1, 2. (a) Nge kore ta kado me nidi ace du bua? (b) Tan’ ore nge ore itico waruma kore kado me nidi thawalane wenei Madaru so ej?

NGE kore kado me nidi thawalane bua hna kedi ri ciroi ni bua? Deko ma nidi ace co hma re thubene kore kado ha thu co numu tharan. Bua ci nidi hnoron’ ore kado ngei ma nidi opodoneti, ca ngei me ace me ekowe ne kueile so bua.

² Madaru ci kanu eje hmaiai kore kado me shed. Ke sa kore kado me nidi ace so ej. Melei kore kado me nidi thawalane wenei Madaru bane so eje ngom. Ri yeno om, eje co ule ko Iehova hna sia Iesu lu ome ri ten, ha thu co waruma tha thu ase ko ke ej. (Ieielo Mataio 20:28.) Nubonengo hna ure Iesu bane itico waruma so ej, melei ci aehngeni ko Nubonengo nidi ci hnoro ej.

3. Tan’ ore nge eje ci tango?

³ Ore itico waruma kore hnei Iehova hna hngoronatane bane cengi eje buti wene ri nia ne tango. (Efeso 1:7) Ngei eje me ci alane co carajewe ore tan’ ore itico waruma, nidi ace ke eje co carajewe ore ace hna pina ri gadrane Edena, ri ta milliers kore ta kenereken. Ceceni eje ne hmani eje me hna dan, Adamu ne Eva, hna rue ore nia, hale ma ha tango ke bushengon. Ka  eje se ci tango tan’ ore bushengone hna kanu ej’ ore nia.​—Ule ore Note 9, ri page 240.

4. La kei Adamu? Ka Iehova hna kanu bon’ ore nge?

⁴ Ri eziene Iehova hna puli Adamu, ore cahmane me hna dan, Nubonengo hna kanu Adamu sa kore ace me nidi ac: ore ciroi me deko yenian. Ngome nata, ne hnengome ni Adamu roi so. Deko sa te ke bone hna uedr, ca hna mohma, ka se deko joko co tango. Tan’ ore Iehova kore thu puli Adamu, Nubonengo inom’ ore ceceni bon. (Luke 3:38) Iehova hna iara nengoce du bon. Nubonengo hna ie ahngane du bon’ ore nodei ace bone co rue. Ka Nubonengo se hna kanu bon’ ore ruace me deko ma ushiwa.​—Genese 1:28-30; 2:16, 17.

5. Tusi Hmijoc ci ie ko hna puli Adamu “tuni Nubonengo.” Melei ci ie ko nge?

⁵ Hna puli Adamu “tuni Nubonengo.” (Genese 1:27) Hna puli bone sese ne il’ ore ta singene inom’ ore ta singene ni Nubonengo: inom’ ore ciran, waetea, lata me netiti, ne nen. Madaru se hna nue bone co ureie co rue ore roi, ca co ureie ore nia. Deko ma hna puli Adamu inom’ ore robo. Kacene Adamu hna ureie co ninen’ o Iehova, ile bone co menengon’ ore Paradrais e iara oiru.

6. Ri rane Adamu hna cie ore wathebo ni Madaru, bone hna luzion’ ore nge? Adamu deko hna ninen’ o Iehova. Nge di kore ta tharane so ej?

⁶ Ri rane Adamu hna cie ore wathebo ni Madaru, ha hnaelo ke bon. Hmaiai kore ace bone hna luzion: inom’ ore co nidi kani Madaru, ne il’ ore ciroi me deko nia, ne paradrais bone hna menengon. (Genese 3:17-19) Adamu ne Eva hna cie ore wathebo ni Madaru,  hale bushengone ma ha deko ci uroi. Tan’ ore nia ni Adamu, ha pina kore “nia ome ri tene . . . ne il’ ore tango hnen’ o re nia; inomelei hna til’ o re nodei ngom’ ileodene ko re tango, wen’ o re ha nia sese ileoden.” (Rome 5:12) Ri eziene Adamu hna cie ore wathebo, bone hna salem’ o bone ko jeu’ ore nia, ne tango. Whan’ omelei, bone se hna salem’ o eje joko jeu’ ore nia ne tango. (Rome 7:14) Ilo, numu ci uroi so ej? Egewa. Iehova hna kanon’ ore itico waruma!

7, 8. Nge kore itico waruma?

⁷ Nge kore itico waruma? Melei ore thubene bane cengibut’ ore ngome hna wose, ca bane iticone yawe o se ac. Ri Tusi Hmijoc, ore itico waruma melei ore thubene co kanone bane ruaban’ ore ta ace hna nian.

⁸ Ri eziene Adamu hna cie ore wathebo ne hna kanu ej’ ore tango, bone hna apinani cece kore nia. Deko lo te se ngome me nia me thuni co kanon’ ore thubene bane lae win’ ore so ace me nia omelei. Roidi, Iehova hna hngoronatan’ ore thubene bane cengi eje buti wene ri nia, ne tango. Iehova hna kanu ej’ ore itico waruma korion? Ka nge di kore ta hnahneone so eje hnen’ omelei? Eje dai ule sesonelo.

9. Hna kanon’ ore nge bane itico waruma?

⁹ Deko se ngome me thuni co kanon’ ore itico waruma. Tan’ ore nge? Tan’ ore eje ileodene ta ngome me nia so. (Ta Salamo 49:7, 8) Ka Adamu hna luzion’ ore ciroi me deko yenian. Hale me co itico waruma di kore ngome me deko yenian, ci kaion’ omelei ko, “itico waruma son’ ileoden.” (1 Timothi 2:6) Ore  itico waruma co ekowe ne il’ ore kakailen’ ore ciroi ni Adamu me deko yenian.

10. Korione kei Iehova hna kanon’ ore itico waruma?

¹⁰ Korione kei Iehova hna kanon’ ore itico waruma? Nubonengo hna sianelu ome ri tene ore Tenengoieni Nubonengo me hna wahnacorone ne hna puze dan. (1 Ioane 4:9, 10) Iesu hna kedi co nue Cecewaiene ne il’ ore aw, ore guhne Nubone hna menengon. (Filipi 2:7) Iehova hna yose ore ciroi ni Iesu ri aw, ka hna aicenilu di ome ri ten. Ma hnapo Iesu but, melei Nubone hna ngome di me hmijoc, ne deko yenian.​—Luke 1:35.

11. Hna korione ko sa so kore ngome hna thuni co itico waruma son’ ileoden?

¹¹ Nodei ngome ileodene ha tha thuni ko co numu ore ciroi me deko yenian, tan’ ore hnei Adamu, cahmane me hna dane hna rue ore nia. Ke ilo, numu se ngome me thuni co nue gupanebut’ ore ta matrani Adamu sere ri tango? Egewa. (Ieielo Rome 5:19.) Iesu deko te hna rue ore nia, ile Nubone me kanon’ ore ciroi ni Nubone me deko yeniane bane itico waruma. (1 Korinito 15:45) Ore ciroi ni Nubone me deko yeniane thuni co nuebut’ ore tango son’ ore nodei re tei Adam.​—1 Korinito 15:21, 22.

12. Tan’ ore nge Iesu nidi hna jo?

¹² Tusi Hmijoc ci ie ahngane ko, Iesu nidi hna jo ri dan’ ore co tango. Hna nidi ridi nia Nubone hnei moc, hna dengi watutu o Nubone ri serei, ka nidi iwe kore hna jo ni Nubone ri dan’ ore co tango. (Ioane 19:1, 16-18, 30) Tan’ ore nge Iesu nidi hna jo? Tan’ ore Satana hna ie ko, se ngome ma numu ore tubuhnidi me hmaiai, deko sa te ke bone co menenge seseko du  Madaru. Iesu hna asesekoni ko, ore ngome me deko yenian, thuni co menenge seseko du Madaru, ngei bone me ci nidi jo. Iehova ineko se nidi hna opodo Iesu!—Ta Onatre 27:11; ule ore Note 15, ri page 244.

13. Hna lae thubene korione kore itico waruma?

¹³ Hna lae thubene korione kore itico waruma? Ri kenerekene 33, ri 14 Nisan (se cekole ri calendrier ni si Juda), Iehova hna nue ore ta icuhma ne Iesu co atangoni Nubone. (Hebera 10:10) Ka therion’ ore ran, thubenelo ore tango ni Iesu, Iehova hna aroini Iesu lo yawe, ha thu angela yawe, ke ha deko ma ngom. Thubenelo melei, Iesu hna icelo yawe ri aw, ile Nubone me aehngeni du Iehova ore itico waruma: ore nidi ace il’ ore ciroi ni Nubone me deko yenian. Melei ci ie ko, Nubone hna kanu Madaru ore netiti ni Nubone co menenge ri hnengome me deko yeniane ome ri ten, ha thu kanonedi ore netit’ omelei jeu’ ore ta matrani Adamu kei Iehova. (Hebera 9:24) Onome ha hna lae thuben’ ore itico waruma. Koiko, ha thuni co nue gupa eje buti wene ri nia ne tango.​—Ieielo Rome 3:23, 24.

14, 15. Eje co rue ore nge ha thu co nuebut’ ore ta nia ni ej?

¹⁴ Whan’ onom, eje ha thuni co numu ore roi lene sen’ ore kado me thawalane wenei Madaru, ka eje thuni joko co numu ore roi ri ta eziene co pina. Eje dai ule ko korion.

¹⁵ Ta nia ni eje ha hna nuebut. Nidi ushiwa kore co iara rue ore roi. Eje ci rue ore ta ace me menu, ka ci ie, ca ngei ci rue ore ta ace me nia. Eje co rue di ore nge ha thu co nuebut’ ore ta nia ni ej? Eje co nidi  lereieti ore ta ace me nia hna rue. Omete, roi ke eje co lata me waami, ne co sibo Iehova co nuebut’ ore ta nia ni ej. Ile eje co thuni co ua sesekone ko, ha co nuebut’ ore ta nia ni ej.​—Kolose 1:13, 14; 1 Ioane 1:8, 9.

16. Eje co rue ore nge ha thu numu ua anetitini me roi?

¹⁶ Ua anetitini ni eje roi. Ngei ore ua anetitini ni eje ma auaneni eje ko, eje hna rue ore nia, eje ci ie ko nia ni eje ko. Ri se ezien, eje se ci uane ko eje deko paen. Ke eje deko co hnenigeleti ore ta uan’ omelei. Iehova ci alane ko eje co ie ahnganebuti du Nubonengo ore ta nidranidra, ne ta ushiwa ni ej. (Hebera 4:14-16) Eje thuni co ua sesekone ko, ngei eje ma kewiwi du Madaru co kedi ore ta lereie ni ej, Nubonengo co taedrehngi ej, ne co nuebut’ ore ta nia ni ej (Hebera 9:13, 14) Hale me eje thuni co menenge dongodongo ne Madaru.

17. Nge kore ta hnahneone eje co kedi wene ri hna itico waruma?

¹⁷ Eje ci uroion’ ore waruma tha thu ase ko. “Ka tango ko re thuben’ o re nia ; ka waruma tha thu ase ko ko re itutuo (kado) ni Madaru, wen’ o Iesu Keriso Dokuj.” (Rome 6:23) Eje ci uroione ko, eje co waruma e iara oiru ri engetac, tan’ ore Iesu hna tango so ej. (Ahngabot 21:3, 4) Ke eje co rue di ore nge ha thu co kedi ore ta hnahneon’ omelei?

18. Eje ci ule korione ko Iehova ci hnoro ej?

¹⁸ Ngei eje ma kedi sa kore kado me shed, eje ci nidi opodon. Ore itico waruma kore kado me nidi thawalan’ ore ta kado ileoden. Wen’ omelei, nidi ace ke eje co aehngeni du Iehova ko, eje ci nidi acon’ ore kado wenei Nubonengo. Ioane 3:16 ci ie ko: “Wen’ o re  naeni Madaru hna raton’ o re ten’ o re aw, ca ile nubonengo me nunuone te o re Tei nubonengo xara sa so.” Deko ma numu enengoco bane uran’ ore cirane ni Iehova so ej. Hnen’ ore ciran, Nubonengo deko hna cakoro ej’ ore ngome Nubonengo nidi hna wahnacoron: Tei Nubonengo. Hnen’ ore cirane joko, Iesu se hna canga ibetu co tango so ej. (Ioane 15:13) Ore itico waruma kore ci nidi asesekoni du bua ko, Iehova ne Iesu ci hnoro bua.​—Galatia 2:20.

19, 20. (a) Bua co kani Iehova korion? (b) Bua co aehngeni korione ko bua ci une jeu’ ore itico waruma?

¹⁹ Eje hna yenone ko, Iehova cece hnei ciran. Korione di ke eje co kani Nubonengo? Ushiwa du eje co hnoron’ o se ngome eje me tha ule ko. Ioane 17:3 ci ie ko eje thuni co rowo kaceni Iehova. Ngei bua ma yenone co ule kaceni Madaru, bua co nidi hnoro Nubonengo, ne co alane co aopodoneni Nubonengo. Hale bua co kani Nubonengo. Roi ke bua co yenonelo ko ore Tusi Hmijoc.​—1 Ioane 5:3.

²⁰ Unelo jeu’ ore itico waruma. Tusi Hmijoc ci ie ko: “nubon’ o re ci une jeu’ o re Tenengoiene ha numu o re waruma tha thu ase ko.” (Ioane 3:36) Ci ie ko nge kore “co ruacon’ o re ci une”? Melei ci ie ko, co rue ore hnei Iesu hna awa eje co rue. (Ioane 13:15) Deko ma kueile so kore co ie ko eje ci une du Iesu. Nidi ace kore co aehngeni ri ta ruace ni eje ko, eje ci une du Nubon. Ri Iakobo 2:26, eje ci ieie ko: “Ha tango ko re ci une me deko ta ruace te.”

21, 22. (a) Tan’ ore nge nidi ace kore co kanete co Uan’ ore tango ni Iesu ri nodei kenereken? (b) Eje co ule di ore nge ri Yeno 6 ne 7?

²¹ Huebuti co kanete co Uan’ ore tango ni Iesu.  Iesu ci alane ko eje co iara uane ko ore hnei Nubone hna kanon’ ore ciroi me deko nia ni Nubone, bane itico waruma so ej. Ri lakidi dan’ ore Iesu co tango, Nubone hna ie du re kokonieni Nubone ko: “Ilonelo kome bane uane du nu.” (Ieielo Luke 22:19.) Wen’ omelei, ri nodei kenereken, nodei Témoins ni Iehova ci uan’ ore tango ni Iesu. Buice ci kaion’ omelei ko “Mémorial” ca “Kodaru re lakidi ni Doku.”(1 Korinito 11:20; Mataio 26:26-28) Ngei bua ma kanete co Uan’ ore tango ni Iesu, melei bua ci aehngeni ko bua ci nidi acon’ ore itico waruma, ne il’ ore nidi cirane ni Iehova, ne Iesu so bua.​—Ule ore Note 16, ri page 245.

²² Deko ma numu se kado me thawalane inom’ ore itico waruma. (2 Korinito 9:14, 15) Dai uanelo, ore kado me thawalan’ omelei thuni joko co kanon’ ore ta hnahneone du ta millions kore ta ngome ma ha tango. Ilo, seseko komelei? Ore Yeno 6 ne 7 ha co ie hmaiaione di.