1, 2. (a) Wanem nao savve mekem iu tinghae long wanfala present wea iu kasem? (b) Why nao ransom hem spesol present from God?

WASWE, enitaem samwan givim iu wanfala spesol present? Taem samwan givim iu wanfala present wea iu hapi tumas long hem, or hem samting wea iu needim, bae iu barava tinghae long datfala present.

² Wanfala present wea God givim iumi hem samting wea iumi barava needim. Datfala present hem winim eni nara present wea God givim long iumi olketa man. Long disfala chapter, bae iumi lanem Jehovah sendem kam Son bilong hem, Jesus Christ, mekem iumi savve kasem laef olowe. (Readim Matthew 20:28.) Taem Jehovah sendem kam Jesus long earth for givim ransom, datwan showimaot Jehovah barava lovem iumi.

3. Why nao iumi olketa man dae?

³ Ransom hem spesol present from Jehovah wea mekem iumi olketa man kamap free from sin and dae. (Ephesus 1:7) For minim why nao iumi needim ransom, iumi mas savve wanem nao happen long garden bilong Eden staka thousand year go finis. Firstfala dadi and mami bilong iumi, Adam and Eve, tufala sin. From tufala sin, tufala dae. And iumi tu  dae bikos iumi evriwan kasem sin from Adam and Eve.—Lukim Endnote 9.

4. Hu nao Adam, and wanem spesol samting nao God givim long hem?

⁴ Taem Jehovah creatim firstfala man, Adam, hem givim hem perfect laef, wea hem barava spesol samting. Adam garem perfect mind and perfect body. So hem bae no sik, hem bae no savve olo, and hem bae nating dae. Adam hem son bilong God bikos Jehovah nao creatim hem. (Luke 3:38) Jehovah story witim hem evritaem. God explainim wanem hem laekem Adam for duim, and hem givim hem naesfala waka for duim.—Jenesis 1:28-30; 2:16, 17.

5. Taem Bible sei God wakem Adam for “olsem hem,” wanem nao datwan minim?

⁵ Bible sei God wakem Adam for “olsem hem.” (Jenesis 1:27) Jehovah wakem Adam for garem olketa sem wei olsem Hem. Samfala long olketa wei hia nao hem love, wisdom, justice, and paoa. Adam free for disaedem samting seleva tu. Adam hem no olsem wanfala machine wea eniwan nao mas kontrolem bifor hem duim samting. God creatim hem long wei wea hem fit for disaedem samting wea stret, and samting wea no stret. Sapos Adam hem disaed for obeyim God, hem bae fit for laef olowe long Paradaes.

6. Taem Adam no obeyim God, wanem nao hem lusim, and hao nao datwan affectim iumi?

⁶ Taem Adam no obeyim God and kasem panis for dae, hem lusim barava spesol samting. Hem lusim spesol wei for fren witim Jehovah, perfect laef wea  hem garem, and hem no savve stap moa long Paradaes. (Jenesis 3:17-19) Adam and Eve disaed for no obeyim God, so tufala no garem eni hope nao. Samting wea Adam duim mekem “sin hem kasem evriwan long world . . . dastawe evriwan dae bikos evriwan sin.” (Rome 5:12) Taem Adam sin, hem mekem hemseleva and iumi tu kamap “slave” bilong sin and dae. (Rome 7:14) Waswe, iumi garem eni hope? Yes, datfala ransom nao mekem iumi garem hope.

7, 8. Wanem nao ransom?

⁷ Ransom hem wanem? Ransom savve minim tufala samting. First samting, hem savve minim price for mekem man kamap free. Mek-tu samting, hem savve minim price wea barava fitim for changem bak samting.

⁸ No eni man long world savve changem bak barava nogud samting wea Adam duim taem hem sin and mekem iumi for dae. Bat Jehovah duim samting for iumi olketa man savve kamap free from sin and dae. Distaem bae iumi storyim wanem Jehovah duim for provaedem datfala ransom, and gud samting wea iumi savve kasem from datwan.

9. Wanem kaen ransom nao fitim perfect laef wea Adam lusim?

⁹ No eniwan long iumi fit for peim ransom for perfect laef wea Adam hem lusim. Why nao olsem? Bikos iumi evriwan no perfect. (Sams 49:7-9) Narafala man wea perfect nao mas givim laef  bilong hem for changem bak datfala perfect laef bilong Adam. Dastawe Bible sei datfala ransom hem “price wea semsem.” (1 Timothy 2:6) Datfala ransom hem mas semsem witim perfect laef wea Adam hem lusim.

10. Wanem nao Jehovah duim for provaedem ransom?

¹⁰ Wanem nao Jehovah duim for provaedem ransom? Jehovah sendem kam spesol Son bilong hem long earth. Jesus nao datfala Son, and hem nao first wan wea God creatim. (1 John 4:9, 10) Jesus hem willing for lusim Dadi bilong hem, and hom bilong hem, long heven. (Philippi 2:7) Jehovah putim laef bilong Jesus insaed long bele bilong Mary, and Jesus hem born olsem wanfala perfect man wea no garem sin.—Luke 1:35.

11. Hao nao wanfala man nomoa savve peim ransom for evri man?

¹¹ Taem firstfala man, Adam, hem no obeyim Jehovah, hem lusim datfala perfect laef wea evri man long earth shud kasem. Waswe, eni nara man savve finisim sin and dae wea evri pikinini bilong Adam kasem? Yes. (Readim Rome 5:19.) Jesus, wea no garem sin, hem givim perfect laef bilong hem olsem wanfala ransom. (1 Corinth 15:45) Datwan nao savve finisim dae wea kasem olketa pikinini bilong Adam.—1 Corinth 15:21, 22.

12. Why nao Jesus kasem barava nogud samting bifor hem dae?

¹² Bible storyim barava nogud samting wea pipol duim long Jesus bifor hem dae. Olketa whipim hem nogud, nilam hem long post, and hem kasem bigfala pain and safa gogo hem dae. (John 19:1, 16-18, 30)  Why nao Jesus kasem barava nogud samting olsem? From Satan sei no eni man savve faithful long God sapos hem kasem bigfala test. Jesus showimaot man wea perfect hem fit for faithful long God nomata hem kasem barava nogud samting. Masbi Jehovah barava hapi long Jesus!—Provebs 27:11. Lukim Endnote 15.

13. Wanem taem nao Jesus peim datfala ransom?

¹³ Long Nisan 14, 33 C.E., olketa enemy bilong Jesus killim hem dae. (Hebrew 10:10) Thrifala day bihaen datwan, Jehovah mekem Jesus for laef bak, no olsem wanfala man, bat olsem wanfala spirit. Taem hem go bak long heven, hem givim long Jehovah datfala ransom, wea hem nao perfect laef bilong hem wea hem sakrifaesim, for baem bak olketa pikinini bilong Adam. (Hebrew 9:24) From Jehovah acceptim datfala ransom, iumi garem chance for kamap free from sin and dae.—Readim Rome 3:23, 24.

14, 15. Wanem nao iumi mas duim mekem God savve forgivim iumi taem iumi duim sin?

¹⁴ Iumi kasem finis olketa gud samting from datfala spesol present wea God givim. Distaem bae iumi storyim samfala gud samting wea iumi kasem distaem, and wea iumi bae kasem long future tu.

¹⁵ God savve forgivim iumi taem iumi duim sin. Hem no isi for evritaem duim samting wea stret. Iumi savve duim mistek, and samfala taem iumi talem and duim rong samting. (Colossae 1:13, 14) Hao  nao iumi savve kasem forgiveness? Iumi shud barava sorre long rong samting wea iumi duim, and hambol for askem Jehovah for forgivim iumi. And iumi sure hem bae forgivim iumi long olketa sin wea iumi duim.—1 John 1:8, 9.

16. Wanem nao iumi mas duim mekem iumi garem gudfala konsens?

¹⁶ Iumi savve garem gudfala konsens. Sapos konsens bilong iumi pokem iumi from iumi duim samting wea no stret, datwan savve mekem iumi feel guilty, and maet iumi feel iusles and lus hope tu. Bat iumi shud no givap. Sapos iumi askem Jehovah for forgivim iumi, iumi sure hem bae herem iumi and forgivim iumi. (Hebrew 9:13, 14) Jehovah laekem iumi for mas story long hem abaotem eni problem wea kasem iumi, and abaotem olketa wik point bilong iumi. (Hebrew 4:14-16) Datwan savve helpem iumi for gohed fren gud witim God.

17. From Jesus dae for iumi, wanem blessing nao iumi savve kasem?

¹⁷ Iumi garem hope for laef olowe. Bible sei: “Pei wea sin givim hem dae. Bat present wea God givim hem laef olowe bikos long samting wea Lord bilong iumi Christ Jesus hem duim.” (Rome 6:23) From Jesus dae for iumi, iumi savve laef olowe and garem gudfala health. (Revelation 21:3, 4) Bat wanem nao iumi mas duim for kasem olketa blessing hia?

18. Hao nao iumi savve Jehovah hem lovem iumi?

¹⁸ Taem samwan givim iu wanfala spesol present, iu barava tinghae long datwan. Datfala ransom hem  present wea God givim iumi wea winim eni nara samting, so iumi shud tinghae long datwan and thankiu long Jehovah. John 3:16 sei: “God barava lovem tumas pipol long world dastawe hem givim kam spesol Son bilong hem.” Tru nao, datwan showimaot Jehovah lovem iumi tumas. And iumi savve Jesus tu lovem iumi bikos hem willing for dae for iumi. (John 15:13) Datfala ransom hem shud mekem iumi sure Jehovah and Jesus barava lovem iumi.—Galatia 2:20.

19, 20. (a) Wanem nao iu savve duim for fren witim Jehovah? (b) Hao nao iu savve showimaot faith long datfala ransom?

¹⁹ From iu lane abaotem bigfala love wea God garem for iu, waswe iu laek for fren witim hem? Wanem nao iu savve duim for fren witim hem? Hem no isi for lovem samwan wea iu no savve gud long hem. John 17:3 sei iumi savve lane abaotem Jehovah. Taem iu duim datwan, bae iu barava lovem hem, bae iu laek for mekem hem hapi, and bae iu fren witim hem. So gohed studyim Bible mekem iu bae savve gud long Jehovah.—1 John 5:3.

²⁰ Showimaot faith long ransom. Bible sei “man wea showimaot faith long Son hem kasem laef olowe.” (John 3:36) Hao nao man bae showimaot faith? Iumi showimaot faith taem iumi followim wanem Jesus teachim. (John 13:15) Hem no inaf for iumi sei iumi biliv long Jesus nomoa. For showimaot iumi tinghae long datfala ransom, iumi mas duim samting for pruvim datwan. James 2:26 hem sei: “Faith bilong man wea no duim gudfala samting hem dae.”

21, 22. (a) Why nao hem gud for iumi attendim Memorial bilong dae bilong Christ evri year? (b) Wanem nao bae iumi storyim long Chapter 6 and 7?

 ²¹ Attendim Memorial bilong dae bilong Christ. Long evening bilong Nisan 14, Jesus givim komand long olketa aposol bilong hem for rememberim dae bilong hem. Evri year iumi duim datwan, and nem bilong datfala celebration hem Memorial or “evening kaikai bilong Lord.” (1 Corinth 11:20, footnote; Matthew 26:26-28) Jesus laekem iumi for evritaem tingim wei wea hem givim perfect laef bilong hem olsem sakrifaes for iumi. Hem sei: “Gohed for duim diswan for showimaot iufala rememberim mi.” (Readim Luke 22:19.) Taem iu attendim Memorial, iu showimaot iu tinghae long datfala ransom and bigfala love wea Jehovah and Jesus garem for iumi.—Lukim Endnote 16.

²² Datfala ransom hem spesol present wea iumi kasem. (2 Corinth 9:14, 15) Staka million pipol wea dae finis tu bae kasem gud samting from datfala spesol present. Bae iumi story abaotem datwan long Chapter 6 and 7.