CAPITA 5
Ndando ya Kupatula Inapu Bwana Bwakama bwa Kutunda Kuli Njambi
1, 2. (a) Bika bilingisa bwana bubamyana kupwa bwa seho? (b) Mwafwa bika ndando ya kupatula inapu bwana bwakama bwanatwana Njambi?
BWANA muka bwabubwa bubamyana laja mu kuyoya kweni? Bwana kubwapandele kupwa bwa ndando yakama asinoni mubumone kupwa bwa seho. Bwana bukapu bwabubwa nga bunamizibisa kubwaha, nambe nga cuma cibanamyana mwacitondele manene.
2 Kuli bwana bwanatwana Njambi buje bututonda manene kutubakana mabwana oshe anatwana. Bunapu bwana bwakama manene bwanana banu. Ngwe mutulilongesela muno mu Capita, Yehova watumine Munendi Yesu Kilistu kwa kututsila mangana tukayoye myaka yoshe. (Tandeni Mateo 20:28.) Yehova namwesa ngwendi watuzema ha kutuma Yesu hano hasi.
NDANDO YA KUPATULA YAPWA BIKA?
3. Bika bibali na kutsila banu?
3 Ndando ya kupatula inapu ngila yali na kupangesa Yehova mu kusambesa banu ku bubi na ku kutsa. (Efeso 1:7) Tuzibukeni tahi byuma byalingiwile kusañulu mu citungu ca Edeni. Oku kutukwasa tumone seho ya ndando ya kupatula. Bisemi betu ba kulibanga ba Adama na Eva balingile bubi. Ngeci batsile mwafwa ya bubi. Netu tuli na kutsa mwafwa twatambwile bubi kuli Adama na Eva.—Taleni Biñanda bya Kushongo ha 9.
4. Adama wapwile iya, co bamwanene bika?
4 Adama wapwile munu wa kulibanga kutanga kuli Yehova. Adama bamwanene cuma cimo ca seho manene. Bamwanene kuyoya kwa kulumbunuka. Adama wakele na mubila na bisinganyeka bya kulumbunuka. Kapandele kubinja, kapandele kukulubala na kutsa. Yehova Njambi wapwile ishe mwafwa ikeye wamutangele. (Luka 3:38) Yehova wasimutwiiye na Adama simbu yoshe. Njambi walekele Adama byuma byapandele kulinga na kumwana bipangi byabibwa.—Kushangumuka 1:28-30; 2:16, 17.
5. Mu ngila muka Adama bamutangelele “mu cifwa ca Njambi”?
5 Adama bamutangele “mu cifwa ca Njambi.” (Kushangumuka 1:27) Yehova wamwanene bifwa byendi bya kufwa ngwe cizemo, mana, busunga na nzili. Wamwanene lalo nzili ya kulyangwila byakulinga. Adama kapwile ngwe likina embwe. Njambi wamutangele mangana ase kwangula kulinga bubwa nambe bubi. Ngwe Adama wangwile kwononoka Njambi, ngwe wayoyele myaka yoshe mu Paladaisi.
6. Bika byazimbalesele Adama omwo kononokele Njambi? Oku kwatunenela bukalu muka?
6 Adama wazimbalesele byuma bya seho manene omwo watengulukilile Njambi na kumutumbwila kutsa. Wazimbalesele busamba bwendi na Yehova, kuyoya kwendi kwa kulumbunuka na limbo lyendi lya Paladaisi. (Kushangumuka 3:17-19) Adama na Eva kubakele na lilabelelo lya kuyoya lalo, mwafwa balyangwilile kutengulukila Njambi. Mwafwa ya cuma calingile Adama, ‘bubi bwezile hano ha kaye, co bubi bwanenele kutsa. Co kutsa kunete ku miyati yoshe ya banu omwo boshe banalingi bubi.’ (Loma 5:12) Omwo Adama walingile bubi, ‘walilandesele’ babenya hamolika netu mu bundungo bwa bubi na kutsa. (Loma 7:14) Tangwa tukapatuka ku bubi na ku kutsa ndi? Eyo.
7, 8. Ndando ya kupatula inapu bika?
7 Ndando ya kupatula inapu bika? Ndando ya kupatula ilumbunukila mubali. Ca kulibanga, inapu ndando ibafweta mangana bapatule munu nambe kukula cuma. Ca mu cibali, inapu fweto ije ifwika ndando ya cuma cimo.
8 Kukwesi munu wasele kufwetela byuma byabiisile Adama omwo walingile bubi na kutunenela kutsa. Oloni Yehova wabwahesele ngila ya kutupatula ku bubi na ku kutsa. Tusimutwiyeni muili na kupangelamo ndando ya kupatula, nomwo yasa kutukwaselamo.
YEHOVA WATWANENE BATI NDANDO YA KUPATULA?
9. Ndando ya kupatula bapandele kuifweta bati?
9 Naumo wahi wasele kufwetela kuyoya kwa kulumbunuka kuje kwazimbalesele Adama. Mwafwa bika? Mwafwa tubaboshe kutwalumbunukile. (Myaso 49:7, 8) Ndando ya kupatula ije yatondewele, yapwile kuyoya kwa munu wa kulumbunuka lalo. Mukemwo baitumbula ngwabo “ndando ya kulifwa ya kupatula.” (1 Timateo 2:6, NWT) Oyo ndando ya kupatula yapandele kukala na seho ya kupwisa hamo na kuyoya kuje kwazimbalesele Adama.
10. Yehova watwanene bati ndando ya kupatula?
10 Yehova watwanene bati ndando ya kupatula? Yehova watumine Munendi wa kulitila hano hasi. Ou Munendi Yesu, ikeye yalibangele kutanga ku byuma byoshe. (1 Yowano 4:9, 10) Yesu walyanene kuseza Ishe na mwela waubwa mwilu. (Filipu 2:7) Yehova wajalwisile Yesu mwilu na kumunena hano hasi. Co wasemukile wa kulumbunuka, wa kujeneka bubi.—Luka 1:35.
Yehova wanene Munendi wa kulitila kupwa ndando ya kutupatula
11. Munu umo napu bati ndando ya kupatula banu boshe?
11 Adama kononokele Yehova, ngeci wazimbalesele kuyoya kwa kulumbunuka kuje kubapandele kukala nakwo banu boshe. Kuma kwali munu weka uje asa kumanesa kutsa kuje kwaija kuli bana ba Adama boshe ndi? Eyo. (Tandeni Loma 5:19.) Yesu uje kalingile bubi, wanene kuyoya kwendi kwa kulumbunuka kupwa ndando ya kupatula. (1 Kolinte 15:45) Kuyoya kwendi kwa kulumbunuka kukamanesa kutsa kuje kwaija kuli bana ba Adama boshe.—1 Kolinte 15:21, 22.
12. Mwafwa bika Yesu wayandelele manene?
12 Mbimbiliya inatuleka mwayandelele Yesu simbu kanda atse. Bamupupangele makote na kumupameya ha citi ca kuyandesela, co watsile mwamubi. (Yowano 19:1, 16-18, 30) Mwafwa bika Yesu wayandelele ngeci? Satana wendekele ngwendi kukwesi munu asa kupwa wa kulongwa kuli Njambi nga aliwana na byeseko byakama. Ngeci, Yesu wamwesele ngwendi munu wa kulumbunuka asa kupwa wa kulongwa kuli Njambi nambe bamuyandesa manene. Yesu wazibisile Yehova kubwaha.—Visimo 27:11; taleni Biñanda bya Kushongo ha 15.
13. Ndando ya kupatula baifwetele bati?
13 Ndando ya kupatula baifwetele bati? Yesu wanene Ishe seho ya kuyoya kwendi. Yehova watabesele bitozi batsiye Yesu. Bamutsiile mu mwaka wa 33, ha Nisane 14 ya kalenda ya Bayunda. (Vahevelu 10:10) Omwo mwetile matangwa atatu, Yehova wamusangwile kupwa munu wa ku sipilitu. Kutundaho, omwo Yesu welukile kuli Ishe, waketesele seho ya kuyoya kwendi kwa kulumbunuka kuli Yehova kupwa ndando ya kupatula. (Vahevelu 9:24) Ha kuwana ngwe ndando ya kupatula banaifwete laja, twasa oni kupatuka ku bubi na ku kutsa.—Tandeni Loma 3:23, 24.
MUYASA KUMIKWASELA NDANDO YA KUPATULA
14, 15. Bika bitunapande kulinga nga tushaka ngwetu bubi bwetu babusambese?
14 Obu bwana bwakama bwanatwana Njambi bunashangumuka laja kutukwasa. Tumoneni mubuli na kutukwaselamo ano matangwa, nomwo mubukatukwasela kulutwe.
15 Bubi bwetu babusambesa. Kwapwa kwakukalu kulinga byuma byabibwa simbu yoshe. Tukasebuka, co simbu imo tukendeka na kulinga byuma byabibi. (Kolose 1:13, 14) Basa kutusambesa bati? Tunapande kunanguka ngwetu byuma bitunalingi binapu byabibi na kulomba Yehova atusambese. Nga tulinga ngoco, co twasa kukulahela ngwetu bubi bwetu banabusambesa.—1 Yowano 1:8, 9.
16. Bika bitunapande kulinga mangana tukale na citakutaku cacibwa?
16 Tukala na citakutaku cacibwa. Nga citakutaku cetu cituleka ngwaco tunabiisa, tukalizibi kukala na mulonga, nambe kulimona kupwa tubangoco. Oloni kutwapandele kuzeya. Nga tulomba kuli Yehova ngwetu atusambese, twasa kukulahela ngwetu atutolilila, co atusambesa. (Vahevelu 9:13, 14) Yehova ashaka ngwendi tumuleke bukalu bwetu na buzeye bwetu bwoshe. (Vahevelu 4:14-16) Nga tulinga ngoco, co tukala mu kwoloka na Njambi.
17. Bibezikiso muka bitwasa kuwana mwafwa ya kutsa kwa Yesu?
17 Tuli na lilabelelo lya kukayoya myaka yoshe. “Omwo fweto ya bubi inapu kutsa, oloni bwana bwa Njambi bunapu mwonyo wa myaka yoshe muli Kilistu Yesu Mwene yetu.” (Loma 6:23) Twasa kukayoya myaka yoshe na kupwa ba kulikangula ku mibila mwafwa Yesu watutsililile. (Kujombolola 21:3, 4) Oloni bika bitunapande kulinga mangana tukatambule ebi bibezikiso?
MUKULAHELA NDANDO YA KUPATULA NDI?
18. Tuzibuka bati ngwetu Yehova watuzema?
18 Acisinganyekeni kubwaha kumukazibi nga munu umo amyana bwana bwabubwa. Ndando ya kupatula inapu bwana bwabubwa manene kutubakana mabwana oshe, co tunapande kukandelela manene kuli Yehova. Ku Yowano 3:16 ngwabo: “Njambi wazemene baka-kaye manene, ngeci wanene Munendi umolika.” Cili bene Yehova watuzema manene, ngeci watwanene Munendi wa kulitila, Yesu. Co tunazibuka lalo ngwetu Yesu nendi watuzema mwafwa walyanene kwija mu kututsila. (Yowano 15:13) Bwana bwa ndando ya kupatula bunapande kutulingisa tumone ngwetu Yehova na Yesu batuzema.—Ngalatiya 2:20.
Omwo tulilongesa bya Yehova, tupwa babusamba bendi, co lalo tumuzema manene
19, 20. (a) Mwasa kupwa bati kabusamba ka Yehova? (b) Mumwesa bati ngweni mwakulahela ñombelo ya Yesu?
19 Munazibuka oni ngweni Yehova watuzema manene. Ngeci, mwasa kupwa bati kabusamba kendi? Kwapwa kwakukalu kuzema munu uje kumuzibuka. Ku Yowano 17:3 batuleka ngwabo twasa kuzibuka Yehova. Nga muzibuka Yehova, co mumuzema manene, mumuzibisa kubwaha na kulikuta nendi busamba. Ngeci lilongeseni Mbimbiliya mangana muzibuke byabingi hali Yehova.—1 Yowano 5:3.
20 Kulaheleni ñombelo ya Yesu. Mbimbiliya ngwayo “woshe akulahela kuli Mwana ali na mwonyo wa myaka yoshe.” (Yowano 3:36) Kukulahela kulumbununa bika? Kulumbununa kulinga byuma byatulekele Yesu ngwendi tulinge. (Yowano 13:15) Kutwapandele kwendeka lika ha kanwa ngwetu twakulahela Yesu embwe. Tunapande tulingako bimo bije bimwesa likulahelo lyetu. Mukanda wa Yakomba 2:26 ngwawo: ‘Kukulahela nga kukwesi na bilinga, co kunatsi.’
21, 22. (a) Bika bitunapande kuila ku Canukiso ca kutsa kwa Kilistu mwaka na mwaka? (b) Bika bitusimutwiya mu Capita 6 na 7?
21 Yeni ku Canukiso ca kutsa kwa Kilistu. Ku mangwezi aje simbu kanda Yesu atse, watulekele ngwendi tunapande kwanuka kutsa kwendi. Tukalingi eci cilika mwaka na mwaka. Eci cilika bacisana ngwabo Canukiso nambe “Kulya kwa Mwene kwa Mangwezi.” (1 Kolinte 11:20, NWT; Mateo 26:26-28) Yesu ashaka twanuke ngwetu wanene kuyoya kwendi kwa kulumbunuka kupwa ndando ya kutupatula. Wendekele ngwendi: “Lingeni eci mu kunjanuka yange.” (Tandeni Luka 22:19.) Nga muya ku Canukiso, mumwesa ngweni muli na kwanuka ndando ya kupatula na cizemo cakama canatumwesa Yehova na Yesu.—Taleni Biñanda bya Kushongo ha 16.
22 Ndando ya kupatula inapu bwana bwakama manene kutubakana mabwana oshe atutambula. (2 Kolinte 9:14, 15) Obu bwana bukakwasa na banu babangi baje batsa laja. Mu Capita 6 na 7 banalumbununa omwo ndando ya kupatula yasa kukwaselamo batsi.
