1, 2. ¿Imatataj Diosninchej noqanchejrayku ruwasqa?

¹ SICHUS ujnin amigonchej necesitashajtinchej qolqeta jaywariwasunman chayqa, maytachá kusikusunman, agradecekusunmantaj, ¿icharí?

² Jehová Diosninchejqa mana chay amigo jinallachu. Payqa ni pejpa ruwasqanta noqanchejrayku ruwan. Kay capitulopi yachakusun jina, Jehová Diosqa Wawan Jesucristota noqanchejrayku kachamorqa, wiñay kausayta tarinanchejpaj (Mateo 20:28 leey). Payqa chayta ruwarqa maytapuni munakuwasqanchejrayku.

3. ¿Imaraykutaj wañoj kasqanchej?

³ Jehová Diosqa Jesusta kachamorqa juchamanta, wañuymantawan kacharichinawanchejpaj (Efesios 1:7). Chanta, ¿imaraykutaj kacharichisqa kayta necesitarqanchej? Adanwan Evawanqa Edén huertapi kashaspa juchallikorqanku, chayraykutaj wañorqanku. Noqanchejpis paykunaj wawasnin kasqanchejrayku wañullanchejtaj (“Jucha” nisqata leeriy).

4. ¿Imayna ruwasqataj Adán kasqa?

⁴ Jehová Diosqa Adanta mana juchayojta ruwarqa. Adanqa mana juchata rejserqachu, sonqonpis, yuyayninpis llimphu karqa. Chayrayku payqa  ni jaykʼaj onqonmanchu karqa, nitaj machuyanmanchu karqa, nillataj wañunmanpischu karqa. Jehová Diosmin Adantaqa ruwarqa. Chayrayku payqa tatan jina karqa (Lucas 3:38). Chantapis Diosqa Adanwan parlajpuni. Diosqa Adanman nerqa mirananta, animalestapis qhawananta. Nillarqataj uj sachʼaj poqoynillanta amapuni mikhunanta (Génesis 1:28-30; 2:16, 17).

5. ¿Adanqa uj máquina jinachu kasqa?

⁵ Diosqa Adanta “payman rijchʼakojta ruwarqa” (Génesis 1:27). Adantaqa ruwarqa Pay jina kʼacha sonqoyoj, munakuyniyoj, yachayniyoj ima kananpaj, cheqan kajtataj ruwananpaj. Chantapis Diosqa Adanta ruwarqa, pay kikinmanta imatapis ruwayta atinanpaj. Adanqa mana uj máquina jinachu karqa. Maquinaqa mana sapallanmantaqa imatapis ruwanchu. Adantajrí imachus allin, imatajchus mana allin kasqanta sapallanmanta reparayta aterqa. Diostachus kasukunman karqa chayqa, wiñaypaj kusisqa kausakunman karqa.

6. Diosta mana kasukusqanrayku, ¿imastaj Adanta qhatisqa?

⁶ Adanqa Diosta mana kasukorqachu. Chayrayku Diosqa wañunanta nerqa. Chantapis Adanqa niña Diospa ñaupaqenpi allinpaj qhawasqachu karqa, juchasapaman tukorqa, Edén huertamantapis wijchʼuchikamorqa (Génesis 3:17-19). Adanwan Evawanqa Diosta mana kasukusqankurayku, wañuyllataña suyakunanku karqa.

7, 8. Adán juchallikuspa, ¿imamantaj jaywaykuwasqanchej?

⁷ Adán juchallisqanrayku “jucha kay mundoman yaykumorqa, jucharaykutaj wañuypis tiyan.  Ajinamanta wañoyqa tukuy runasman chayarqa, tukuyninku juchallikusqankurayku” (Romanos 5:12). Adanqa juchallikuspa, juchaman wañuymanwan jaywaykuwarqanchej (Romanos 7:14). Juchamantawan wañuymantawan, ¿pillapis kacharichiyta atiwasunmanchu?

⁸ Juchamantawan wañuymantawanqa, ni pi runapis kacharichiyta atiwasunmanchu. Jehová Diosnillanchej kacharichiyta atiwarqanchej. Kunanqa yachakusunchej imaynatachus Diosninchej juchamanta kacharichiwasqanchejta. Yachakullasuntaj imaynatachus chay ruwasqan yanapawasqanchejtapis.

9. Adán juchallisqanmanta, ¿imaraykú Jesuslla pagayta aterqa?

⁹ Juchasapas kasqanchejrayku, Adán juchallikusqanmantaqa ni mayqenninchej Diosman pagayta atisunmanchu (Salmo 49:7-9). Adanqa mana juchayoj runa karqa. Chayrayku mana juchayoj runallataj juchamanta kacharichinawanchej karqa. Jesusqa Adán jinallataj mana juchayoj runa karqa. Chayrayku “pay kikin jaywaykukorqa, maychus necesitakusqan preciota pagananpaj” (1 Timoteo 2:6).

10. ¿Imatataj Diosninchej ruwasqa juchamanta kacharichinawanchejpaj?

¹⁰ ¿Imatataj Jehová Diosninchej ruwarqa juchamanta kacharichinawanchejpaj? Payqa aswan munasqa Wawan Jesusta jallpʼaman kachamorqa. Diosqa niraj ni imata ruwashaspa Jesusta ñaupajta ruwarqa (1 Juan 4:9, 10). Jesusqa Tatanta saqenan kajtinpis, cielopi jatun kayninta saqenan kajtinpis, tukuy sonqo kay  jallpʼaman jamorqa (Filipenses 2:7). Jehová Diosqa, uj milagrota ruwaspa Jesuspa kausayninta Mariaj wijsanman churarqa. Ajinamanta Jesusqa kay  jallpʼapi mana juchayoj nacekorqa (Lucas 1:35).

11. ¿Pillataj juchamanta kacharichiyta atiwanchej?

¹¹ Adanqa Jehová Diosta mana kasukusqanrayku juchasapaman tukorqa, chayrayku noqanchejpis juchasapasllataj kanchej. Juchamantaqa Jesuslla kacharichiyta atiwanchej (Romanos 5:19 leey). Payqa mana juchasapachu karqa, chayrayku kausayninta noqanchejrayku qorqa (1 Corintios 15:45). Jesusqa mana juchayoj kausayninta qospa, wañuymanta kacharichiwarqanchej (1 Corintios 15:21, 22).

12. ¿Imataj sutʼi yachakusqa Jesús kasukusqanrayku?

¹² Bibliaqa niwanchej, Jesustaqa niraj wañupushajtin anchatapuni ñakʼarichisqankuta. Paytaqa mana khuyarispa jasutʼerqanku, rakhu kʼaspiman clavaykorqanku, unayta ñakʼarichispataj wañucherqanku (Juan 19:1, 16-18, 30). Supayqa nerqa ni mayqen runapis ñakʼarishaspaqa Diosta kasukunanta. Jesustajrí chay jinata ñakʼarichejtinkupis Diostaqa kasukullarqapuni. Ajinapi sutʼi yachakorqa mana juchayoj runaqa, mayta ñakʼarispapis Diosta kasukuyta atisqanta. Jehová Diosqa maytachá kusikorqa chayta rikuspa (Proverbios 27:11; “Cruz” nisqata leeriy).

13. Tatanpa ñaupaqenman yaykuspa, ¿imatataj Jesús ruwasqa?

¹³ Jesustaqa 33 watapi 14 de nisán killapi enemigosnin wañucherqanku (Hebreos 10:10). Kinsa  diasninmantaj,  Jehová Diosqa  Jesusta kausarichimorqa manaña aycha cuerpoyojtachu, manachayqa mana rikukoj cuerpoyojta. Chaymantataj Jesusqa cieloman kutiporqa. Chaypitaj Tatanpa ñaupaqenman  yaykorqa juchanchejmanta pagananpaj. Tatantaj noqanchejrayku kausayninta qosqanta pagota jina japʼikaporqa (Hebreos 9:24). Ajinamanta  Jesusqa  juchamantawan wañuymantawan  kacharichiwarqanchej  (Romanos 3:23, 24 leey).

14, 15. ¿Imatataj ruwananchej kasqa Dios perdonanawanchejpaj?

¹⁴ Jehová Dios Wawanta kachamusqanqa, maytapuni yanapawanchej, manataj kay tiempollapichu, manachayqa qhepamanpis yanapallawasuntaj.

¹⁵ Juchasninchej pampachasqa kayta atin. Juchasapas kasqanchejrayku, mana atillanchejchu allin kajta ruwaytaqa. Imapipis pantanchejpuni, wakin kutitaj juchaman urmanchej (Colosenses 1:13, 14). ¿Imatá ruwasunman perdonta tarinapaj? Tukuy sonqowan Diosman kutirikunanchej tiyan, llampʼu  sonqowantaj  perdonta  mañakunanchej tiyan. Chayta ruwasunchej chayqa, Jehová Diosninchejqa perdonawasun (1 Juan 1:8, 9).

16. ¿Imatataj ruwasunman imapipis pantaykojtinchej?

¹⁶ Llimphu concienciayoj kayta atinchej. Imapipis pantaykojtinchejqa ni puñuytapis atinchejchu. Ichapis yuyasunman noqanchejpuni juchayoj kasqanchejta, ni jaykʼajtaj imatapis allinta ruwananchejta, nitaj  imapajpis valesqanchejta. Jinapis mana allinchu kanman ajinata yuyananchejqa. Jehová Diosmanta perdonta mañakusunchej chayqa, payqa uyariwasunpuni, perdonawasunpunitaj (Hebreos 9:13, 14). Jehová Diosninchejqa munan tukuy imatapuni payman willakunanchejta (Hebreos 4:14-16). Ajinamanta Diospa ñaupaqenpi llimphu sonqoyoj kasunchej.

17. ¿Imayna kausaytataj tarisunchej Jesús wañusqanrayku?

¹⁷ Wiñay kausayta suyakuyta atinchej. “Juchaj pagonqa wañuymin. Diospa regalonrí wiñay kausay, Señorninchej Cristo Jesusnejta” (Romanos 6:23). Jesusqa noqanchejrayku wañorqa. Chayrayku tumpamantawanqa wiñaypaj kausakuyta atisunchej, niñataj onqosunchu (Apocalipsis 21:3, 4).

18. ¿Imatá Diosninchej ruwasqa mayta munakuwasqanchejrayku?

¹⁸ Pillapis necesitashajtinchejpuni imata jaywariwajtinchejqa, mayta kusikunchej. Jehová Diospis, necesitashajtinchejpuni Wawanta kachamorqa noqanchejrayku wañunanpaj. Chayta ruwasqantaj ni imawan kikinchakunchu. Chayrayku Payman mayta agradecekunanchej tiyan. “Diosqa chay jinatapuni kay mundomanta runasta munakusqanrayku, uj kʼata Wawanta qorqa” (Juan 3:16). Jehová Diosqa mayta munakuwanchej. Chayrayku aswan munasqa Wawanta noqanchejrayku wañunanpaj kachamorqa. Jesuspis mayta munakullawanchejtaj. Payqa tukuy  sonqo kausayninta noqanchejrayku qorqa (Juan 15:13). Arí, Jehová Dioswan Jesuswanqa maytapuni munakuwanchej (Gálatas 2:20).

19, 20. 1) ¿Imatá ruwasunman Diosman qayllaykunapaj? 2) ¿“Jesuspi creeni” nispallachu ninanchej tiyan?

¹⁹ Kunanqa yachanchejña Jehová Diosqa mayta munakuwasqanchejta. Jinapis payman qayllaykunanchejpajqa, Payta  rejsinanchej  tiyan. Mana  rejsispaqa  mana  munakuyta  atillasunmanchu. Bibliaqa Jehová Diosta rejsiyta atisqanchejta niwanchej (Juan 17:3). Payta astawan rejsispaqa, astawan munakusunchej, kusichiyta munasunchej, qayllanpitaj kasunchej. Chayrayku Bibliata estudiaspa Diosmanta yachakunallapuni (1 Juan 5:3).

²⁰ Jesús wañusqanmanta agradecekuna. Bibliaqa willawanchej “Diospa Wawanpi creejqa wiñay kausayniyoj” kananta (Juan 3:36). Jesuspi creespaqa, pay yachachisqanman jina kausakunanchej tiyan (Juan 13:15). Mana “Jesuspi creeni” nispallachu ninanchej tiyan. Jesús noqanchejrayku wañusqanmanta agradecekunapajqa, creesqanchejman jinapuni kausakunanchej tiyan. Biblia nin: “Mana ruwasqasniyoj creeypis wañusqa kashan”, nispa (Santiago 2:26).

21, 22. 1) Jesuspa Wañuyninta Yuyarinapaj tantakuyman rispa, ¿imatá yuyarikunchej? 2) ¿Imatataj 6, 7 capitulospi yachakusunchej?

²¹ Jesuspa Wañuyninta Yuyarinapaj tantakuyman rinapuni. Jesusqa 14 de nisán chʼisipi, apostolesninman kamacherqa wañuyninta  yuyarikunankuta. Jesuspa wañuyninta yuyarikunapajqa sapa wata tantakunchej. Chay tantakuytaj ‘Señorpa Cenan’ nisqa (1 Corintios 11:20; Mateo 26:26-28). Jesusqa mana juchayoj kausayninta noqanchejrayku qorqa, munantaj chayta yuyarikunanchejta. Payqa nerqa: “Kayta ruwallaychejpuni noqamanta yuyarikuspa”, nispa (Lucas 22:19 leey). Chay tantakoyqa yuyarichiwanchej Dioswan Jesuswan mayta munakuwasqanchejta. Sichus Jesús noqanchejrayku wañusqanta yuyarikuyta munanchej chayqa, chay tantakuyman rinanchejpuni tiyan (“Jesuspa Wañuyninta Yuyarina” nisqata leeriy).

²² Jehová Diosninchej Wawanta noqanchejrayku kachamusqanqa, ni imawan kikinchakunchu (2 Corintios 9:14, 15).  Jesús kausayninta qosqanrayku, wañusqaspis kausarimuyta atenqanku. Chaytaqa 6, 7 capitulospi astawan yachakusunchej.