୧, ୨. (କ) କୌଣସି ଏକ ଉପହାର କାହିଁକି ଆପଣଙ୍କ ପାଇଁ ବହୁମୂଲ୍ୟ ହୋଇଯାଏ ? (ଖ) ମୁକ୍ତିର ମୂଲ୍ୟ କାହିଁକି ଈଶ୍ୱରଙ୍କର ସବୁଠାରୁ ଶ୍ରେଷ୍ଠ ଉପହାର ଅଟେ ?

 ଆଜି ପର୍ଯ୍ୟନ୍ତ ଆପଣଙ୍କୁ ଯେତେସବୁ ଉପହାର ମିଳିଛି, ସେମଧ୍ୟରୁ କେଉଁଟି ଆପଣଙ୍କ ପାଇଁ ସବୁଠାରୁ ଉତ୍ତମ ଅଟେ ? ଏକ ଉପହାର ଆପଣଙ୍କ ନିମନ୍ତେ ବହୁମୂଲ୍ୟ ହେବା ପାଇଁ ତାହା ମହଙ୍ଗା ହେବା ଜରୁରୀ ନୁହଁ । ଯେତେବେଳେ ଏକ ଉପହାର ଆପଣଙ୍କୁ ଖୁସି ଦିଏ କିମ୍ବା ତାହା ଆପଣଙ୍କୁ ପ୍ରକୃତରେ ଦରକାର ଥାଏ, ଆପଣ ଏହା ପାଇଁ କୃତଜ୍ଞ ଅନୁଭବ କରିଥାʼନ୍ତି ।

^୨ ଈଶ୍ୱର ମଧ୍ୟ ଆମକୁ ଅନେକ ଉପହାର ଦେଇଛନ୍ତି । କିନ୍ତୁ ସେଗୁଡ଼ିକ ମଧ୍ୟରେ ଏପରି ଏକ ଉପହାର ରହିଛି, ଯାହା ଅନ୍ୟ ଯେକୌଣସି ଜିନିଷ ଅପେକ୍ଷା ଆମକୁ ଅଧିକ ଆବଶ୍ୟକ ଅଟେ । ଏହା ମାନବଜାତି ପାଇଁ ଈଶ୍ୱରଙ୍କର ସବୁଠାରୁ ଶ୍ରେଷ୍ଠ ଉପହାର ଅଟେ । ଏହି ଅଧ୍ୟାୟରେ ଆମେ ଶିଖିବା ଯେ ଯିହୋବା ନିଜ ପୁତ୍ର ଯୀଶୁଙ୍କୁ ପୃଥିବୀକୁ ପଠାଇଲେ, ଯାହାଫଳରେ ଆମେ ଚିରଦିନ ପାଇଁ ଜୀବିତ ରହିପାରିବା । (ମାଥିଉ ୨୦:୨୮ ପଢ଼ନ୍ତୁ ।) ଯିହୋବା ନିଜ ପୁତ୍ରଙ୍କୁ ମୁକ୍ତିର ମୂଲ୍ୟ ରୂପେ ପୃଥିବୀକୁ ପଠାଇ ପ୍ରମାଣିତ କରିଛନ୍ତି ଯେ ସେ ଆମକୁ ପ୍ରକୃତରେ ପ୍ରେମ କରନ୍ତି ।

୩. ଆମେ କାହିଁକି ମରିଥାଉ ?

^୩ ମାନବଜାତିକୁ ପାପ ଓ ମୃତ୍ୟୁରୁ ମୁକ୍ତ କରିବା ପାଇଁ ମୁକ୍ତିର ମୂଲ୍ୟ ଯିହୋବାଙ୍କର ଏକ ବ୍ୟବସ୍ଥା ଅଟେ । (ଏଫିସୀୟ ୧:୭) କିନ୍ତୁ ମୁକ୍ତିର ମୂଲ୍ୟ କାହିଁକି ଆବଶ୍ୟକ ହେଲା ? ଏହାକୁ ବୁଝିବା ପାଇଁ ଆମକୁ ଜାଣିବାକୁ ହେବ ଯେ ହଜାର ହଜାର ବର୍ଷ ପୂର୍ବେ ଏଦନ ଉଦ୍ୟାନରେ କʼଣ ଘଟିଥିଲା । ଆମର ପ୍ରଥମ ପିତାମାତା ଆଦମ ଓ ହବା ପାପ କଲେ । ପାପ କରିବା ଯୋଗୁଁ ସେମାନେ ବୃଦ୍ଧାବସ୍ଥାରେ ପହଞ୍ଚି ଶେଷରେ ମରିଗଲେ । ଆମେ ମଧ୍ୟ  ଏଥିପାଇଁ ମରିଥାଉ, କାରଣ ଆମେ ଆଦମ ଓ ହବାଙ୍କ ଉତ୍ତରାଧିକାରୀ ଭାବରେ ସେମାନଙ୍କଠାରୁ ପାପ ପାଇଛୁ ।— ଅଧିକ ବିବରଣୀ-୯ ଦେଖନ୍ତୁ ।

୪. ଯିହୋବା ଆଦମକୁ କʼଣ କʼଣ ଦେଇଥିଲେ ?

^୪ ଯେତେବେଳେ ଯିହୋବା ପ୍ରଥମ ମଣିଷ ଆଦମକୁ ସୃଷ୍ଟି କଲେ, ସେ ତାʼକୁ ଏପରି କିଛି ଦେଇଥିଲେ ଯାହା ବହୁମୂଲ୍ୟ ଥିଲା । ସେ ଆଦମକୁ ସିଦ୍ଧ ମଣିଷ ଜୀବନ ଦେଇଥିଲେ । ସେ ତାʼକୁ ସିଦ୍ଧ ମସ୍ତିସ୍କ ଓ ସିଦ୍ଧ ଶରୀର ଦେଇଥିଲେ । ତାʼଠାରେ କୌଣସି ପାପ ନ ଥିଲା । ସେ କେବେ ରୋଗରେ ପୀଡ଼ିତ ହୋଇ ନ ଥାʼନ୍ତା, କେବେ ବୁଢ଼ା ହୋଇ ନ ଥାʼନ୍ତା ଏବଂ କେବେ ମଧ୍ୟ ମରି ନ ଥାʼନ୍ତା । ଯିହୋବା ଆଦମକୁ ସୃଷ୍ଟି କରିଥିବାରୁ ସେ ତାʼ ପାଇଁ ଜଣେ ପିତା ସଦୃଶ ଥିଲେ । (ଲୂକ ୩:୩୮) ଯିହୋବା ତାʼ ସହିତ ନିୟମିତ ଭାବେ କଥା ହେଉଥିଲେ । ସେ ଆଦମକୁ ସ୍ପଷ୍ଟ ଭାବରେ କହିଥିଲେ ଯେ ସେ ତାʼଠାରୁ କʼଣ ଚାହୁଁଥିଲେ । ଏହା ଛଡ଼ା, ଈଶ୍ୱର ତାʼକୁ ଏପରି କାମ ଦେଇଥିଲେ, ଯେଉଁଥିରୁ ସେ ଖୁସି ପାଉଥିଲା ।— ଆଦି ପୁସ୍ତକ ୧:୨୮-୩୦; ୨:୧୬, ୧୭.

୫. ବାଇବଲ କହେ: ଆଦମକୁ “ପରମେଶ୍ୱରଙ୍କ ପ୍ରତିମୂର୍ତ୍ତିରେ” ସୃଷ୍ଟି କରାଯାଇଥିଲା । ଏହାର ଅର୍ଥ କʼଣ ?

^୫ ଆଦମକୁ “ପରମେଶ୍ୱରଙ୍କ ପ୍ରତିମୂର୍ତ୍ତିରେ” ସୃଷ୍ଟି କରାଯାଇଥିଲା । (ଆଦି ପୁସ୍ତକ ୧:୨୭) ଅର୍ଥାତ୍‌, ଯିହୋବାଙ୍କ ପାଖରେ ଯେଉଁ ଗୁଣଗୁଡ଼ିକ ରହିଛି, ଠିକ୍‌ ସେହି ଗୁଣଗୁଡ଼ିକ ସେ ଆଦମକୁ ଦେଇଥିଲେ ଯେପରି— ପ୍ରେମ, ବୁଦ୍ଧି, ନ୍ୟାୟ ଓ ଶକ୍ତି । ଏହା ସହିତ, ସେ ଆଦମକୁ ଏକ ରୋବର୍ଟ ବା ଯନ୍ତ୍ର-ମାନବ ଭଳି ସୃଷ୍ଟି କରି ନ ଥିଲେ, ବରଂ ତାʼକୁ ନିଜ ପସନ୍ଦ ଓ ନାପସନ୍ଦ କରିବାର ସ୍ୱାଧୀନତା ଦେଇଥିଲେ । ଆଦମ ନିଜେ ସ୍ଥିର କରିପାରୁଥିଲା ଯେ ସେ ଈଶ୍ୱରଙ୍କ ଆଜ୍ଞା ପାଳନ କରିବ କି ନାହିଁ । ଯଦି ଆଦମ ଈଶ୍ୱରଙ୍କ ଆଜ୍ଞା ପାଳନ କରିବା ପାଇଁ ସ୍ଥିର କରିଥାʼନ୍ତା, ତେବେ ସେ ଚିରଦିନ ପାଇଁ ପାରଦୀଶରେ ଜୀବିତ ରହିପାରିଥାʼନ୍ତା ।

୬. (କ) ଯେତେବେଳେ ଆଦମ ଈଶ୍ୱରଙ୍କ ଆଜ୍ଞା ଉଲ୍ଲଙ୍ଘନ କଲା, ସେ କʼଣ ହରାଇଲା ? (ଖ) ଆମ ଉପରେ ଏହାର କʼଣ ପ୍ରଭାବ ପଡ଼ିଲା ?

^୬ ଯେତେବେଳେ ଆଦମ ଈଶ୍ୱରଙ୍କ ଆଜ୍ଞା ଉଲ୍ଲଙ୍ଘନ କଲା, ସେ ମୃତ୍ୟୁଦଣ୍ଡ ପାଇଲା । ଏହା ପରେ ସେ ନିଜର ସବୁକିଛି ହରାଇଲା । ସେ ଯିହୋବାଙ୍କ ସହିତ ଥିବା ତାʼର ଖାସ୍‌ ମିତ୍ରତା, ନିଜର ସିଦ୍ଧ ଜୀବନ ଓ ପାରଦୀଶର ଘର ହରାଇଲା । (ଆଦି ପୁସ୍ତକ ୩:୧୭-୧୯) ଆଦମ ଓ ହବା ଜାଣିଶୁଣି ଈଶ୍ୱରଙ୍କ ଆଜ୍ଞା ଉଲ୍ଲଙ୍ଘନ କରିବା ପାଇଁ ସ୍ଥିର କଲେ, ତେଣୁ ସେମାନଙ୍କ ପାଇଁ ଆଉ କୌଣସି ଆଶା ନ ଥିଲା । ଆଦମ ଯାହା କଲା, ତାʼ ଯୋଗୁଁ “ପାପ ଓ ପାପ ଦ୍ୱାରା ମୃତ୍ୟୁ ଜଗତରେ ପ୍ରବେଶ କଲା, ଆଉ ସେହିପ୍ରକାରେ ମୃତ୍ୟୁ  ସମସ୍ତ ଲୋକଙ୍କ ପ୍ରତି ଘଟିଲା, ଯେଣୁ ସମସ୍ତେ ତ ପାପ କଲେ ।” (ରୋମୀୟ ୫:୧୨) ଯେତେବେଳେ ଆଦମ ପାପ କଲା, ସେ କେବଳ ନିଜକୁ ନୁହଁ, ବରଂ ଆମ ସମସ୍ତଙ୍କୁ ପାପ ଓ ମୃତ୍ୟୁର ଦାସତ୍ୱରେ “ବିକ୍ରି” କରିଦେଲା । (ରୋମୀୟ ୭:୧୪, ଇଜି-ଟୁ-ରିଡ୍‌ ଭର୍ସନ) ତେବେ କʼଣ ଆମ ପାଇଁ ଏହି ଦାସତ୍ୱରୁ ମୁକ୍ତି ପାଇବାର କିଛି ଆଶା ରହିଛି ? ହଁ, ଯିହୋବା ଆମ ପାଇଁ ମୁକ୍ତିର ମୂଲ୍ୟର ବ୍ୟବସ୍ଥା କଲେ ।

୭, ୮. ମୁକ୍ତିର ମୂଲ୍ୟ କʼଣ ଅଟେ ?

^୭ ମୁକ୍ତିର ମୂଲ୍ୟ କʼଣ ଅଟେ ? ଏହାର ଅର୍ଥରେ ମୁଖ୍ୟତଃ ଦୁଇଟି କଥା ସାମିଲ୍‌ ରହିଛି । ପ୍ରଥମତଃ, କାହାରିକୁ ମୁକ୍ତ କରିବା ପାଇଁ କିମ୍ବା ବନ୍ଧା ପଡ଼ିଥିବା କୌଣସି ଜିନିଷକୁ ମୁକୁଳାଇବା ପାଇଁ ଯେଉଁ ଦାମ୍‌ ଦିଆଯାଏ, ତାକୁ ମୁକ୍ତିର ମୂଲ୍ୟ କୁହାଯାଏ । ଦ୍ୱିତୀୟତଃ, କୌଣସି କ୍ଷତିର ଭରଣ ପାଇଁ ଯେଉଁ ଦାମ୍‌ ଦିଆଯାଏ, ତାକୁ ମଧ୍ୟ ମୁକ୍ତିର ମୂଲ୍ୟ କୁହାଯାଏ ।

^୮ ଯେତେବେଳେ ଆଦମ ପାପ କଲା ଏବଂ ଆମ ପାଇଁ ମୃତ୍ୟୁ ଆଣିଲା, ସେ ଏତେ ବଡ଼ କ୍ଷତି ଘଟାଇଲା ଯେ କୌଣସି ଅସିଦ୍ଧ ମଣିଷ ଏହା ପାଇଁ ଦାମ୍‌ ଦେଇପାରି ନ ଥାʼନ୍ତେ । କିନ୍ତୁ ଯିହୋବା ଆମକୁ ପାପ ଓ ମୃତ୍ୟୁରୁ ମୁକ୍ତ କରିବା ପାଇଁ ରାସ୍ତା ବାହାର କଲେ । ଆସନ୍ତୁ ଆମେ ଦେଖିବା ଯେ ଏହି ମୁକ୍ତିର ମୂଲ୍ୟ କିପରି ଦିଆଗଲା ଏବଂ ଆମେ ଏଥିରୁ କିପରି ଲାଭ ପାଇପାରିବା ।

୯. କେଉଁ ପ୍ରକାରର ମୁକ୍ତିର ମୂଲ୍ୟ ଆବଶ୍ୟକ ଥିଲା ?

^୯ ଆଦମ ଯେଉଁ ସିଦ୍ଧ ଜୀବନ ହରାଇଲା, ତାର ଭରଣ ପାଇଁ ଆମ ଭିତରୁ କେହି ଏବଂ କେବେ ମଧ୍ୟ ମୁକ୍ତିର ମୂଲ୍ୟ ଦେଇପାରି ନ ଥାʼନ୍ତେ । କାହିଁକି ? କାରଣ ଆମେ ସମସ୍ତେ ଅସିଦ୍ଧ ଅଟୁ । (ଗୀତସଂହିତା ୪୯:୭, ୮) ଯେଉଁ ମୁକ୍ତିର ମୂଲ୍ୟ ଆବଶ୍ୟକ ହେଲା, ତାହା ଥିଲା— ଅନ୍ୟ ଏକ ସିଦ୍ଧ ମଣିଷ ଜୀବନ । ସେଥିପାଇଁ ଏହାକୁ “ଅନୁରୂପ ମୁକ୍ତିର ମୂଲ୍ୟ” କୁହାଯାଏ । (୧ ତୀମଥି ୨:୬, NW) ଏହି ମୁକ୍ତିର ମୂଲ୍ୟ ଠିକ୍‌ ସେହି ସିଦ୍ଧ ଜୀବନର ମୂଲ୍ୟ ସହିତ ସମାନ ହେବା ଉଚିତ୍‌ ଥିଲା, ଯାହା ଆଦମ ହରାଇଥିଲା ।

୧୦. ଯିହୋବା ମୁକ୍ତିର ମୂଲ୍ୟର କିପରି ବ୍ୟବସ୍ଥା କଲେ ?

^୧୦ ଯିହୋବା କିପରି ମୁକ୍ତିର ମୂଲ୍ୟର ବ୍ୟବସ୍ଥା କଲେ ? ଯିହୋବା ନିଜର ପ୍ରିୟ ପୁତ୍ର ଯୀଶୁଙ୍କୁ ପୃଥିବୀକୁ ପଠାଇଲେ । ଏହି ପୁତ୍ର ତାହାଙ୍କ ସର୍ବପ୍ରଥମ ସୃଷ୍ଟି ଥିଲେ । (୧ ଯୋହନ ୪:୯, ୧୦) ଯୀଶୁ ନିଜ ଇଚ୍ଛାରେ ସ୍ୱର୍ଗ ଓ ତାହାଙ୍କ ପିତାଙ୍କୁ ଛାଡ଼ିବାକୁ ପ୍ରସ୍ତୁତ ଥିଲେ । (ଫିଲିପ୍ପୀୟ ୨:୭) ଯିହୋବା ଯୀଶୁଙ୍କ ଜୀବନକୁ ସ୍ୱର୍ଗରୁ ପୃଥିବୀରେ କୁମାରୀ କନ୍ୟା  ମରୀୟମଙ୍କ ଗର୍ଭକୁ ସ୍ଥାନାନ୍ତରିତ କଲେ ଏବଂ ଯୀଶୁ ଜଣେ ସିଦ୍ଧ ମଣିଷ ଭାବରେ ଜନ୍ମ ହେଲେ, ଅର୍ଥାତ୍‌ ତାହାଙ୍କଠାରେ ପାପ ନ ଥିଲା ।— ଲୂକ ୧:୩୫.

୧୧. ଜଣେ ମଣିଷ କିପରି ସମଗ୍ର ମାନବଜାତି ପାଇଁ ମୁକ୍ତିର ମୂଲ୍ୟ ଦେଇପାରିଥାʼନ୍ତା ?

^୧୧ ଯେତେବେଳେ ପ୍ରଥମ ମଣିଷ ଆଦମ ଯିହୋବାଙ୍କ ଆଜ୍ଞା ମାନିଲା ନାହିଁ, ସେ ସମଗ୍ର ମାନବଜାତି ପାଇଁ ମଧ୍ୟ ସିଦ୍ଧ ଜୀବନ ହରାଇଲା । କʼଣ ଅନ୍ୟ କୌଣସି ମଣିଷ ଆଦମର ସମସ୍ତ ସନ୍ତାନମାନଙ୍କୁ ମୃତ୍ୟୁର କବଳରୁ ମୁକ୍ତ କରିପାରିବ ? ହଁ । (ରୋମୀୟ ୫:୧୯ ପଢ଼ନ୍ତୁ ।) ଯୀଶୁ ଖ୍ରୀଷ୍ଟ ପୃଥିବୀରେ ଥିବା ସମୟରେ କୌଣସି ପାପ କରି ନ ଥିଲେ । ତେଣୁ ସେ ନିଜ ସିଦ୍ଧ ଜୀବନକୁ ମୁକ୍ତିର ମୂଲ୍ୟ ଭାବରେ ଦେଇପାରିଲେ । (୧ କରିନ୍ଥୀୟ ୧୫:୪୫) ଆଉ, ତାହାଙ୍କ ସିଦ୍ଧ ଜୀବନର ବଳିଦାନ ଯୋଗୁଁ ଆଦମର ସମସ୍ତ ସନ୍ତାନମାନଙ୍କୁ ମୃତ୍ୟୁର କବଳରୁ ମୁକ୍ତ କରାଯାଇପାରିବ ।— ୧ କରିନ୍ଥୀୟ ୧୫:୨୧, ୨୨.

୧୨. ଯୀଶୁଙ୍କୁ କାହିଁକି ଏତେ ବେଶି କଷ୍ଟ ସହିବାକୁ ପଡ଼ିଲା ?

^୧୨ ବାଇବଲରୁ ଆମେ ଜାଣିପାରୁ ଯେ ଯୀଶୁଙ୍କୁ ମରିବା ପୂର୍ବରୁ କʼଣ କʼଣ ଅତ୍ୟାଚାର ଓ କଷ୍ଟ ସହିବାକୁ ପଡ଼ିଥିଲା । ତାହାଙ୍କୁ ଅତି ନିଷ୍ଠୁର ଭାବେ ଚାବୁକ୍‌ରେ ପ୍ରହାର କରାଗଲା, କାଠ ଖୁଣ୍ଟରେ କଣ୍ଟା ଦ୍ୱାରା ପିଟି ଦିଆଗଲା ଏବଂ ଅତି କଠିନ ଯନ୍ତ୍ରଣାରେ ମରିବାକୁ ଛାଡ଼ି ଦିଆଗଲା । (ଯୋହନ ୧୯:୧, ୧୬-୧୮, ୩୦) ଯୀଶୁଙ୍କୁ ଏତେ ବେଶି କଷ୍ଟ କାହିଁକି ସହିବାକୁ ପଡ଼ିଲା ? କାରଣ ଶୟତାନ ଦାବି କରିଥିଲା ଯେ ଯେକୌଣସି ମଣିଷକୁ ଯଦି କଠୋର ପରୀକ୍ଷାରେ ପକାଯାଏ, ତେବେ ସେ ଈଶ୍ୱରଙ୍କ ବିଶ୍ୱସ୍ତ ରହିବ ନାହିଁ । କିନ୍ତୁ ଯୀଶୁ ପ୍ରମାଣିତ କଲେ ଯେ ଜଣେ ସିଦ୍ଧ ମଣିଷ ଏପରିକି ଅତ୍ୟନ୍ତ କଠିନ ପରିସ୍ଥିତିରେ ମଧ୍ୟ ଈଶ୍ୱରଙ୍କ ବିଶ୍ୱସ୍ତ ରହିପାରିବ । କଳ୍ପନା କରନ୍ତୁ, ଯୀଶୁଙ୍କ ପାଇଁ ଯିହୋବା କେତେ ଯେ ଗର୍ବ ଅନୁଭବ କରି ନ ଥିବେ !— ହିତୋପଦେଶ ୨୭:୧୧; ଅଧିକ ବିବରଣୀ-୧୫ ଦେଖନ୍ତୁ ।

୧୩. ମୁକ୍ତିର ମୂଲ୍ୟ କିପରି ଦିଆଗଲା ?

^୧୩ ମୁକ୍ତିର ମୂଲ୍ୟ କିପରି ଦିଆଗଲା ? ଯିହୁଦୀ କ୍ୟାଲେଣ୍ଡର୍‌ ଅନୁଯାୟୀ ୩୩ ଖ୍ରୀଷ୍ଟାବ୍ଦର ନୀସନ୍‌ ମାସର ୧୪ ତାରିଖରେ ଯିହୋବା ଯୀଶୁଙ୍କୁ ଶତ୍ରୁମାନଙ୍କ ହାତରେ ମରିବାକୁ ଦେଲେ । (ଏବ୍ରୀ ୧୦:୧୦) ଏହାର ତିନି ଦିନ ପରେ ଯିହୋବା ଯୀଶୁଙ୍କୁ ପୁଣିଥରେ ଜୀବିତ କଲେ, କିନ୍ତୁ ମଣିଷ ଜୀବନ ଦେଇ ନୁହଁ, ବରଂ ଜଣେ ଆତ୍ମିକ ପ୍ରାଣୀ ଭାବରେ । ସେ ଯୀଶୁଙ୍କୁ ଏକ ଅଦୃଶ୍ୟ ଶରୀର ଦେଲେ । ପରେ ଯେତେବେଳେ ଯୀଶୁ ସ୍ୱର୍ଗରେ ନିଜ ପିତାଙ୍କ ପାଖକୁ ଫେରିଗଲେ, ସେତେବେଳେ ସେ ନିଜ ସିଦ୍ଧ ମଣିଷ ଜୀବନର ମୂଲ୍ୟକୁ ଈଶ୍ୱରଙ୍କୁ ଅର୍ପଣ କଲେ, ଯାହା ସେ ଆଦମର ସନ୍ତାନମାନଙ୍କ ଉଦ୍ଧାର ପାଇଁ ମୁକ୍ତିର ମୂଲ୍ୟ ରୂପେ ବଳିଦାନ କରିଥିଲେ । (ଏବ୍ରୀ ୯:୨୪) ବର୍ତ୍ତମାନ, ଯେହେତୁ ମୁକ୍ତିର ମୂଲ୍ୟ ଦିଆଯିବା  ସରିଯାଇଛି, ଆମେ ପାପ ଓ ମୃତ୍ୟୁରୁ ମୁକ୍ତ ହୋଇପାରିବା ।— ରୋମୀୟ ୩:୨୩, ୨୪ ପଢ଼ନ୍ତୁ ।

୧୪, ୧୫. ଆମର ପାପଗୁଡ଼ିକରୁ ଆମେ କ୍ଷମା କିପରି ପାଇପାରିବା ?

^୧୪ ଈଶ୍ୱରଙ୍କ ଏହି ଶ୍ରେଷ୍ଠ ଉପହାରରୁ ଲାଭ ପାଇବା ଆମ ପାଇଁ ଆରମ୍ଭ ହୋଇଯାଇଛି । ଆସନ୍ତୁ ଦେଖିବା ଯେ ଆମେ ବର୍ତ୍ତମାନ କିପରି ଏଥିରୁ ଲାଭ ପାଉଛୁ ଏବଂ ଭବିଷ୍ୟତରେ କିପରି ଲାଭ ପାଇବା ।

^୧୫ ଆମର ପାପସବୁ କ୍ଷମା କରାଯାଏ । ସବୁବେଳେ ଠିକ୍‌ କାମ କରିବା ଏତେ ସହଜ ନୁହେଁ । ଆମ ସମସ୍ତଙ୍କ ଦ୍ୱାରା ଭୁଲ୍‌ ହୋଇଥାଏ । ବେଳେ ବେଳେ ଆମେ ଭୁଲ୍‌ କଥା କହିଦେଉ କିମ୍ବା ଭୁଲ୍‌ କାମ କରିଥାଉ । ଆମେ ସେଗୁଡ଼ିକରୁ କ୍ଷମା କିପରି ପାଇପାରିବା ? ଆମେ ଯାହା ଭୁଲ୍‌ କରିଛୁ, ତାʼ ପାଇଁ ପ୍ରକୃତରେ ଅନୁତାପ କରିବା ଉଚିତ୍‌ ଏବଂ କ୍ଷମା ପାଇଁ ନମ୍ରତାର ସହିତ ଯିହୋବାଙ୍କୁ ପ୍ରାର୍ଥନା କରିବା ଉଚିତ୍‌ । ତାʼପରେ, ଆମେ ଦୃଢ଼ ବିଶ୍ୱାସ ରଖିପାରିବା ଯେ ଆମର ପାପଗୁଡ଼ିକୁ ସେ ନିଶ୍ଚୟ କ୍ଷମା କରିବେ ।— କଲସୀୟ ୧:୧୩, ୧୪; ୧ ଯୋହନ ୧:୮, ୯.

୧୬. ଶୁଦ୍ଧ ବିବେକ ରଖିବା ପାଇଁ ଆମକୁ କʼଣ କରିବାକୁ ହେବ ?

^୧୬ ଆମେ ଶୁଦ୍ଧ ବିବେକ ରଖିପାରିବା । ଯଦି ଆମ ବିବେକ କହେ ଯେ ଆମେ କିଛି ଭୁଲ୍‌ କରିଛୁ, ତେବେ ଆମେ ନିଜକୁ ଦୋଷୀ ମନେ କରୁ, ଏପରିକି ନିରାଶ ହୋଇଯାଉ ଏବଂ ନିଜକୁ ମୂଲ୍ୟହୀନ ମନେ କରିଥାଉ । କିନ୍ତୁ ଆମେ ହାର୍‌ ମାନିବା ଉଚିତ୍‌ ନୁହଁ । ଯଦି ଆମେ କ୍ଷମା ପାଇଁ ହୃଦୟର ସହିତ ଯିହୋବାଙ୍କୁ ପ୍ରାର୍ଥନା କରିବା, ତେବେ ଆମେ ନିଶ୍ଚିତ ହୋଇପାରିବା ଯେ ଆମ ଗୁହାରି ସେ ଶୁଣିବେ ଏବଂ ଆମକୁ କ୍ଷମା କରିବେ । (ଏବ୍ରୀ ୯:୧୩, ୧୪) ଯିହୋବା ଚାହାନ୍ତି ଯେ ଆମେ ନିଜର ଯେକୌଣସି ସମସ୍ୟା ଓ ଦୁର୍ବଳତାଗୁଡ଼ିକ ବିଷୟରେ ତାହାଙ୍କ ସହିତ ମନ ଖୋଲି କଥା ହେବା ଉଚିତ୍‌ । (ଏବ୍ରୀ ୪:୧୪-୧୬) ପରିଣାମସ୍ୱରୂପ, ଆମେ ଈଶ୍ୱରଙ୍କ ସମ୍ମୁଖରେ ଶୁଦ୍ଧ ବିବେକ ରଖିପାରିବା ।

୧୭. ଯୀଶୁ ଆମ ପାଇଁ ନିଜ ଜୀବନ ଦେଇଥିବାରୁ ଆମେ କʼଣ ଆଶା ରଖିପାରିବା ?

^୧୭ ଆମେ ଚିରଦିନ ପାଇଁ ଜୀବିତ ରହିବାର ଆଶା ରଖିପାରିବା । “ପାପର ବେତନ ମୃତ୍ୟୁ, କିନ୍ତୁ ଈଶ୍ୱରଙ୍କ ଅନୁଗ୍ରହଦାନ ଆମ୍ଭମାନଙ୍କ ପ୍ରଭୁ ଖ୍ରୀଷ୍ଟ ଯୀଶୁଙ୍କ ସହଭାଗିତାରେ ଅନନ୍ତ ଜୀବନ ଅଟେ ।” (ରୋମୀୟ ୬:୨୩) ଯେହେତୁ ଯୀଶୁ ଆମ ପାଇଁ ନିଜ ଜୀବନ ଦେଲେ, ଆମେ ଉତ୍ତମ ସ୍ୱାସ୍ଥ୍ୟରେ ଚିରଦିନ ପାଇଁ ଜୀବିତ ରହିବାର ଆଶା ରଖିପାରିବା ।  (ପ୍ରକାଶିତ ବାକ୍ୟ ୨୧:୩, ୪) କିନ୍ତୁ ସେହି ଆଶିଷଗୁଡ଼ିକ ପାଇବା ପାଇଁ ଆମକୁ କʼଣ କରିବାକୁ ହେବ ?

୧୮. ଆମେ କିପରି ଜାଣୁ ଯେ ଯିହୋବା ଆମକୁ ପ୍ରେମ କରନ୍ତି ?

^୧୮ ଟିକିଏ ଭାବି ଦେଖନ୍ତୁ, ଯେତେବେଳେ କେହି ଜଣେ ଆପଣଙ୍କୁ ଏକ ସୁନ୍ଦର ଉପହାର ଦିଅନ୍ତି, ଆପଣଙ୍କ ହୃଦୟ କିପରି କୃତଜ୍ଞତାରେ ଭରିଯାଏ ! ମୁକ୍ତିର ମୂଲ୍ୟ ସମସ୍ତ ଉପହାରଗୁଡ଼ିକ ମଧ୍ୟରୁ ଅଧିକ ମୂଲ୍ୟବାନ ଅଟେ ଏବଂ ଏହା ପାଇଁ ଆମେ ଯିହୋବାଙ୍କ ପ୍ରତି ଗଭୀର ଭାବେ କୃତଜ୍ଞ ହେବା ଉଚିତ୍‌ । ଯୋହନ ୩:୧୬ କହେ ଯେ ‘ଈଶ୍ୱର ଜଗତକୁ ଏତେ ପ୍ରେମ କଲେ ଯେ, ସେ ଆପଣା ଅଦ୍ୱିତୀୟ ପୁତ୍ରଙ୍କୁ ଦାନ କଲେ ।’ ହଁ, ଯିହୋବା ଆମକୁ ଏତେ ପ୍ରେମ କରନ୍ତି ଯେ ସେ ନିଜ ପ୍ରିୟ ପୁତ୍ର ଯୀଶୁଙ୍କୁ ଆମ ପାଇଁ ଦେଇଦେଲେ । ଆଉ, ଆମେ ଜାଣୁ ଯେ ଯୀଶୁ ମଧ୍ୟ ଆମକୁ ପ୍ରେମ କରନ୍ତି, କାରଣ ସେ ନିଜ ଇଚ୍ଛାରେ ଆମ ପାଇଁ ତାହାଙ୍କ ଜୀବନ ଉତ୍ସର୍ଗ କରିଦେଲେ । (ଯୋହନ ୧୫:୧୩) ମୁକ୍ତିର ମୂଲ୍ୟର ଉପହାରରୁ ଆପଣ ବୁଝିବା ଉଚିତ୍‌ ଯେ ଯିହୋବା ଏବଂ ଯୀଶୁ ଆପଣଙ୍କୁ ବାସ୍ତବରେ ବହୁତ ପ୍ରେମ କରନ୍ତି ।— ଗାଲାତୀୟ ୨:୨୦.

୧୯, ୨୦. (କ) ଆପଣ କିପରି ଯିହୋବାଙ୍କ ମିତ୍ର ହୋଇପାରିବେ ? (ଖ) ଆପଣ ଯୀଶୁଙ୍କ ମୁକ୍ତିର ମୂଲ୍ୟ ପ୍ରତି କିପରି ଆଦର ଦେଖାଇପାରିବେ ?

^୧୯ ବର୍ତ୍ତମାନ ଯେତେବେଳେ ଆପଣ ଈଶ୍ୱରଙ୍କ ମହାନ ପ୍ରେମ ବିଷୟରେ ଜାଣିପାରିଛନ୍ତି, ଆପଣ କିପରି ତାହାଙ୍କ ମିତ୍ର ହୋଇପାରିବେ ? କାହାରି ସହିତ ମିତ୍ରତା କରିବାକୁ ହେଲେ, ପ୍ରଥମେ ଆପଣଙ୍କୁ ତାଙ୍କ ବିଷୟରେ ଜାଣିବାକୁ ହେବ । ଯୋହନ ୧୭:୩ କହେ ଯେ ଆମେ ଯିହୋବାଙ୍କୁ ଜାଣିପାରିବା । ଯଦି ଆପଣ ଯିହୋବାଙ୍କୁ ଜାଣିବେ, ତାହାଙ୍କ ପାଇଁ ଆପଣଙ୍କ ପ୍ରେମ ଆହୁରି ଗଭୀର ହେବ, ଆପଣ ତାହାଙ୍କୁ ଖୁସି କରିବାକୁ ଚାହିଁବେ ଏବଂ ତାହାଙ୍କ ମିତ୍ର ହେବେ । ତେଣୁ ବାଇବଲର ଅଧ୍ୟୟନ ଦ୍ୱାରା ଯିହୋବାଙ୍କ ବିଷୟରେ ଶିଖିବା ଜାରି ରଖନ୍ତୁ ।— ୧ ଯୋହନ ୫:୩.

^୨୦ ଯୀଶୁଙ୍କ ମୁକ୍ତିର ମୂଲ୍ୟ ପ୍ରତି ଆଦର ଦେଖାନ୍ତୁ । ବାଇବଲ କହେ: “ଯେ ପୁତ୍ରଙ୍କଠାରେ ବିଶ୍ୱାସ କରେ, ସେ ଅନନ୍ତ ଜୀବନ ପ୍ରାପ୍ତ ହୋଇଅଛି ।” (ଯୋହନ ୩:୩୬) ଏଠାରେ ବିଶ୍ୱାସ କରିବାର ଅର୍ଥ କʼଣ ? ଏହାର ଅର୍ଥ ଯୀଶୁ ଖ୍ରୀଷ୍ଟ ଆମକୁ ଯାହା କରିବା ପାଇଁ ଶିଖାଇଥିଲେ, ତାହା କରିବା । (ଯୋହନ ୧୩:୧୫) ଆମେ ଯୀଶୁଙ୍କୁ ବିଶ୍ୱାସ କରୁ ବୋଲି କହିବା ଯଥେଷ୍ଟ ନୁହଁ । ମୁକ୍ତିର ମୂଲ୍ୟ ପ୍ରତି ଆଦର ଦେଖାଇବା ପାଇଁ ଆମେ ନିଜ ବିଶ୍ୱାସ  ଅନୁଯାୟୀ କାମ ମଧ୍ୟ କରିବା ଉଚିତ୍‌ । ଯାକୁବ ୨:୨୬ ପଦ କହେ: ‘କର୍ମ ବିନା ବିଶ୍ୱାସ ମୃତ ଅଟେ ।’

୨୧, ୨୨. (କ) ଆମେ ପ୍ରତିବର୍ଷ ଯୀଶୁଙ୍କ ମୃତ୍ୟୁର ସ୍ମାରକ ସଭାରେ କାହିଁକି ଉପସ୍ଥିତ ହେବା ଉଚିତ୍‌ ? (ଖ) ଆମେ ୬ ଓ ୭ ଅଧ୍ୟାୟରେ କʼଣ ଆଲୋଚନା କରିବା ?

^୨୧ ଖ୍ରୀଷ୍ଟଙ୍କ ମୃତ୍ୟୁର ସ୍ମାରକ ସଭାରେ ଉପସ୍ଥିତ ହୁଅନ୍ତୁ । ଯୀଶୁ ନିଜ ମୃତ୍ୟୁର ପୂର୍ବ ରାତିରେ ଶିଖାଇଥିଲେ ଯେ ଆମେ ତାହାଙ୍କ ମୃତ୍ୟୁର ସ୍ମାରକ ପାଳନ କରିବା ଉଚିତ୍‌ । ଏହା ଆମେ ପ୍ରତିବର୍ଷ ପାଳନ କରିଥାଉ, ଯାହାକୁ ସ୍ମାରକ କିମ୍ବା “ପ୍ରଭୁଭୋଜ” ବୋଲି କୁହାଯାଏ । (୧ କରିନ୍ଥୀୟ ୧୧:୨୦; ମାଥିଉ ୨୬:୨୬-୨୮) ଯୀଶୁ ଚାହାନ୍ତି ଯେ ସେ ଯେଉଁ ନିଜର ସିଦ୍ଧ ଜୀବନ ମୁକ୍ତିର ମୂଲ୍ୟ ଭାବରେ ଆମ ପାଇଁ ଦେଲେ, ତାହା ଆମେ ମନେ ପକାଇବା ଉଚିତ୍‌ । ସେ କହିଥିଲେ: “ମୋତେ ସ୍ମରଣ କରିବା ନିମନ୍ତେ ଏହା କର ।” (ଲୂକ ୨୨:୧୯ ପଢ଼ନ୍ତୁ ।) ଯେତେବେଳେ ଆପଣ ସ୍ମାରକ ସଭାରେ ଉପସ୍ଥିତ ହୁଅନ୍ତି, ଆପଣ ମୁକ୍ତିର ମୂଲ୍ୟ ପ୍ରତି ଆଦର ଦେଖାନ୍ତି । ଏହା ସହିତ, ଯିହୋବା ଏବଂ ଯୀଶୁଙ୍କର ଆମ ପ୍ରତି ଯେଉଁ ମହାନ ପ୍ରେମ ରହିଛି, ତାʼ ପ୍ରତି ମଧ୍ୟ ଆପଣ ଗଭୀର ଆଦର ଦେଖାଇଥାʼନ୍ତି ।— ଅଧିକ ବିବରଣୀ-୧୬ ଦେଖନ୍ତୁ ।

^୨୨ ମୁକ୍ତିର ମୂଲ୍ୟ ଆମ ପାଇଁ ସବୁଠାରୁ ଶ୍ରେଷ୍ଠ ଉପହାର ଅଟେ । ଏହାଠାରୁ ଅଧିକ ମୂଲ୍ୟବାନ ଉପହାର ଆଉ କିଛି ନାହିଁ । (୨ କରିନ୍ଥୀୟ ୯:୧୪, ୧୫) ଏହି ବହୁମୂଲ୍ୟ ଉପହାରରୁ ଏପରିକି ଲକ୍ଷ ଲକ୍ଷ ମରିଯାଇଥିବା ଲୋକମାନେ ମଧ୍ୟ ଲାଭ ପାଇପାରିବେ । ଆମେ ୬ ଓ ୭ ଅଧ୍ୟାୟରେ ଆଲୋଚନା କରିବା ଯେ ତାହା କିପରି ସମ୍ଭବ ହେବ ।