1, 2. (a) Hana wa taʼandrö saohagölö mbuala nibeʼe khöda? (b) Hana wa höli andrö buala Lowalangi fondrege zebua?

HADIA mbuala sabölö sökhi si no irai ötema? Tenga börö wa ebua mböli mbuala awena taʼandrö saohagölö. Na möi fangomuso dödöu mbuala andrö mazui moguna sibai khöu, tatu öʼandrö sibai saohagölö.

² Moroi ba ngawalö mbuala nibeʼe Lowalangi, so sambua mbuala sabölö moguna khöda. Daʼa mbuala sabölö ebua nibeʼe Lowalangi ba niha. Ifatunö khöda ba faza daʼa, no ifatenge Nononia Yehowa sotöi Yesu Keriso ba gulidanö, enaʼö tasöndra waʼauri si lö aetu. (Baso Mataiʼo 20:28.) Tandra waʼomasi Yehowa ba niha gulidanö, yaʼia daʼö ifatenge Yesu tobali höli.

3. Hana wa mate niha?

³ Ibeʼe höli Yehowa ba wangefaʼö yaʼita ba horö ba ba waʼamate. (Efeso 1:7) Enaʼö aboto ba dödöda hana wa moguna khöda höli, datafuli tatörö tödöda hadia zalua ngahönö fakhe ba zilalö khö Gadamo ba Khawa ba kabu Edena me aekhu ira ba horö. Börö me no lafalua horö, andrö wa mate ira. Andrö göi wa mate ita, börö horö ondröita moroi khöra.​—Faigi Gonönöta 9.

4. Haniha Gadamo, ba hadia nibeʼe Yehowa khönia?

 ⁴ Me ifazökhi niha si föföna Yehowa sotöi Adamo, ibeʼe khönia mbuala sebua, yaʼia daʼö faʼauri soʼahonoa. Botonia hegöi fangera-ngerania moʼahonoa, lö göna ia fökhö, lö atua ia, ba lö mate. Börö me Yehowa zamazökhi Adamo, andrö wa hulö namania Yehowa. (Luka 3:38, NW) Asese fahuhuo ira Yehowa. Ifatunö Lowalangi hadia niʼandrönia khö Gadamo, aefa daʼö ibeʼe khönia halöwö si sökhi.​—I Moze 1:28-30; 2:16, 17.

5. Hadia geluahania me imane Sura Niʼamoniʼö ’famaedo’ Lowalangi Gadamo?

⁵ Ifazökhi Gadamo Lowalangi ”famaedonia”. (I Moze 1:27) Eluahania, so khö Gadamo gamuata Yehowa simane faʼomasi, faʼatua-tua, faʼatulö ba faʼabölö. Itehegö khö Gadamo wangai angetula, tenga simane robot. Eluahania tola ifili samösa hadia nifaluania ba waʼaurinia, hadia satulö mazui si lö atulö. Na iʼoʼö niwaʼö Lowalangi Adamo, isöndra waʼauri si lö aetu ba Waradaiso.

6. Hadia zi no itayaigö Adamo me lö iʼoʼö niwaʼö Lowalangi? Ba hadia lua-luania khöda?

⁶ Me no ifili Adamo ba wolawa Lowalangi, lua-luania mate ia. Taya wahuwusania khö Yehowa, faʼauri soʼahonoa, ba lö hadöi nahiania ba Waradaiso. (I Moze 3:17-19) Börö me no lafili ba wolawa Lowalangi ira Adamo faoma Khawa, aetu wanötönara saʼae. Börö me no ifalua daʼö Adamo, andrö imane Sura Niʼamoniʼö, ”Simane böröta horö andrö ba gulidanö, wa no ha samösa niha [Adamo] zamobörö awö lua-lua horö andrö ba faʼamate, awö wa no  ikhamö niha fefu faʼamate andrö börö wa no dozi samazökhi horö ira.” (Roma 5:12) Me ifalua horö Adamo, no ’ifamawa’ ia hegöi maʼuwunia tobali sawuyu horö ba faʼamate. (Roma 7:14) Hadia so wanötönada nasa? So.

7, 8. Hadia geluahania höli?

⁷ Hadia nifotöi höli andrö? So dombua geluahania. Si oföna, kefe nibeʼe ba wosanu enaʼö mangawuli khöda hadia zi no tagadegö. Si dua, kefe nibeʼe ba wogati hadia zi no tekiko.

⁸ Samösa lö hadöi niha ba gulidanö si tola mangefaʼö yaʼita moroi ba horö nifalua Gadamo hegöi ba waʼamate. Hizaʼi, ibeʼe lala Yehowa ba wangefaʼö yaʼita moroi ba daʼö. Datafahaʼö ita hadia mbörö wa so höli ba hadia gunania khöda.

9. Hewisa zinangeania zi tobali höli?

⁹ Hana wa lö hadöi niha si tola mangefaʼö yaʼita moroi ba horö nifalua Gadamo? Börö me fefu niha lö moʼahonoa. (Zinunö 49:8, 9) Börö me niha soʼahonoa zangekhugö yaʼita ba horö, andrö wa niha soʼahonoa göi zangefaʼö mangawuli. Daʼö wa lafotöi ia ”höli” soʼahonoa. (I Timoteo 2:6) Höli andrö fagölö waʼebua mbölinia simane si no itayaigö Adamo.

10. Hewisa wameʼe Yehowa höli?

¹⁰ Hewisa wameʼe Yehowa höli andrö? Ifatenge Yesu ba gulidanö, Ono niʼomasiʼönia, siaʼa nifazökhi dangania. (I Yohane 4:9, 10) Omasi Yesu wondröi Amania hegöi nahiania ba zorugo. (Filifi  2:7) Ifawuʼa waʼauri Yesu ba gulidanö Yehowa, ba tumbu ia tobali niha soʼahonoa.​—Luka 1:35.

11. Hewisa wa tola ihöli niha sato si samösa niha?

¹¹ Börö me no isawö goroisa Yehowa Adamo, andrö wa lö moʼahonoa niha gulidanö fefu. Hadia so niha sangefaʼö yaʼita moroi ba horö Gadamo? So. (Baso Roma 5:19.) Yaʼia daʼö Yesu, niha soʼahonoa, ibeʼe waʼaurinia tobali höli. (I Korindro 15:45) Ha faʼauri soʼahonoa zi tola mangefaʼö yaʼita moroi ba horö Gadamo.​—I Korindro 15:21, 22.

12. Hana wa itaögö wamakao Yesu?

¹² Itutunö khöda Sura Niʼamoniʼö hadia zalua khö Yesu fatua lö mate ia. Laleasi ia, laʼosö ba döla geu, ba mate ba waʼafökhö. (Yohane 19:1, 16-18, 30) Hana wa itaögö daʼö fefu Yesu? Ba wanema li tandrawa nibeʼe Zatana. Ifobahulu niha, wa laröi Lowalangi na göna ira fanandraigö. Iʼoromaʼö Yesu wa so niha soʼahonoa si lö faröi khö Lowalangi hewaʼae göna ia famakao. Khalaigö atö hewisa waʼomuso dödö Yehowa ba nifalua Yesu!​—Gamaedola 27:11; faigi Gonönöta 15.

13. Hewisa wameʼe höli?

¹³ Hewisa wameʼe höli? Ibeʼe waʼaurinia soʼahonoa Yesu tobali sumange khö Namania. Me 14 Nisa döfi 33 ba zura mbaŵa niha Yehuda, itehegö Yehowa mate Yesu ba danga zi faʼudu khönia. (Heberaiʼo 10:10) Tölu ngaluo aefa daʼö, ifuli isusugi ia Yehowa tobali boto eheha. Aefa daʼö, möi Yesu khö Namania ba zorugo ba wameʼe faʼaurinia soʼahonoa tobali höli. (Heberaiʼo 9:24) Awena teʼefaʼö niha  moroi ba horö ba ba waʼamate.​—Baso Roma 3:23, 24.

14, 15. Hadia nifaluada enaʼö aefa horöda?

¹⁴ No taʼila mege hadia mbuala fondrege zebua nibeʼe Lowalangi khöda. Datafaigi hadia gunania khöda iadaʼa hegöi ba zi so föna.

¹⁵ Teʼefaʼö horöda. Abua khöda wamalua amuata si sökhi ero inötö. Asese fasala ita ba wehede hegöi ba gamuata. (Kolose 1:13, 14) Hewisa enaʼö tola aefa horöda? Tafalalini gera-erada, ba taʼandrö wangefa horö khö Yehowa si fao fangide-ngideʼö. Aefa daʼö, mamati ita wa hasambalö iʼefaʼö horöda.​—I Yohane 1:8, 9.

16. Hewisa enaʼö so khöda dödö side-ide sohau-hau?

¹⁶ So khöda dödö side-ide sohau-hau. Itegu ita tödöda side-ide na tafalua zala, so khöda waniasa, aetu wanötöna, ba hulö niha si lö moguna ita. Hizaʼi, böi tabusi dödöda. Na taʼandrö waʼebolo dödö Yehowa, faduhu dödöda wa ifondro-ndrongo khöda ba iʼefaʼö horöda. (Heberaiʼo 9:13, 14) Omasi Yehowa na tatutunö khönia gabula dödöda ba si tebai ikhamö faʼabölöda. (Heberaiʼo 4:14-16) Lua-luania, tola taʼokhögö dödö side-ide sohau-hau föna Lowalangi.

17. Hadia howu-howu khöda me no mate Yesu?

¹⁷ So khöda wanötöna faʼauri si lö aetu. ”Luo horö sa, ba faʼamate, ba buala faʼebua dödö Lowalangi andrö, ba no faʼauri si lö aetu ba khö Keriso Yesu, Soʼaya yaʼita.” (Roma 6:23) Börö me no ihöli  ita Yesu, tola tasöndra waʼauri si lö aetu, ba lö göna ita fökhö. (Famaʼeleʼö 21:3, 4) Hewisa enaʼö tola tatema howu-howu andrö?

18. Hadia dandra waʼomasi Yehowa khöda?

¹⁸ Khalaigö waʼomuso dödöu na ötema mbuala si sökhi sibai. Simanö göi höli andrö no buala fondrege zi sökhi, andrö moguna taʼandrö saohagölö khö Yehowa. Imane Yohane 3:16, ”Simanö sa waʼomasi Lowalangi nösi gulidanö, no ibeʼe Nononia andrö si ha sambua.” Börö waʼomasi Yehowa khöda, ifatenge Nononia ba gulidanö. Ba taʼila waʼomasi Yesu göi, itehegö mate ia salahida. (Yohane 15:13) Höli andre dandra waʼomasi Yehowa hegöi Yesu khöda.​—Galatia 2:20.

19, 20. (a) Hewisa enaʼö tola fahuwu ita khö Yehowa? (b) Hadia dandra wa taʼandrö saohagölö höli nibeʼe Yesu?

¹⁹ No taʼila waʼomasi Lowalangi khöda, ba hewisa enaʼö tola fahuwu ita khönia? Lö taʼila taʼomasiʼö niha si lö faʼila khöda. Imane Yohane 17:3, tola aboto ba dödöda Yehowa. Na no so khöda waʼaboto ba dödö haniha ia, tedou waʼomasida khönia, ba tobali ita si fahuwu khönia. Börö daʼö, böi taböhöli wamahaʼö yaʼita khö Yehowa ba Zura Niʼamoniʼö.​—I Yohane 5:3.

²⁰ Mamati ita ba höli nibeʼe Yesu. Imane Sura Niʼamoniʼö, ”Khö zamati khö Nono andrö so waʼauri si lö aetu.” (Yohane 3:36) Hadia geluaha mamati? Eluahania tafalua niwaʼö Yesu. (Yohane  13:15) Tenga ha asala tawaʼö, mamati ndraʼo khö Yesu, moguna taforomaʼö ba mbua-buada. Simane niwaʼö ba Yakobo 2:26, ’Famati andrö, lö faʼauri, na lö bua-bua.’

21, 22. (a) Hana wa moguna taʼondrasi Wanörö Tödö faʼamate Keriso ero röfi? (b) Hadia nifatunöda ba Faza 6 ba 7?

²¹ Ondrasi Wanörö Tödö faʼamate Keriso. Fatua lö mate Yesu, no iʼoroisi enaʼö tatörö tödö waʼamatenia. Tafalua daʼö sakali ba zi döfi, ba lafotöi ia Bongi Watomesa Zoʼaya. (Mataiʼo 26:26-28) Omasi Yesu na tatörö tödö höli si no ibeʼe. Imane, ”Mitörö-törö tödömi ndraʼo, ba zimane.” (Baso Luka 22:19.) Na öʼondrasi Wanörö Tödö faʼamate Yesu, lö solifu ndraʼugö höli awö waʼomasi Yehowa hegöi Yesu khöda.​—Faigi Gonönöta 16.

²² Höli no buala fondrege zebua si no irai tatema. (II Korindro 9:14, 15) Ba Faza 6 ba 7 ifatunö khöda wa moguna göi höli andre ba niha si no mate zuta waʼato.