1, 2. (1) ¿Imanö qarëpaqtaq “alläpa väleq qarëmi” ninkiman? (2) ¿Imanirtaq noqantsikrëkur Jesus wanunqanqa Diospa mas väleq kaq qarënin?

¿IMËLLAPIS qarayäshurqunkiku juk alläpa väleq qarëta? ¿Imanö qarëpaqtaq “alläpa väleq qarëmi” ninkiman? Musyanqantsiknöpis, juk qarë alläpa väleq kanampaqqa, manam chaniyoqraqtsu kanan. Imatapis wananqëkita o gustashunqëkita qarëkuyäshuptikiqa alläpachi agradecikunkiman.

² Dios Yayantsikqa imëkatam noqantsikrëkur ruramushqa, peru juk kuti ruranqantaqa imëkapitapis masmi necesitarqantsik. Tsë ruranqanmi mas väleq kaq qarëninqa. Noqantsikpaqrëkur wanunampaqmi Tsurinta kachamurqan, tsënöpa mana wanushpa kawakïta tarinapaq (leyi Mateu 20:28). Jehoväqa rasumpa kuyamarnintsikmi tsëta rurarqan. Kë capïtuluchömi tsë qarënimpita masllata yachakurishun.

3. ¿Imanirtaq wanuntsik?

³ Jesus wanunqanrëkurmi Diosnintsikqa jutsapita y wanïpita libramäshun (Efesius 1:7). Peru ¿imanirtaq Jesus wanunanqa precisarqan? Tsëta musyanapaqqa Adanwan Ëva Eden huertachö imata rurayanqanta yarpärishun. Pëkunaqa Diosta mana cäsukurmi jutsata rurayarqan, y tsënöpam wanuyarqan.  Llapantsikmi Adanpita y Ëvapita shamuntsik, tsëmi jutsayoqllana yurikuntsik, y tsënöpam wanuntsik (rikäri 9 kaq nötata).

4. ¿Pitaq Adan karqan, y imanötaq vïdan karqan jutsaman manaraq ishkiptin?

⁴ Diosnintsikqa Adantam kë Patsachö puntata kamarqan. Y Adanqa jutsannaqmi karqan, tsënöpam shonqunchö y pensamientunchö limpiu karqan. Tsëmi ni imëpis edäyänantsu ni wanunantsu karqan. Jehoväqa Adanpa teytan cuentam karqan, porqui pëmi kamarqan (Lücas 3:38). Diosnintsikqa Adanta imëpis parlapaqmi, y alleq clärum willaq pëpita imata shuyaranqanta. Jinamampis juk shumaq trabäjutam qorqan (Genesis 1:28-30; 2:16, 17).

5. ¿Imanirtaq Bibliaqa nin Diosnintsikqa ‘kikin niraqta’ Adanta kamanqanta?

⁵ Bibliam nin Diosnintsikqa ‘kikin niraqta’ Adanta kamanqanta (Genesis 1:27). Porqui kikinnö kuyakoqta, alli yachaqta, alli kaqta ruraqta y kallpayoqtam kamarqan. Adanqa manam juk mäquinanötsu karqan, porqui kikin imatapis decidinampaqmi Diosnintsikqa kamarqan. Alli kaqta o mana alli kaqta ruranampaqpis kikinmi decidinan karqan. Sitsun Jehoväta cäsukunampaq decidinman karqan, tsëqa mana wanushpam Shumaq Patsachö kawakunman karqan.

6. (1) ¿Imataq Adanta pasarqan Diosta mana cäsukunqanrëkur? (2) ¿Imamantaq Adanpa jutsan chätsimarquntsik?

⁶ Adanqa mana wiyakoq karmi Diosnintsikwan amïgu këninta oqrarirqan, y wanunampaqmi condenashqa karqan. Jutsasapam tikrarirqan, tsëmi Eden huertapita Diosnintsik qarqurirqan (Genesis 3:17-19). Y Adanpa culpanrëkurmi, “llapan nunakunaman  jutsa yëkurqan, y jutsarëkurnam pëkunaman wanï charqan, y tsënömi wanïqa llapan nunakunaman chärirqan, llapankuna jutsata rurayashqa kayaptin” (Romänus 5:12). Awmi, Adanpa jutsanrëkurmi llapantsik jutsasapa kantsik, y tsënöpam wanuntsik (Romänus 7:14). Adanwan Ëvaqa kikinkunam decidiyarqan Diosta mana cäsukïta, tsëmi pëkunapaqqa salvacion karqannatsu. Peru ¿noqantsikpaqqa salvacion kanmantsuraq karqan? Awmi. Jehoväqa salvamänapaqmi Jesusta kachamurqan.

7, 8. ¿Imanirtaq Jesus wanunan precisarqan?

⁷ ¿Imanirtaq Jesus wanunan precisarqan? Buënu, jutsapita librashqa kanapaqqa juk päguran precisarqan. Jinamampis Bibliaqa nin, pipis juk perjuiciuta ruranqan altsakänampaqqa, tsë perjuiciupa chaninraq pagakushqa kanan precisanqantam.

⁸ Jutsaman y wanïman Adan rantikamanqantsikpita libri kanapaqqa, manam ni pï nunapis pagakïta puëdinmantsu karqan. Tsëmi Jehoväqa salvamänantsikpaq Jesusta kachamurqan. Rikärishun Jesus wanunqan imanir y imanö salvamanqantsikta.

9. Jutsapita y wanïpita librashqa kanapaqqa, ¿imanö pägutaq precisarqan?

⁹ Jutsannaq vïdanta oqrarirmi Adanqa llapantsikta jutsaman y wanïman rantikamarqantsik. Tsëmi tsëpita librashqa kanapaqqa, juk jutsannaq nunapa vïdanraq pägu kanan karqan. Porqui Biblia ninqannöpis, jutsapita libri kanapaqqa ‘precisaq chaninran’  pagakushqa kanan karqan (1 Timoteu 2:6). Y musyanqantsiknöpis, noqantsikqa llapantsikpis jutsayoqllana yurikushqa karmi tsë chanintaqa pagakïta puëdishwantsu karqan (Salmus 49:7, 8).

10. ¿Imatataq Jehovä rurarqan salvamänapaq?

¹⁰ ¿Imatataq Jehovä rurarqan salvamänapaq? Alläpa kuyë Tsurin Jesustam Patsaman kachamurqan (1 Juan 4:9, 10). Y Jesusqa kuyamarnintsikmi Teytanta y ciëluchö shumaq kawakïkanqanta jaqirir Patsaman shamurqan (Filipensis 2:7). ¿Y imanötaq shamurqan? Jehovämi permitirqan Marïa jutiyoq shipash Jesusta qeshyaq tikrarinampaq. Tsëmi Jesusqa nunanö yurikurqan, peru jutsannaq (Lücas 1:35).

11. ¿Imanötaq musyantsik juk nunalla llapan nunakunata salvëta puëdinqanta?

¹¹ Rikanqantsiknöpis, Jehovä Diosta Adan mana wiyakunqanrëkurmi jutsannaq kawakunapaq kaqta oqrarirqantsik. Tsëmi precisarqan juk jutsannaq nunaraq salvamänantsik. Peru ¿juk nunallaqa puëdinmantsuraq karqan llapan nunakunata salvëta? Awmi. Tsëtam rikätsikun Romänus 5:19 (leyiri) textu. Jesusqa manam ni imëpis jutsata rurarqantsu, tsëmi jutsannaq vïdanwan llapan nunakunata salvëta puëdirqan (1 Corintius 15:21, 22, 45).

12. ¿Imanirtaq Jesus sufrinan precisarqan?

¹² Bibliam willakun Jesusta imanö sufritsiyanqanta y wanutsiyanqanta. Mana ankupashpam (llakipaypam) astayarqan, y juk qerumanmi clavayarqan, tsëmi alläpa sufrirnin wanurqan (Juan 19:1, 16-18, 30; rikäri 15 kaq nötata). Peru ¿imanirtaq sufrinanraq precisarqan? Porqui Satanasmi nishqa karqan alläpa  sufrimientukunapa pasarqa ni pipis Diosta manana cäsukunampaq kaqta. Peru juk jutsannaq nunapis alläpa sufrimientukunapa pasëkarnin Diosta cäsukïta puëdinqantam Jesusqa rikätsikurqan. ¡Y tsënö ruranqampitaqa Jehoväqa alläpachi kushikurqan! (Proverbius 27:11).

13. ¿Imatataq Jesus rurarqan salvamänapaq?

¹³ ¿Imatataq salvamänapaq Jesus rurarqan? Jehovämi permitirqan 33 watachö 14 de nisan junaq Jesusta wanutsiyänanta (Hebrëus 10:10). * Tsëpita kima junaqtam Jehoväqa kawaritsimurqan, peru manam nunanö cuerpuyoqtanatsu kawaritsimurqan, sinöqa espïritullatanam. Tsëpitanam, ciëluman kutirirnin jutsannaq vïdampa chaninwan llapantsikpa jutsantsikpita pagakurqan, tsënöpa salvacionta tarinapaq (Hebrëus 9:24). Tsëpita patsëmi jutsapita y wanïpita libri këman chëta puëdintsik (leyi Romänus 3:23, 24).

14, 15. ¿Imatataq ruranantsik Jehovä perdonamänapaq?

¹⁴ Jesus wanunqanqa imëkachömi yanapamantsik. Rikärishun kanan tiempu imanö yanapamanqantsikta y shamoq tiempuchö imanö yanapamänapaq kaqta.

¹⁵ Perdontam chaskita puëdintsik. Llapantsikmi imallachöpis pantarintsik. Höraqa mana allitam rurarintsik o parlarintsik. Peru Jehovä perdonamänapaqqa, ¿imatataq ruranantsik? Shonqupita patsëmi  arrepentikunantsik, humildim kanantsik y perdonëkamänapaqmi Jehoväman mañakunantsik. Tsënö rurashqaqa, Jehoväqa perdonëkamäshunmi (Colosensis 1:13, 14; 1 Juan 1:8, 9).

16. Alli concienciayoq kanapaqqa, ¿imatataq ruranantsik?

¹⁶ Alli concienciayoq këtam puëdintsik. Ima mana allitapis rurarishqaqa concienciantsikmi acusamantsik, y tsëmi mana alli sientikuntsik. Itsachi pensashwan ni imapaq mana välinqantsikta y Jehovä manana perdonamänapaq kaqta. Peru manam tsënötsu. Perdonamänapaq Jehoväta rogakushqaqa wiyamäshunmi y perdonëkamäshunmi (Hebrëus 9:13, 14). Jehoväqa munan ima problëmapapis pasarqa, o ima viciuyoqpis karqa pëman mañakunantsiktam (Hebrëus 4:14-16). Tsënöpam pëpa rikëninchö alli concienciayoq kashun.

17. ¿Imanö kawakïtataq puëdishun Jesus wanunqanrëkur?

¹⁷ Mana wanushpa kawakïtam puëdishun. Bibliam kënö nimantsik: “Jutsa qokunqan päguqa wanïmi, peru Dios qokunqan qarëqa Señornintsik Cristu Jesusrëkur imëyaqpis kawëmi” (Romänus 6:23). Awmi, Jesus wanunqanrëkurmi chipyëpa sänu këta y mana wanushpa kawakïta puëdishun (Revelacion [Apocalipsis] 21:3, 4). ¿Imatataq ruranantsik tsënö kawakïta munarqa?

18. ¿Imataq rikätsikun Jehoväwan Jesus kuyamanqantsikta?

¹⁸ ¿Imanöraq sientikunkiman pipis juk shumaq qarëta qarëkushuptiki? Noqantsikrëkur Jesus wanunqanqa llapampitapis mas väleq kaq qarëmi, y  tsëpitam Jehoväta alläpa agradecikunantsik. Juan 3:16 textum nin, “nunakunata alläpa kuyarninmi Diosqa japallan Tsurinta pëkunarëkur qorqan” nishpa. Jina tsënöllam Jesuspis kuyamantsik, tsëmi noqantsikrëkur wanunampaq shamurqan (Juan 15:13). Noqantsikrëkur Jesus wanunqanqa rikätsimantsik, Jehoväwan Jesus llapantsikta rasumpa kuyamanqantsiktam (Gälatas 2:20).

19. Jehoväwan amïgu kanëkipaqqa, ¿imatataq ruranëki?

¹⁹ Jehovä kuyamanqantsikta musyëkarqa, ¿imatataq ruranëki pëwan amïgu kanëkipaq? Alleq reqitam procuranëki. Musyanqantsiknöpis, pitapis mana reqinqantsiktaqa manam kuyëta puëdintsiktsu. Peru Juan 17:3 textum nin Jehoväta reqita puëdinqantsikta. Tsëta rurarqa masmi kuyanki, kushitsitam procuranki y amïgum tikrayanki. Tsëmi precisan Bibliata estudiarnin Jehoväpita yachakur sïguinëki (1 Juan 5:3).

20. ¿Imanötaq rikätsikunkiman Jesus salvamanqantsikman markäkunqëkita?

²⁰ Jesus wanurnin salvamanqantsikman markäkï (yärakuy). “Tsuriman markäkunqanta rikätsikoq kaqqa, imëyaqpis kawakïtam chaskin” ninmi Bibliachöqa (Juan 3:36). ¿Imanötaq markäkunqantsikta rikätsikuntsik? Jesus yachatsikunqanta cäsukurmi (Juan 13:15). Manam “Jesusmanmi crei” ninanllatsu, mastam ruranantsik. Jesus salvamanqantsikman markäkunqantsiktam rurënintsikwan rikätsikunantsik. Tsëmi Santiägu 2:26 textuchö kënö nin: “Markäkïpis alli rurëkunayoq mana karqa wanushqa cuenta[m] këkan”.

21, 22. (1) ¿Imanirtaq cada wata ëwanantsik Jesus Wanunqanta Yarpänapaq Reunionman? (2) ¿Imatataq yachakushun 6 y 7 kaq capïtulukunachöqa?

 ²¹ Jesus Wanunqanta Yarpänapaq Reunionman ëwë. Wanutsiyänampaq tsariyänan paqasmi Jesusqa mandakurqan noqantsikrëkur wanunqanta yarpänapaq. Tsëtaqa rurantsik Jesus Wanunqanta Yarpänapaq Reunionman o “Señorpa Cënanman” ëwarmi (1 Corintius 11:20; Mateu 26:26-28). Jesusqa munan jutsannaq vïdanta entregarnin salvamanqantsikta yarpänatam. Kikinmi, “këta rurar sïguiyë noqata yarpäyämarnï” nirqan (leyi Lücas 22:19). Jesus Wanunqanta Yarpänapaq Reunionman ëwarqa, salvamänapaq Jesus wanunqampita agradecikunqantsikta, y Jehoväwan Jesus alläpa kuyamanqantsikta cuentaman churanqantsiktam rikätsikuntsik (rikäri 16 kaq nötata).

²² Noqantsikrëkur Jesus wanunqanqa manam ni ima qarëwan igualantsu (2 Corintius 9:14, 15). Qateqnin kaq 6 y 7 capïtulukunachöqa yachakushun, Jesus wanunqanqa mëtsika millon wanushqa nunakunatapis yanapanampaq kaqtam.