1, 2. (a) Acani cino cikalenga ukuti ica wila cicindame? (b) Amulandu ci wuno inzuwi ya kwe Yesu yawela aca wila icicindame ukufuma kwe Leza?

ACA wila ci icizima nkaninye cino mukatela amupocelelapo? Ica wila citafwile ukuwa ica mutengo pa kuti mucilole ukuti acicindame. Lelo nga ca kuti cikumiletela insansa nanti nga acino mukalondesya, mungacitemwa sana.

² Kwawa ica wila conga cino cacila pa vya wila vyonsinye vino Leza watupa cino swensinye tukalondesya. Co-o, aca wila icicindame sana cino wapile awantu. Mwe co-o icipandwa, twandi tusambilile vino Yehova watumile Umwana wakwe, Yesu Klistu pa kuti twize twikale umuyayaya. (Wazyani Mateyu 20:28.) E Yehova walanjizizye ukuti watutemwa nkaninye pano watumile Yesu ukwiza mu kutufwila.

3. Acani cino tukafwila?

³ Inzuwi ya kwe Yesu anzila yino Yehova wapekanya pa kupususya awantu ukufuma ku luwembu ni mfwa. (Waefeso 1:7) Pa kuti twivwicisye umulandu wuno inzuwi yakwe yacindamila sana, tuzipizile ukumanya vino vyacitisile mu Edeni. Awakwasi wa kutalicila, e Adamu ne Eva wawembusile. Pa mulandu wa kuti wawembusile, wizile awafwa. Acino na sweswenye tukafwila amuno twapyana uluwembu ukufuma kwe Adamu ne Eva.—Wazyani Amazwi na Yanji pa 9.

4. Uzye Adamu walinji wuli pa kutalika? Avyani vino wamupile?

 ⁴ Pano Yehova wapanzile umuntu wa kutalicilapo Adamu, wamupile icintu icicindame sana. Wamupile uwumi uwupwililike. Walinji amupwililike mwe vyonsinye. Akuli ukuti atalinji nu kulwala, ukukota nanti ukufwa. E Yehova walinji ngati we Yisi kwe Adamu amuno awino wamupanzile. (Luka 3:38) Lyonsinye Adamu walanzyanyanga ne Yehova. Swinya wamulondololezile ivya kwikala nu kumupa incito inzima yino wawombanga.—Intaliko 1:28-30; 2:16, 17.

5. Uzye Baibolo ikasula cani pa kulanda ukuti Adamu wapanzilwe “mu mukola wa kwe Leza”?

⁵ Adam wamupanzile “mu mukola wa kwe Leza.” (Intaliko 1:27) E Yehova wamupanzile ni miwele yino wawa nayo iyikole ulukundo, amano, uwupinguzi, na maka. Wamupile ni nsambu zya kuyisolela ivya kucita, atalinji ngati aca mashini. Wamupanzile ukuti umweneco angayisolela icizima ni ciwipe. Wanga asolepo ukwivwila Leza, ngawisile umuyayaya mu Paradaise.

6. Avyani vyo Adamu wapanizye pano wakanile ukwivwila Leza? Uzye vyo vyacitisile vyatukuma wuli?

⁶ Pano wakanile ukwivwila Leza, wamupinguzile ukuti alifwa swinya wonye avino cizile aciwa. Pano wacisile wo-o, wuciwuza wakwe ne Yehova wasizile, wamuwinzile mu Paradaise, swinya atalinji nu wumi uwupwililike. (Intaliko 3:17-19) Adamu ne Eva wasozilepo ukukanayivwila Leza umwenzonye, fwandi watalinji ni suwilo ilili lyonsinye. Pa mulandu na vino wacisile, “uluwembu lwinjizile mu muntu wenga mu nsi ni mfwa yinjilizile mu luwembu, avino ni mfwa yasalangine ku wantu wonsinye amuno wonsinye wawembusile.” (Waroma 5:12) Pano wawembusile, ‘watukazizye’ mu wuzya wa luwembu ni mfwa. (Waroma 7:14) Uzye cikusula ukuti na  sweswenye tutawa ni suwilo ilili lyonsinye? Awe, sweswe twawa nalyo.

7, 8. Uzye inzuwi acili icani?

⁷ Uzye inzuwi acili acani? Tungalanda vye ukuti inzuwi acifuta mulandu. Nanti indalama zino zikalipilwa pa kuti umuntu wino wanyefile afume mu cifungo.

⁸ Kutalinji umuntu uwili wensinye wino walinji nu kulipila pe vino Adamu wononile pano wawembusile nu kuleta uluwembu ni mfwa. Lelo Yehova wapekinye inzila iya kutufumizya mu luwembu ni mfwa. Nomba lekani tusambilile vino inzuwi yikawomba ni vizima vino yatucitila.

9. Avyani vino vyalondekwanga pa kulipila inzuwi?

⁹ Patalinji wino walinji nu kulipila icifuta mulandu pa wumi uwupwililike wuno Adamu wasovizye. Amulandu ci? Amuno swensinye tutapwililika. (Amalumbo 49:7, 8) Inzuwi yino yalondekwanga, awumi wunji uwupwililike. Acino yikakwitilwa ukuti “inzuwi iyilinganeko.” (1 Timoti 2:6) Inzuwi yazipizile ukuwa nu wumi uwupwililike ngati awulyanye wuno Adamu walinji nawo pano atani awembuke.

10. Uzye Yehova wacisile wuli pa kupekanya inzuwi?

¹⁰ Uzye Yehova wacisile wuli pa kupekanya inzuwi? E Yehova wasenzile Umwana wakwe wino wacindama nkaninye ukwiza mu nsi. E Yesu awino Yehova watalicizilepo ukupanga pa vintu vyonsinye. (1 Yohani 4:9, 10) E Yesu nawe wayikundizile ukufuma mwi yulu nu kwiza mu nsi. (Wafilipi 2:7) E Yehova wacinsizye uwumi wa kwe Yesu ukufuma kwi yulu ukwiza mu nsi, nu kwiza kwatwa umuntu umupwililike wino atalinji nu luwembu.—Luka 1:35.

11. Uzye umuntu wenga walinji nu kupususya wuli awantu wonsinye?

 ¹¹ Pano Adamu wakanile ukwivwila Yehova, walenzile awantu wonsinye ukupanya uwumi uwupwililike. Uzye kwalinji umuntu winji wino walinji nu kulenga awana wa kwe Adamu ukuwa nu wumi uwupwililike na swinya? Ee, akuno walinji. (Wazyani Waroma 5:19.) E Yesu wino asitela awembukepo, wapile uwumi wakwe uwupwililike ukuwa icifuta mulandu. (1 Wakorinte 15:45) Uwumi wakwe uwupwililike walinji nu kufumyapo imfwa pa wana wa kwe Adamu wonsinye.—1 Wakorinte 15:21, 22.

12. Amulandu ci wuno Yesu waculizile?

¹² E Baibolo ikalondolola vino Yesu wacuzile pano atani afwe. Wamumile, awamupamantila pa cimuti swinya wamukomile mu nzila ya kuti pa kufwa wacuzile nkaninye. (Yohani 19:1, 16-18, 30) Amulandu ci wuno Yesu waculizile wo-o? Amuno Satana walanda ukuti kutawa umuntu wino angatwalilila ni cisinka kwe Leza nga wapita mu ntazi nkulu. Yelenganyani vino Yehova wivwile icete pano Yesu watwalilizile ukusipicizya!—Imilumbe 27:11; wazyani Amazwi na Yanji pa 15.

13. Uzye inzuwi yalipizilwe wuli?

¹³ Uzye inzuwi yalipizilwe wuli? Ukulingana ne kalenda wa ciYuda, pa Nisani 14 mu mwaka wa 33, e Yehova wazumilizizye ukuti e Yesu wamukome ku walwani wakwe. (Waheberi 10:10) Pa nsizi ya manda yatatu, Yehova wamuzyulupuzile nu muwili wa kumuzimu, asa wa wuntu. Pano Yesu wanyocezilemo kwi yulu kwe Yisi, wayile atula umutengo wa wumi wakwe kwe Yehova ukuwa inzuwi. (Waheberi 9:24) Pa mulandu wa kuti inzuwi yalipilwa, twaluwulwa ukufuma ku luwembu ni mfwa.—Wazyani Waroma 3:23, 24.

14, 15. Avyani vyo tuzipizile ukucita pa kuti tutetelwe uluwembu?

¹⁴ Na pe yonye impindi kwawa ivizima vino tukayitopwa vino inzuwi ya kwe Yesu yaleta. Lekani tulole vino tukayitopwa pe yo-o impindi na vino tuliyitopwa ku nkolelo.

¹⁵ Uluwembu lwitu lukatetelwa. Citapepuka ukucita ivizima cila mpindi. Tukaluvyanya, swinya mpindi zimwi tukalanda nu kucita iviwipe. (Wakolose 1:13, 14) Uzye tungacita wuli pa kuti tutetelwe? Tuzipizile ukwivwa uwuwi pa viwipe vino tucisile nu kulenga Yehova ukuti atutetele. Nga twacita wo-o, apano tungasuwila ukuti uluwembu lwitu lwatetelwa.—1 Yohani 1:8, 9.

16. Tungacita wuli pa kuwa ne kampingu umusanguluke?

¹⁶ Tukawa ne kampingu umusanguluke. E kampingu nga yikutunena ukuti tucisile vimwi iviwipe, tukatalika ukuyipa imilandu, tukasakamikwa swinya tukakwivwa ukuti tutacindama. Lelo tutazipizile ukunenuka. Amuno nga twalenga ukuti e Yehova atutetele, tukasuwila ukuti wandi ayivwe nu kututetela. (Waheberi 9:13, 14) Akalonda twamunena intazi zitu zyonsinye na vino vikatusakamika. (Waheberi 4:14-16) Acino cikalenga twawa pa mutende nu Leza.

17. Pa mulandu wa kuti Yesu watufwizile, avizima ci vyo tuliyitopwa?

¹⁷ Twawa ni suwilo lyakwikala uwumi wa muyayaya. “Icilambu ca luwembu amfwa, lelo ica wila ca kwe Leza awumi wa muyayaya mwe Klistu Yesu e Tatakulu.” (Waroma 6:23) Pa mulandu wa kuti Yesu watufwizile, twawa ni syuko lya kwizayikala umuyayaya nu wumi uwuzima. (Ukuwumbulika 21:3, 4) Nomba avyani vyo tuzipizile ukucita pa kuti twize twikale umuyayaya?

18. Avyani vino vikalanjizya ukuti e Yehova watutemwa?

¹⁸ Yelenganyani vino mukakwivwa icete wumwi nga wamipa ica wila icizima. Inzuwi acili ica wila icizima nkaninye cino swensinye tufwile twasalifizyapo Yehova. Pe Yohani 3:16 e Baibolo ikati “Leza watemilwe nkaninye awa mu nsi ica kuti wapile Umwana wakwe wino wakwatwa wenga.” Acisinka, e Yehova watutemwa sana ica kuti watupile nu Umwana wakwe wino watemwa sana. Na sweswenye twamanya ukuti e Yesu watutemwa sana, amuno wayikundizile ukutufwila. (Yohani 15:13) Inzuwi yizipizile ukulenga swensinye ukusinincizya ukuti e Yehova ne Yesu watutemwa nkaninye.—Wagalatiya 2:20.

19, 20. (a) Uzye tungacita wuli pa kuwa iviwuza vya kwe Yehova? (b) Mungalanjizya wuli ukuti mwasuwila mu nzuwi ya kwe Yesu?

¹⁹ Pano nomba mwasambilila pa kutemwa ukukulu kuno Leza wawa nako, uzye mungacita wuli pa kuti muwe e ciwuza wakwe? Citapepuka ukutemwa umuntu wino musitela mulolepo. Pe Yohani 17:3 pa kati tungamanya Yehova. Nga mwamumanya, muliwamutemelwako, nga mwamutemelwako, muliwalonda ukumuwombela, icisyazile muliwa e ciwuwa wakwe. Acino twalililani ukusambilila pe Yehova ukupitila mu kusambilila Baibolo.—1 Yohani 5:3.

²⁰ Suwilani inzuwi ya kwe Yesu. E Baibolo ikalanda ukuti “wino akasuwila Umwana akawa nu wumi wa muyayaya.” (Yohani 3:36) Uzye ukuwa ni suwilo cikapiliwula cani? Cikapiliwula ukukonka vino Yesu watunena ukucita. (Yohani 13:15) Tutazipizile ukulanda vye ukuti twasuwila mwe Yesu. Pa kulanjizya ukuti twasuwila mu nzuwi ya kwe Yesu, tuzipizile ukucita vino vikalanjizya ukuti twawa ni suwilo. Amuno pe  Jemusi 2:26, pa kalanda ukuti: ‘Isuwilo lino litawa ni milimo lyo lyafwa.’

21, 22. (a) Amulandu ci wuno tuzipizile twazanilwa ku Cizusyo ca mfwa ya kwe Klistu cila mwaka? (b) Avyani vino tulisambilila mu Cipandwa 6 ne 7?

²¹ Mwazanwa ku Cizusyo ca mfwa ya kwe Klistu. Uwanda wuno Yesu wafwanga watusambilizizye ukuti tuzipizile twakwizuka imfwa yakwe. Cila mwaka tukazanwa ku Cizusyo cino tukakwita nu kuti “Ica Kulya ca kwe Tatakulu ica Manguzi.” (1 Wakorinte 11:20; Mateyu 26:26-28) E Yesu akalonda twakwizuka ukuti wapile uwumi wakwe uwupwililike ukuwa inzuwi pa kuti tuwe nu wumi. Watili: “Mwacita wonye wo-o ku kunjizucizya.” (Wazyani Luka 22:19.) Nga mwazanwa ku Cizusyo lyo mu kulanjizya ukuti mu kakwizuka inzuwi ya kwe Yesu swinya mukasalifya pe vyo Yehova ne Yesu watutemwa.—Wazyani Amazwi na Yanji pa 16.

²² Kutawa ica wila icicindame ukucila pa nzuwi ya kwe Yesu. (2 Wakorinte 9:14, 15) Yo-o inzuwi yilileta ivizima na kwe wano wafwa. Mu Cipandwa 6 ne 7 tulisambilila vino co-o cilicitika.