1, 2. a) Bõe n kɩtd tɩ kũun tar yõodo? b) Bõe la Wẽnnaam maan n kõ tõndo, tɩ yaa kũun sẽn ka to?

KŨUN nins yãmb sẽn zoe n paamã sʋka, bʋg n yɩ yãmb noog n yɩɩda? Kũunã ligd tõeeme n yaa toogo, la pa rẽ n kɩt tɩ noom-y ye. Yaa a sẽn kõt-y sũ-noogo, bɩ a sẽn yaa bũmb sẽn yaa tɩlɛ ne-y wã yĩnga.

² Wẽnnaam sẽn maan bũmb nins n kõ tõndã sʋka, a ye n yaa tɩlɛ ne-d n yɩɩda. Kũun kae t’a yõodã ta-a ye. Sag-kãngã pʋgẽ, d na n bãngame t’a Zeova tʋma a Bi-ribl a Zeezi Kiris tẽngã zug t’a wa ki, tɩ d tõe n wa paam n vɩɩmd wakat sẽn kõn sa. (Karm-y Matye 20:28.) A Zeova sẽn kɩt t’a Zeezi wa ki tɩ yɩ maoongã, wilgdame t’a nonga tõnd wʋsgo.

3. Bõe yĩng tɩ ninsaalbã yaa kiidbã?

³ A Zeova sẽn kɩt t’a Zeezi wa ki wã yaa sẽn na n fãag ãdem-biisã ne yel-wẽndã la kũumã. (Efɛɛs-rãmbã 1:7) Sẽn na yɩl n bãng bũmb ning sẽn kɩt tɩ rẽ yaa tɩlɛ ne-dã, rẽnda d tẽeg yell ning sẽn maan Edɛn zẽedã zĩigẽ na maan yʋʋm tusa wã. D yaab a Ãdem ne a Hawa maana yel-wẽnde. B kii rẽ yĩnga. Tõnd me yaa kiidba, bala d roga ne yel-wẽndã.—Ges-y Vẽnegr a 8 wã.

4. Wẽnnaam naana d yaab a Ãdem t’a yaa wãn-wãna?

 ⁴ A Zeova sẽn wa n naan d yaab a Ãdmã, a ra zemsa zãnga. A yĩngã ra pa tar zanga, a tagsa wã fãa me ra yaa sõma. A ra pa na n tol n lʋɩ bãaga, n kʋʋl bɩ n ki ye. Sẽn yaa a Zeova n naan a Ãdmã, a ra yaa wa a Ba. (Luk 3:38) A ra mi n gomda ne a Ãdem. A wilg-a-la a sẽn dat t’a maane, la a kõ-a tʋʋm sẽn kõt sũ-noogo.—Sɩngre 1:28-30; 2:16, 17.

5. Biiblã sẽn yeel tɩ Wẽnnaam naana a Ãdem ‘n wõneg a mengã’ rat n yeelame tɩ bõe?

⁵ Wẽnnaam naana a Ãdem ‘n wõneg a menga.’ (Sɩngre 1:27) Woto rat n yeelame t’a naan-a lame t’a tar yam, pãnga, n nong tɩrlem la a tõe n nong a taaba. A naan-a lame t’a tõe n yãk yam a toore. A Ãdem ra tõe n yãka yam n maan sẽn yaa sõma wall wẽnga. A sã n da yãk yam n sak Wẽnnaam, a ra na n vɩɩmda arzãnã pʋgẽ wakat sẽn kõn sa, tẽngã zugu.

6. A Ãdem sẽn kɩɩs Wẽnnaamã, bõe la a bõn-yã?

⁶ A Ãdem sẽn kɩɩsã, Wẽnnaam kaoo a bʋʋd t’a segd ne kũum, tɩ rẽ kɩt t’a bõn wʋsgo. A sãama zood ning a sẽn da tar ne a Zeova wã, n kong a vɩɩmã sẽn da zems zãngã, la arzãnã. (Sɩngre 3:17-19) A Ãdem ne a Hawa meng n yãk yam n kɩɩs Wẽnnaam. Dẽnd sugr pa be b yĩng ye.

7, 8. Bõe la a Ãdem kɩɩsgã wa ne a kambã la a yagensã zugu?

⁷ A Ãdem sẽn maan bũmb ningã waa ne yel-wẽnã dũni, tɩ “yel-wẽnã wa ne kũum, tɩ nebã fãa kiidẽ, b fãa sẽn maan yel-wẽnã yĩngã.” (Rom-dãmbã 5:12) A Ãdem sẽn maan yel-wẽndã, kɩtame  tɩ lebg yel-wẽndã la kũumã n “so” yẽnda ne a yagensã fãa. (Rom-dãmbã 7:14) La rẽ yĩnga d tõe n paama d mens ne yel-kãngã bɩ? N-ye.

⁸ Ned ra kae n tõe n yao n dol bũmb ning a Ãdem sẽn bõne, a sẽn kɩɩs Wẽnnaam tɩ rẽ wa ne kũumã ye. La a Zeova maana bũmb sẽn na yɩl tɩ d paam d meng ne yel-wẽndã la kũumã. Bɩ d gom rẽ yelle, la d ges d sẽn tõe n maan n paam tɩ bõn-kãng naf tõndo.

9. Wãn to la ninsaalbã ra na n le n tõog n paam vɩɩm ningã a Ãdem sẽn bõnã?

⁹ Tõnd ned baa a ye pa tõe n yao n dol vɩɩm sẽn zems zãngã a Ãdem sẽn bõnã ye. Bõe yĩng tɩ d yet woto? Bala d fãa yaa yel-wẽn-maandba. (Yɩɩn-sõamyã 49:8, 9) Yaa ned sẽn zems zãng n da tõe n kõ a vɩɩmã n dole. Nin-kãng soab ra na n kõ a meng n ‘da nebã fãa.’ (1 Tɩmote 2:6) A Zeezi sẽn dol bũmb ningã yõod tog n zemsa vɩɩmã a Ãdem sẽn bõnã kɛpɩ.

10. Bõe la a Zeova maan n na n fãag tõndo?

¹⁰ Bõe la a Zeova maan n na n fãag tõndo? A tʋma a Zeezi sẽn yaa a Bi-ribl a sẽn nong wʋsgã tẽngã zugu. Yẽ la a naan pipi. (1 Zã 4:9, 10) A Zeezi sakame n bas a Ba wã, la a yirã sẽn yaa saasẽ wã. (Filip-rãmbã 2:7) A Zeova maana yel-solemde, n dɩk a Zeezi vɩɩmã n ning a Maari pʋgẽ wã, t’a rog n yaa ninsaal sẽn zems zãnga, n pa tar yel-wẽnd ye.—Luk 1:35.

11. Wãn to la nin-yend vɩɩm tõe n fãag ãdem-biisã fãa?

 ¹¹ A Ãdem sẽn kɩɩs a Zeova wã, ãdem-biisã fãa bõna vɩɩm sẽn zems zãngã. La rẽ yĩnga, ned ra beeme n tõe n fãag ãdem-biisã tɩ b paam b mens ne kũumã bɩ? N-ye. (Karm-y Rom-dãmb 5:19.) A Zeezi sẽn zɩ n maan yel-wẽndã rɩka a vɩɩmã n yao n dole. (1 Korẽnt-rãmbã 15:45) A sẽn zems zãngã, a ra tõe n fãaga ãdem-biisã tɩ b paam b mens ne kũumã.—1 Korẽnt–rãmbã 15:21, 22.

12. Bõe yĩng tɩ ra yaa tɩlɛ t’a Zeezi namse?

¹² Biiblã wilgda b sẽn nams a Zeezi to-to nand t’a ki wã. B pãb-a-la ne kalwaase, n ka-a ra-luk zug t’a nams n yaool n ki. (Zã 19:1, 16-18, 30) Bõe yĩng tɩ ra yaa tɩlɛ t’a Zeezi nams woto? Bala a Sʋɩtãan yeelame tɩ ned kae n na n kell n sak a Zeova nams-toaag pʋgẽ ye. La a Zeezi wilgame tɩ ned sẽn zems zãng tõe n kell n yɩɩ wẽn-sakda, baa sã n na n tũ ne a yõore. Tags-y n ges-y a Zeova sũur sẽn yɩ noog to-to ne a Zeezi!—Yel-bũnã 27:11; ges-y Vẽnegr 14.

13. Bõe la a Zeezi ra segd n maan t’a maoongã naf ninsaalbã?

¹³ Bũmb la a Zeezi ra segd n maan t’a maoongã naf ninsaalbã. Yʋʋmd 33, zʋɩf rãmbã Nizã kiuug rasem 14 daare, a Zeova basame tɩ bɛɛbã kʋ-a. (Ebre-rãmbã 10:10) Rasem a tãab poore, a Zeova vʋʋg-a lame t’a le lebg malɛka. A Zeezi sẽn leb a Ba wã nengẽ saasẽ wã, a tɩ wilga a sẽn sak n ki tɩ yɩ maoongã yõodo. (Ebre-rãmbã 9:24) Yaa rẽ la a tog n maan sẽn na yɩl tɩ d paam d mens ne yel-wẽnã la kũumã.—Karm-y Efɛɛs-rãmb 1:7.

14, 15. D maanda wãn n paam d yel-wẽnã sugri?

¹⁴ A Zeova sẽn kɩt t’a Zeezi wa ki tɩ yɩ maoongã, zoe n nafda tõndo. Bɩ d ges nafa kẽer d sẽn paamde, la d sẽn na n paam beoogo.

¹⁵ D paamda d yel-wẽnã sugri: Yaa toog tɩ d maand sẽn yaa tɩrg wakat fãa. D tudgdame. D mi n goma goam bɩ n maan bũmb sẽn pa segde. (Koloos-rãmbã 1:13, 14) D maanda wãn n paam sugri? D tog n wilgame tɩ d sũur sãama wʋsgo, la d sik d meng n kos a Zeova sugri. Rẽ poore, d segd n kɩsa sɩd t’a kõ-d-la sugri.—1 Zã 1:8, 9.

16. D sũurã sã n wa ningd-d taale, bõe la d segd n maane?

¹⁶ D sũurã pa ningd-d taal ye: D sã n maan sẽn pa segde, d sũurã ningd-d-la taale, tɩ rẽ tõe n kɩt tɩ d wa tẽed tɩ d ka võore, la tɩ tɩɩm kae ye. D pa tog n koms raood ye. D sã n kos a Zeova ne d sũur fãa t’a kõ-d sugri, d tõe n kɩsa sɩd t’a na n kelg-d lame, la t’a na n kõ-d-la sugri. (Ebre-rãmbã 9:13, 14) A Zeova ratame tɩ sẽn yaa zu-loɛɛg ning fãa, d pãn-komsmã sẽn yaa a soab fãa, bɩ d togs-a. (Ebre-rãmbã 4:14-16) Rẽ na n kɩtame tɩ zems-n-taar zĩnd tõnd ne yẽ sʋka.

17. A Zeezi sẽn ki tõnd yĩngã, bark bʋs la d tõe n paame?

¹⁷ D tõe n wa paam n vɩɩmda wakat sẽn kõn sa: “Yel-wẽnã yaood yaa kũum, la kũun ning Wẽnnaam sẽn kõt zaalmã yaa vɩɩm sẽn kõn sa, tõnd Zu-soab a Zeezi Kiris pʋgẽ.” (Rom-dãmbã 6:23) A Zeezi sẽn ki tõnd yĩngã, d tõe n wa paama vɩɩm sẽn kõn sa, n tar laafɩ hakɩɩka. (Vẽnegre 21:3, 4) Bõe la d segd n maan n wa paam bark kãensã?

18. Bõe n kɩt tɩ d miẽ t’a Zeova nonga tõndo?

¹⁸ Ned sã n kõ-y kũun sẽn be yamleoogo, y kõn wilg a soab tɩ y sũur noomame sɩda? A Zeezi maoongã yaa Wẽnnaam kũun sẽn ka to. D tog n wilga a Zeova tɩ d sũur nooma hal wʋsgo. Zã 3:16 yetame tɩ “Wẽnnaam nonga dũniyã wʋsgo, hal tɩ b kõ b Bi-ribl yendã.” Sɩd me, a Zeova nonga tõnd hal n sak n kõ a Bi-ribl a Zeezi a sẽn nong wʋsgã. D miime t’a Zeezi me nong-d lame, bala a sak n kii tõnd yĩnga. (Zã 15:13) A Zeezi maoongã tog n kɩtame tɩ d kɩs sɩd tɩ yẽ ne a Zeova nonga tõndo.—Galat-rãmbã 2:20.

19, 20. a) Bõe la y tõe n maan n lebg Wẽnnaam zoa? b) Bõe la y tõe n maan n wilg tɩ y tẽeda a Zeezi maoongã?

¹⁹ Masã, y bãngame tɩ Wẽnnaam nonga tõnd hal wʋsgo. Bõe la y tõe n maan n lebg a zoa? F sã n pa mi neda, yɩl n nong-a yaa toogo. Zã 17:3 wilgdame tɩ d tõe n bao n bãnga a Zeova. Y sã n bao n bãng-a, y na n nong-a lame n paase, y na n dat n ta a yam, y na n paam n lebga a zoa me. Dẽ wã, bɩ y wɩng ne Biiblã zãmsgo, n tõog n bãng a Zeova sõma.—1 Zã 5:3.

²⁰ Wilg-y tɩ y tẽeda a Zeezi maoongã: Biiblã yetame tɩ “ned ning sẽn tẽed-a Bi-riblã tara vɩɩm sẽn kõn sa.” (Zã 3:36) Tẽ a Zeezi maoongã rat n yeelame tɩ bõe? Rat n yeelame tɩ d maan bũmb ning a Zeezi sẽn yeel tɩ d maanã. (Zã 13:15) D sã n yeel tɩ d tẽeda a Zeezi bala, pa sek ye. Sẽn na yɩl n  wilg tɩ d tẽeda a Zeezi maoongã, d tog n wilga rẽ ne d tʋʋmã. Zak 2:26 yetame tɩ “tẽeb sã n ka naag ne tʋʋma a yaa kɩɩnga.”

21, 22. a) Bõe yĩng tɩ d segd n naag n tẽeg a Zeezi kũumã yʋʋmd fãa? b) Bõe yell la d na n gom sak a 6 ne a 7 wã pʋgẽ?

²¹ Wa-y a Zeezi kũumã tẽegrẽ: Yʋng ning b sẽn yõk a Zeezi wã, a wilgame tɩ kiris-nebã tog n tẽegda yẽ kũumã yelle. D sɩd maanda woto yʋʋmd fãa. D boonda rẽ t’a Zeezi kũumã tẽegre. (Matye 26:26-28) A Zeezi ratame tɩ d tẽeg tɩ yẽ kõo a vɩɩmã sẽn zems zãngã tɩ yɩ maoong tõnd yĩnga. A yeela woto: “Bɩ y maand bõn-kãngã n tẽegd mam yelle.” (Karm-y Luk 22:19.) Y sã n wa a Zeezi kũumã tẽegre, y wilgdame tɩ y tẽrame t’a kii tõnd yĩnga, la tɩ yẽ ne a Zeova nonga tõnd wʋsgo.—Ges-y Vẽnegr 15 wã.

²² A Zeezi sẽn ki tɩ yɩ maoongã yaa Wẽnnaam kũun sẽn ka to. (2 Korẽnt-rãmbã 9:14, 15) Yaa kũun sẽn na n naf neb milyõ-rãmb sẽn ki menga. Sak a 6 la a 7 wã na n wilga sẽn na n yɩ to-to tɩ rẽ tõoge.