ບົດທີ 5
ຄ່າໄຖ່ເປັນຂອງຂວັນທີ່ມີຄ່າຫຼາຍທີ່ສຸດຈາກພະເຈົ້າ
1, 2. (ກ) ເຈົ້າຄິດວ່າຂອງຂວັນແບບໃດມີຄ່າຫຼາຍທີ່ສຸດ? (ຂ) ເປັນຫຍັງຄ່າໄຖ່ຈຶ່ງເປັນຂອງຂວັນທີ່ມີຄ່າຫຼາຍທີ່ສຸດທີ່ພະເຈົ້າໃຫ້ເຮົາ?
ເຈົ້າຄິດວ່າຂອງຂວັນແບບໃດມີຄ່າຫຼາຍທີ່ສຸດ? ທີ່ຈິງແລ້ວຂອງຂວັນທີ່ມີຄ່າບໍ່ຈຳເປັນຕ້ອງແພງ. ຖ້າຂອງຂວັນນັ້ນຖືກໃຈເຈົ້າຫຼືເປັນສິ່ງທີ່ເຈົ້າຈຳເປັນຕ້ອງໃຊ້ແລະກຳລັງຢາກໄດ້ ເຈົ້າກໍຈະດີໃຈແລະມີຄວາມສຸກຫຼາຍເມື່ອໄດ້ຮັບຂອງຂວັນນັ້ນ.
2 ພະເຢໂຫວາໃຫ້ຂອງຂວັນກັບມະນຸດຫຼາຍຢ່າງ ແລະມີຢ່າງໜຶ່ງທີ່ມີຄ່າຫຼາຍທີ່ສຸດແລະຈຳເປັນກວ່າສິ່ງໃດທັງໝົດ. ໃນບົດນີ້ ເຮົາຈະຮຽນວ່າພະເຢໂຫວາສົ່ງພະເຢຊູຄລິດລູກຂອງພະອົງມາເພື່ອທີ່ເຮົາຈະມີຊີວິດຕະຫຼອດໄປ. (ອ່ານມັດທາຍ 20:28) ການທີ່ພະເຢໂຫວາສົ່ງພະເຢຊູມາໃນໂລກເພື່ອເປັນຄ່າໄຖ່ສະແດງວ່າພະອົງຮັກເຮົາທຸກຄົນແທ້ໆ.
ເປັນຫຍັງຕ້ອງມີຄ່າໄຖ່?
3. ເປັນຫຍັງຄົນເຮົາຈຶ່ງຕາຍ?
3 ຄ່າໄຖ່ເປັນວິທີທີ່ພະເຢໂຫວາຊ່ວຍມະນຸດໃຫ້ຫຼຸດພົ້ນຈາກບາບແລະຄວາມຕາຍ. (ເອເຟໂຊ 1:7) ຫຼາຍພັນປີມາແລ້ວ ໃນສວນເອເດນ ອາດາມກັບເອວາມະນຸດຄູ່ທຳອິດໄດ້ເຮັດບາບ ພວກເຂົາຈຶ່ງຕ້ອງຕາຍ ແລະເນື່ອງຈາກເຮົາເປັນລູກຫຼານຂອງອາດາມກັບເອວາ ເຮົາກໍຕ້ອງຕາຍຄືກັນຍ້ອນໄດ້ຮັບບາບມາຈາກພວກເຂົາ. ນີ້ເປັນເຫດຜົນທີ່ເຮົາຈຳເປັນຕ້ອງມີຄ່າໄຖ່.—ເບິ່ງຄຳອະທິບາຍເພີ່ມເຕີມ 9
4. ອາດາມແມ່ນໃຜ ແລະລາວມີຊີວິດແບບໃດ?
4 ຕອນທີ່ພະເຢໂຫວາສ້າງອາດາມມະນຸດຄົນທຳອິດ ພະອົງໃຫ້ສິ່ງໜຶ່ງທີ່ມີຄ່າຫຼາຍກັບລາວ ນັ້ນກໍຄືຊີວິດທີ່ສົມບູນແບບທັງຮ່າງກາຍແລະຈິດໃຈ. ລາວບໍ່ຕ້ອງເຈັບປ່ວຍ ບໍ່ຕ້ອງເຖົ້າລົງ ແລະບໍ່ຕ້ອງຕາຍ. ເນື່ອງຈາກພະເຢໂຫວາສ້າງອາດາມຂຶ້ນມາ ພະອົງຈຶ່ງເປັນຄືກັບພໍ່ຂອງລາວ. (ລູກາ 3:38) ພະເຢໂຫວາເວົ້າລົມກັບອາດາມເປັນປະຈຳ ໃຫ້ລາວເຮັດວຽກທີ່ມີຄວາມສຸກ ແລະພະອົງບອກອາດາມຢ່າງຈະແຈ້ງວ່າລາວຕ້ອງເຮັດຫຍັງ.—ຕົ້ນເດີມ 1:28-30; 2:16, 17
5. ຄຳພີໄບເບິນບອກວ່າອາດາມຖືກສ້າງ ‘ຕາມແບບຂອງພະເຈົ້າ’ ໝາຍຄວາມວ່າແນວໃດ?
5 ອາດາມຖືກສ້າງ ‘ຕາມແບບຂອງພະເຈົ້າ.’ (ຕົ້ນເດີມ 1:27) ພະເຢໂຫວາໃຫ້ລາວມີຄຸນລັກສະນະຄືກັບພະອົງ ເຊັ່ນ: ຄວາມຮັກ ສະຕິປັນຍາ ຄວາມຍຸຕິທຳ ແລະລິດເດດ. ພະເຈົ້າບໍ່ໄດ້ສ້າງອາດາມໃຫ້ເປັນຫຸ່ນຍົນ ພະອົງໃຫ້ລາວຄິດແລະເລືອກເອງວ່າຈະເຮັດສິ່ງທີ່ດີຫຼືສິ່ງທີ່ບໍ່ດີ. ຖ້າອາດາມເລືອກເຊື່ອຟັງພະເຈົ້າ ລາວກໍຈະມີຊີວິດຕະຫຼອດໄປໃນສວນອຸທິຍານ.
6. ເມື່ອອາດາມບໍ່ເຊື່ອຟັງພະເຈົ້າ ລາວຕ້ອງສູນເສຍຫຍັງແດ່? ແລະເຮົາຕ້ອງຮັບຜົນແນວໃດ?
6 ແຕ່ອາດາມເລືອກບໍ່ເຊື່ອຟັງພະເຈົ້າ ລາວຕ້ອງຮັບຜົນເສຍຫາຍຮ້າຍແຮງຈາກການຕັດສິນໃຈຄັ້ງນັ້ນ. ລາວຖືກຕັດສິນລົງໂທດເຖິງຕາຍ ຕ້ອງສູນເສຍສາຍສຳພັນພິເສດທີ່ເຄີຍມີກັບພະເຢໂຫວາ ສູນເສຍບ້ານທີ່ເປັນອຸທິຍານ. (ຕົ້ນເດີມ 3:17-19) ຍ້ອນອາດາມກັບເອວາບໍ່ເຊື່ອຟັງພະເຈົ້າ ພວກເຂົາຈຶ່ງໝົດໂອກາດທີ່ຈະມີຊີວິດຕະຫຼອດໄປ. ອາດາມເຮັດໃຫ້ “ບາບໄດ້ເຂົ້າມາໃນໂລກ . . . ແລະຄວາມຕາຍກໍເກີດຂຶ້ນຍ້ອນບາບນັ້ນ ແລ້ວຄວາມຕາຍຈຶ່ງລາມໄປເຖິງທຸກຄົນເພາະທຸກຄົນໄດ້ເຮັດບາບ.” (ໂຣມ 5:12) ເມື່ອອາດາມເຮັດບາບ ລາວ “ຂາຍ” ຕົວເອງລວມທັງພວກເຮົານຳໃຫ້ເປັນທາດຂອງບາບແລະຄວາມຕາຍ. (ໂຣມ 7:14) ແລ້ວພວກເຮົາເດ ຍັງຈະມີຄວາມຫວັງຫຍັງອີກບໍ? ມີແນ່ນອນ ພະເຢໂຫວາຈັດກຽມຄ່າໄຖ່ໃຫ້ພວກເຮົາ.
7, 8. ຄ່າໄຖ່ກ່ຽວຂ້ອງກັບຫຍັງ?
7 ຄ່າໄຖ່ແມ່ນຫຍັງ? ຄ່າໄຖ່ກ່ຽວຂ້ອງກັບສອງຢ່າງຄື: (1) ສິ່ງທີ່ຈ່າຍເພື່ອໄຖ່ຄົນຫຼືສິ່ງຂອງກັບຄືນມາ. (2) ສິ່ງນັ້ນຕ້ອງເທົ່າທຽມຫຼືມີຄ່າເທົ່າກັບສິ່ງທີ່ຕ້ອງການໄຖ່.
8 ອາດາມເຮັດບາບແລະເຮັດໃຫ້ພວກເຮົາຕ້ອງຕາຍ ບໍ່ມີໃຜເລີຍໃນໂລກນີ້ທີ່ສາມາດຊົດໄຊ້ຄ່າເສຍຫາຍຈຳນວນມະຫາສານທີ່ລາວເຮັດໄວ້. ແຕ່ພະເຢໂຫວາຈັດກຽມວິທີເພື່ອຊ່ວຍເຮົາໃຫ້ຫຼຸດພົ້ນຈາກບາບແລະຄວາມຕາຍ. ໃຫ້ເຮົາມາເບິ່ງນຳກັນວ່າຄ່າໄຖ່ຊ່ວຍເຮົາແນວໃດ ແລະເຮົາຈະໄດ້ຮັບປະໂຫຍດໂດຍວິທີໃດ.
ວິທີທີ່ພະເຢໂຫວາຈັດກຽມຄ່າໄຖ່ໃຫ້ເຮົາ
9. ເພື່ອຈະໄຖ່ຊີວິດສົມບູນແບບຕ້ອງມີຄ່າໄຖ່ແບບໃດ?
9 ບໍ່ມີຜູ້ໃດໃນພວກເຮົາສາມາດຈ່າຍເພື່ອໄຖ່ຊີວິດສົມບູນແບບທີ່ອາດາມເຮັດໃຫ້ສູນເສຍໄປ. ຍ້ອນຫຍັງ? ຍ້ອນສິ່ງທີ່ຈະໄຖ່ໄດ້ຕ້ອງເປັນຊີວິດທີ່ສົມບູນແບບຂອງອີກຄົນໜຶ່ງ ແຕ່ເຮົາທຸກຄົນເປັນຄົນບໍ່ສົມບູນແບບ. (ຄຳເພງ 49:7, 8) ຄ່າໄຖ່ຕ້ອງມີຄ່າເທົ່າກັບສິ່ງທີ່ອາດາມເຮັດໃຫ້ສູນເສຍໄປຈຶ່ງຈະເອີ້ນໄດ້ວ່າເປັນຄ່າໄຖ່ທີ່ມີຄ່າເທົ່າທຽມກັນ.—1 ຕີໂມທຽວ 2:6
10. ພະເຢໂຫວາຈັດກຽມຄ່າໄຖ່ແນວໃດ?
10 ພະເຢໂຫວາຈັດກຽມຄ່າໄຖ່ແນວໃດ? ພະເຢໂຫວາກຽມໂດຍສົ່ງລູກຊາຍທີ່ພະອົງຮັກຫຼາຍທີ່ສຸດໃຫ້ມາໃນໂລກ. ລູກຄົນນີ້ແມ່ນພະເຢຊູ ພະເຈົ້າສ້າງເພິ່ນກ່ອນສ້າງສິ່ງອື່ນໆທັງໝົດ. (1 ໂຢຮັນ 4:9, 10) ພະເຢຊູເຕັມໃຈຈາກພໍ່ຂອງເພິ່ນແລະສະລະຊີວິດໃນສະຫວັນ. (ຟີລິບປອຍ 2:7) ພະເຢໂຫວາຍ້າຍຊີວິດຂອງພະເຢຊູຈາກສະຫວັນໃຫ້ມາຢູ່ໃນໂລກ ແລະພະເຢຊູກໍມາເກີດເປັນມະນຸດທີ່ສົມບູນແບບ ນັ້ນຄືບໍ່ມີບາບເລີຍ.—ລູກາ 1:35
ພະເຢໂຫວາໃຫ້ລູກທີ່ພະອົງຮັກຫຼາຍທີ່ສຸດມາເປັນຄ່າໄຖ່ສຳລັບເຮົາ
11. ຄົນຜູ້ດຽວຈະເປັນຄ່າໄຖ່ສຳລັບເຮົາທຸກຄົນໄດ້ແນວໃດ?
11 ເມື່ອຄົນຜູ້ດຽວເຊິ່ງກໍແມ່ນອາດາມທີ່ບໍ່ເຊື່ອຟັງພະເຢໂຫວາ ລາວເຮັດໃຫ້ເຮົາທຸກຄົນໝົດໂອກາດທີ່ຈະມີຊີວິດສົມບູນແບບ. ດັ່ງນັ້ນ ຄົນຜູ້ດຽວກໍສາມາດຊ່ວຍເຮົາທຸກຄົນທີ່ເປັນລູກຫຼານຂອງອາດາມໃຫ້ຫຼຸດພົ້ນຈາກຄວາມຕາຍໄດ້ຄືກັນ. (ອ່ານໂຣມ 5:19) ຄົນຜູ້ດຽວເຊິ່ງກໍແມ່ນພະເຢຊູທີ່ບໍ່ເຄີຍເຮັດບາບ ເພິ່ນໄດ້ສະລະຊີວິດທີ່ສົມບູນແບບຂອງເພິ່ນເພື່ອເປັນຄ່າໄຖ່. (1 ໂກຣິນໂທ 15:45) ຊີວິດທີ່ສົມບູນແບບຂອງພະເຢຊູຜູ້ດຽວຈຶ່ງສາມາດໃຊ້ເປັນຄ່າໄຖ່ເພື່ອໄຖ່ລູກຫຼານຂອງອາດາມທຸກຄົນໃຫ້ຫຼຸດພົ້ນຈາກຄວາມຕາຍໄດ້.—1 ໂກຣິນໂທ 15:21, 22
12. ເປັນຫຍັງພະເຢຊູຕ້ອງຍອມທົນທຸກທໍລະມານຫຼາຍຂະໜາດນີ້?
12 ຄຳພີໄບເບິນບອກວ່າກ່ອນພະເຢຊູຈະຕາຍເພິ່ນທຸກທໍລະມານຫຼາຍ ເພິ່ນຖືກຂ້ຽນຢ່າງໂຫດຫ້ຽມ ຖືກຕອກເທິງເສົາ ແລະຕ້ອງທົນກັບຄວາມເຈັບປວດຢ່າງທໍລະມານຈົນຕາຍ. (ໂຢຮັນ 19:1, 16-18, 30) ເປັນຫຍັງພະເຢຊູຕ້ອງຍອມທົນທຸກທໍລະມານຫຼາຍຂະໜາດນີ້? ຍ້ອນຊາຕານບອກວ່າບໍ່ມີມະນຸດຄົນໃດຈະຍັງພັກດີຕໍ່ພະເຈົ້າໄດ້ຖ້າລາວຖືກທົດສອບຢ່າງໜັກ. ແຕ່ພະເຢຊູພິສູດໃຫ້ເຫັນແລ້ວວ່າມະນຸດທີ່ສົມບູນແບບສາມາດພັກດີຕໍ່ພະເຈົ້າໄດ້ເຖິງວ່າຈະເຈິການທົດສອບທີ່ໜັກໜ່ວງທີ່ສຸດ. ລອງຄິດເບິ່ງແມ້ ພະເຢໂຫວາຕ້ອງພູມໃຈໃນຕົວພະເຢຊູຫຼາຍແທ້ໆ!—ສຸພາສິດ 27:11; ເບິ່ງຄຳອະທິບາຍເພີ່ມເຕີມ 15
13. ມີການຈ່າຍຄ່າໄຖ່ແນວໃດ?
13 ມີການຈ່າຍຄ່າໄຖ່ແນວໃດ? ໂດຍການທີ່ພະເຢຊູມອບຊີວິດທີ່ມີຄ່າໃຫ້ກັບພໍ່ຂອງເພິ່ນ. ໃນວັນທີ 14 ເດືອນນີຊານ ປີ ຄ.ສ 33 ຕາມປະຕິທິນຂອງຄົນຢິວ ພະເຢໂຫວາຍອມໃຫ້ພວກສັດຕູຂ້າພະເຢຊູ. (ເຮັບເຣີ 10:10) ແລ້ວສາມມື້ຕໍ່ມາ ພະເຢໂຫວາກໍເຮັດໃຫ້ພະເຢຊູກັບມາມີຊີວິດອີກ ບໍ່ແມ່ນເປັນຮ່າງກາຍມະນຸດ ແຕ່ເປັນຮ່າງກາຍສຳລັບສະຫວັນ. ຫຼັງຈາກນັ້ນ ພະເຢຊູກັບໄປຫາພະເຢໂຫວາພໍ່ຂອງເພິ່ນໃນສະຫວັນ ແລ້ວເອົາຄຸນຄ່າຊີວິດມະນຸດສົມບູນແບບທີ່ເພິ່ນສະລະເປັນຄ່າໄຖ່ມອບໃຫ້ພະເຢໂຫວາ. ເວົ້າງ່າຍໆກໍຄື ພະເຢຊູເອົາສິດຂອງເພິ່ນທີ່ຈະເປັນມະນຸດສົມບູນແບບໃນໂລກມອບໃຫ້ພະເຈົ້າ ເພື່ອພະເຈົ້າຈະເອົາສິດນີ້ໄປໃຫ້ລູກຫຼານຂອງອາດາມ. (ເຮັບເຣີ 9:24) ພະເຢໂຫວາຈັດກຽມຄ່າໄຖ່ໃຫ້ເຮົາເພື່ອເຮົາທຸກຄົນຈະມີໂອກາດເປັນມະນຸດສົມບູນແບບ ຫຼຸດພົ້ນຈາກບາບແລະຄວາມຕາຍ.—ອ່ານໂຣມ 3:23, 24
ປະໂຫຍດທີ່ເຈົ້າຈະໄດ້ຈາກຄ່າໄຖ່
14, 15. ເຮົາຕ້ອງເຮັດຫຍັງແດ່ເພື່ອພະເຈົ້າຈະໃຫ້ອະໄພບາບຂອງເຮົາ?
14 ທີ່ຈິງ ຕັ້ງແຕ່ຕອນນີ້ແລ້ວທີ່ເຮົາໄດ້ຮັບປະໂຫຍດຈາກຂອງຂວັນທີ່ມີຄ່າຫຼາຍທີ່ສຸດທີ່ພະເຈົ້າໃຫ້ເຮົາ. ໃຫ້ມາເບິ່ງວ່າເຮົາໄດ້ຮັບປະໂຫຍດຫຍັງຈາກຄ່າໄຖ່ທັງໃນຕອນນີ້ແລະໃນອະນາຄົດ.
15 ຄ່າໄຖ່ເຮັດໃຫ້ພະເຈົ້າໃຫ້ອະໄພບາບຂອງເຮົາ. (ໂກໂລຊາຍ 1:13, 14) ບໍ່ແມ່ນເລື່ອງງ່າຍເລີຍທີ່ຄົນເຮົາຈະເຮັດສິ່ງທີ່ຖືກຕ້ອງຕະຫຼອດເວລາ ເຮົາເຮັດຜິດພາດເລື້ອຍໆບໍ່ວ່າຈະເປັນທາງຄຳເວົ້າຫຼືການກະທຳ. ດັ່ງນັ້ນ ເຮົາຕ້ອງເຮັດຫຍັງແດ່ເພື່ອພະເຈົ້າຈະໃຫ້ອະໄພເຮົາ? ເຮົາຕ້ອງຮູ້ສຶກເສຍໃຈແທ້ໆກັບຄວາມຜິດທີ່ໄດ້ເຮັດ ແລະເຮົາຕ້ອງຖ່ອມຕົວຂໍພະເຢໂຫວາໃຫ້ອະໄພເຮົາ. ຖ້າເຮັດແບບນີ້ເຮົາກໍໝັ້ນໃຈໄດ້ວ່າບາບຂອງເຮົາໄດ້ຮັບການໃຫ້ອະໄພແລ້ວ.—1 ໂຢຮັນ 1:8, 9
16. ເຮົາຕ້ອງເຮັດຫຍັງແດ່ເພື່ອຈະຮູ້ສຶກສະບາຍໃຈໄດ້ວ່າພະເຈົ້າຍອມຮັບເຮົາ?
16 ຄ່າໄຖ່ເຮັດໃຫ້ເຮົາສະບາຍໃຈວ່າພະເຈົ້າຍອມຮັບເຮົາ. ຖ້າເຮົາຮູ້ສຶກຜິດຫຼາຍກັບສິ່ງທີ່ເຄີຍເຮັດ ເຮົາອາດເຖິງຂັ້ນທໍ້ໃຈແລະຮູ້ສຶກວ່າຕົວເອງບໍ່ມີຄ່າ. ແຕ່ເຮົາຕ້ອງບໍ່ຍອມແພ້ແລະບໍ່ຈົມຢູ່ກັບຄວາມຮູ້ສຶກຜິດ ຖ້າເຮົາຂໍພະເຢໂຫວາໃຫ້ອະໄພເຮົາ ເຮົາກໍໝັ້ນໃຈໄດ້ວ່າພະອົງຟັງແລະພ້ອມຈະໃຫ້ອະໄພເຮົາ. (ເຮັບເຣີ 9:13, 14) ພະເຢໂຫວາຢາກໃຫ້ເຮົາລົມກັບພະອົງ ເຮົາສາມາດບອກພະອົງໄດ້ວ່າເຮົາຕ້ອງຕໍ່ສູ້ກັບບັນຫາແລະຈຸດອ່ອນຫຍັງແດ່. (ເຮັບເຣີ 4:14-16) ຖ້າເຮົາເຮັດແບບນັ້ນ ເຮົາກໍຮູ້ສຶກສະບາຍໃຈໄດ້ວ່າພະເຈົ້າຍອມຮັບເຮົາ.
17. ການທີ່ພະເຢຊູຕາຍເພື່ອເຮົາເຮັດໃຫ້ເຮົາມີຄວາມຫວັງຫຍັງ?
17 ຄ່າໄຖ່ເຮັດໃຫ້ເຮົາມີຄວາມຫວັງທີ່ຈະມີຊີວິດຕະຫຼອດໄປ. “ຄ່າຈ້າງທີ່ບາບຈ່າຍແມ່ນຄວາມຕາຍ ແຕ່ຂອງຂວັນທີ່ພະເຈົ້າໃຫ້ແມ່ນຊີວິດຕະຫຼອດໄປຜ່ານທາງພະຄລິດເຢຊູຜູ້ເປັນນາຍຂອງພວກເຮົາ.” (ໂຣມ 6:23) ຍ້ອນພະເຢຊູຕາຍເພື່ອເຮົາ ເຮົາຈຶ່ງສາມາດມີຊີວິດຕະຫຼອດໄປໄດ້ພ້ອມທັງມີສຸຂະພາບທີ່ແຂງແຮງສົມບູນ. (ພະນິມິດ 21:3, 4) ແຕ່ເຮົາຕ້ອງເຮັດຫຍັງເພື່ອຈະໄດ້ສິ່ງເຫຼົ່ານີ້?
ເຈົ້າຈະສະແດງຄວາມຂອບໃຈສຳລັບຄ່າໄຖ່ບໍ?
18. ເຮົາຮູ້ໄດ້ແນວໃດວ່າພະເຢໂຫວາຮັກເຮົາ?
18 ລອງຄິດເບິ່ງວ່າເຈົ້າຈະດີໃຈຫຼາຍສ່ຳໃດຖ້າມີຄົນເອົາຂອງຂວັນທີ່ເຈົ້າມັກມາໃຫ້ເຈົ້າ. ຄ່າໄຖ່ເປັນຂອງຂວັນທີ່ມີຄ່າຫຼາຍທີ່ສຸດເຊິ່ງບໍ່ມີຫຍັງຈະທຽບໄດ້ເລີຍ ແລະເຮົາຄວນຂອບໃຈພະເຢໂຫວາຢ່າງສຸດຊຶ້ງທີ່ເອົາຂອງຂວັນນີ້ໃຫ້ເຮົາ. ໂຢຮັນ 3:16 ບອກວ່າ “ພະເຈົ້າຮັກຄົນໃນໂລກຫຼາຍ ຈົນເຖິງຂັ້ນຍອມສະລະລູກຄົນດຽວຂອງພະອົງ.” ພະເຢໂຫວາຮັກເຮົາຫຼາຍແທ້ໆຈົນຍອມສະລະພະເຢຊູລູກທີ່ພະອົງຮັກຫຼາຍທີ່ສຸດເພື່ອເຮົາ. (ໂຢຮັນ 15:13) ຄ່າໄຖ່ນີ້ທີ່ເປັນຄືກັບຂອງຂວັນເຮັດໃຫ້ເຈົ້າໝັ້ນໃຈໄດ້ວ່າພະເຢໂຫວາແລະພະເຢຊູຮັກເຈົ້າຫຼາຍແທ້ໆ.—ຄາລາເຕຍ 2:20
ເມື່ອເຮົາໄດ້ຮຽນເລື່ອງພະເຢໂຫວາ ເຮົາກໍຈະເປັນໝູ່ກັບພະອົງ ແລ້ວເຮົາກໍຈະຮັກພະອົງຫຼາຍຂຶ້ນເລື້ອຍໆ
19, 20. (ກ) ເຈົ້າຈະເປັນໝູ່ກັບພະເຢໂຫວາໄດ້ແນວໃດ? (ຂ) ເຈົ້າຈະສະແດງໃຫ້ເຫັນແນວໃດວ່າເຈົ້າເຊື່ອໃນເລື່ອງຄ່າໄຖ່ຂອງພະເຢຊູ?
19 ເຈົ້າໄດ້ຮຽນຮູ້ແລ້ວວ່າພະເຢໂຫວາຮັກເຈົ້າຫຼາຍສ່ຳໃດ ແລະເຈົ້າຄືຊິຢາກຮັກພະອົງຄືກັນ. ແຕ່ເພື່ອທີ່ເຮົາຈະຮັກຜູ້ໃດຜູ້ໜຶ່ງແລະເປັນໝູ່ກັບລາວ ເຮົາກໍຕ້ອງຮູ້ຈັກລາວກ່ອນ. ໂຢຮັນ 17:3 ບອກວ່າ ເຮົາສາມາດຮູ້ຈັກພະເຢໂຫວາໄດ້. ຖ້າເຈົ້າຮູ້ຈັກພະອົງແລ້ວ ເຈົ້າກໍຈະຮັກພະອົງສຸດຫົວໃຈແລະຢາກເຮັດທຸກສິ່ງທຸກຢ່າງໃຫ້ພະອົງພໍໃຈ ແລ້ວເຈົ້າກໍຈະເປັນໝູ່ກັບພະອົງ. ດັ່ງນັ້ນ ຂໍໃຫ້ເຈົ້າພະຍາຍາມຮູ້ຈັກພະເຢໂຫວາຕໍ່ໆໄປໂດຍການຮຽນຄຳພີໄບເບິນ.—1 ໂຢຮັນ 5:3
20 ສະແດງຄວາມເຊື່ອໃນເລື່ອງຄ່າໄຖ່ຂອງພະເຢຊູ. ຄຳພີໄບເບິນບອກວ່າ “ຄົນທີ່ສະແດງຄວາມເຊື່ອໃນລູກຂອງພະເຈົ້າຈະມີຊີວິດຕະຫຼອດໄປ.” (ໂຢຮັນ 3:36) ການສະແດງຄວາມເຊື່ອໝາຍຄວາມວ່າແນວໃດ? ເພື່ອສະແດງວ່າເຮົາເຊື່ອໃນພະເຢຊູ ເຮົາຕ້ອງເຮັດບາງຢ່າງທີ່ພິສູດວ່າເຮົາເຊື່ອແທ້ໆບໍ່ແມ່ນພຽງແຕ່ເວົ້າວ່າເຊື່ອ. ຢາໂກໂບ 2:26 ບອກວ່າ: “ຄວາມເຊື່ອທີ່ບໍ່ມີການກະທຳກໍຕາຍແລ້ວ.” ດັ່ງນັ້ນ ວິທີທີ່ເຮົາຈະສະແດງວ່າເຮົາເຊື່ອໃນເລື່ອງຄ່າໄຖ່ຂອງພະເຢຊູກໍຄື ເຮົາຕ້ອງເຮັດຕາມທີ່ພະເຢຊູສອນ.—ໂຢຮັນ 13:15
21, 22. (ກ) ເປັນຫຍັງເຮົາຄວນເຂົ້າຮ່ວມການປະຊຸມເພື່ອລະນຶກເຖິງການຕາຍຂອງພະຄລິດ? (ຂ) ເຮົາຈະໄດ້ຮູ້ເລື່ອງຫຍັງໃນບົດທີ 6 ແລະ 7?
21 ເຂົ້າຮ່ວມການປະຊຸມເພື່ອລະນຶກເຖິງການຕາຍຂອງພະຄລິດ. ໃນຄືນກ່ອນທີ່ພະເຢຊູຈະຕາຍ ເພິ່ນສັ່ງໄວ້ວ່າເຮົາຄວນລະນຶກເຖິງການຕາຍຂອງເພິ່ນ. ເຮົາເຮັດແບບນັ້ນໂດຍຈັດການປະຊຸມທຸກປີ ການປະຊຸມນີ້ເອີ້ນວ່າການປະຊຸມເພື່ອລະນຶກເຖິງການຕາຍຂອງພະເຢຊູ ຫຼື “ອາຫານແລງຂອງພະຄລິດ.” (1 ໂກຣິນໂທ 11:20; ມັດທາຍ 26:26-28) ພະເຢຊູຢາກໃຫ້ເຮົາຈື່ໄວ້ວ່າເພິ່ນສະລະຊີວິດທີ່ສົມບູນແບບຂອງເພິ່ນເພື່ອໄຖ່ເຮົາ. ເພິ່ນບອກວ່າ: “ໃຫ້ເຮັດແບບນີ້ຕໍ່ໆໄປເພື່ອລະນຶກເຖິງຂ້ອຍ.” (ອ່ານລູກາ 22:19) ຖ້າເຈົ້າເຂົ້າຮ່ວມການປະຊຸມເພື່ອລະນຶກເຖິງການຕາຍຂອງພະເຢຊູ ກໍສະແດງວ່າເຈົ້າບໍ່ລືມຄ່າໄຖ່ແລະຄວາມຮັກທີ່ພະເຢໂຫວາແລະພະເຢຊູມີຕໍ່ເຈົ້າ.—ເບິ່ງຄຳອະທິບາຍເພີ່ມເຕີມ 16
22 ຄ່າໄຖ່ເປັນຂອງຂວັນທີ່ມີຄ່າຫຼາຍທີ່ສຸດທີ່ເຮົາໄດ້ຮັບ. (2 ໂກຣິນໂທ 9:14, 15) ຂອງຂວັນທີ່ມີຄ່ານີ້ຍັງເປັນປະໂຫຍດຕໍ່ຫຼາຍລ້ານຄົນທີ່ຕາຍໄປແລ້ວ. ໃນບົດທີ 6 ແລະ 7 ຈະຊ່ວຍໃຫ້ຮູ້ວ່າຄ່າໄຖ່ເປັນປະໂຫຍດແນວໃດຕໍ່ຄົນທີ່ຕາຍໄປແລ້ວ.
ເລື່ອງທີ່ເຈົ້າອາດຈະມັກ
ໃຫ້ໃກ້ຊິດກັບພະເຢໂຫວາ
ພະເຢໂຫວາຈັດກຽມ “ຄ່າໄຖ່ໃຫ້ຄົນຈຳນວນຫຼາຍ”
ຄຳສອນທີ່ເຂົ້າໃຈງ່າຍແລະສຳຄັນຊ່ວຍເຮົາໃຫ້ສະໜິດກັບພະເຈົ້າ.
