Mutu 5
Dipo—ni Mphaso yofumila kwa Mulungu
1, 2. (a) Kansi mwewo muwona kuti mphaso niyantengo wapatali ikankhala yotyani? (b) Ndaŵa yanji tinganene kuti dipo ya Yesu ni mphaso yantengo wapatali kupambana chinthu chilichonse?
KANSI ni mphaso yotyani yemwilondelako kale mwewo? Mphaso yufunikalini kunkhala yodula kuti iŵe yofunika ngako kuli mwewo. Mphaso ingankhale yofunika ngako kuli mwewo keno mwakondwela nayo komasoti keno nichinthu chemwenzefuna ngako. Mosakaikila mwewo mungaitembeje ngako mphaso yamene iyi.
2 Mulungu etipasa mphaso yetenzefunikila ngako kupambana chinthu chilichonse. Yamene iyi ni mphaso ikulu yechipeleka Mulungu ku ŵanthu. M’Mutu uno, tiphunzile kuti Yehova etumija Mwana wake, Yesu Khilisitu, kuti tinkhalepo mpaka kale-kale. (Ŵelengani Mateyu 20:28.) Potumija Yesu pano pachalo monga dipo, Yehova ewonesha chendi kuti otikonda.
KANSI DIPO N’CHINJI?
3. Ndaŵa yanji tikufwa?
3 Kuti timasuke ku uchimo na imfwa, Yehova etumija Yesu kuzatifwila. (Aefeso 1:7) Kuti timvwishe chifukwa chechipelekela moyo wake Yesu, tufunika kukumbukila vichitika m’munda wa Edeni. Makolo ŵasu oyambilila Adamu na Hava echimwa, n’chifukwa chake echifwa. Adamu na Hava etipasako uchimo, n’chifukwa chake tonse tikufwa.—Onani Mawu Akumapeto 9.
4. Kansi Adamu enze na moyo wotyani akaliye chimwa?
4 Yehova elenga munthu woyamba Adamu ali wangwilo, vamene ivi venze viweme. Adamu, akaliye chimwa enze na maganizo na muŵili wangwilo. Yove sembe enzelwalalini olo kukalamba. Soti sembe aliye ufwe, Yehova enze monga atata ŵake. (Luka 3:38) Mulungu enzelaŵila na Adamu nthawe zonse kumuuja vangachite. Ndipo enze emupasa ntchito yemene enzekondwela nayo.—Genesis 1:28-30; 2:16, 17.
5. Kansi Baibolo yutanthauza chinji, ikonena kuti “Adamu elengewa m’chifanizilo cha Mulungu”?
5 Adamu elengewa “m’chifanizilo cha Mulungu”. (Genesis 1:27) Ivi vutanthauza kuti Adamu elengewa na minkhalidwe yolingana naya Yehova, monga chikondi, nzelu, mphamvu na chilungamo. Koma olo n’tetyo Mulungu elenga Adamu kuti akosiyanisha chiweme na chiipa. Adamu enzelini monga ni mashini. Kuti enze emvwila Mulungu, yove sembe enkhala Mpaladaiso mpaka kale-kale.
6. Kansi n’chinji chimuchitikila Adamu paliye mvwile Mulungu? Lomba sewo vutikhuza tyani?
6 Adamu epasiwa chilango chikulu chifukwa chosamvwila Mulungu ndipo echifwa. Yove eluza ushamwali wake na Yehova, moyo wake wangwilo komasoti epitikishiwa m’munda wa Edeni. (Genesis 3:17-19) Tonse sewo tili na uchimo. Niye chifukwa chake monga “mwiuloŵela uchimo m’chalo, kupitila muli munthu yumo, na imfwa kupitila mu uchimo, imfwa yamene iyo ifalikila kuli ŵanthu onse chifukwa chakuti onse echimwa.” (Aroma 5:12) Adamu pamozi na mbadwa zake zonse enkhala akapolo a uchimo na imfwa. (Aroma 7:14) Adamu na Hava esankha kusamvwila Mulungu. Soti enzeve chiyembekezo chilichonse. N’nga sewo? Kansi penze njila iyakine yatingamasukile ku uchimo na imfwa? Eye, yenzepo. Kuti timasuke, penzefunika muyakine kuti apeleke dipo.
7, 8. Kansi dipo n’chinji?
7 Kansi dipo n’chinji? Dipo ingatanthauze vinthu viŵili, chinthu choyamba, dipo ni malipilo opelekewa pofuna kuti munthu amasuliwe. Chachiŵili, dipo ni ntengo wa malipilo opelekewa, wolingana na chinthu chawonongeka.
8 Sewo tili mu ukapolo wa uchimo na imfwa, ndipo sewo paseka paliye chatingachite kuti timasuke. Koma Yehova ekonza njila kuti atimasule. Yove etumija mwana wake kuti azatifwile.
MWECHIPELEKELA DIPO YEHOVA
9. Kansi dipo yenzefunika kupelekewa tyani?
9 Sembe paliye munthu aliyense wamene ekwanisha kupeleka dipo kuti tizafwane moyo wangwilo wechitaya Adamu. Ndaŵa yanji? Ndaŵa yakuti nise ochimwa. (Salimo 49:7, 8) Dipo yenzefunika kulipiliwa na moyo wa munthu wangwilo, n’chifukwa chake yuitiwa kuti “dipo yokwanila ndendende” mmalo mwa tonse. (1 Timoteyo 2:6) Dipo yenzefunika kunkhala yolingana na mwewenzele moyo wechitaya Adamu.
10. Kansi Yehova echita chinji kuti atimasule?
10 Kansi Yehova echita chinji kuti atimasule? Yove etumija mwana wake wofunika ngako pano pachalo. (1 Yohane 4:9, 10) Yesu evomela kuwela pano pansi, kusiya Atata ŵake na malo ŵake kululu. (Afilipi 2:7) Yehova echita chinthu chodabwisha kuti Yesu avyalike ali wangwilo, aliye uchimo.—Luka 1:35.
Yehova epeleka Mwana wake wapadela monga dipo kuli sewo
11. Kansi vingakwanishike tyani kuti munthu yumo apeleke dipo kuli ŵanthu onse?
11 Munthu woyamba Adamu, pechichimwa echitisha kuti ŵanthu onse ankhale ochimwa. Kansi vingakwanishike kuti munthu yumo apulumushe ŵanthu onse ku uchimo na imfwa? Eye. (Ŵelengani Aroma 5:19.) Yesu wamene enzeve uchimo, epeleka moyo wake wangwilo monga dipo. (1 Akorinto 15:45) Moyo wangwilo wamene uyu niye ungatiyavye kuti sewo timasuke ku uchimo na imfwa.—1 Akorinto 15:21, 22.
12. Ndaŵa yanji Yesu enzefunika kuvutika?
12 Baibolo yufotokoza mavuto onse ŵechikumana nawo Yesu akaliye kufwa. Masodja emukwapula mwankhanza na chikoti, emukhomelela pachimuti chotamanilapo ndipo emusiya kuti akotamana mpaka kufwa. (Yohane 19:1, 16-18, 30) Ndaŵa yanji Yesu enzefunika kuvutika teti? Ndaŵa Satana elaŵila kuti paliye munthu angankhale wokhulupilika kwa Mulungu akakumana na mavuto. Koma Yesu ewoneshelatu patuŵa kuti vingakwanishike munthu kunkhala wokhulupilika olo kuti wakumana na mavuto. Mosakayikila, Yehova ekondwela ngako na vechichita Mwana wake Yesu!—Miyambo 27:11; onani Mawu Akumapeto 15.
13. Kansi dipo ipelekewa tyani?
13 Kansi dipo ipelekewa tyani? Yesu epeleka moyo wake kwa Atata ŵake m’chaka cha 33 C.E., pa nsiku ya 14 ya mwezi wamene Ayuda enzeutomola kuti Nisani, Yehova elola kuti Yesu apaiwe na adani ŵake. (Aheberi 10:10) Papita masiku atatu, Yehova emuusha, osati na muŵili waumunthu, koma na muŵili wauzimu n’nga ni mwenzele poyamba akaliye wela pano pachalo. Yesu pechijokela kwa Atata ŵake kululu, yove epeleka moyo wake waumunthu wantengo wapatali monga dipo kwa Yehova. (Aheberi 9:24) Apa tinganene kuti Yesu elipila moyo wangwilo wala wechitaya Adamu, chifukwa cha vechichita Yesu, tili na mwayi womasuliwa ku uchimo na imfwa.—Ŵelengani Aroma 3:23, 24.
MWAINGAKUYAVYILENI DIPO YA YESU
14, 15. Kansi tufunika kuchita chinji kuti tikhululukiliwe machimo ŵasu?
14 Tiyamba kale kupindula na mphaso ikulu yofumila kwa Mulungu. Tiyeni tiwone mwayutiyavyila pakalipano komasoti madaliso ŵatkuti tizafwane kusogolo chifukwa cha mphaso yamene iyi.
15 Kukhululukiliwa kwa machimo ŵasu. N’kovuta kuchita vinthu viweme nthawe zonse, nthawe ziyakine tuphoniya polaŵila olo pochita vinthu viyakine. (Akolose 1:13, 14) Kansi tingachitenji kuti tikhululukiliwe? Tufunika kuziŵa kuti taphoniya nosenga Yehova molichefya kuti atikhululukile. Tikachita vamene ivi, tingaŵe na chidalilo chakuti Mulungu angatikhululukile machimo ŵasu.—1 Yohane 1:8, 9.
16. Kansi tingachite chinji kuti tinkhale na chikumbuntima chiweme?
16 Mungankhale na chikumbuntima chiweme. Keno chikumbuntima chasu chutiuja kuti tachita vinthu viipa, tuyamba kuliimba mlandu, tuliwona kuti nise osafunika komasoti tulimvwa kuti tiliye chiyembekezo. Koma tufunikalini kuganiza teti vamene ivi vikatichitikila. Keno tingasenge Yehova kuti atikhululukile, yove angamvwe pemphelo yasu notikhululukila. (Aheberi 9:13, 14) Yehova ofuna kuti tikomuuja mavuto ŵasu komasoti vofoka vasu. (Aheberi 4:14-16) Monga vokonkhapo vake tingankhale pa ntendele na Mulungu.
17. Kansi ni madaliso otyani ŵatingazafwana chifukwa cha imfwa ya Yesu?
17 Tili na chiyembekezo cha moyo wosasila. “Chifukwa malipilo a uchimo ni imfwa, mphaso yakupeleka Mulungu ni moyo wosasila kupitila muli Yesu Khilisitu Ambuye ŵasu.” (Aroma 6:23) Chifukwa chakuti Yesu etifwila, n’vokwanishika kuzankhala na moyo wosasila komasoti uliye mavuto. (Chivumbulutso 21:3, 4) Lomba tingachite chinji kuti tizalondele madaliso onse amene aŵa?
KANSI MWEWO MUTEMBEJA DIPO YAMENE IYI?
18. Kansi tuziŵa tyani kuti Yehova otikonda ngako?
18 Ganizilani kuti munthu muyakine wakupasani mphaso iweme, n’vowonekelatu kuti mungakondwele ngako. Dipo ni mphaso ya ntengo wapatali yamene Mulungu yechitipasa ndipo tufunika kuitembeja ngako. Pa lemba ya Yohane 3:16 Baibolo yunena kuti “Mulungu ekonda ngako chalo mwakuti etwala Mwana wake wovyalika yeka.” N’chendi, Yehova otikonda ndipo etipasa Mwana wake, Yesu. Ndipo tuziŵa kuti naye Yesu otikonda, chifukwa evomela na ntima wonse kuwela pano pachalo kuzatifwila. (Yohane 15:13) Mphaso ya dipo ya Yesu yutisimikijila kuti Yehova komasoti Yesu otikonda ngako.—Agalatiya 2:20.
Tikophunzila vinyinji ponena za Yehova, tinkhale azishamwali ŵake komasoti chikondi chasu na yove chikule
19, 20. (a) Kansi mungachite chinji kuti munkhale shamwali wa Yehova? (b) Kansi mungawoneshe tyani kuti mukhulupilila nsembe ya dipo ya Yesu?
19 Pakuti lomba mwaphunzila za chikondi chikulu cha Yehova, kansi mungachite chinji kuti yove ankhale shamwali wanu? N’kovuta kukonda munthu wamusaziŵa. Lemba ya Yohane 17:3 yunena kuti mungamuziŵe Yehova. Mukaziŵa vinyinji vokhuza Yehova, muyambe kumukonda ngako, kuchita vinthu vumukondwelesha komasoti mukomuwona kuti ni shmwali wanu wapantima. Tetyo pitilijani kuphunzila Baibolo kuti muziŵe vinyinji vokhuza Yehova.—1 Yohane 5:3.
20 Mukowonesha kuti mukhulupilila nsembe ya dipo ya Yesu. Baibolo yunena kuti: “Wokhulupilila Mwana wamene uyo ali nawo moyo wosasila.” (Yohane 3:36) Kansi kunkhala nachikhulupililo kutanthauza chinji? Kutanthauza kuchita venzephunzisa Yesu. (Yohane 13:15) Kungolaŵila kuti tukhulupilila Yesu n’kosakwanila. Tufunika kuchita vinthu vuwonesha kuti tukhulupilila chendi dipo ya Yesu. Lemba ya Yakobo 2:26, yunena kuti: “Chikhulupililo chiliye ntchito n’chakufwa.”
21, 22. (a) Ndaŵa yanji tufunika kupezeka pamwambo Wokumbukila imfwa ya Khilisitu chaka chilichonse? (b) Kansi tizaphunzile chinji m’Mutu 6 na 7?
21 Mukopezeka pamwambo wokumbukila imfwa ya Khilisitu. Nchingulo Yesu akaliye kufwa, ephunzisa ophunzila ŵake kuti akokumbukila imfwa yake. Chaka chilichonse tuchita mwambo wamene uyu, ndipo uitiwa kuti Chikumbukilo, olo kuti “Chakulya chanchingulo cha Ambuye.” (1 Akorinto 11:20; Mateyu 26:26-28) Yesu ofuna kuti tikokumbukila kuti epeleka moyo wake wangwilo monga dipo chifukwa cha sewo. Yove elaŵila kuti: “Mukochita vamene ivi ponikumbukila.” (Ŵelengani Luka 22:19.) Mukopezeka pa mwambo wokumbukila imfwa ya Yesu, niye kuti mutembeja chikondi chikulu chamene Yehova na Yesu chechitiwonesha popeleka dipo.—Onani Mawu Akumapeto 16.
22 Dipo ya Yesu ni mphaso ya ntengo wapatali kupambana vinthu vonse. (2 Akorinto 9:14, 15) Ŵanthu mamiliyoni anyinji amene emwalila azapindulesoti ngako na mphaso yamene iyi. M’Mutu 6 na 7 tizaphunzile kuti vamene ivi vizakwanishike tyani.
