1, 2. 1) ¿Tleka tikpatioita tlen mitstliokoliaj? 2) ¿Tleka miak ipati Jehová okiualtitlanki iKone ma techmakixtiki?

¿SE TONAL omitstliokolijkej itlaj tlen sapanoa omitspakti? ¿Tleka tikpatioita ijkuak itlaj mitstliokoliaj? Amo moneki yetos patio. Tiktlasojkamati porque mitsyolpaktia noso moneki tikpias.

² ToTajtsin Dios yotechtliokoli miak tlamantli pero onka se tlen okachi tikpatioitaj. Ijkuak okiualtitlanki iKone ma techmakixtiki, otechmakak se ueyi tetliokolil tlen techpaleuis nochipa tiyoltoskej (xiktlajtolti Mateo 20:28). Jehová okiteititi melauak techtlasojtla ijkuak okiualtitlanki Jesús nikan tlaltikpak. Itech nin tlamachtil okachi timomachtiskej non tlamantli.

3. ¿Tleka tiixpoliuij?

³ Ika imikilis Jesús, toTajtsin Dios techmakixtia itech tlajtlakoli uan mikilistli (Efesios 1:7). ¿Tleka omonekiaya ma techmakixtikan? Achto moneki tikajsikamatiskej tlen okichijkej Adán uan Eva ijkuak okatkaj itech xochitlali Edén. Yejuan omikej porque otlajtlakolchijkej. Otechpanoltilijkej tlajtlakoli, ik non, noijki tiixpoliuij (xikita nota 9).

4. ¿Akin okatka Adán uan tlen okipiaya?

 ⁴ Achto tlakatl tlen toTajtsin Dios okichijchi ye Adán uan amo okipiaya tlajtlakoli. Ikuayejyekol uan itlalnakayo kuali okatka, kijtosneki amo keman mokokoskia, amo ueuejtiskia noso kokoxkatiskia uan amo ixpoliuiskia. Jehová okichijchi Adán, ik non, okatka ken iTajtsin (Lucas 3:38). ToTajtsin Dios iuan omotlapouiaya uan okiyekiluiaya tlen omonekiaya kichiuas. Noijki okimakak se kualtsin tekitl (Génesis 1:28-30; 2:16, 17).

5. ¿Tleka tikijtoaj toTajtsin Dios okichijchi Adán ijkon ken ye?

⁵ ToTajtsin Dios okichijchi Adán ijkon ken ye (Génesis 1:27). Non kijtosneki ijkon ken Jehová tetlasojtla, ixtlamatki, nochi kichiua ika melajkayotl uan kipia chikaualistli, noijki ijkon okichijchi Adán. Pero Adán amo okatka ken se robot, ye uelis kipejpenaskia tlen kichiuaskia. Uelis mokuayejyekoskia kox kichiuaskia tlen kuali noso tlen amo kuali. Tla kitlakamatiskia Jehová, nochipa yoltoskia itech xochitlali.

6. ¿Tlen okipanok Adán ijkuak amo otetlakamatki?

⁶ Ijkuak Adán amo okitlakamatki toTajtsin Dios ye okilui mikiskia. Adán okipolo miak tlamantli. Ayakmo omouikak iuan Jehová, ayakmo okipixki chipauak inemilis uan okikixtijkej itech xochitlali (Génesis 3:17-19). Adán uan Eva amo okinekej kitlakamatiskej toTajtsin Dios, ik non, amikaj uelis kinmakixtiskiaj.

7, 8. ¿Ken otechijtlako tlen okichi Adán?

⁷ Tlen okichi Adán tinochtin otechijtlako. Ik non, “tlajtlákoli okalak itech nin tlaltíkpaktli iwa okualík mikílistli, ijkó noiwa nochteh mikkih porke nochteh otlajtlakolchijkeh” (Romanos 5:12). Ijkuak Adán  otlajtlakolchi, ye ‘omonamákʼ uan noijki tejuan otechnemakak imak tlajtlakoli uan mikilistli (Romanos 7:14). Pero tejuan ¿uelis ikaj techpaleuiskia? Kema.

⁸ Amikaj uelis kitlaxtlauaskia tlen amo kuali okichi Adán porque otlajtlakolchi, ik non, otechpanoltili mikilistli. Pero Jehová okitemakak ikaj tlen techmakixtis itech tlajtlakoli uan mikilistli. Ma tikitakan tlen okichi Jehová uan ken techpaleuia.

9. ¿Tlen omonekiaya para uelis nochipa tiyoltoskiaj?

⁹ Adán amo okipiaya tlajtlakoli, ik non, ye uan ikoneuan uelis yoltoskiaj nochipa. Pero ¿tlen omonekiaya para uelis nochipa tiyoltoskiaj? Se tlakatl tlen noijki amo okipiaya tlajtlakoli uelis kichiuaskia tinochtin nochipa ma tiyoltokan. Ijkon oksepa tikpiaskiaj tlen Adán okipolo (1 Timoteo 2:6). Tinochtin titlajtlakolejkej, ik non, amikaj uelis motemakaskia (Salmo 49:7, 8).

10. ¿Tlen okichi Jehová para techmakixtis?

¹⁰ ¿Tlen okichi Jehová para techmakixtis? Okiualtitlanki Jesús, iKone tlen okachi kitlasojtla (1 Juan 4:9, 10). Ye otetlakamatki uan okinek kikauas iTajtsin uan nochi tlen okipiaya iluikak (Filipenses 2:7). Jehová okitlali iyolilis iKone ijtik María. Ik non, ijkuak Jesús oneski amo okipiaya tlajtlakoli (Lucas 1:35).

11. ¿Ken tikmatij san Jesús uelis tinochtin techmakixtiskia?

¹¹ Achto tlakatl amo okitlakamatki Jehová, ik non, tinochtin titlajtlakolejkej. ¿Uelis se tlakatl tinochtin techmakixtiskia? Kema. ¿Ken tikmatij? Biblia  technankilia ika Romanos 5:19 (xiktlajtolti). Jesús uelis yoltoskia nochipa porque amo keman otlajtlakolchi, ik non, san ye uelis motemakaskia para kitlajtlamiskia mikilistli uan ijkon nochipa tiyoltoskej (1 Corintios 15:21, 22, 45).

12. ¿Tleka omonekiaya Jesús sapanoa tlajyouis?

¹² Biblia techyekiluia Jesús sapanoa otlajyoui ijkuak okimiktijkej. Chikauak okiuitekej, okipilojkej itech se tlaketsali, noijki yolik uan teyolkoko omikik (Juan 19:1, 16-18, TNM, 30; xikita nota 15). ¿Tleka omonekiaya ma tlajyoui? Porque Satanás okijto tla ikaj sapanoa tlajyouis, san niman kikauas toTajtsin Dios. Pero Jesús okiteititi se tlakatl tlen amo tlajtlakole uelis kitlakamatis toTajtsin Dios maski sapanoa tlajyouis. ¡Jehová melauak oyolpakik ijkuak okitak tlen okichi iKone! (Proverbios 27:11).

13. ¿Ken otechmakixti Jehová?

¹³ ¿Ken otechmakixti Jehová? Okitekauili ma kimiktikan iKone. Ijkon okichijkej akinmej okikokoliayaj Jesús. Non opanok tonal 14, metstli nisán xiuitl 33 (Hebreos 10:10). Ijkuak opanok eyi tonal, Jehová okiyoliti pero okiyoliti ken se espíritu. Satepan, omokopki iluikak uan ompa ixpan iTajtsin okitlaxtla tlen Adán okichi, porque Jesús okitemakak iyolilis tlen amo okipiaya tlajtlakoli (Hebreos 9:24). Imikilis Jesús techmakixtia itech tlajtlakoli uan mikilistli (xiktlajtolti Romanos 3:23, 24).

14, 15. ¿Tlen moneki tikchiuaskej para Jehová ma techtlapojpolui?

¹⁴ Imikilis Jesús techpaleuia miak uan yetoskia  ken toTajtsin Dios otechmakak se tetliokolil. Itech okseki párrafos timomachtiskej ken techpaleuia axkan uan satepan.

¹⁵ ToTajtsin Dios techtlapojpoluia. Tinochtin tikitaj oui tikchiuaskej tlen kuali. Ualeua timotlapololtiaj, tikchiuaj uan tikijtoaj tlen amo kuali. ¿Tlen moneki tikchiuaskej para ma techtlapojpolui Jehová? Moneki timoyolkopaskej uan tiktlatlaujtiskej ma techtlapojpolui. Tla ijkon tikchiuaj, melauak techtlapojpoluis (Colosenses 1:13, 14;1 Juan 1:8, 9).

16. ¿Tlen moneki tikchiuaskej para kuali tikpiaskej totlalnamikilis?

¹⁶ Kuali tikpiaj totlalnamikilis. Ijkuak tikchiuaj itlaj tlen amo kuali, totlalnamikilis techkuejsoa uan amo kuali timomachiliaj. Non uelis kichiuas ma tikmachilikan amitlaj topati uan amikaj uelis techpaleuis. Pero amo ma timosotlauakan. Tla tiktlatlaujtiskej Jehová ma techtlapojpolui, ye techkakis uan techtlapojpoluis (Hebreos 9:13, 14). Jehová kineki ma tikiluikan tlen techtlajyouiltia noso tla techyoltilana tlen amo kuali (Hebreos 4:14-16). Ijkon tikpiaskej kuali totlalnamikilis ixpan toTajtsin Dios.

17. ¿Tlen uelis tikpiaskej ika imikilis Jesús?

¹⁷ Nochipa tiyoltoskej. “Tlajtlákoli tetlaxtlawia ika mikílistli, pero tlan Dios kitetliokolia ye n nemílistli non ayik tlami keman tiseititokeh iwan Toteko Cristo Jesús” (Romanos 6:23). Ika imikilis Jesús uelis tikpiaskej yolilistli tlen amo keman tlamis uan ayakmo timokokoskej (Apocalipsis 21:3, 4). ¿Tlen moneki tikchiuaskej para tikseliskej non tlamantli?

18. ¿Ken okiteititijkej Jehová uan Jesús techtlasojtlaj?

¹⁸ Sapanoa tiyolpakij ijkuak itlaj techtliokoliaj. Imikilis Jesús ken se tetliokolil uan melauak miak ipati, ik non, moneki ma tiktlasojkamatilikan Jehová porque ye otechmakak. Juan 3:16 kijtoa “Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone”. Jesús noijki okiteititi techtlasojtla ijkuak okinek topatka mikis (Juan 15:13). Jehová uan Jesús okiteititijkej melauak techtlasojtlaj porque otechmakixtijkej (Gálatas 2:20).

19. ¿Tlen moneki tikchiuas para timouikas iuan Jehová?

¹⁹ Yotimomachtijkej Jehová melauak techtlasojtla. Pero ¿tlen moneki tikchiuas para iuan timouikas? Moneki kuali xikixmati. Tla ikaj amo tikixmatij, amo uelis tiktlasojtlaskej. Pero Juan 17:3 kijtoa uelis tikixmatiskej Jehová. Okachi tiktlasojtlas ijkuak okachi tikixmatis uan tiknekis tikyolpaktis uan ijkon iuan timouikas. Ik non, okachi xikixmati Jehová uan ximomachtijto Biblia (1 Juan 5:3).

20. ¿Ken tikteititis titlaneltoka itech imikilis Jesús?

²⁰ Xitlaneltoka itech imikilis Jesús. Biblia kijtoa “akin kineltoka Ikone Dios, yolitos nochipa” (Juan 3:36). ¿Tlen kijtosneki titlaneltokaskej? Kijtosneki tikchiuaskej nochi tlen ye otlamachti (Juan 13:15). Amo san moneki tikijtoskej titlaneltokaj itech Jesús, noijki moneki tikchiuaskej okseki tlamantli. Nochi tlen tikchiuaj moneki kiteititis melauak titlaneltokaj  itech imikilis Jesús. Santiago 2:26 kijtoa “totlaneltokalis amitla ipati tla amitla tikchiwah”.

21, 22. 1) ¿Tleka moneki timonechikoskej ijkuak tikilnamikij imikilis Jesús? 2) ¿Tlen tikitaskej itech tlamachtil 6 uan 7?

²¹ Ximonechiko ijkuak tikilnamikij imikilis Jesús. Se yoak achto mikiskia Jesús, okijto ma tikilnamikikan imikilis. Ijkon tikchiuaj ijkuak timonechikoaj para tikilnamikiskej imikilis noso “isena n Toteko” (1 Corintios 11:20; Mateo 26:26-28). Jesús kineki ma tikilnamikikan ye okitemakak iyolilis tlen amo kipia tlajtlakoli para techmakixtis. Ye okijto: “Ijkí xikchiwakah para nonnechilnamikiskeh” (xiktlajtolti Lucas 22:19). Ijkuak timonechikoaj para tikilnamikiskej imikilis, tikteititiaj tikpatioitaj uan tikilnamikij Jehová uan Jesús sapanoa techtlasojtlaj (xikita nota 16).

²² Amikaj uelis techtliokolis itlaj tlen kipatkayotis imikilis Jesús (2 Corintios 9:14, 15). Itech tlamachtil 6 uan 7, tikitaskej imikilis Jesús noijki kinpaleuis akinmej yoixpolikej.