1, 2. (a) Ngimba findu fiki fikupangisya ukuti ikyabupe kiye kyapamwanya fiyo? (b) Nongwa yafiki ukutabuliwa kwitu kyabupe kyapamwanya fiyo?

PA fyabupe fyosa ifi mwambililepo, ngimba kyabupe kiliku iki mukuketa ukuti kyapamwanya fiyo? Ukuti ikyabupe kiye kyapamwanya kitikulondiwa ukuya kya ndalama nyingi. Loli linga muhobwike nakyo kangi muketile ukuti kikuya pakubatula, mundaghisya fiyo.

² Kyala atupele ifyabupe fingi, loli pali ikyabupe kyapamwanya fiyo ukukinda fyosa. Ikyabupe iki kyapamwanya fiyo ku bandu bosa. M’mutu ughu, tukuya pakumanyila ukuti Yehova alintumile umwanake pa kisu, Yesu Kristu, ukuti tusaye nu bumi bwa bwila na bwila. (Belenga Matai 20:28.) Ukuntuma umwanake pa kisu ukuti atutabule, kukunangisya ukuti Yehova atughanile fiyo.

3. Nongwa yafiki twebandu tukufwa?

³ Yehova ikututabula ku butulanongwa bwitu ni nifwa ukwendela mwa Yesu Kristu. (Baefesi 1:7) Ukuti tupilikisye inongwa yake iyi twalondiwagha ukutabuliwa, tumanye tasi ifi fyabombiwe kunyuma mu ngunda wa Edeni. Abapapi bitu, Adamu na Eva, batulile inongwa. Abene bafwile panongwa ya butulanongwa bwabo. Ukuya mbapo ya Adamu na Eva yo nongwa twesa tukufwa.—Mukete Amasyu Gha Pabumalilo 9.

4. Ngimba Adamu ali yonani, kangi Kyala alimpele ifiki?

⁴ Bo Yehova apelile umundu uwakwanda, Adamu,  alimpele ulusako lwa pamwanya fiyo. Alimpele Adamu ubumi bwa bwila na bwila. Inyinong’ono syake syali ngolofu nu mbili wake ghope wali ngolofu. Adamu akabaghile ukubina, ukukangala pamo ukufwa. Nongwa yakuti Yehova alimpelile Adamu, umwene yo ali tata wake. (Luka 3:38) Yehova na Adamu bayobesaniagha akabalilo kosa. Kyala alimbulile Adamu isi umwene alondagha kumyake nukumpa imbombo inunu yakuti ahobokeghe nayo.—Ubwandilo 1:28-30; 2:16, 17.

5. Ngimba amasyu ghakuti Kyala alimpelile Adamu “nkifwani kyake” ghikusanusya isyafiki?

⁵ Kyala alimpelile Adamu “nkifwani kyake.” (Ubwandilo 1:27) Yehova alimpele utuyilo utu umwene ali nato, bo lughano, amahala, ukuya wabwanaloli, na maka. Alimpele kangi Adamu ulusako lwakusala mwene ifi ikulonda. Adamu akafwene na muno amaloboti ghayilile. Kyala alimpelile ukuti asaleghe mwene ukubomba inunu pamo imbibi. Linga Adamu asalile ukumpilikila Kyala ngali alitughele nu bumi bwa bwila na bwila m’Paladaiso.

6. Ngimba lusako luliku ulu Adamu ataghile bo atoliwe ukumpilikila Kyala? Ngimba uswe tukupalamasiwa bulebule?

⁶ Bo asalile ukuleka ukumpilikila Kyala, Adamu ataghile ulusako ulunywamu fiyo papo alongiwe ukuti afwe. Ataghile ulusako lwakuya pabumanyani na Yehova, ubumi bwa bwila na bwila pampene ni kisu kya Paladaiso. (Ubwandilo 3:17-19) Adamu na Eva basalile ukuleka ukumpilikila Kyala. Nongwa ya isi Adamu abombile, “ubutulanongwa bwalyendile m’mundu yumoywene ukwisa nkisu muno, mo mumo bope nubufwe bwendile mbutulanongwa, po apa ubufwe bulinkusatanila mbandu bosa papo bosa batulile inongwa.” (Baroma 5:12) Bo Adamu atulile inongwa ‘alyulisiwe’ pampene nanuswe ku butulanongwa na ku nifwa. (Baroma 7:14) Ngimba uswe tubaghile ukupona ku butulanongwa ubu? Ee, tubaghile.

7, 8. Ngimba ukutabuliwa kokuti fiki?

 ⁷ Ngimba ukutabuliwa kokuti fiki? Ukutabuliwa kukusanusya fiyo ifindu fibili. Ikyakwanda, kukwimila ukuhomba indalama pamo ifindu fimo ukuti umundu abuliwe pamo ifindu ifi fyonangike fighomokele. Ikyabubili, kukwimila ukuhomba indalama pamo ifindu fimo ifi untengo wake ghufwene na ifi fyonangike.

⁸ Nayumo umundu uyu abaghile ukuhomba kwa Kyala pa butulanongwa bwa Adamu ubu bwatwele inifwa ku bandu bosa. Loli Yehova alondile injila yakututabulila ku butulanongwa ni nifwa. Isagha tumanyile muno Yehova atutabulile nu bununu ubu bulipo.

9. Ngimba twalondiwagha ifiki ukuti tutabuliwe?

⁹ Nayumo umundu uyu abaghile ukututabula ukuti tuye nubumi ubugholofu ubu Adamu ataghile. Nongwa yafiki? Nongwa yakuti twesa tuli batulanongwa. (Salimo 49:7, 8) Ubumi bwa mundu ungolofu bo bwalondiwagha ukuti tutabuliwe. IBaibolo likuyoba ukuti Yesu yo ‘ntabuli wa bandu bosa.’ (1 Timoti 2:6) Ubumi ubwakututabulila, bwalondiwagha ukuya bugholofu ukufwana namuno ubumi bwayilile ubu Adamu ataghile.

10. Ngimba Yehova atutabwile bulebule?

¹⁰ Ngimba Yehova atutabwile bulebule? Yehova alintumile umwanake unganiwa fiyo pa kisu. Umwanake uyu yo Yesu, ali wakwanda ukupeliwa bo fyosa fikali. (1 Yohani 4:9, 10) Yesu alitikisye ukwisa pa kisu ukufuma kumwanya kuno ikalagha. (Bafilipi 2:7) Yehova asamisye ubumi bwa Yesu ukufuma kumwanya ukwisa pa kisu. Yesu apapiwe kisita butulanongwa.—Luka 1:35.

11. Ngimba umundu yumoywene abaghile ukubatabula bulebule abandu bosa?

¹¹ Umundu uwakwanda, Adamu, ataghile ubumi bugholofu  bwa twesa pakabalilo aka alekile ukumpilikila Yehova. Ngimba alipo uyu abaghile ukutupoka ku bufye? Alipo. (Belenga Baroma 5:19.) Yesu, uyu akalyonangilemo, afwile ukuti uswe tutabuliwe. (1 Bakorinti 15:45) Ubumi bwake ubugholofu bo bwene bwabaghile ukusosyapo inifwa ku bana bosa ba Adamu.—1 Bakorinti 15:21, 22.

12. Nongwa yafiki Yesu alondiwagha ukuti atamiwe fiyo?

¹² IBaibolo likulingania muno Yesu atamiliwe bo ali pipi ukufwa. Akomiwe fiyo ningili, balinkomile ni misomali pa mpiki, nukufwa inifwa yakubaba. (Yohani 19:1, 16-18, 30) Nongwa yafiki Yesu alondiwagha ukuti atamiwe fiyo? Nongwa yakuti Setano ayobile ukuti nayumo umundu uyu abaghile ukukindilila ukuya nsubiliwa kwa Kyala linga aghene ni ngelo inywamu. Yesu anangisye ukuti umundu ungolofu abaghile ukufwanisya ukuya nsubiliwa kwa Kyala nalinga aghane ni ngelo inywamu pa bumi bwake. Yehova ahobwike fiyo nu mwanake uyu!—Isya Mbupingamo 27:11; mukete Amasyu Gha Pabumalilo 15.

13. Ngimba twatabuliwe bulebule?

¹³ Ngimba twatabuliwe bulebule? Yesu apelike ubumi bwake bwa pamwanya kwa tata wake. Mu kyinja kya 33 C.E., m’mwesi wa Nisani 14 pa kalendala ya Bayuda, Yehova alitikisye ukuti abalughu ba Yesu bangoghe. (Bahiburi 10:10) Bo ghakindilepo amasiku matatu ukufuma apa Yesu afwilile, Yehova alinsyusisye Yesu nukumpa ubumi ubu bwafwene na ubu ali nabo kumwanya bo akali ukwisa pa kisu. Panyuma pake, Yesu aghomokile kumwanya, pakabalilo aka Yehova alitikisye syosa isi abombile bo ali pa kisu ukuti uswe tutabuliwe. (Bahiburi 9:24) Nongwa ya syosa isi Yesu abombile, uswe tuli nulusako lwa kwabuliwa ku butulanongwa ni nifwa.—Belenga Baroma 3:23, 24.

14, 15. Ngimba findu fiki ifi tukulondiwa ukubomba ukuti tuhobokeliwe imbibi syitu?

¹⁴ Pakabalilo aka twesa tukutuliwa ni kyabupe kya pamwanya iki Kyala atupele. Isagha tumanyile muno ikyabupe iki kikututulila lino na nkyeni.

¹⁵ Tukuhobokeliwa imbibi syitu. Ukubomba inunu akabalilo kosa kukutamya ku mundu aliwesa. Twesa tukonanga utubalilo tumo mu isi tukuyoba pamo ukubomba. (Bakolosi 1:13, 14) Ngimba tubaghile ukuhobokeliwa bulebule? Twitikisyeghe syosa isi tonangile nukunsuma Yehova ukuti atuhobokele. Linga tunsumile, umwene ikutuhobokela imbibi syitu.—1 Yohani 1:8, 9.

16. Ngimba tubombeghe isyafiki ukuti tuye na mabyebye amanunu?

¹⁶ Tukuya na mabyebye amanunu. Linga amabyebye ghakutubula ukuti tubombile simo imbibi, tukwilonga mu ndumbula, lumo tukwanda ukwinong’ona ukuti Kyala akabaghila ukutuhobokela. Loli tutikulondiwa ukuti mo twinong’oneleghe. Linga tunsumile Yehova ukuti atuhobokele, tunsubileghe ukuti apilike kangi atuhobokile. (Bahiburi 9:13, 14) Yehova ikulonda ukuti tumbuleghe indamyo syitu syosa ukuti atutule. (Bahiburi 4:14-16) Linga atuhobokile, tukuya nawe pabumanyani.

17. Ngimba tukwisa pakukaba ifiki nongwa yakuti Yesu atufwilile?

¹⁷ Tukwisa kuya nu bumi bwa bwila na bwila. ‘Namanga ifihombiwa ifi ubutulanongwa bukunhomba umundu bo bu bufwe; ifyene loli ifyabupe fya Kyala, bo bu bumi bwa bwila na bwila, mwa Yesu Kristu uNtwa witu.’ (Baroma 6:23) Nongwa yakuti Yesu atufwilile, tuli nulusako lwakuya nubumi bwa bwila na bwila nu mbili ungolofu. (Ubusetuli 21:3, 4) Ngimba tukulondiwa ukubomba isyafiki ukuti Kyala asatusaye?

18. Ngimba tukumanya bulebule ukuti Yehova atughanile?

¹⁸ Ngimba mukuhoboka fiyo linga yumo abapele ikyabupe kya pamwanya? Ukutabuliwa kyabupe kyapamwanya fiyo ukukinda fyosa, yo nongwa tukulondiwa ukuyoba ukuti ndagha kwa Yehova uyu atupele. Pa Yohani 3:16 pali amasyu ghakuti ‘Namanga bo akighanile bunobuno Kyala ikisu, ko kwenda nukukipa uMwanake yumoywene untigha pamo wapadela.’ Isi sikututula ukumanya ukuti Yehova atughanile fiyo uswe yo nongwa atupele umwanake unganiwa, Yesu Kristu. Tumenye kangi ukuti Yesu yope atughanile, papo alipelike ukutufwila. (Yohani 15:13) Ikyabupe iki kitupele uswe ulusubilo lwamaka ukuti Yehova na Yesu batughanile fiyo.—Bagalatiya 2:20.

19, 20. (a) Ngimba mubaghile ukubomba isyafiki ukuti muye pabumanyani na Yehova? (b) Ngimba mubaghile ukubomba isyafiki ukuti munangisye ukuti mukundaghisya ikyabupe kya Yesu?

¹⁹ Pakuti lino mumanyile isya lughano ulukulumba lwa Kyala, ngimba mubaghile ukubomba isyafiki ukuti muye pabumanyani na Yehova? Kukuya kukafu fiyo ukungana umundu uyu mukam’manya kanunu. Ilemba lya Yohani 17:3 likuyoba ukuti tubaghile ukumanya Yehova. Linga mumanyila isya Yehova, ulughano lwinu kumyake lukukula, mukwanda ukulonda ukuti mubombeghe ubwighane bwake nukuya nawe pabumanyani. Mukindilile ukumanyila iBaibolo ukuti mumanye nyingi isya Yehova.—1 Yohani 5:3.

²⁰ Mundaghisyeghe ikyabupe kya Yesu. IBaibolo likuyoba ukuti “uyu ikumwitika uMwana yo ali nabo ubumi bwa bwila.” (Yohani 3:36) Ngimba ukumwitika umwana kukusanusya ifiki? Kukusanusya ukubomba isi Yesu atumanyisye ukuti tubombeghe. (Yohani 13:15) Tutikulondiwa ukuyoba pakanwa pene ukuti tukunsubila Yesu. Tukulondiwa  ukunangisya nimbombo syitu ukuti tukundaghisya ikyabupe iki tuli nakyo. Pa lemba lya Yakobe 2:26, tukubelenga ukuti: “ulwitiko lufwe itolo apa linga lukaya nimbombo.”

21, 22. (a) Nongwa yafiki tukulondiwa ukuti tuyengepo pakukumbukila inifwa ya Yesu ikyinja kilikyosa? (b) Ngimba tukwisa pakumanyila ifiki m’mutu 6 na 7?

²¹ Muyengepo pisiku lyakukumbukila inifwa ya Yesu. Pisiku ilyakuti kilabo ikuya pakufwa, Yesu ayobile atile twise tukumbukileghe inifwa yake. Tukukumbukila inifwa ya Yesu ikyinja kilikyosa, kangi tukuyoba ukuti Ukumbukila inifwa ya Yesu pamo “Ighonelo lya Mwalafyale.” (1 Bakorinti 11:20 NWT; Matai 26:26-28) Yesu ikulonda ukuti tukumbukileghe ukuti umwene afwile ukuti uswe tutabuliwe. Ayobile atile: ‘Bo mubombeghe bunobuno ukungumbukilamo une.’ (Belenga Luka 22:19.) Linga mukwaghiwapo pisiku lyakukumbukila inifwa ya Yesu, mukunangisya ukuti mukundaghisya inifwa yake nu lughano ulukulumba ulu Yehova na Yesu bali nalo kumyitu.—Mukete Amasyu Gha Pabumalilo 16.

²² Ukutabuliwa kyabupe kyapamwanya iki Kyala atupele. (2 Bakorinti 9:14, 15) Ikyabupe kyapamwanya iki kikwisa kubatula nabandu abingi fiyo aba bafwile. Isi syo tukwisa pakumanyila m’mutu 6 na 7.