BUNG NGA
Tlanna—Pathian Thilpêk Ropui Ber
1, 2. (a) Engin nge thilpêk chu i tâna hlu tak nihtîr? (b) Engvângin nge tlanna chu Pathian thilpêk ropui ber a nih?
THILPEK i dawn tawh azawnga ṭha ber chu eng nge ni? Thilpêk hlu tak ni tûr chuan man to tak a nih kher a ngai lo. A tihhlim che emaw, i mamawh tak emaw a nih hian chu thilpêk avâng chuan i lâwm hle a ni.
2 Pathian thil min pêk tam tak zîngah chuan eng dang zawng aia kan mamawh êm êm thilpêk pakhat a awm a. Chu chu mihringte hnêna Pathian thilpêk ropui ber a ni. Hemi bungah hian, chatuana kan nun theih nâna Jehova’n a Fapa, Isua Krista a rawn tirh chungchâng kan zir ang. (Matthaia 20:28 chhiar rawh.) Jehova chuan tlanna atâna Isua leiah rawn tîrin, min hmangaihzia a târ lang a ni.
TLANNA CHU ENG NGE NI?
3. Engvângin nge mihringte an thih?
3 Tlanna chu Jehova’n sual leh thihna ata mihringte a chhuah zalênna a ni a. (Ephesi 1:7) Tlanna kan mamawh chhan hre thiam tûr chuan kum sâng tam tak kaltaa Eden huana thilthleng kha kan hriat hmasak a ngai a ni. Kan nu leh pa hmasa ber Adama leh Evi chuan thil sual an ti a, an thih phah a. An hnên aṭanga sual kan rochun avângin keini pawh kan thi a ni.—Endnote 9-na en rawh.
4. Adama chu tu nge ni a, eng nge a neih?
4 Jehova’n mihring hmasa ber Adama a siam khân, thil hlu tak engemaw a pe a. Chu chu mihring nun ṭha famkim a ni. Adama chuan rilru leh taksa ṭha famkim a nei a. A na ngai lo vang a, a tarin, a thi ngai hek lo vang. Jehova siam a nih avângin, a tân chuan Jehova chu a pa ang a ni. (Luka 3:38) Jehova chuan Adama chu rawn be ziahin, a laka a beiseite chu chiang takin a hrilh a, hna thawh tûr hlimawm tak a pe bawk.—Genesis 1:28-30; 2:16, 17.
5. Bible-in Adama chu ‘Pathian anpuia’ siam nia a sawi hian eng a tihna nge?
5 Adama chu ‘Pathian anpuia’ siam a ni a. (Genesis 1:27) Jehova chuan a mizia ang hmangaihna te, finna te, rorêl dikna te, leh thiltihtheihnate neiin a siam a ni. Adama hnênah zalên taka duh thlan theihna pawh a pe a; chuvângin, Adama chu robot ang a ni lo. Thil dik leh dik lo thliar hrang thei leh ti thei tûra siam a ni. Pathian thu lo âwih sela chuan Paradis-ah chatuanin a nung reng tûr!
6. Adama’n Pathian thu a âwih loh khân eng nge a chân? Chu chuan engtin nge min nghawng?
6 Pathian thu a âwih loh avânga thi tûra Adama chung thu rêl a nih khân, a thil chân chu a nasa hle. Jehova nêna an inṭhianna, a nun ṭha famkim, leh a chênna Paradis chu a chân a ni. (Genesis 3:17-19) Adama leh Evi chuan Pathian thuâwih loh an thlan avângin beisei tûr an nei lo. Adama thiltih avângin, “sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a.” (Rom 5:12) Adama’n thil sual a tih khân, amah mai ni lovin keini pawh sual leh thihna bâwihah min “hralh” a ni. (Rom 7:14) A nih, beisei tûr kan nei em? Nei e.
7, 8. Tlanna chu eng nge ni?
7 Tlanna chu eng nge ni? Tlannaah chuan a tlângpui thuin thil pahnih a tel a. Pakhatnaah, tuemaw chhuah zalên nân emaw, thil engemaw neih lêt leh nân emawa sum pêk hi a ni. Pahnihnaah, tlanna chu chhan engemaw avânga chhia thil pakhat siam ṭhatna tûra a man pêk hi a ni.
8 Mihringte zîngah hian Adama thil sual tih avânga kan chunga thihna thlentu chhiatna nasa tak siam ṭhat nâna a man pe thei tûr kan awm lo va. Mahse, Jehova chuan sual leh thihna ata min chhuah zalên tûrin kawng min sialsak a ni. Tlanna hnathawh dân leh kan hlâwkpui theih dân chu i lo en ang u.
JEHOVA’N TLANNA MIN PEK DAN
9. Tlanna chu engtin nge pêk a nih?
9 Kan zîngah hian Adama chân tâk nun ṭha famkim nei leh tûra tlanna pe thei kan awm lo. Engvângin nge? Mi ṭha famkim lo vek kan nih vâng a ni. (Sâm 49:7, 8) Mihringte tlan nâna thilpêk ngai chu mihring nun ṭha famkim dang a ni a. Bible chuan Isua chu “mi zawng zawng tlan nâna inpea,” tiin a ko va. (1 Timothea 2:6) Isua pêk nun ṭha famkim hlutna leh Adama chân tâk nun hlutna chu a intluk chiah a ni.
10. Engtin nge Jehova’n tlanna a pêk?
10 Engtin nge Jehova’n tlanna a pêk? A thil siam hmasak ber leh a ngainat ber, a Fapa Isua chu leiah rawntîrin tlanna a pe a. (1 Johana 4:9, 10) Isua chuan a Pa leh a vân in chu inhuam takin a kalsan a. (Philippi 2:7) Jehova’n Isua nunna chu vân aṭangin leiah a rawn sawn a, sual nei lo mihring ṭha famkim niin a rawn piang ta a ni.—Luka 1:35.
Jehova chuan a Fapa ngainat tak chu tlanna atân min pe
11. Engtin nge mi pakhat chuan mi zawng zawng tâna tlanna a pêk theih?
11 Mihring hmasa ber Adama chuan Jehova thu âwih lovin, mihring zawng zawng tâna nun ṭha famkim chu a chân a. Mi dang tuemawin Adama fate zawng zawng tân thihna a tibo thei em? Thei e. (Rom 5:19 chhiar rawh.) Thil sual ti ngai lo Isua chuan a nun ṭha famkim chu tlanna atân a pe a. (1 Korinth 15:45) Chu chu Adama fate zawng zawng tâna thihna nuai bosak nâna hman theih a ni.—1 Korinth 15:21, 22.
12. Engvângin nge Isua tân hrehawm tam tak tawrh a ngaih?
12 Bible chuan Isua’n a thih hmaa hrehawm a tawrh nasatzia a sawi a. Hruihruala vuak te, nghaisakna bana khenbeh te, leh hrehawm nasa takte tuarin a thi a ni. (Johana 19:1, 16-18, 30) Engvângin nge Isua tân hrehawm tam tak tawrh a ngaih? Setana’n fiahna nasa tak hnuaiah mihring tumah hi Pathian chungah an rinawm dâwn lo a tih vâng a ni. Isua chuan hrehawm nasa tak tuar chung pawhin mi ṭha famkim chu Pathian chungah a rinawm thei tih a târ lang a. Jehova’n Isua a chhuan nasat tûrzia chu han ngaihruat teh!—Thufingte 27:11; Endnote 15-na en rawh.
13. Tlanna chu eng anga pêk nge ni?
13 Tlanna chu eng anga pêk nge ni? Isua chuan a nun hlutna chu a Pa hnênah a pe a. C.E. 33, Juda calendar-a Nisan 14-ah, Jehova chuan Isua chu hmêlmate kut tuara a thih chu a remti a ni. (Hebrai 10:10) Mahse, ni thum nîah, Isua chu mihring taksa ni lovin, thlarau taksa puin a kaitho leh a ni. A hnuah, Isua chu a Pa vâna mi Jehova hnênah kîr lehin a mihring nun ṭha famkim hlutna chu tlanna atân a hlân a. (Hebrai 9:24) Tûnah tlanna pêk a nih tawh avângin, sual leh thihna ata zalên theihna hun remchâng kan nei tawh a ni.—Rom 3:23, 24 chhiar rawh.
TLANNA I HLAWKPUI THEIH DAN
14, 15. Kan sualte ngaihdam ni tûrin eng nge kan tih ngai?
14 Pathian thilpêk ropui ber chu kan hlâwkpui reng tawh a. Tûna kan hlâwkpui dân leh nakina kan hlâwkpui dân tûr chu i lo en ang u.
15 Kan sualte ngaihdam a ni. Thil dik tih reng chu a harsa a. Thil ṭha lo sawi châng leh tih châng kan nei a ni. (Kolossa 1:13, 14) Engtin nge ngaihdam kan nih theih? Kan thil tihsual avângin pawi tih tak zetna kan neiin, inngaitlâwm takin Jehova hnênah a ngaihdamna kan dîl tûr a ni. Chutianga kan tih chuan, kan sualte ngaihdam a ni tih kan ring thei a ni.—1 Johana 1:8, 9.
16. Chhia leh ṭha hriatna thiang nei tûrin eng nge kan tih ngai?
16 Chhia leh ṭha hriatna thiang kan nei thei. Kan chhia leh ṭha hriatnain thil sual engemaw kan ti tih min hrilh chuan, inthiam lohna kan nei a, beisei bo leh tlâktlai lo niin kan inhre mai thei. Mahse, kan beidawng mai tûr a ni lo. Jehova hnêna ngaihdam kan dîl chuan, min ngaithlain min ngaidam ang tih kan chiang thei a ni. (Hebrai 9:13, 14) Jehova chuan kan buaina leh kan chak lohna engpawh a hnêna hrilh tûrin min duh a. (Hebrai 4:14-16) Chutiang chuan Pathian nêna inremna kan nei thei a ni.
17. Isua kan tâna a thih avângin eng malsâwmnate kan dawn theih?
17 Chatuan nun beiseina kan nei. “Sual man chu thihna a ni si a; Pathian thilthlâwnpêk erawh chu kan Lalpa Krista Isua zârah chuan chatuana nunna a ni.” (Rom 6:23) Isua kan tâna a thih avângin chatuan nunna leh hrisêlna ṭha famkim kan nei thei a. (Thu Puan 21:3, 4) Mahse, chûng malsâwmate dawng thei tûr chuan eng nge kan tih ngai?
TLANNA I PAWM ANG EM?
18. Engtin nge Jehova’n min hmangaih tih kan hriat?
18 Thilpêk ṭha tak i dawn huna i lâwm dân chu han ngaihtuah teh. Tlanna chu thilpêk azawnga hlu ber a nih avângin Jehova chungah kan lâwm hle tûr a ni. Johana 3:16 chuan: “Pathianin khawvêl a hmangaih êm êm a, chutichuan a Fapa mal neih chhun a pe,” tih min hrilh a. Ni e, Jehova chuan min hmangaih êm avângin a Fapa ngainat tak Isua chu min pe a ni. Kan tâna inhuam taka a thih avângin, Isua pawhin min hmangaih tih kan hre bawk. (Johana 15:13) Tlanna thilpêk chuan Jehova leh Isua’n an hmangaih tak zet che tih a rintîr tûr che a ni.—Galatia 2:20.
Jehova chungchâng kan zir chuan a ṭhian kan ni ang a, amah kan hmangaih lehzual ang
19, 20. (a) Engtin nge Jehova ṭhian i nih theih? (b) Engtin nge Isua tlanna inthawina i pawm tih i lantîr theih?
19 Tûnah chuan Pathian hmangaihna ropui tak i lo hre ta a, engtin nge a ṭhian i nih theih ang? I mi hriat ngai miah loh tuemaw hmangaih chu a awlsam lo. Johana 17:3 chuan Jehova kan hre thei tih min hrilh a. Jehova i hriat chuan amah i hmangaih lehzualin, tihlâwm i duh ang a, chutiang chuan a ṭhian i rawn ni ang. Chuvângin, Bible zirna hmangin Jehova chungchâng zir zawm zêl ang che.—1 Johana 5:3.
20 Isua tlanna inthawina pawm rawh. Bible chuan: “Tupawh Fapa ring apiangin chatuana nunna an nei tawh,” a ti a. (Johana 3:36) Ring tih chu eng tihna nge ni? Isua’n ti tûra min zirtîrte tihna hi a ni. (Johana 13:15) ‘Isua kan ring,’ tih ngawt mai hi a tâwk lo. Tlanna pawm tûr chuan kan rinna nêna inmilin thil kan tih a ngai a ni. Jakoba 2:26-ah: “Thiltih tel lovin rinna . . . chu thi a ni,” tiin kan chhiar si a.
21, 22. (a) Engvângin nge Krista thih Hriatrengna inkhâwmah kum tina kan tel ang? (b) Bung 6-na leh 7-naah eng nge kan sawiho vang?
21 Krista thih Hriatrengna inkhâwmah tel rawh. A thih hma zân khân Isua chuan a thih hriatrengna kan nei tûr a ni tih min hrilh a. Chu chu kum tinin kan hmang a, Hriatrengna, a nih loh leh “Lalpa Zanriah” tiin kan ko a ni. (1 Korinth 11:20; Matthaia 26:26-28) Isua chuan min tlan nân a nun ṭha famkim a pe tih hre reng tûrin min duh a. “Mi hriat reng nân hei hi ti ṭhîn rawh u,” tiin min chah a ni. (Luka 22:19 chhiar rawh.) Hriatrengna inkhâwma i tel hian, tlanna i ngaihhlutzia leh Jehova leh Isua min hmangaihna nasa tak i hriat rengzia i lantîr a ni.—Endnote 16-na en rawh.
22 Tlanna chu kan dawn theih thilpêk azawnga ropui ber a ni a. (2 Korinth 9:14, 15) Chu thilpêk hlu tak chu thi tawh mi maktaduai tam tak pawhin an hlâwkpui ang. Bung 6-na leh 7-naah an hlâwkpui theih dân chu sawiho a ni ang.
