1, 2. а) Адӕймагӕн уӕлдай хъазар цӕхуӕн лӕвар фӕууй? б) Киристей нивонд Хуцауи устурдӕр лӕвар исхонӕн цӕмӕн ес?

ЦИ ЛӔВӔРТТӔ дин искодтонцӕ, уонӕй дин тӕккӕ хъазардӕр ци адтӕй? Ести нин ку балӕвар кӕнунцӕ, уӕлдайдӕр ба нӕ хъӕбӕр ка гъудӕй, уӕхӕн ести, уӕд нин хъӕбӕр ӕхцӕуӕн фӕууй.

² Хуцау нин ци лӕвӕрттӕ искодта, уонӕй сӕ еу уӕлдай хъазардӕр ӕй. Уомӕй устурдӕр лӕвар нӕййес. Аци сӕри базондзиан, Йеговӕ ӕ Фурти, Йесо Киристей, зӕнхӕмӕ уой туххӕй ке рарвиста, цӕмӕй нӕ бон уа ӕносмӕ цӕрун. (Бакӕсӕ Матфеййи 20:28.) Йеговӕ Йесой цард нивонди ке ’рхаста, уомӕй бавдиста, куд хъӕбӕр нӕ уарзуй, уой.

3. Адӕн цӕмӕн мӕлунцӕ?

³ Киристей нивонди фӕрци Йеговӕ адӕни фӕййервӕзун кодта тӕрегъӕд ӕма мӕлӕтӕй (Ефесӕгтӕмӕ 1:7). Йесой нивонд цӕмӕн багъудӕй, уой балӕдӕруни туххӕй гъӕуама базонӕн, цалдӕр мин анзей размӕ Едеми дзӕхӕрадони ци ’рцудӕй, уой. Нӕ рагфиддӕлтӕ Адам ӕма Евӕ искодтонцӕ тӕрегъӕд, ӕма уой туххӕй рамардӕнцӕ. Ӕма нур адӕн мӕлунцӕ, Адам ӕма Евӕй сӕ тоги тӕрегъӕд ке рахастонцӕ, уой туххӕй. (Кӕсӕ 9 уӕлӕнхасӕн.)

4. Адам ка адтӕй ӕма цӕмӕй хайгин адтӕй?

 ⁴ Йеговӕ фиццаг адӕймаги, Адами, ку сфӕлдиста, уӕд ин балӕвар кодта устур хӕзна – ӕнхӕст цард. Адамӕн адтӕй ӕнхӕст зунд ӕма ӕнхӕст бауӕр. Е сӕйгӕ некӕд кодтайдӕ, некӕд базӕронд адтайдӕ ӕма некӕд рамардайдӕ. Адами Йеговӕ ке сфӕлдиста, уомӕ гӕсгӕ Йеговӕ адтӕй ӕ фидӕ (Лукай 3:38). Йеговӕ ӕ хӕццӕ арӕх дзурдта. Ӕма ’й Адам хуарз лӕдӕрдтӕй, Хуцау имӕ цӕмӕ ӕнгъӕлмӕ кӕсуй, уой. Удта ма Йеговӕ Адамӕн равардта, ӕ зӕрдӕ кӕмӕй рохс кодтайдӕ, уӕхӕн куст (Райдайӕн 1:28–30; 2:16, 17).

5. Хуцау Адами «ӕхемӕ гӕсгӕ» куд сфӕлдиста?

⁵ Хуцау Адами «ӕхемӕ гӕсгӕ» сфӕлдиста (Райдайӕн 1:27). Йеговӕ ӕй исхайгин кодта, ӕхемӕ ка ес, уӕхӕн менеугутӕй, зӕгъӕн, уарзондзийнадӕй, зундӕй, рӕстдзийнадӕй ӕма хъаурӕй. Удта ма ин равардта сӕребарӕдзийнадӕ дӕр, гъома унаффитӕ хӕссуни барӕ. Адам робот н’ адтӕй. Раст бакӕндзӕй ӕви нӕ, уой равзаруни барӕ ин адтӕй. Адам Хуцаумӕ ку байгъустайдӕ, уӕд ӕ бон адтайдӕ ӕносмӕ дзенети цӕрун.

6. Адам Хуцаумӕ ку нӕ байгъуста, уӕд цӕмӕй фенӕхай ӕй? Е махбӕл куд фӕббӕрӕг ӕй?

⁶ Адам Хуцаумӕ ку нӕ байгъуста, уӕд ин Хуцау мӕлӕти тӕрхон рахаста. Адамӕн ӕ ӕгоммӕгӕсдзийнадӕ хъӕбӕр хъазар ислӕудтӕй. Йегови хӕццӕ ин ци лимӕндзийнадӕ адтӕй, уомӕй фенӕхай ӕй, удта ӕнхӕст цардӕй ӕма, кӕми цардӕй, еци дзенетӕй дӕр (Райдайӕн 3:17–19). Адам ӕма Евӕ Хуцаумӕ ке нӕ байгъустонцӕ, уомӕ гӕсгӕ син ӕносмӕ цӕруни нифс нӕбал адтӕй. Адам ци бакодта, уой туххӕй «дуйнемӕ  ӕрцудӕй тӕрегъӕд, тӕрегъӕди фудӕй ба – мӕлӕт, ӕма уотемӕй мӕлӕт рапурхӕ ’й ӕгас адӕнбӕл, уомӕн ӕма еугурӕйдӕр ракодтонцӕ тӕрегъӕд» (Ромӕгтӕмӕ 5:12). Адам тӕрегъӕд ке искодта, уомӕй ӕхе дӕр ӕма мах дӕр тӕрегъӕд ӕма мӕлӕтӕн рауӕйӕ кодта (Ромӕгтӕмӕ 7:14). Цума ма нин ести нифс ес? Гъо, ӕма нин еци нифс фӕззиндтӕй, Йеговӕ Киристей нивонди ке ’рхаста, уой фӕрци.

7, 8. Киристей нивонд ци ӕй, уой куд ӕнгъезуй балӕдӕрун?

⁷ Киристей нивонд ци ӕй, уой куд ес балӕдӕрӕн? Уой ӕнгъезуй рабарун: 1) кедӕр исуӕгъдӕ кӕнунмӕ кенӕ дзаума фӕстӕмӕ райсунмӕ ци аргъ бафедунцӕ, уой хӕццӕ; 2) адӕймаг ескӕмӕн ести зиан ку ’рхӕссуй, уӕд ӕй уобӕл ци аргъ бафедун фӕгъгъӕуй, уой хӕццӕ.

⁸ Адами тӕрегъӕд ци устур зиан ӕрхаста, уобӕл еунӕг ӕнӕнхӕст адӕймагӕн дӕр ӕ бон н’ адтӕй бафедун. Фал Йеговӕ иссирдта мадзал, цӕмӕй нӕ тӕрегъӕд ӕма мӕлӕтӕй фӕййервӕзун кодтайдӕ. Мадта фулдӕр базонӕн, Киристей нивонди туххӕй ӕма нин еци нивонд ци пайда ӕрхаста, уой туххӕй.

9. Адам ци цардӕй фенӕхай ӕй, уой туххӕй цӕхуӕн аргъ гъудӕй бафедун?

⁹ Махӕй неке бон адтайдӕ бафедун, Адам ци ӕнхӕст цардӕй фенӕхай ӕй, уой аргъ. Цӕмӕннӕ? Уомӕн ӕма мах ӕгасӕйдӕр ӕнӕнхӕст ан (Псалом 49:7, 8). Адами ӕнхӕст царди туххӕй ци аргъ гъудӕй бафедун, е гъӕуама адтайдӕ ӕндӕр ӕнхӕст адӕймаги цард. Уомӕ гӕсгӕ ’й Библи хонуй «сӕрмӕ-сӕр  ахӕсти аргъ» (1 Тимофеймӕ 2:6, феппайуйнаг). Гъома гъудӕй Адами хузӕн ӕнхӕст адӕймаги цард.

10. Йеговӕ ци искодта, цӕмӕй адӕни тӕрегъӕд ӕма мӕлӕтӕй фӕййервӕзун кодтайдӕ?

¹⁰ Йеговӕ ци искодта, цӕмӕй адӕни тӕрегъӕд ӕма мӕлӕтӕй фӕййервӕзун кодтайдӕ? Ӕ хъазар Фурти, Йесой, зӕнхӕмӕ рарвиста. Йесо адтӕй, Йеговӕ цидӕриддӕр сфӕлдиста, уонӕй фиццаг (1 Иоанни 4:9, 10). Е цӕттӕ адтӕй ӕ Фиди ӕма ӕ уӕларвон цӕрӕнбунат ниууадзунмӕ (Филиппӕгтӕмӕ 2:7). Йеговӕ ӕ Фурти цард уӕлӕрвтӕй зӕнхӕмӕ рахаста. Йесо зӕнхӕбӕл райгурдӕй ӕма адтӕй ӕнхӕст, ӕнӕтӕрегъӕд адӕймаг (Лукай 1:35).

11. Еу адӕймаги цардӕй ӕгас адӕни дӕр балхӕнӕн куд ес?

¹¹ Фиццаг ӕнхӕст адӕймаг Адам Йеговӕмӕ ку нӕ байгъуста, уӕд ӕгас адӕн дӕр ӕносон цардӕй фенӕхай ӕнцӕ. Цума еске бон адтӕй Адами цӕуӕтӕн фӕстӕмӕ ӕнхӕст цард раттун? Гъо, адтӕй. (Бакӕсӕ Ромӕгтӕмӕ 5:19.) Йесо ӕнӕтӕрегъӕд адӕймаг адтӕй ӕма е ’нхӕст цард нивонди ӕрхаста (1 Коринфӕгтӕмӕ 15:45). Ӕма уой фӕрци Адами цӕуӕтӕн фадуат фӕззиндтӕй мӕлӕти цагъайрадӕй фӕййервӕзунмӕ (1 Коринфӕгтӕмӕ 15:21, 22).

12. Йесой уойбӕрцӕ гъезӕмӕрттӕ бавзарун цӕмӕн багъудӕй?

¹² Библий финст ӕй, Йесо ӕ мӕлӕти размӕ цӕйбӕрцӕ гъезӕмӕрттӕ бавзурста, уой туххӕй. Ехсӕй ӕй фуднад фӕккодтонцӕ, гъӕдӕбӕл ӕй ӕрауигътонцӕ ӕма гъезӕмарӕгӕнгӕй рамардӕй (Иоанни 19:1, 16–18, 30). Йесой уойбӕрцӕ цидӕртӕ бавзарун цӕмӕн багъудӕй? Уомӕн ӕма Сайтан загъта, устур фӕлварӕнти еунӕг адӕймаг дӕр Хуцаубӕл  еузӕрдонӕй ке нӕ байзайдзӕй. Фал Йесо ба бавдиста, ӕнхӕст адӕймаги бон ке ӕй еузӕрдонӕй байзайун, цийфӕнди гъезӕмӕрттӕ ма бавзара, уӕддӕр. Расагъӕс кӕнӕ, Йеговӕ Йесойӕй куд сӕрустур адтайдӕ (Ӕмбесӕндтӕ 27:11; кӕсӕ 15 уӕлӕнхасӕн).

13. Йесо уӕлӕрвтӕмӕ ку раздахтӕй, уӕд ци искодта?

¹³ 33 анзи 14 нисани (дзиуиттаг къӕлиндармӕ гӕсгӕ) Йеговӕ бауагъта, цӕмӕй Йесой е знӕгтӕ рамардтайуонцӕ (Дзиуиттӕгтӕмӕ 10:10). Ӕртӕ боней фӕсте Йеговӕ Йесой райгас кодта, ӕрмӕст адӕймаги бауӕри нӕ, фал изӕди бауӕри. Уой фӕсте Йесо уӕлӕрвтӕмӕ раздахтӕй. Уоми ӕ Фиди рази е ’нхӕст царди аргъи хӕццӕ ӕрлӕудтӕй, цӕмӕй адӕни тӕрегъӕдтӕбӕл бафистайдӕ. Ӕма ӕ Фидӕ еци аргъ райста (Дзиуиттӕгтӕмӕ 9:24). Нур нин уой фӕрци ес фадуат, цӕмӕй тӕрегъӕд ӕма мӕлӕтӕй исуӕгъдӕ уӕн. (Бакӕсӕ Ромӕгтӕмӕ 3:23, 24.)

14, 15. Цӕмӕй нӕ тӕрегъӕдтӕ хатиргонд ӕрцӕуонцӕ, уой туххӕй нӕ ци кӕнун гъӕуй?

¹⁴ Хуцау нин ци хъазар лӕвар искодта, е нин устур арфӕдзийнӕдтӕ хӕссуй. Гъӕйдӕ ӕркӕсӕн, Киристей нивонд нин абони ци пайда хӕссуй, удта нин федӕни ци хуарздзийнӕдтӕ ӕрхӕсдзӕй, уобӕл.

¹⁵ Нӕ тӕрегъӕдтӕ хатиргонд цӕунцӕ. Раст ци ӕй, уой кӕнун алкӕд ӕнцон нӕ фӕууй. Не ’гасӕйдӕр рӕдуйгӕ кӕнӕн, кӕми дзурдӕй, кӕми ба гъуддагӕй. Цума нӕ ци кӕнун гъӕуй, цӕмӕй нӕ тӕрегъӕдтӕ хатиргонд ӕрцӕуонцӕ? Гъӕуама сӕбӕл зӕрдӕй ӕрфӕсмон кӕнӕн ӕма Йеговӕн сӕрниллӕгӕй  лигъстӕ кӕнӕн, цӕмӕй нин ниххатир кӕна. Уой фӕсте ба гъӕуама мабал дузӕрдуг кӕнӕн, Хуцау нин ке ниххатир кодта, уобӕл (Колоссӕгтӕмӕ 1:13, 14; 1 Иоанни 1:8, 9).

16. Цӕмӕй нин Хуцауи рази кӕдзос цӕсгон уа, уой туххӕй нӕ ци кӕнун гъӕуй?

¹⁶ Кӕдзос цӕсгон. Ескӕми ку фӕррӕдуйӕн, уӕд уой фӕсте нӕхебӕл ӕрходӕн ӕма нӕхе хуӕрун райдайӕн. Еуӕй-еухатт ба ма нӕхемӕ дӕр нийгъосӕн ӕма нӕхемӕ нецӕййаг ӕркӕсӕн. Фал нӕ нифс гъӕуама ма сӕтта. Йеговӕн ку лигъстӕ кӕнӕн, цӕмӕй нин ниххатир кӕна, уӕд нӕ ӕнӕмӕнгӕй фегъосдзӕй ӕма нин ниххатир кӕндзӕй (Дзиуиттӕгтӕмӕ 9:13, 14). Йегови фӕндуй, цӕмӕй ин нӕ зиндзийнӕдти ӕма нӕ лӕмӕгъдзийнӕдти туххӕй дзорӕн (Дзиуиттӕгтӕмӕ 4:14–16). Ӕма гъе уӕд ӕ рази нӕ цӕсгон уодзӕй кӕдзос.

17. Йесо мах туххӕй ке рамардӕй, уой фӕрци цӕхуӕн арфӕдзийнӕдтӕй исхайгин уодзиан?

¹⁷ Ес нин ӕносмӕ цӕруни нифс. «Тӕрегъӕд фист цӕуй мӕлӕтӕй, Хуцау ци лӕвар дӕттуй, е ба ӕй ӕносон цард нӕ Хецау Йесо Киристей фӕрци» (Ромӕгтӕмӕ 6:23). Йесо мах туххӕй ке рамардӕй, уой фӕрци нин ес ӕносмӕ ӕнӕнезӕй цӕруни нифс (Раргомадӕ 21:3, 4). Фал нӕ ци кӕнун гъӕуй, цӕмӕй еци арфӕдзийнӕдтӕй исхайгин уӕн?

18. Йеговӕ нӕ ке уарзуй, уой кӕцӕй зонӕн?

¹⁸ Еске нин ести ку балӕвар кӕнуй, уӕд нин хъӕбӕр ӕхцӕуӕн фӕууй. Киристей нивонд ба ӕгасемӕй  хъазардӕр лӕвар ӕй, ӕма гъӕуама уой туххӕй Йеговӕй боз уӕн. Иоанни 3:16 финст ӕй: «Хуцау дуйне уотӕ хъӕбӕр уарзуй, ӕма ӕ еунӕг Фурти равардта». Йеговӕ нӕ уотӕ уарзуй, ӕма мах туххӕй равардта ӕ хъазар Фурти, Йесо Киристей. Удта ма ’й зонӕн, Йесо дӕр нӕ ке уарзуй, уомӕн ӕма ӕ цард барвӕндӕй равардта (Иоанни 15:13). Мадта Киристей нивонд уобӕл дзорӕг ӕй, ӕма дӕ Йеговӕ ӕма Йесо хъӕбӕр берӕ уарзунцӕ (Галатӕгтӕмӕ 2:20).

19, 20. а) Цӕмӕй Йегови ӕмбал исуай, уой туххӕй дӕ ци гъӕуй кӕнун? б) Киристей нивондбӕл ке ӕууӕндис, е цӕмӕй бӕрӕг уодзӕй?

¹⁹ Киристей нивондӕн ке аргъ кӕнис, уой дӕ бон куд ӕй бавдесун? Йеговӕ уӕхӕн уарзондзийнадӕ ке бавдиста, уомӕ гӕсгӕ дӕ, ӕвӕдзи, бафӕнддзӕй е ’мбал исун. Фал цӕмӕй еске ӕмбал исуай, уой туххӕй ӕй гъӕуама хуарз базонай. Иоанни 17:3 куд финст ӕй, уотемӕй нӕ бон ӕй Йегови базонун. Ӕма ’й уӕд бауарздзӕнӕ ӕма дӕ бафӕнддзӕй ӕ зӕрдӕ рохс кӕнун, ӕма уотемӕй е ’мбал исуодзӕнӕ. Мадта Библи ахур кӕнӕ, ӕма Йегови туххӕй никки фулдӕр базондзӕнӕ (1 Иоанни 5:3).

²⁰ Киристей нивондбӕл баууӕндӕ. Библий финст ӕй: «Фуртбӕл ка ӕууӕндуй, е исхайгин уодзӕй ӕносон цардӕй» (Иоанни 3:36). Фуртбӕл ӕууӕндун ци нисан кӕнуй? Гъӕуама цӕрӕн, Йесо нин куд байамудта, уотӕ (Иоанни 13:15). Уотид дзорун, Йесобӕл ӕууӕндун, зӕгъгӕ, фагӕ нӕй. Киристей нивондбӕл ке ӕууӕндӕн, е гъӕуама нӕ гъуддӕгтӕй дӕр бӕрӕг уа. Иакови 2:26 кӕсӕн: «Ӕууӕндундзийнадӕ... ӕнӕ гъуддӕгтӕй мард ӕй».

21, 22. а) Алли анз дӕр Киристей мӕлӕт Имисӕн изӕрмӕ цӕмӕн ӕрбацӕуӕн? б) Аци киунуги 6 ӕма 7 сӕртӕй ци базондзиан?

 ²¹ Киристей мӕлӕт Имисӕн изӕрмӕ ӕрбацо. 14 нисани изӕрӕй Йесо ӕ апостолтӕн бафӕдзахста, цӕмӕй ин ӕ мӕлӕт имисӕн изӕр бӕрӕг кодтайуонцӕ. Мах ӕй алли анз дӕр фӕббӕрӕг кӕнӕн. Е хуннуй Имисӕн изӕр кенӕ «Хецауи ӕхсӕвӕр» (1 Коринфӕгтӕмӕ 11:20; Матфеййи 26:26–28). Йесой фӕндуй, цӕмӕй нӕ зӕрдӕбӕл дарӕн, мах туххӕй е ’нхӕст цард ке равардта, уой. Йесо загъта: «Уотӕ кӕнтӕ мӕ имисуни туххӕй». (Бакӕсӕ Лукай 22:19.) Имисӕн изӕрмӕ ку ’рбацӕуай, уӕд уомӕй бавдесдзӕнӕ, Киристей нивонд дӕ зӕрдӕбӕл ке дарис, удта Йеговӕ ӕма Киристе ци устур уарзондзийнадӕ бавдистонцӕ, уомӕн ке аргъ кӕнис, уой. (Кӕсӕ 16 уӕлӕнхасӕн.)

²² Киристей нивонд адӕнӕн тӕккӕ устурдӕр лӕвар ӕй (2 Коринфӕгтӕмӕ 9:14, 15). Еци дессаги лӕвар пайда ӕрхӕсдзӕй сауӕнгӕ, ка рамардӕй, еци милиуангай адӕнӕн дӕр. Уомӕн гӕнӕн куд ес, уой ба базондзиан 6 ӕма 7 сӕртӕй.