1, 2. 1) ¿Keniuj tionmomachilia keman se akin kuali iuan tionmouika mitsonpaleuia? 2) ¿Keyej tein Jiova kichiuak okachi kipia ipatiuj?

¿KEMANSA mitsonpaleuianij keman okachi monekia? Xa keman mitsonpolojtoya tomin se akin kuali iuan tionmouika mitsontayokolij. Tejuatsin xa semi tionyolpakik uan tionmotasojkamatik.

² Jiova techmakak se taman tein okachi kipia ipatiuj. Kemej tikitaskej itech nejin tamachtilis, Jiova kiualtitanik iKonetsin, Jesucristo, maj toka momikiliki. Ijkon uelis tinemiskej nochipaya (xikonixtajtolti Mateo 20:28). Keman kiualtitanik Jesús nikan taltikpak, Jiova kinextij ke yekmelauj techtasojta.

3. ¿Keyej timomikiliaj?

³ Ika inemilis Jesús tein kitemakak, Dios kichiuas maj amo titajtakolejkejok nion maj timomikilikanok (Efesios 1:7). Moneki tikmatiskej tein panok ne uejkauj itech xochital tein moajsia Edén. Nejin techpaleuis maj tikajsikamatikan keyej monekia maj Jesús toka momikiliani. Toyekinika tatuan, Adán uan Eva, tajtakojkej uan yejua ika momikilijkej. Tejuan no timomikiliaj porin Adán uan Eva techpanoltilijkej tajtakol. (Xikonita tajtolmelaualis 9.)

4. ¿Akoni katka Adán, uan keniuj nemia keman Dios kichijchiuak?

⁴ Dios kichijchiuak yekinika takat, Adán. Keman kichijchiuak amo tajtakolej katka. Nejin semi kipiaya ipatiuj porin Adán amo keman kinemiliaya tein amo kuali uan amo keman kokolispeuaskia, amo ueuentsintiaskia  nion momikiliskia. Kemej Jiova kichijchiuak Adán, yejuatsin katka kemej ipopaj oso itat (Lucas 3:38). Dios tajtouaya iuan Adán uan kuali kimelauiliaya tein kinekia maj kichiua. Uan no, kimakak se tekit tein kiyolpaktiskia kichiuas (Génesis 1:28-30; 2:16, 17).

5. ¿Toni kijtosneki Biblia keman kijtoua ke Dios kichijchiuak Adán “kemej yejuatsin”?

⁵ Dios kichijchiuak Adán “kemej yejuatsin” (Génesis 1:27). Nejin kijtosneki ke ijkon kemej Jiova tetasojta, tamatkej uan nochi kichiua ika melaujkayot, Adán no ijkon katka. Nejin se taman tein tapialmej amo kichiuaj. Yejuan amo uelij kinemiliaj toni kichiuaskej. Sayoj ke Dios kichijchiuak Adán kemej ueliskia iselti kinemiliskia ox kichiuaskia tein kuali oso tein amo kuali. Komo Adán kitakamatiskia Jiova, nemiskia nochipaya itech Xochital.

6. ¿Toni kipanok Adán keman amo kitakamatik Dios?

⁶ Kemej Adán amo kitakamatik Dios, semi tajyouij. Jiova kiixtalij maj momikili uan amo kuali mouikayaok iuan. Mochiuak tajtakolej uan Dios kikixtij itech Xochital (Génesis 3:17-19). Adán uan Eva amo akinok kinmakixtiskia porin amo kitakamatkej Dios.

7, 8. ¿Keniuj techtajyouiltia tein kichiuak Adán?

⁷ Kemej Adán amo tatakamatik, “tajtakol momauak ya tech nochi senmanauak. Uan [...] ongak mikilis nochi senmanauak ika por ne tajtakol de Adán. Uan no ne mikilis mosouako uan takitskijtinemiko inpan nochi in taltikpakuani porin nochi in taltikpakuani motajtakolmakakke” (Romanos 5:12). Keman Adán tajtakoj, yejua uan tejuan kemej yeskia peuak ‘titeaxkatij’ itech tajtakol uan mikilis (Romanos 7:14). Sayoj ke ¿uelis tikchiaskej maj techmakixtikan? Kemaj. Jiova kitemakak tein techpaleuis.

 ⁸ Keman Adán tajtakoj kichiuak maj timomikilikan. Nejin semi techtajyouiltia, sayoj ke tejuan amo ueliskia timomakixtiskej porin no titajtakolejkej. Sayoj ke Jiova kitemakak tein techpaleuis maj amo titajtakolejkejok nion maj timomikilikanok. Maj tikitakan toni kitemakak uan keniuj techpaleuia.

9. ¿Keniuj ueliskia oksepa tikchiaskej tinemiskej nochipaya?

⁹ Kemej Adán amo tajtakolej katka, yejua uan ikoneuan ueliskiaj nemiskej nochipaya. Sayoj okse takat akin no amo tajtakolej ueliskia kichiuas maj tiikoneuan Adán oksepa tikchiakan tinemiskej nochipaya (1 Timoteo 2:6). Sayoj ke kemej tinochin titajtakolejkej, nion semej ueliskia tikchiuaskej maj oksepa tikpiakan tein Adán kipoloj (Salmo 49:7, 8).

10. ¿Toni kichiuak Jiova tein ika techmakixtiskia?

¹⁰ ¿Toni kichiuak Jiova? Kiualtitanik nikan taltikpak Jesús, iKonetsin akin okachi kitasojta (1 Juan 4:9, 10). Jesús motemakak kikauas iTajtsin uan tekit tein kipiaya ompa iluikak (Filipenses 2:7). Jiova kipanoltij inemilis Jesús itech iijtik María. Ijkon, keman Jesús yolik amo tajtakolej katka, yejua ika amo kokolispeuaskia, amo ueuentsintiaskia nion momikiliskia (Lucas 1:35).

11. ¿Keniuj sayoj se takat ueliskia techmakixtis tinochin?

¹¹ Kemej tikitakejya, yekinika takat amo kitakamatik Jiova uan kichiuak maj tinochin timochiuanij titajtakolejkej. ¿Ueliskia sayoj se takat techmakixtis tinochin? Kemaj. (Xikonixtajtolti Romanos 5:19.) Kemej Jesús amo keman tajtakoj, yejua uelia nemia nochipaya. Yejua ika ueliskia motemaktis uan ijkon kiixpolos mikilis uan kinpaleuis ikoneuan Adán maj nemikan nochipaya (1 Corintios 15:21, 22, 45).

12. ¿Keyej semi tajyouij Jesús?

 ¹² Biblia kijtoua nochi tein kijyouij Jesús achto ke momikiliskia. Kikuetaxuijkej, kipilojkej itech se kouit, uan kemej amo niman momikilij semi tajyouij (Juan 19:1, 16, 30). ¿Keyej semi tajyouij Jesús? Porin Satanás kijtojka ke nion akin kitakamatiskia Dios komo kipanouaya uejueyi ouijkayomej. Sayoj ke Jesús kinextij ke se takat akin amo tajtakolej uelis kisentokas kitakamatis Dios maski semi tajyouis. ¡Jiova semi kiyolpaktij tein kichiuak iKonetsin! (Proverbios 27:11.) (Xikonita tajtolmelaualis 15.)

13. ¿Toni kichiuak Jesús keman yajki iluikak?

¹³ Itech tonal 14 metsti nisán xiuit 33, akin kitauelitayaj Jesús kimiktijkej (Hebreos 10:10). * Eyi tonal satepan, Jiova oksepa kimakak inemilis, sayoj ke amo moitayaok. Satepan, Jesús oksepa yajki iluikak. Keman ompa yetoyaya, yajki iixpan iTajtsin kiixtauato totajtakoluan. Uan iTajtsin kiselij kemej taxtauil inemilis tein toka kitemakak (Hebreos 9:24). Ijkon, Jesús techpaleuij maj satepan amo titajtakolejkejok nion maj timomikilikanok (xikonixtajtolti Romanos 3:23, 24).

14, 15. ¿Toni moneki tikchiuaskej komo tiknekij maj Jiova techtapojpolui?

¹⁴ Dios kitemakak inemilis iKonetsin uan nejon techpaleuia itech miak taman. Maj tikitakan keniuj techpaleuia axkan uan keniuj techpaleuis satepan.

¹⁵ Dios techtapojpoluia. Ouij techkisa nochipa tikchiuaskej tein kuali. Tinochin kemansa tikchiuaj uan tikijtouaj tein amo kuali. ¿Keniuj uelis techtapojpoluis  Dios? Moneki tiknextiskej ke yekmelauj techyolkokoua tein tikchiujkej uan ika nochi toyolo tiktajtaniskej Jiova maj techtapojpolui. Komo ijkon tikchiuaj, uelis tikyekmatiskej ke yejuatsin techtapojpoluis (Colosenses 1:13, 14; 1 Juan 1:8, 9).

16. ¿Toni techpaleuis maj amo tikmachilikan ke amo technamiki timotokiskej iuan Dios?

¹⁶ Amo tikmachiliskejok ke amo technamiki timotokiskej iuan Dios. Komo tiknemiliaj ke tikchiujkej teisa tein amo kuali, xa timoyolkokouaj uan tikmachiliaj ke amo technamiki timotokiskej iuan Dios. Sayoj ke moneki amo timosenkauaskej. Komo tiktataujtiaj Jiova maj techtapojpolui, uelis tikyekmatiskej ke techkakis uan techtapojpoluis (Hebreos 9:13, 14). Jiova kineki maj tiktapouikan tein yeski kuejmol oso amo kuali tanejnekilis tein tikpiaskej (Hebreos 4:14-16). Ijkon, amo timoyolkokojtoskejok nion tikmachiliskejok ke amo technamiki oksepa timotokiskej iuan Jiova.

17. ¿Toni tatiochiualismej uelis tikseliskej porin Jesús toka momikilij?

¹⁷ Uelis tinemiskej nochipaya. “Tajtakol [...] tetaxtauia sayo ika mikilis. Pero Totajtsin Dios techtayokolia yejua ne yek nemilis nachipa porin tipoutinemij iuan Totekotsin Cristo Jesús.” (Romanos 6:23.) Kemej Jesús toka momikilij, uelis tinemiskej nochipaya uan amo kemanok tikokolispeuaskej (Apocalipsis 21:3, 4).

18. ¿Keniuj tikmatij ke Jiova techtasojta?

¹⁸ Xikonnemili keniuj semi tionyolpakik keman se akin kuali iuan tionmouika mitsontayokolij tomin keman semi mitsonpolojtoya. Yejua semi mitsontasojta.  Keman Jiova kitemakak iKonetsin maj toka momikili yejua tein okachi kipia ipatiuj tein toka kichiuak, uan moneki semi tiktasojkamatiliskej. Juan 3:16 kijtoua ke “Totajtsin Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin”. Kemej tikitaj, Jiova semi techtasojta, yejua ika kitemakak iKonetsin. Uan tikmatij ke Jesús no techtasojta, porin toka momikilij (Juan 15:13). Inemilis Jesús tein kitemakak kinextia ke Jiova uan Jesús yekmelauj techtasojtaj tisejsemej (Gálatas 2:20).

19. ¿Keniuj uelis kuali tionmouikas iuan Jiova?

¹⁹ Axkan ke tikonmati ke Jiova semi techtasojta, ¿keniuj uelis kuali tionmouikas iuan? Xikonixmati Jiova. Ouij techkisa tiktasojtaskej akin amo tikixmatij. Yejua ika Juan 17:3 techyoleua maj tikixmatikan Jiova. Komo tikonixmati, okachi tikontasojtas, tikonnekis tikonchiuas tein kiyolpaktia uan kuali tionmouikas iuan. Yejua ika xikonsentoka xionmomachti Biblia uan ijkon tikonixmatis Jiova (1 Juan 5:3).

20. ¿Keniuj tiknextiaj ke titakuaujtamatij itech inemilis Jesús tein kitemakak?

²⁰ Xiontakuaujtamati itech inemilis Jesús tein kitemakak. Biblia kijtoua ke “nochi nekes ten takuautamatiske iuan ne Ikonetsin Dios, yejuan nojonkes kipiaske ne yek nemilis nachipa” (Juan 3:36). ¿Keniuj tiknextiaj ke titakuaujtamatij? Keman tikchiuaj tein Jesús tamachtij (Juan 13:15). Amo sayoj moneki tikijtoskej ke tikneltokaj Jesús, ta no moneki tiknextiskej ika tein tikchiuaj ke titakuaujtamatij itech inemilis tein kitemakak. Santiago 2:26 kijtoua ke “se itakuautamatilis amo teyi ipatiu komo amo kinextijtinemi [...] tatakamatilis”.

21, 22. 1) ¿Keyej moneki timosentiliskej xijxiujtika keman moelnamiki imikilis Cristo? 2) ¿Toni tikitaskej itech tamachtilismej 6 uan 7?

 ²¹ Xionyoui keman moelnamiki imikilis Cristo. Youak achto ke kimiktiskiaj, Jesús tanauatij maj se kielnamiki imikilis. Tikchiuaj nejin keman xijxiujtika timosentiliaj keman moelnamiki imikilis (Mateo 26:26-28). Jesús kineki maj tikelnamikikan ke kitemakak inemilis uan ika techmakixtij. Yejua kijtoj: “Xiksentokakan xikchiujtokan nejin uan ika xinechelnamikikan” (xikonixtajtolti Lucas 22:19, TNM). Keman timosentiliaj ijkuak moelnamiki imikilis Cristo, tiknextiaj ke tikelnamikij ke toka momikilij uan ke Jiova uan Jesús semi techtasojtaj. (Xikonita tajtolmelaualis 16.)

²² Amo moajsi okse taman tein okachi kipia ipatiuj ke tein Jiova kichiuak keman kitemakak iKonetsin maj toka momikili (2 Corintios 9:14, 15). Itech tamachtilismej 6 uan 7 tikitaskej keniuj inemilis Jesús tein kitemakak no kinpaleuis akin momikilijkejya.