1, 2. (a) Anto ray rason ya napablim so sakey a regalo? (b) Akin ya say dondon so sankarakepan ya regalo na Dios?

ANTOY sankarakepan ya regalon naawat mo? Agmet kaukolan ya mabmabli itan pian napablim. No manliket ka ed naawat mon regalo odino talagan kaukolan mo, seguradon naapresyam itan.

² Diad amin ya regalon inter na Dios ed sikatayo, walay sakey a regalo ya talagan kakkaukolan tayo. Atan so sankarakepan ya regalo na Dios ed totoo. Diad sayan kapitulo, naaralan tayo ya imbaki nen Jehova so Anak to, si Jesu-Kristo, pian makapambilay tayo na andi-anggaan. (Basaen so Mateo 20:28.) Nen imbaki nen Jehova si Jesus diad dalin bilang dondon, pinaneknekan To ya talagan inar-aro To tayo.

3. Akin ya ompapatey iray totoo?

³ Say dondon so paraan nen Jehova pian ibulos so totoo ed kasalanan tan patey. (Efeso 1:7) Pian natalosan tayo no akin ya kaukolan so dondon, amtaen tayo no antoy agawa diad hardin na Eden, nilibon taon lay apalabas. Nankasalanan so inmunan atateng tayo, si Adan tan Eva. Lapud nankasalanan ira, inatey ira. Tan lapud atawir tayoy kasalanan ed si Adan tan Eva, ompatey tayo met.​—Nengnengen so Kaaruman ya Impormasyon 9.

4. Siopa si Adan, tan anto ray inter nen Jehova ed sikato?

⁴ Nen pinalsa nen Jehova so inmunan too, si Adan, wala ray mabmabli ya inter To. Inikdan toy Adan na  perpekton bilay, perpekton nonot, tan perpekton laman. Sikatoy agmansakit, ag-ontatken, tan ag-ompatey. Lapud si Adan et pinalsa nen Jehova, singa to Ama si Jehova. (Lucas 3:38) Lanang ya kakatongtongen nen Jehova si Adan. Malinew ya impaliwawa nen Jehova ed si Adan no anto ray iilaloan To tan inikdan To na makapaliket a kimey.​—Genesis 1:28-30; 2:16, 17.

5. Antoy kabaliksan na nabasa ed Biblia ya pinalsa si Adan “unong ed indengan na Dios”?

⁵ Pinalsa si Adan “unong ed indengan na Dios.” (Genesis 1:27) Kabaliksan na satan ya inikdan nen Jehova si Adan na saray kualidad ya miparad Sikato, singa say aro, karunongan, hustisya, tan pakayari. Inikdan to met na abilidad ya mandesisyon a bukor. Aliwan robot si Adan. Sikatoy pinalsa na Dios ya sarag toy mandesisyon ya gawaen so duga odino aliwa. No nandesisyon komon si Adan ya unoren so Dios, seguradon nambilay na andi-anggaan ed Paraiso.

6. Anto ray pinerdi nen Adan nen agto inunor so Dios? Antoy epekto na satan ed sikatayo?

⁶ Nen ag-inunor nen Adan so Dios tan asentensiaan na patey, balbaleg so pinerdi to. Pinerdi toy espisyal a pikakaaro to ed si Jehova, say perpekton bilay to, tan say Paraison ayaman to. (Genesis 3:17-19) Nandesisyon si Adan tan Eva ya ag-unoren so Dios, kanian anggapo lay ilalo dan manbilay na andi-anggaan. Lapud ginawa nen Adan, “linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo lapud nankasalanan iran amin.” (Roma 5:12) Nen nankasalanan si Adan, ‘inlako’ toy sarili to tan pati sikatayo kanian nagmaliw itayon aripen na kasalanan tan patey. (Roma 7:14) Wala ni kasi ilalo tayon manbilay na andi-anggaan? On, wala ni.

7, 8. Anto so dondon?

 ⁷ Anto so dondon? Walay duaran nayarin pakausaran na salitan dondon. Unona, say dondon et say presyo ya ibayar pian ibulos so sakey odino pian bawien so sakey a bengatla. Komadua, say dondon et say presyo ya ibayar parad sakey a bengatlan aderal o aperdi.

⁸ Anggapoy toon makabayar ed balbaleg ya pinerdi nen Adan nen nankasalanan tan impatawir tod sikatayoy patey. Balet nanggaway paraan si Jehova pian ibulos itayo ed kasalanan tan patey. Aralen tayo no panon ya inter so dondon parad sikatayo tan no panon itayon nagunggonaan ed satan.

9. Panon a nabayaran so dondon?

⁹ Anggapon balot ed sikatayo so makabayar na dondon parad perpekton bilay ya pinerdi nen Adan. Akin ey? Lapud anggapod sikatayo so perpekto. (Salmo 49:7, 8) Say dondon ya kaukolan ya ibayar et perpekto met ya bilay na sakey a too. Atan so rason no akin ya tinawag itan ya “kasimbangan a dondon.” (1 Timoteo 2:6) Say dondon et kaukolan ya mipetekan so presyo o bili to ed samay bilay ya pinerdi nen Adan.

10. Panon ya inter nen Jehova so dondon?

¹⁰ Panon ya inter nen Jehova so dondon? Imbaki nen Jehova ed dalin so inar-aro ton Anak. Sayan Anak to, si Jesus, so sankaunaan ya pinalsa to. (1 Juan 4:9, 10) Mabulos ya tinaynan nen Jesus so Ama to tan say ayaman to ed tawen. (Filipos 2:7) Manlapud tawen et inyalis nen Jehova so bilay nen Jesus ed dalin, tan niyanak bilang perpekton too ya anggapoy kasalanan.​—Lucas 1:35.

11. Panon ya diad panamegley na sakey a too et nadondon so amin ya totoo?

¹¹ Pinerdi na unonan perpekton too ya si Adan so perpekton  bilay parad amin ya totoo nen agto inunor si Jehova. No walay sananey ya perpekton too, sarag to kasin ekalen so patey ed amin ya ananak nen Adan? On. (Basaen so Roma 5:19.) Si Jesus, ya agbalot nankasalanan, et inter toy perpekton bilay to bilang dondon. (1 Corinto 15:45) Nayarin usaren itan ya perpekton bilay to pian ekalen so patey ed amin ya ananak nen Adan.​—1 Corinto 15:21, 22.

12. Akin et kaukolan nin manirap ya maong si Jesus?

¹² Ipapanengneng na Biblia no panon ya nanirap a maong si Jesus antis ya inatey. Sikatoy maruksan sinisiplatan, impasak ed panamairapan a poste, tan inanosan toy kalkalna tan ansakisakit ya ipapatey. (Juan 19:1, 16-18, 30) Akin et kaukolan nin manirap ya maong si Jesus? Lapud papapawayen nen Satanas ya anggapoy toon manmatoor ed Dios no nairapan lan maong. Pinaneknekan nen Jesus ya sarag na perpekton too so manmatoor ed Dios anggano grabe lay paniirap to. Seguradon malikeliket si Jehova ed ginawa nen Jesus!—Proverbio 27:11; nengnengen so Kaaruman ya Impormasyon 15.

13. Panon ya imbayar so dondon?

¹³ Panon ya imbayar so dondon? Inyawat nen Jesus ed Ama to so bili na bilay to. Nen Nisan 14, diad taon 33 na Judion kalendaryo, inmabuloy si Jehova ya pateyen na saray kakabusol si Jesus. (Hebreo 10:10) Kayari na taloy agew, binilay nen Jehova si Jesus balet aliwan bilang too, noagta bilang espiritu. Nen pinmawil si Jesus ed Ama to diad tawen, inyawat tod si Jehova so bili na perpekton bilay to bilang dondon. (Hebreo 9:24) Imbayar lay dondon, kanian wala lay pankanawnawa tayon nibulos ed kasalanan tan patey.​—Basaen so Roma 3:23, 24.

14, 15. Antoy kaukolan tayon gawaen pian naperdona iray kasalanan tayo?

¹⁴ Nagugunggonaan itayo la ed sankarakepan ya regalo na Dios. Nengnengen tayo no panon itayon nagugunggonaan natan tan diad arapen.

¹⁵ Napeperdona iray kasalanan tayo. Aliwan mainomay so lanang ya panggawa na duga. Nalilingo itayo tan no maminsan et wala ray aliwa ya ibabaga odino gagawaen tayo. (Colosas 1:13, 14) Antoy gawaen tayo pian naperdona itayo? Kaukolan ya talagan magbabawi tayo ed saray aliwa ya ginawa tayo tan mapaabeba tayon kerewen ed si Jehova ya perdonaen to tayo. Diad satan et makaseguro tayo ya naperdona iray kasalanan tayo.​—1 Juan 1:8, 9.

16. Antoy kaukolan tayon gawaen pian nawalaan tayoy malinis a konsiensia?

¹⁶ Walaan itayo na malinis a konsiensia. No walay ginawa tayon aliwa, nakokonsiensia itayo, tan ompan isipen tayon anggapo lay ilalo tayo odino anggapo lay kana tayo. Balet agtayo nepeg ya onsuko. No onkerew tayoy panamerdona ed si Jehova, makaseguro tayo ya dengelen to tayo tan perdonaen to tayo. (Hebreo 9:13, 14) Labay nen Jehova ya ibaga tayod sikato so antokaman ya problema tan kakapuyan tayo. (Hebreo 4:14-16) Bilang resulta, nawalaan tayoy malinis a konsiensia ed arap na Dios.

17. Anto ran bendisyon so nayarin naawat tayo lapud inatey si Jesus parad sikatayo?

¹⁷ Walay ilalo tayon manbilay na andi-anggaan. “Say bayar na kasalanan et patey, balet say regalon iiter na Dios et say bilay ya andi-anggaan diad panamegley nen Kristo Jesus a Katawan tayo.” (Roma 6:23) Inatey si Jesus parad sikatayo kanian sarag tayoy manbilay na andi-anggaan ya walaay perpekton laman. (Apocalipsis 21: 3, 4) Balet antoy kaukolan tayon gawaen pian naawat tayo iratan ya bendisyon?

18. Panon tayon amta ya inar-aro itayo nen Jehova?

¹⁸ Isip mo pay aliknam nen walay angiter ed sika na marakdakep ya regalo. Say dondon so sankablian ya regalo, tan nepeg tayon impapuson pisalamatan si Jehova ed satan. Ibabagad sikatayo na Juan 3:16: “Ontan lay panangaro na Dios ed mundo ya inter to so bogbogtong ya Anak to.” Talagan inar-aro itayo nen Jehova kanian inter tod sikatayoy pinabpabli ton Anak, si Jesus. Tan amta tayo ya inaro itayo met nen Jesus ta mabulos ya inatey parad sikatayo. (Juan 15:13) Lapud regalon dondon, komon ta kombinsido ka ya talagan inar-aro ka nen Jehova tan nen Jesus.​—Galacia 2:20.

19, 20. (a) Antoy gawaen mo pian magmaliw kan kaaro nen Jehova? (b) Panon mon nipanengneng ya aapresyaen moy dondon bagat nen Jesus?

¹⁹ Natan ta naaralan mo lay nipaakar ed baleg ya panangaro na Dios, panon kan magmaliw a kaaro to? Mairap ya aroen so agmo kabat. Ibabaga na Juan 17:3 ya sarag tayon kabaten si Jehova. Legan mon kakabaten si Jehova, mas onaralem so panangarom ed sikato, labay mon paliketen, tan magmaliw kan kaaro to. Kanian itultuloy mon kabaten si Jehova diad panaral moy Biblia.​—1 Juan 5:3.

²⁰ Apresyaen so dondon bagat nen Jesus. Ibabaga na Biblia ya “samay mangipapanengneng na pananisia ed Anak et walaan na bilay ya andi-anggaan.” (Juan 3:36) Panon tayon ipanengneng itan ya pananisia? Nepeg tayon unoren so imbangat nen Jesus ya gawaen tayo. (Juan 13:15) Agtayo labat basta ibabaga ya manisia tayod si Jesus. Pian napaneknekan ya aapresyaen tayoy dondon, nepeg ya ipanengneng tayod gawa so pananisia tayo.  Nabasa tayod Santiago 2:26 ya ‘say pananisia ya andian na saray gawa et inatey.’

21, 22. (a) Akin ya onatendi tayod Memoryal na impatey nen Kristo kada taon? (b) Antoy aralen tayo ed Kapitulo 6 tan 7?

²¹ Onatendi ed Memoryal na impatey nen Kristo. Diad samay labi antis na impatey nen Jesus, imbaga to ya nepeg tayon nodnonoten so impatey to. Tinaon tayon gagawaen iya tan say tawag ed satan et Memoryal odino “Pangdem na Katawan.” (1 Corinto 11:20; Mateo 26:26-28) Labay nen Jesus ya nodnonoten tayoy impangiter to na perpekton bilay to bilang dondon. Imbaga to: “Itultuloy yon gawaen iya bilang pannodnonot ed siak.” (Basaen so Lucas 22:19.) No onatendi kad Memoryal, ipapanengneng mon nonodnonoten moy dondon tan say baleg ya panangaro ed sikatayo nen Jehova tan Jesus.​—Nengnengen so Kaaruman ya Impormasyon 16.

²² Say dondon so sankarakepan a regalon naawat tayo. (2 Corinto 9:14, 15) Anggan saray binilyon ya inaatey et minabang met ed sayan mabmablin regalo. Diad Kapitulo 6 tan 7 et naaralan tayo no panon itan ya nagawa.