasiwa inoniva-a hora yokalao dhowa nodhowa. Thitho yotuva yen’na ngu umboni ooni-a ira mwaimbarimbari Yohova unonidhiveliwana.

3. Mwasiwa ngwan’ni ninokwa?

³ Ira nivwecheche mwasa wakwele Yesu, ninofwanela vwechecha vyaireile vyawa mamiliyau manjinji ndulimu mundani mwa Edeni. Makolwi-u oroma Adamu na Eva tatodawa, ngumwasiwa aliwa tatokwa. Ee-no madawo tatomwadheya wa i-yo othene. Mwasiwa ngwenuo, ninokwa. Ira aniombole wu madawo, Yohova atomruma Yesu ira anikwele.—Aefeso 1:7; onani madhu akomoni 9.

4. N’nga ingumi ya Adamu yali a-vi liye a-anadawe?

 ⁴ Adamu apanduchiwile na Yohova angali olongomana. Vyevyo vyali vyodabwi-a. A-anadawe, tutulee na mathuulelwee vyali vyapama. Liye kaabulelenga, ulula, venango wukwa. Yohova ali Babee. (Luka 3:38) Nlungu anoongechave na Adamu thitho anommwandelecha vyongo vyoi liye aire. Adamu atowachela basa lamva-a imwerumweru.—Maromelo 1:28-30; 2:16, 17.

5. Adamu tampanduchidhe “mwiifwanafwani-o ya Nlungu”. Vyevyo vinofuna viongen’ni?

⁵ Adamu apanduchiwile “mwiifwanafwani-o ya Nlungu.” (Maromelo 1:27) Vyevyo vinooni-a ira Yohova atomva-a Adamu makalelo ana liye, ninga dhivelo, zelu, upama nanguru. I-yavo vyevyo, Nlungu atompanducha na makalelo ooda sakula vyoira va vyongo vyapama na vyothakala. Adamu kaali mutu oi angaodile irana yongo a-anathuulele. Liye angakalile Paradaizoni dhowa nodhowa aakale ira atosakula mvwela Nlungu.

6. N’nga yammwireele Adamu chini angakondile a-vwela Nlungu? N’nga vyevyi vinonikuza a-vi?

⁶ Adamu atoluza ngari yavadhulu mwasa o-ovwela Nlungu. Liye atomangiwa muukwani noluza uxamwalee wavakundu na Yohova. Liye atokala mutu o-olongomana thitho kaaode kala mundani mwa Edeni okoka. (Maromelo 3:17-19) I-yo othene natonongeya. Mwasa wa Adamu, “madawo to-ovolowa ilamboni dhela mwa mutu mmbo-i, na wukwa dhela mwa madawo, mwandhila yenio wukwa watofiedha waatu othene, neri-a othene tatodawa.” (Aroma 5:12) Adamu naatu othene tatokala adhaari avyodawa na wukwa. Adamu angadawile, liye “atodhiguli-a” thitho i-yo ninga adhaari a wukwa. (Aroma 7:14) N’nga vatokala idedi-edho wa i-yo? Ee nitokaana.

7, 8. N’nga yoombolana chini?

 ⁷ Yoombolana chini? Movweya pama, njipereso inopagaliwa ira tammombolena mutu. Bibilyani, madhu oi yoombolana anothapulela pereso yogulana yongo.

⁸ Nili omangeya wu madawo na wukwa thitho kaninaode ira yongo iliyothene ira nidhiombole. Ee-no, Yohova utoira vyofuneya ira aniombole. Liye atomruma Yesu ira avelele ingumee wa i-yo.

9. Mwasiwa ngwan’ni ninaonge ira kavali mmbo-i wa i-yo aaode pagali pereso yoombolana ira aniombole?

⁹ Ingumi yaluzile Adamu yali yolongomana. Ee-no ira niomboliwe, wali ofuneya ira mutu olongomana avelele ingumiyee wa i-yo. (Salimo 49:7, 8) Ngumwasiwa Bibilya linoonga ira “yoombolana yofwanelela venango yapereso yolandana.” (1 Timoteo 2:6) Mbwenye i-yo nili odawa, mwasiwa ngwenuo kavali mmbo-i wa i-yo aaode pagali pereso yoombolana ira aniombole.

10. Chini iirile Yohova ira aniombole?

¹⁰ N’nga chini yairile Yohova ira aniombole? Yohova atomruma vailambo yavathi mwanee ofuneya vinjinji. (1 Juwau 4:9, 10) Yesu atorumela i-yachi Babee na limburo lakala liye dhulu. (Afilipi 2:7) Yohova atoira vyodabwi-a thitho Yesu ali olongomana o-okaana yodawa.—Luka 1:35.

11. Vingaodeile ira mutu mmbo-i aniombole i-yo othene?

¹¹ Vingaodeile ira mutu mmbo-i aniombole i-yo othene? Ee. Ninga mwemo mutu mmbo-i mwanigawele liye vyodawa, thitho mutu mmbo-i angaodile niombola wu madawo na wukwa. (Muleri Aroma 5:19.) Adamu ato-iya vwela Yohova, atoluza ingumee yolongomana  thitho atonigawela madawo na wukwa. Yesu atovelela ingumee ninga pereso yoniombolana. (1 Akoritiyo 15:45) Dhela mwa vyairile Yesu, i-yo othene nitokaana ngari yokaana ingumi yo-omala.—1 Akoritiyo 15:21, 22.

12. Mwasiwa ngwan’ni wali ofuneya ira Yesu aone nyarwa vinjinji?

¹² Bibilya linoonga vya nyarwa yothene yan’na Yesu a-anakwe. Anyakhondo tatomkoma Yesu mwauwalanga. Liye atokomeliwa vamwiri oonelavo nyarwa thitho atovwa upa fiedha wukwa. (Juwau 19:1, 16-18, 30) Mwasiwa ngwan’ni wali ofuneya ira Yesu aone nyarwa vinjinji? Mwasiwa ngoi Satana aongile ira kavali unakale ororomeleya wa Nlungu angalive ira unogumanana nyarwa dhinjinji. Mbwenye Yesu atooni-a ira olongomana unooda kalave ororomeleya angalive ira unogumanana nyarwa dhilukhulu. Mo-okaikela, Yohova atodhiveliwana vyairile Yesu!—Sanganikho 27:11; onani madhu akomoni 15.

13. N’nga yoomboliwana yapagaliwile a-vi?

¹³ N’nga yoomboliwana yapagaliwile a-vi? Yawa ya 33, vanisani 14 vakalendariyo waayuda, Yohova atoiri-a ira Yesu apiwe naamwidanee. (Aebere 10:10) Yesu kaali ofwanela wukwa, mbwenye liye atooni-a nyarwa ingumee yolongomana. Vanduli vamalambo mararu, Yohova atomvenyathi-a Yesu a-kala na tutu laumutu mbwenye tutu launemba. Yesu angawelele dhulu, Yohova ato-indi-edha basa ingumi yolongomana ya Yesu ira aniombole. (Aebere 9:24) Mwasiwa ngwenuo nitokaana ngari yoombowa wu madawo na wukwa.—Muleri Aroma 3:23, 24.

14, 15. N’nga ninofwanela ira n’ni ira nileveleliwe vyodawa vi-u?

¹⁴ Mo-okaikela, Yoomboliwana chotuva yeniyo iniva-idhe Nlungu. Dhoweni nione mwemo yoomboliwana munanikami-edha aliwa chineneeva thitho munanikami-edhe aliwa sogolou.

¹⁵ Leveleliwa vyodawa vi-u. Kai vyoodeya irana vyongo vyapama hora dhothene. (Akolose 1:13, 14) Fendo dhinango i-yo ninoonga thitho ninoira vyo-ofwanelela. N’nga ninofwanela iranan’ni ira nileveleliwe? Ninofwanela i-yachi irana madawo thitho mvepa Yohova modhievi-a ira anilevelele. Ninooda nyindela ira Yohova unonilevelela mwasa wa yoomboliwana.—1 Juwau 1:8, 9.

16. Mwasiwa ngwan’ni ninooda kaana ithuulela rima yapama vanduli vovepa ira nileveleliwe?

¹⁶ Ithuulela rima yapama. Ithuulela rima yi-u inokala yothakala naira yongo yo-ofwanelela. I-yo ninoviona kala othakala, thitho fendo dhinango ninoviona ira nili o-ofwanela. Mbwenye kaninofwanela thuulela ee-no. Yohova kanafuna ira niovenga onga na liye mwasa wa vinogumanana i-yo. (Aebere 9:13, 14) Vanduli vovepa leveleliwa ninooda, kala varendele na Nlungu na kaana ithuulela rima yapama. Mwasiwa ngwan’ni? Mwasiwa ngoi ninooda kaana imbarimbari yoi Yohova unonivwa thitho unonilevelela mwasa wa yoomboliwana.—Aebere 4:14-16.

17. Mbamaraeli-o aavi anofuna i-yo kaana mwasa oi Yesu atonikwela?

¹⁷ Idedi-edho ya ingumi yo-omala. “Voi yopagali ya madawo kuukwa, mbwenye yotuva inovelela Nlungu chiingumi yo-omala dhela mwa Kristu Yesu, Mbwiyi-u.” (Aroma 6:23) Ninooda kalao dhowa nodhowa nakala aingumi yolongomana na mwasa oi Yesu  atonikwela. (Apokalipse 21:3, 4) N’nga ninofwanela iran’ni ira niwachele maraeli-o enala?

18. N’nga ninaidhiwa a-vi ira Yohova unonidhiveliwana?

¹⁸ Kathuulelani mwemo munakalelanyo aimwerumweru mutu auva-ani yotuva. Yoomboliwana chotuva yokumela wa Nlungu thitho ninofwanela msimba Yohova mwasa wa vyevyo. Lemba la Juwau 3:16 linoonga ira: “Nlungu o-odhiveliwana vinjinji ilambo yavathi, moi atovelela Mwanee obaliwa e-ka, ira mutu uliwethene unamroromele a-anongiwe, mbwenye akaena ingumi yo-omala.” Nitoidhiwa ira Yohova unonidhiveliwana neri-a liye utoniva-a mwanee ofuneya, Yesu. Thitho nitoidhiwa ira unonidhiveliwana mwasa oi liye atonikwela. (Juwau 15:13) Ee-no kanikaikele ira Yohova na Yesu kanonidhiveliwana.—Agalata 2:20.

19, 20. (a) Nyo munaode a-vi kala xamwali wa Yohova? (b) Niaoni-e a-vi ira nitokaana iroromelo va yoombolana ya Yesu?

¹⁹ Mummwidhiwe Yohova. Vinokala vyorucha mdhiveliwana mutu o-ommwidhiwa. Lemba la Juwau 17:3 linoonga ira ninooda mmwidhiwa Yohova. I-yo nammwidhiwa vinjinji Nlungu, udhiveli-u na Nlungu unowenjedheleya. Vanduli viwa ninooda mdhiveliwi-a liye na kala xamwalee. Ee-no nidhowenave funjedha Bibilya.—1 Juwau 5:3.

²⁰ Mukaena iroromelo va yoomboliwana ya Yesu. Kaana iroromelo kai onga ira ninororomela Yesu baa-i. Bibilya linoonga ira “ule un’na iroromelo wa Yesu unodha khana ingumi yo-omala.” (Juwau 3:36) Kaana iroromelo unothapulelan’ni? Unothapulela irana vinifunji-idhe Yesu. (Juwau 13:15) Pumwemo munaoni-e  i-yo ira nitokaana iroromelo. Tiyago 2:26, muleri: “Iroromelo yo-okaana mabasa inokala yokwa.”

21, 22. (a) Mwasiwa ngwan’ni yawa iliyothene ninofwanela dhowa gumanoni othuulela wukwa wa Yesu Kristu? (b) N’nga miru 6 na 7 inodha onga n’ni?

²¹ Onelani gumano othuulela wukwa wa Yesu. Nama-iyu oi bebe-i unopiwa, Yesu atofunji-a ira ninofwanela gumaneyanga ira nithuulele wukwa wee. Ninoira vyevyo yawa iliyothene va “Yodya ya Mbwiye” venango ira thuulela wukwa wa Yesu. (1 Akoritiyo 11:20; Mateu 26:26-28) Yesu unofuna ira i-yo nimthuulelenga ira liye utoniva-a ingumee yolongomana ninga yoombolana. Liye aongile ira: “Mwiirengana vyevi vondithuulela miyo.” (Muleri Luka 22:19.) Nadhowanga wu gumano wen’na, ninooni-a ira ninothuulela va yoombolana na udhivela wa Yohova na Yesu waatu othene.—Onani madhu akomoni 16.

²² Yoomboliwana chotuva yapama inofwanela i-yo wachela. (2 Akoritiyo 9:14, 15) Miru 6 na 7 inodha onga mwemo yotuvila munofuna aliwa kami-a mamiliyau aatu akwide.