1, 2. (a) Niki ekirikureetera ekiconco kuba eky’omuhendo ahariiwe? (b) Ahabw’enki ekitambo nikyo kiconco ekirikukirayo eki Ruhanga yaatuhaire?

EKICONCO ekirikukirayo eki oratungire ni kiiha? Ekiconco tikiine kuba ky’esente nyingi kubaasa kuba eky’omuhendo ahariiwe. Ekiconco ku kirikukureetera okushemererwa, nari kyaba kiri kyenyine eki orikwenda, nookisiima.

² Omu biconco byona ebi Ruhanga atuhaire, hariho kimwe ekirikukira byona. N’ekiconco eki Ruhanga yaahaire abantu. Omu shuura egi, nituza kwega ngu Yehova akoohereza Omwana we, Yesu Kristo kugira ngu tutungye amagara agatahwaho. (Shoma Matayo 20:28.) Yehova ahabw’okwohereza Yesu omu nsi kuba ekitambo, akooreka ngu buzima naatukunda.

3. Ahabw’enki abantu nibafa?

³ Ekitambo n’omuringo ogu Yehova yaakoreise kucungura abantu kuruga omu kibi n’okufa. (Abaefeso 1:7) Kubaasa kwetegyereza ahabw’enki ekitambo kyabaire nikyetengyesa, twine kumanya ekyabaireho ira omu musiri Edeni. Abazaire baitu ab’okubanza Adamu na Haawa bakashiisha. Ahabw’okushiisha, bakaija baafa. Naitwe nitufa ahabw’okugira ngu tukahungura ekibi kuruga ahari Adamu na Haawa.—Reeba Ebirikukiraho 9.

4. Adamu n’oha, kandi akaba aine kintu ki eky’omuhendo?

⁴ Obu Yehova yaahanga Adamu, akamuha ekintu ky’omuhendo  munonga. Akamuha amagara agahikiriire. Adamu akaba aine omubiri oguhikiriire n’ebiteekateeko ebihikiriire. Akaba atarikwija kurwara, kuba omugurusi, nari kufa. Ahabw’okugira ngu Yehova niwe yaahangire Adamu, akaba ari nka ishe. (Luka 3:38) Yehova akaba naakira kugamba nawe. Akashoboororera gye Adamu eki yaabaire naayenda ngu akore, kandi yaamuha n’omurimo ogurikushemeza.—Okutandika 1:28-30; 2:16, 17.

5. Baibuli neemanyisa ki ku erikugira ngu Adamu akahangwa ‘omu kishushani kya Ruhanga’?

⁵ Adamu akahangwa ‘omu kishushani kya Ruhanga.’ (Okutandika 1:27) Yehova akaha Adamu emitwarize nk’eye, nka rukundo, obwengye, oburingaaniza, n’amaani. Akaha Adamu obugabe bw’okwecweramu. Akaba atari nka rooboti. Yehova akamuhanga arikubaasa kucwamu kukora ekihikire nari ekigwire. Ku ogire ngu Adamu akacwamu kworobera Ruhanga, akaba naija kutuuraho ebiro byona omu Paradiso.

6. Adamu akafeerwa ki ku yaagomiire Ruhanga, kandi eki nikitukwataho kita?

⁶ Adamu ku yaagomiire Ruhanga kandi akacwerwa orubanja rw’okufa, akashashurira obugomi bwe. Akafeerwa omukago gwe gw’omutaano na Yehova, amagara ge agahikiriire, na Paradiso. (Okutandika 3:17-19) Adamu na Haawa bakacwamu kugomera Ruhanga, n’ahabw’ekyo bakaba bataine matsiko goona. Ahabw’obugomi bwa Adamu, ‘ekibi kikaija omu nsi, kandi kikarugamu okufa, n’okufa kwabuga omu bantu boona, ahakuba boona bakashiisha.’ (Abarooma 5:12) Adamu ku yaagomire, ‘akeeguza’ omu buhuuku bw’ekibi n’okufa otwariiremu naitwe. (Abarooma 7:14) Mbwenu shi itwe twine amatsiko? Eego, itwe tugaine.

7, 8. Ekitambo niki?

 ⁷ Ekitambo niki? Ekitambo nikibaasa kugira amakuru abiri. Amakuru ag’okubanza, ekitambo n’omuhendo ogurikushashurwa kucungura omuntu nari ekintu. Amakuru aga kabiri, ekitambo n’omuhendo ogurikuheebwayo okugaruraho ekintu ekisiisikaire.

⁸ Tihariho muntu owaabaire naabaasa kushashurira ebyasiisikaire obu Adamu yaakora ekibi kandi akatureetera n’okufa. Kwonka Yehova akataho entebeekanisa y’okutucungura kuruga omu kibi n’okufa. Ka tureebe oku ekitambo kirikukora, n’oku turikubaasa kukigasirwamu.

9. Ni kitambo ki ekyabaire kiine kuheebwayo?

⁹ Tihariho n’omwe ahariitwe owaabaire naabaasa kuhayo ekitambo ekirikwingana n’amagara agahikiriire agu Adamu yaafeereirwe. Ahabw’enki? Ahabw’okugira ngu twena tituhikiriire. (Zaaburi 49:7, 8) Ekitambo ekyabaire kiine kuheebwayo kikaba kiine kuba nikiingana n’amagara agahikiriire. Baibuli neegira ngu Yesu Kristo akeehayo “kucungura abantu boona.” (1 Timoseo 2:6) Amagara agahikiriire agu Yesu yaahaireyo, gakaba nigaingana n’agu Adamu yaafeereirwe.

10. Yehova akahayo ata ekitambo?

¹⁰ Yehova akahayo ata ekitambo? Yehova akahayo Omwana we ow’omuhendo omu nsi. Niwe ou yaabandize kuhanga. (1 Yohaana 4:9, 10) Yesu akaba ayeteekateekire kutsigaho Ishe n’eka ye ey’omu iguru. (Abafilipi 2:7) Yehova akafurura Yesu kuruga omu iguru kwija omu nsi, kandi Yesu akazaarwa ari omuntu ohikiriire otaine kibi.—Luka 1:35.

11. Omuntu omwe akaba naabaasa kuba ata ekitambo ky’abantu boona?

 ¹¹ Omuntu w’okubanza Adamu, akafeerereza abantu boona amagara agahikiriire obu yaagoma. Mbwenu shi haine omuntu owaabaire naabaasa kwihaho okufa kwa baijukuru ba Adamu boona? Eego. (Shoma Abarooma 5:19.) Yesu, otarasiisire, akahayo amagara ge agahikiriire nk’ekitambo. (1 Abakorinso 15:45) Amagara ge agahikiriire gakaba nigaija kuheebwayo nk’ekitambo kwihaho okufa kwa baijukuru ba Adamu boona.—1 Abakorinso 15:21, 22.

12. Ahabw’enki Yesu yaabonaboine munonga?

¹² Baibuli neeshoboorora gye oku Yesu yaabonaboine atakafiire. Akateerwa, yaahanikwa aha muti, kandi yaafeera omu busaasi bwingi. (Yohaana 19:1, 16-18, 30) Ahabw’enki Yesu yaabonabonesiibwe munonga atyo? N’ahabw’okuba Sitaane akagira ngu tihariho muntu orikubaasa kuhamira ahari Ruhanga yaagyezibwa munonga. Yesu akooreka ngu omuntu ohikiriire naabaasa kuhamira ahari Ruhanga n’obu yaakubonabonesibwa ekirenga. Yesu ashemereire kuba yaareeteire Yehova okushemererwa!—Enfumu 27:11; reeba Ebirikukiraho 15.

13. Ekitambo kikaheebwayo kita?

¹³ Ekitambo kikaheebwa kita? Yesu akahayo omuhendo gw’amagara ge ahari Yehova. Omu mwaka gwa 33, ahari Nisani 14 aha karenda y’Abayudaaya, Yehova akaikiriza abazigu kwita Yesu. (Abaheburaayo 10:10) Aha kiro kya kashatu Yesu aherize kufa, Yehova akamuzoora aine amagara ag’omwoyo. Bwanyima Yesu ku yaagarukire ahari Ishe omu iguru, akahayo omuhendo gw’amagara ge agahikiriire ahari Yehova nk’ekitambo. (Abaheburaayo 9:24) Hati obu ekitambo ekyo kyahairweyo, twine  omugisha gw’okucungurwa kuruga omu kibi n’okufa.—Shoma Abarooma 3:23, 24.

14, 15. Twine kukora ki ebibi byaitu kubaasa kusaasirwa?

¹⁴ Twatandikire kugasirwa omu kiconco kya Ruhanga ekirikukirayo. Ka tureebe oku turikugasirwa hati n’oku turikwija kugasirwa omu biro by’omumaisho.

¹⁵ Nitusaasirwa ebibi byaitu. Kigumire kukora ekihikire obwire bwona. Nitukora enshobe, kandi obumwe nitugamba nari tukora ebitahikire. (Abakolosai 1:13, 14) Nitubaasa kusaasirwa tuta? Tushemereire kworeka ngu twashaasha ahabw’okukora kubi reero tushabe Yehova kutusaasira. Obwo nitubaasa kuhamya ngu ebibi byaitu byasaasirwa.—1 Yoh. 1:8, 9.

16. Twine kukora ki kubaasa kugira omutima ogutarikweshinja?

¹⁶ Nitubaasa kugira omutima ogutarikweshinja. Omutima gwaba nigutugambira ngu tukozire ekibi, nitweshinja, obumwe twehwa amatsiko nari tuba nk’abataine mugasho. Kwonka titushemereire kuhwamu amaani. Twashaba Yehova kutusaasira, nitugira amatsiko ngu naija kutuhurikiza kandi atusaasire. (Abaheburaayo 9:13, 14) Yehova naayenda ngu tumugambire oburemeezi bwaitu n’obweremwa bwaitu. (Abaheburaayo 4:14-16) N’ekirikurugamu, nitubaasa kugira omukago murungi nawe.

17. Ni migisha ki ei turikubaasa kutunga ahabw’okugira ngu Yesu akatufeera?

¹⁷ Twine amatsiko g’okugumaho ebiro byona. Abarooma 6:23 nihagira ngu “ebihembo by’ekibi n’okufa, kwonka ekiconco kya Ruhanga n’amagara agatahwaho omuri Kristo Yesu Mukama waitu.” Ahabw’okugira ngu Yesu akatufeera, nitubaasa kugumaho ebiro byona  twine amagara agahikiriire. (Okushuuruurwa 21:3, 4) Kwonka shi twine kukora ki kubaasa kutunga emigisha?

18. Nitumanya tuta ngu Yehova naatukunda?

¹⁸ Teekateeka aha ku orikwehurira omuntu yaakuha ekiconco. Ekitambo n’eky’omuhendo kukira ebiconco byona, kandi twine kusiima Yehova ahabw’okukituha. Yohaana 3:16 nihagira ngu “oku nikwo Ruhanga yaakunzire atyo ensi, akahayo Omwana we omwe nyamunegyere.” Buzima, Ruhanga naatukunda munonga nikyo kyamureeteire kuhayo Yesu, Omwana we ow’omuhendo. Kandi nitumanya ngu na Yesu naatukunda, ahabw’okuba akaba ayeteekateekire kutufeera. (Yohaana 15:13) Oshemereire kuhamiza kimwe ngu ekiconco ky’ekitambo nikyoreka ngu Yehova na Yesu buzima nibakukunda.—Abagalatia 2:20.

19, 20. Noobaasa kuba ota munywani wa Yehova? (b) Noobaasa kworeka ota ngu noikiririza omu kitambo kya Yesu?

¹⁹ Hati obu oyegire ebirikukwata ahari rukundo ya Ruhanga erikukirayo, noobaasa kuba ota munywani we? Ti kyorobi kukunda omuntu ou otarikumanya. Yohaana 17:3 nihagira ngu nitubaasa kumanya Yehova. Ku oraayeyongyere kumanya Yehova, noija kwongyera kumukunda, noija kwenda kumushemeza, kandi noija kuba munywani we. N’ahabw’ekyo, guma nooyega ebirikukwata ahari Yehova orikwega Baibuli.—1 Yohaana 5:3.

²⁰ Yoreka ngu noosiima ekitambo kya Yesu. Baibuli neegira ngu “orikwikiriza Omwana aine amagara agatahwaho.” (Yohaana 3:36) Okwikiriza nikimanyisa ki? Nikimanyisa okukora ebi Yesu yaayegyeise. (Yohaana 13:15) Titurikubaasa kugamba bugamba ngu nitwikiririza omuri Yesu. Kubaasa kwikiririza omu kitambo, twine kugira  eki twakora aha kwikiriza kwaitu. Omuri Yakobo 2:26 nitushoma tuti: “Okwikiriza okutaine kukora kuba kufiire.”

21, 22. (a) Ahabw’enki buri mwaka twine kubaho aha mukoro gw’okwijuka okufa kwa Kristo? (b) Omu shuura ya 6 n’eya 7 nituza kugamba ahari ki?

²¹ Baho aha kwijuka okufa kwa Kristo. Omwabazyo ogwahererukireyo Yesu atakaitsirwe, akatwegyesa ngu twine kwijuka okufa kwe. Nitugira omukoro ogu buri mwaka, kandi nigwetwa ‘Ekiihuro kya Mukama.’ (1 Abakorinso 11:20; Matayo 26:26-28) Yesu naayenda twijukye ngu akahayo amagara ge agahikiriire nk’ekitambo ahabwaitu. Akaragiira ati: “Mugume mukore mutyo okuunyijukiraho.” (Shoma Luka 22:19.) Ku orikubaho aha mukoro gw’Ekiijutsyo, nooyoreka ngu noijuka ekitambo, na rukundo mpango ei Yehova na Yesu batwiniire.—Reeba Ebirikukiraho 16.

²² Ekitambo nikyo kiconco ekirikukira ebiconco ebindi byona. (2 Abakorinso 9:14, 15) Ekiconco eki eky’omuhendo nikigasira n’abo abaafiire. Eshuura ya 6 n’eya 7 niziija kushoboorora oku eki kirikubaasika.