5ǁÎ DANAǃÂS
Xoremarib—Elob kai ǀkhaeb
1, 2. (a) Tae-e ǀkhaexū-e ra ǂoaǂamsa kaiba du? (b) Tae-i ǃaromab xoremariba Elob ti kai ǀkhae?
TAE kai ǀkhae-e du ge ǃkhōǃoa tsâ hâ i? ǀKhae xū-i ge ǂhâbasa tama ǂgui mariba i nî ǂgansa ǁî-e du nî ǃgôaǃgâs aiǃâ. ǀKhaeb ga ra ǂkhî kai du tamas ka io kaise du ǂhâ hâ xū-i o, o du ge kaise ra aio.
2 Hoa ǀkhae xūn Elob ge mā dan xa i ge ǀgui ǀkhaeba hâ kaise da ǂhâ hâba hoan ǀgawiga. Nēb ge Elob kai ǀkhaeba khoesib ǃoa. Nē danaǃâs ǃnâ da ge nî ǁkhāǁkhāsen Jehovab ge ǁîb di ǀGôab, Jesub Xristuba a sîsa ǀamose da nî ûi ǁkhā ga. (Khomai re Mateub 20:28.) Jesuba ǃhūbaiba ǃoa xoremarib ase sîs ǃnâ-ūb ge Jehovaba ge ǁgau amaseb a ǀnam da sa.
XOREMARIBA A TAE?
3. Tae-i ǃaroman khoena ra ǁō?
3 Xoremarib ge Jehovab ǀgauba khoena ǃnoraǃnorasa ǁoreb tsî ǁōba xu. (Efeseǁîn 1:7) Xoremariba da ǂhâ hâ ǃkhaisa ǁnâuǃās ǃaroma da ge aibe nî ǂan tae-i ge tsoatsoas ǃnâ īsa ǀoadisi kurigu ǃkharu hâse Edenni ǃhanab ǃnâ. Sida di ǂguro ǁgûra, Adammi tsî Eva hâra ge ge ǁore. ǁOre ra ge ǃkhais ǃaroma ra ge ge ǁō. Sida tsîn ge ra ǁō ǁoreba da ge Adammi tsî Evasa xu ǀumi amaga.—9ǁÎ ǀArosa ǃgāsasiba mû re.
4. Adamma ge ham-i tsî tae-eb ge ūhâ i?
4 Jehovab ge Adamma kuru o, ob ge ǁÎba ǀō-aisa xū-e ge mā. ǁÎb ge Adamma dīǀoaǀoasa kurusa ūhâ khoese ge kuru. ǁÎb ge dīǀoaǀoasa ǂâis tsî dīǀoaǀoasa soros tsîna ge ūhâ i. ǁÎb ge ûib ǃnâ ga ǀaesen, kaira tsî ǁō tama hâ. Jehovab ge Adamma kuru amagab ge ǁÎba dadasa-i khama ge ība bi i. (Lukab 3:38) Jehovab ge hoaǁae ǁîb ǀkha gere ǃhoa. Jehovab ge Adamma ǃgāsase ge mîǃāba tae-eb ǁîba xu ǂgaoǀkhā hâsa tsî ǁkhoaxaba bi sîsen-e ge mā bi dīb nîse.—Genesis 1:28-30; 2:16, 17.
5. Tae-e i ra ǂâibasen Elobmîs ga mî o, Adammi ge “īb Elob dib” ǃoa a kuruhesa?
5 Adammi ge “īb Elob dib” ǃoa ge kuruhe. (Genesis 1:27) Jehovab ge ǁîba ǁîb ūhâ ǀgauga ge mā, ǀnammi, gā-aisib, ǂhanu-aisib tsî ǀgaib tsîna. ǁÎb ge Adamma aitsama ǁhûibasens ǁkhāsiba ge mā. Adammi ge ge robot tama hâ i. Elob ge ǁîba ge kuru îb ǁhûi tae-i a ǂhanus tsî tae-i a tsūs tsîn ǁaegu. Adammi ga ǁhûi hâ o Eloba ǁnâuǀnamsa, ob ge Paradais ǃnâ ǀamosib kōse ga ûi hâ.
6. Adammi ge Eloba ǁnâuǀnamoǃnâ o, tae-eb ge a ǂoaǃnâ? Nēsa mati sada ra tsâǀkhā?
6 ǁÎb ge Eloba ǁnâuǀnamoǃnâ o, ob ge ǁōb ǁkharaba ge māhe, ǁnās ǀkhab ge Adamma kaise ǀgapi ǃgôasa xū-e ge ǂoaǃnâ. ǁÎb ge ǀō-aisa ǃgaeǀhaos Jehovab ǀkhab ge ūhâ isa ge ǂoaǃnâ tsî ǁîb di dīǀoaǀoasa kurus tsî ǁîb di Paradais oms tsîna. (Genesis 3:17-19) Adammi tsî Evas tsîn ge ge ǁhûi Eloba ǁnâuǀnamoǃnâsa, ǁnās ǀkha ra ge ǁîra ǃâubasen-e ūhâ tama hâ. Adammi di ǁnâuǀnamoǃnâsib ǃaroma i ge, ǁoreba ǃhūbaib ai ge hā “tsî ǁoreba xu ǁōba, tsîb ge ǁōba ǁnāti hoa khoena ge ǃgûǃnâǃganu, hoan gere ǁore amaga.” (Romeǁîn 5:12) Adammi ge ǁore o, ob ge aitsama ge ‘ǁamaxūsen’ tsî sada tsîna ǃgāsis, ǁoreb tsî ǁōb dis ǃnâ ge ǁamaxū. (Romeǁîn 7:14) Sada ǃaroma ǃâubasen-e hâ-e? Î, hâ a.
7, 8. Xoremariba a tae?
7 Xoremariba a tae? Xoremarib di ǃgaoǃgaos ge ǀgam xūna ǃkhōǂgā hâ. ǂGurose, xoremarib ge ǁguibas hîna ra matarehesa khoe-e ǃnoraǃnoras tamas ka io xū-e ǁama oas disa. ǀGamǁîse, xoremarib ge ǂganhe ra marisa ra ǃgū-ai tamas ka io xū-e ra ǀoaǀoa.
8 Khoe-i ge a ǀkhai Adammi ge ǂgāǃnâ da ǂkhôaba xu ǃnoraǃnora da ǁkhā-e ǁoreb ge o. Xawe Jehovab ge daoba ge ǁguiba da î da ǁoreb tsî ǁōba xu ǃnora ǁkhā. Hā re î da ǁkhāǁkhāsen matib xoremariba ra sîsen ǀgausa tsî mati da ǁîba xu a ǀama ǁkhā ǀgaus tsîna.
JEHOVAB GE XOREMARIBA A MĀ ǀGAUB
9. Xoremariba mati nî matare-e?
9 Sada ǀgui-i tsîn ge tātsēs tsîna xoremari-e a matare ǁoa dīǀoaǀoasa ûib hînab ge Adamma ǂoaǃnâb ai. Tae-i ǃaroma? Hoa da dīǀoaǀoasa kurusa ūhâ tama hâ ǃkhais ǃaroma. (Psalmdi 49:7, 8) Xoremarib hîna nî matereheb ge ǀnî hâ dīǀoaǀoasa kurusa ūhâ khoe-e xu nî hā. ǁNā-amaga i ge ra mîhe “ǁî-aitsama hoan ǃaroma xoremarib ase ge māsenna.” (1 Timoteub 2:6) Xoremarib ge nî ǀguitikō Adammi ge ǂoaǃnâ ûib ǀkha i nî ǀgau ga.
10. Jehovaba mati xoremariba ge mā?
10 Jehovaba mati xoremariba ge a mā? Jehovab ge ǁîb di ǀnamǀnamsa ǀGôaba ǃhūbaib ǃoa ge a sî. Nē ǀGôab, Jesub ge kurusaben di ǂguroǃnaesabeba. (1 Johaneb 4:9, 10) Jesub ge ge māsenxa i ǁîb Îba ǁnâxūsa tsî ǁîb ǀhomsi ǁanǃkhaib tsîna. (Filipeǁîn 2:7) Jehovab ge Jesuba ǀhomma xu ǃhūbaib ǃoa ge sî tsîb ge Jesuba dīǀoaǀoasa khoese ge ǃnaehe.—Lukab 1:35.
Jehovab ge ǁîb ǀGôaba ǀgapi xoremarib ase ge mā da
11. Matib ǀgui khoeba xoremarib ase a ī ǁkhā hoa khoen ǃaroma?
11 ǂGuro khoeb Adammi ge ǁîb di dīǀoaǀoasa ûiba hoa khoena ge ǂoaǃnâ kai Jehovabab ge ǁnâuǀnamoǃnâ o. ǀNî hâ khoeba ǁōba Adammi ǀgôan hoana ga ūbēba hâ? Î. (Khomai re Romeǁîn 5:19.) Jesub hîna tātsēs tsîna ǁore tamab ge ǁîb di dīǀoaǀoasa ûiba xoremarib ase ge mā. (1 Korinteǁîn 15:45) ǁÎb di dīǀoaǀoasa ûib ge nî sîsenūhe îb Adammi ǀgôan hoana ǁōba xu ǃnora.—1 Korinteǁîn 15:21, 22.
12. Tae-i ǃaromab Jesuba ǁnātikōse ǃgomma gere tsâ?
12 Elobmîs ge ra ǁguiǃā matikōseb Jesuba ǃgomma gere tsâsa ǁōb nîs aiǃâ. ǁÎb ge karoǂgaoxase gere ǂnauhe, ǃgâuhaib aib ge ge ǃgâuhe tsîb ge ǂau tsî tsûsa ǁōba ge tsâ. (Johaneb 19:1, 16-18, 30) Jesuba tae-i ǃaroma nētikōse ǃgomma gere tsâ? Satanni ge mî amaga khoe-i Elob ǃoa-ai ǂgomǂgomsase hâ tidesa ǀgaisase i ga ǃâitsâhe o. Jesub ge ge ǁgau dīǀoaǀoasa kurusa ūhâ khoe-i tsîn Elob ǃoa-ai ǂgomǂgomsase a hâ ǁkhāsa karosa ǃgomma i ga tsâ xawe. ǂÂis ǀguisa hî re Jehovab ge matikōse ǂnīsa isa Jesub ai!—ǂKhoamîdi 27:11; 15ǁî ǀArosa ǃgāsasiba mû re.
13. Xoremariba mati ge a matarehe?
13 Xoremariba mati ge a matarehe? Jesub ge ǁîb Îba ǁîb ûiba ge mā. Nisanni di 14ǁî tsē 33ǁî kurib Jodeǁîn di ǁkhâb dis ǃnâb ge Jehovaba ge mā-am îb Jesuba ǁîb khākhoen xa ǃgamhe. (Hebreǁîn 10:10) ǃNona tsēdi khaoǃgâb ge Jehovaba Jesuba ge ûi-ûi ǁgansi khoeses ose xawe gagasi khoese. Egab ge Jesuba ǁîb Îb ǃoa a oa o ǀhommi ǃnâ, ob ge ǁîb di dīǀoaǀoasa khoesi ûiba Jehovaba xoremarib ase ge a mā. (Hebreǁîn 9:24) Nēsib xoremariba matarehe hâ o, o da ge ǃēsa ūhâ ǁoreb tsî ǁōba xu ǃnoras dība.—Khomai re Romeǁîn 3:23, 24.
MATI DU XOREMARIBA XU A ǀAMA ǁKHĀ ǀGAUS
14, 15. Tae-e da nî dī în sada di ǁorena ǀûbahe ǁkhā?
14 ǀNai da ge Elob di kai ǀkhaeba xu ra ǀama. Hā re î da kē mati da nēsi a ǀama ǁkhā tsî hānîǁaeb ǃnâs tsîna.
15 Sada ǁoren ge a ǀûbasa. ǃGom i ge a ǂhanuse hoaǁae dīsa. Dīsā da ge ra tsî ǀnî ǁaegu ai da ge xūna ra mî tsî ǂhanuse dī tama hâ. (Koloseǁîn 1:13, 14) Mati da a ǀûbahe ǁkhā? Amabes ǃnâ da ge nî ǃhausen tsūse da ga dī o tsî ǃgamǃgamsen hâse Jehovab ai ǀûbaba nî ǂgan. ǁNāpaxū da ge ǂgomǃgâsiba a ūhâ ǁkhā sada ǁoren go ǀûbahesa.—1 Johaneb 1:8, 9.
16. Tae-e da nî dī ǃanu ǃgâi ǂâisa da ga ūhâ ǂgao o?
16 ǃAnu ǃgâi ǂâisa da ge a ūhâ ǁkhā. Sada di ǃanu ǃgâi ǂâis ga mîba da o xū-e da go dīsāsa, o da ge ǀhapixase ra tsâ tsî xū-e da ǃoaǂui tama hâses tsîna ra tsâ. Xawe i ge ǂhâbasa tama hâ ǀûsensa. Jehovab ai da ga ǀûbaba ǀkhomma o, o da ge a ǂgomǃgâ ǁkhā ǃgâ dab nîsa tsî nî ǀûba dasa. (Hebreǁîn 9:13, 14) Jehovab ge ra ǂhâba î da ǁîb ǀkha sada di ǃgomsina ǃhoa tsî ǂkhabusigu xas tsîna. (Hebreǁîn 4:14-16) ǁNās ǀkha da ge ǂkhîba a ūhâ ǁkhā Elob ǀkha.
17. Mâ ǀkhaega Jesub di ǁōb xa ge ī ǁkhā kaihe?
17 ǃÂubasensa da ge a ūhâ ǁkhā ǀamosib kōse ûis diba. “ǁŌb ge a ǁoreb di mādawa-am xui-ao, xawe ǀkhommi hōs ge a ǀamo ûi, Xristub Jesub sada ǃKhūb ǃnâ.” (Romeǁîn 6:23) Jesub ge sada ǁōba ǃkhais ǃaroma da ge ǀamose ûi ǁkhā tsî dīǀoaǀoasa ǂurusib tsîna a ūhâ ǁkhā. (ǂHaiǂhais 21:3, 4) Xawe tae-e da nî dī î da nē ǀkhaega ǃkhōǃoa?
XOREMARIBA ŪǃOA Î DU NÎ?
18. Mati da a ǂan Jehovab a ǀnam da ǃkhaisa?
18 ǂÂi re matib sadu ǂgaoba ra tsâǀkhāhesa khoe-i ga îsa ǀkhae xū-e mā du o. Xoremarib ge kaise a ǀgapi ǀkhaeba hoan xa tsî da ge Jehovaba nî gangan ǃgamse ǁîb ǃaroma. Johaneb 3:16 ge ra mî “ǁnātikōseb ge Eloba ǃhūbaiba ge ǀnam, ob ge ǁîb di ǀguise ǃnae hâ ǀGôaba ge mā.” Î, Jehovab ge sada ǁnātikōse a ǀnam ǁnā-amagab ge ǀnammi hâ ǀGôab, Jesuba sada ge mā. Sada tsîn ge a ǂan Jesub a ǀnam da sa māsenxaseb ge sada ǃaroma hā ǁō amaga. (Johaneb 15:13) Xoremarib di ǀkhaeb ge a ǂanǃgâ kai du ǁkhā Jehovab tsî Jesub tsîkha amabes ǃnâ a ǀnam du sa.—Galateǁîn 2:20.
Jehovab xa da go ǁkhāǁkhāsen khami da ge a ǁîb ǀhōsa kai ǁkhā tsî sada di ǀnammi ǁîba da ūba hâb ge nî ǃgam
19, 20. (a) Mati da Jehovab ǀhō kai ǁkhā? (b) Mati da a ǁgau ǁkhā Jesub di xoremarib ǁguibasa da ra ūǃoa ǃkhaisa?
19 Nēsi du go Elob di kai ǀnammi xa ǁkhāǁkhāsen o, mati du a ǁÎb ǀhō kai ǁkhā? Supu tama i ge hâ mû tama du hâ khoe-e ǀnamsa. Johaneb 17:3 ge ra mî, Jehovaba du nî ǂan ǃkhaisa. Nēsa du ra dī hînab ge sadu ǀnammi ǁîb ǃoagu du ūhâba nî ǃgam, tsî du ge ǁîba nî ǂkhîǂkhî ǂgao tsî nî ǁîb ǀhō kai. ǁKhāǁhāsen ǀgara re Jehovab xa Elobmîsa ôaǃnâs ǃnâ-ū.—1 Johaneb 5:3.
20 Jesub di xoremarib ǁguibasa ūǃoa re. Elobmîs ge ra mî “ǀGôab ǃnâ ra ǂgom-i ge ǀamo ûiba ūhâ-e.” (Johaneb 3:36) ǂGomsa ûiǂuisa tae-e ra ǂâibasen? Nēs ge ra ǂâibasen Jesub ge ǁkhāǁkhā da khami dīsa. (Johaneb 13:15) Amǃnâs ǀkha ǀgui da ge a mî ǁoa Jesub ǃnâ da ra ǂgom ti. Xoremariba ūǃoas ge ra ǂâibasen, xū-e da nî sada ǂgoms ǀkha dīsa. Jakobub 2:26 ge ra mî: ‘ǂGoms sîsengu ose ǁō hâ’ ti.
21, 22. (a) Tae-i ǃaroma da Jesub di ǃuiǂûsa kurib hoaba nî hâǃnâ? (b) Tae-e ǃnaniǁî tsî hûǁî danaǃâra ǃnâ nî ǃhoaǃgaohe?
21 Jesub ti ǃuiǂûs di ǂâiǂâisensa hâǃnâ re. ǁŌb nî ǃuis aiǃâb ge Jesuba ge ǁkhāǁkhā da î da ǁîb ti ǁōb xa ǂâiǂâisen. Nēsa da ge kurib hoaba ra dī tsî nēs ge ‘ǃKhūb di ǃuiǂûs’ ti ra ǂgaihe. (1 Korinteǁîn 11:20; Mateub 26:26-28) Jesub ge ra ǂhâba î da tā ǀuru ǁîb di dīǀoaǀoasa ûibab ge xoremarib ase mā dasa. Nētib ge ge mî: “Dī nēsa ti ǂâiǂâisensa ǃoa.” (Khomai re Lukab 22:19.) ǃUiǂûsa du ga hâǃnâ o, o du ge ra ǁgau xoremarib xa du ra ǂâisa tsî Jehovab tsî Jesub ūba da hâ kai ǀnamma ra ūǃoa ǃkhaisa.—16ǁÎ ǀArosa ǃgāsasiba mû re.
22 Xoremarib ge kai ǀkhaeb hîna da ge hōǁkhā iba. (2 Korinteǁîn 9:14, 15) Nē ǀgapi ǀkhaeba xu i ge miliundi khoen hîna ge ǀnai a ǁōna nî ǀama. ǃNaniǁî tsî hûǁî danaǃâra ǃnâ da ge nî ǃhoaǃgao matis nēsa a ī ǁkhāsa.
