1, 2. a) ¿Ima regalu ckámpaj astaan valorníyoj can? b) ¿Mayckan can astaan atun regalu Tata Yayamanta?

 ¿MAYCKAN can astaan súmaj regalu chasqueranqui? Suj regalu valor apinánpaj mana ashca ckoshcke valenan tían. Suj regalút chasquiptiyqui cusichisun, o ckam precisasckayqui can, ckam agradecenqui.

² Jehová ashca regalusta ckoaráysh, tían suj astaan precisasckayshta túcuy mayckan cachun imastismanta. Astaan atun regalu Tata Yayamanta humanúspaj can. Cá regalu ckoaráysh áicap Huaanta cachara huañunánpaj, únay unáypaj causayta atináyshpaj (Mateo 20:28 léey). Jehová Jishút Ashpaman cachas ckeshpichianáyshpaj, ckaachera ashcát munaasckayshta. Cá capitulopi astaan aprendesúysh cá regalumanta.

3. ¿Imajchus huañúysh?

³ Jehová Jíshup huañuyninuan humanustas ckeshpichin uchamanta y huañuymanta (Efesios 1:7). Unanchanáyshpaj imaraycu precisu cara Jishu tucuycunaraycu huañunanta, yachanáysh tían ancha únay sucedesckanmanta jardinpi Edenmanta. Huámaj tatasníysh, Adán y Eva, uchallicorancu, chayraycu huañorancu. Nockáysh Adán y Évap uchanta chasqueráysh, chayraycu huañúysh (Ckáay Astaan yacháypaj 9, paginapi 210).

4. a) Adan, ¿pichus cara? b) ¿Imaina ’ruascka cara?

 ⁴ Jehová Adanta mana defectóyoj ’ruara. Chay ancha alli cara. Pensamientusnin y túcuy cuerpun mana defectóyoj cara. Ni aicappas onckonman, ni viejoyanman, ni huañunman cara. Jehová Adanta ’ruara chayraycu páypaj tatan cara (Lucas 3:38). Jehová túcuy punchaus payuan ’rímaj cara. Tata Yaya Adanta nipora imát paymanta suyara y suj ancha súmaj llamcayta ckora (Génesis 1:28-30; 2:16, 17).

5. Áicap Biblia nin Adán «Yayaman llijchacun», ¿imát niyta munan?

⁵ Adan «Yayaman llijchacun», chayna Jehová payta ’ruara (Génesis 1:27). Jehová paypa inata cualidaresninta ckora, munayta, yachayta, justiciát y atiyta. Pay Adanta libertát ajllanánpaj ckora. Adán mana cara uyuas ina. Uyuas mana concienciát apincu, pero Adán concienciát apera, chayraycu ajllayta atinman cara imaina cáusaj ’rera, alli tiasckanta o mana alli tiasckanta ’ruanánpaj. Adán casucuspá únay unáypaj cáusaj ’rera jardinpi Edenmanta.

6. a)  Áicap Adán Tata Yayát mana casucora, ¿imát chincara? b) ¿Imaina perjudicaáysh?

⁶ Adán atun preciút pagarara, áicap Tata Yayát mana casucora y condenascka huañúypaj cara. Chincara súmaj amistarninta Jehovaan y causayninta mana defectóyoj y causayta jardinpi Edenmanta (Génesis 3:17-19). Adán y Eva ajllarancu Tata Yayát mana casucuyta, chayna, Adán ’ruasckanuan, «ucha mundupi yaycora, y huáñuy ucharaycu y chayna túcuy ckaris huañuncu imaraycu túcuy uchallisa carancu» (Romanos 5:12). Áicap Adán uchallicora, pay y nockáysh esclavus uchamanta y huañuymanta ’ruaaráysh (Romanos 7:14). Chayraycu paycunápaj ni suj suyana  tiara. Nockáyshpaj, ¿suyana tían? Ari. Jehová sackera Jishu huañunanta.

7, 8. Jíshup huañuynin, ¿imaina ckeshpichiayshta atin?

⁷ Jíshup huañuynin, ¿imaina ckeshpichiayshta atin? Íshcay layamanta comparacuyta atin. Huámaj, preciu ima pagaracun pillatapas ckeshpichíypaj. Huámaj huasan lugar, preciu ima pagaracun suj imasti valesckanmanta.

⁸ Ni pipas nockayshmanta pagarayta atinman túcuy mana alli Adan ’ruasckanta, áicap uchallicora, huañuyta nockayshman apamora. Jehová ’ruara túcuy precisacusckanta uchamanta y huañuymanta ckeshpichiáyshpaj. Ckaasúysh imaina Jehová Jishút cachara tucuycunaraycu huañunánpaj.

9. ¿Imaina ckeshpichisckas cayta atíysh?

⁹ Adán causaynin mana defectóyoj chincara y ni pipas nockayshmanta chá causayta pagarayta atin ckeshpichianáyshpaj. ¿Ímáj? Imaraycu túcuy uchallícoj cáysh (Salmo 49:7, 8). Suj personalla mana defectóyoj pagarayta atin Adán chincasckanta. O sea suj cáusay quiquin valor apichun (1 Timoteo 2:6).

10. Jehová, ¿imát ’ruara ckeshpichiáyshpaj?

¹⁰ ¿Imaina Jehová ckeshpichiáysh? Jehová Huaan ancha munasckata, Jishút, Ashpaman cachara (1 Juan 4:9, 10). Jishu dispuestu tiara tatanta y huasinta cielopi sackeyta (Filipenses 2:7). Jehová Jíshup causayninta Maríap huicsanpi churara, chayna, Jishu humanu ina huachachiscka cara, mana defectóyoj ni ucháyoj (Lucas 1:35).

11. ¿Imaina suj ckarilla tucuycunata huañuymanta ckeshpichiayshta atin?

 ¹¹ Adan Jehovát mana casucus causayninta mana defectóyoj y túcuy humanusmanta chincachera. ¿Suj ckari túcuy Adanpa huaasninta huañuymanta ckeshpichicuyta atinman? Ari, chayna Biblia nin Romanospi 5:19 (léey). Jishu, ni aicappas uchallicora, chayraycu causayninuan tucuycunát ’rantiaráysh ckeshpichianáyshpaj huañuymanta (1 Corintios 15:21, 22, 45).

12. ¿Imajchus Jishu ashcát usora?

¹² Biblia nin Jishu manáraj huañus ashcát usora. Pay ancha sajra guasquiascka cara, suj caspi ’racupi clavascka y usuchiscka cara y suj huáñuy ancha sajra y ashca nanayuan aguantara (Juan 19:1, 16-18, 30; Ckaáy Astaan yacháypaj 15, paginapi 213). ¿Imajchus Jishu ashcát usora? Imaraycu Súpay nera ni pipas Tata Yayát casúcoj caj ’rin, sinchi tratút chasquispá. Jishu ckaachera ima suj ckari mana defectóyoj Tata Yayát casúcoj cayta atin, aun sinchi tratút chasquis. ¡Pénsay imaina Jehová Jishuraycu ancha cusiscka tiara! (Proverbios 27:11).

13. ¿Aicapchus chá preciu ckeshpichiáyshpaj pagarascka cara?

¹³ ¿Aicapchus chá preciu ckeshpichiáyshpaj pagarascka cara? Huatapi 33, 14 mes Nisanmanta, judiuspa almanaquen, Jehová sackera Jishút enemigusnin huanchinancunápaj (Hebreos 10:10). Quimsa punchaus chaymanta, Jehová Jishút causachera mana suj humanu ina manapé suj persuna ina mana aichamanta y tullumanta cara. Chaymanta, áicap Jishu cieloman voliacora, Jehóvap ñauckenpi causaynin mana defectóyoj presentara y Tatan causaynin aceptara pagaráypaj uchasniyshraycu (Hebreos 9:24). Chayraycu  ckeshpisckas uchamanta y huañuymanta cayta atíysh (Romanos 3:23, 24 léey).

14, 15. ¿Imat ’ruanáysh tían uchasníysh perdonasckas canancunápaj?

¹⁴ Na yanapaashcaycu Tata Yáyap regalun. Ckaasúysh imaina cunan yanapaáysh y ámoj pachapi.

¹⁵ Uchasníysh perdonasckas cancu. Mana chaynalla can túcuy tiempupi alli casckanta ’ruayta. Ashca cutis ucháysh y huaquin cutis mana alli imastistas ’ruáysh y níysh. ¿Imaina perdonasckas cayta atíysh? Sonckoyshmantapacha arrepenticunáysh tían y humildaruan Jehovát mañanáysh tían perdonaanáyshpaj. Chaypachá confiayta atíysh uchasníysh perdonasckas cancu (Colosenses 1:13, 14; 1 Juan 1:8, 9).

16. ¿Imát ’ruanáysh tían ímaj cachun mana allít ’ruaspá?

¹⁶ Alli pensamientus apiyta atíysh. Creespá ’ruasckayshta imapas mana alli tiasckanta, tumpanacuyshta atíysh, suyanát chincas o ni imapáspaj siruisckayshta pensáysh. Pero chayna mana pensanáysh tían. Jehovát mañaspá perdonaanayshta seguros tiasúysh pay uyariasúysh y perdonaasúysh (Hebreos 9:13, 14). Jehová munan payuan ’rimanayshta túcuy problemasniyshmanta y debilidaresniyshmanta (Hebreos 4:14-16). Chayna Tata Yayaan paspi tiayta atíysh.

17. ¿Ima bendiciones chasquiyta atíysh imaraycu Jishu tucuycunaraycu huañora?

¹⁷ Suyana apíysh únay unáypaj causanáyshpaj. «Salariu ima ucha pagaran huáñuy can, pero regalu ima Tata Yaya ckon, cáusay únay unáypaj can, Jesucristuraycu Señorníysh» (Romanos 6:23). Imaina Jishu tucuycunaraycu huañora, causayta atíysh únay unáypaj y ni aicappas onckos (Revelación [Apocalipsis]  21:3, 4). Pero, ¿imát ’ruanáysh tían chá bendiciones chasquináyshpaj?

18. ¿Imaina yacháysh ima Jehová munaasckayshta?

¹⁸ Sonckoyqui cusicun pillapas ancha súmaj regalu ’ruasuptin. Jíshup huañuynin astaan súmaj túcuy regalusmanta can, chayraycu ancha agradecesckas Jehovát tianáysh tían. Juan 3:16 niáysh «Yaya cá munduta ancha munara, ima Huaan unigenitút ckora». Ari, Jehová ashcata munaáysh, chayraycu Huaan munasckata ckoaráysh. Yacháysh Jishupas munaáysh, chayraycu pay dispuestu tiara tucuycunaraycu huañuyta (Juan 15:13). Jíshup huañuynin convencechisunan tían Jehová y Jishu munasusckancunata (Galatas 2:20).

19. ¿Imaina Jehóvap yanasun cayta atinqui?

¹⁹ Cunan na yachanqui Tata Yáyap munayninmanta, ¿imaina yanasun cayta atinqui? Mana chaynalla can pillatapas munayta pít mana ’rejsinqui. Juan 17:3 nin Jehovát ’rejsiyta atíysh. Cayta ’ruaspá munayniyqui payraycu astaan huíñaj ’rin, payta cusíchej ’rinqui, yanasun caj ’rinqui. Chayraycu aprendes Jehovamanta seguinayqui tían (1 Juan 5:3).

20. ¿Imaina ckaachinqui fe Jíshup huañuyninpi apisckayquita?

²⁰ Jíshup huañuyninpi fe ckaáchiy. Biblia nin «pi fe Huaanpi ckaachin cáusay únay unáypaj apin» (Juan 3:36). ¿Imát niyta munan fe ckaachiyta? Niyta munan ’ruanayshta Jishu yachachisckanta (Juan 13:15). Manalla nináysh tían Jishupi creesckayshta manapé ckaachiyta ’ruasckayshuan. Santiagupi 2:26 leéysh: «Fe mana obrasníyoj huañuscka tían».

21, 22. a)  ¿Imajchus sapa huata ’rináysh tían tantacunaman Jíshup huañuyninta yuyáypaj? b) ¿Imát apréndej ’ríysh capitulospi 6 y 7?

 ²¹ Tantacunaman Jíshup huañuyninta yuyáypaj ’rinayqui tían. Chá tuta manáraj Jishu huañus, pay yachachiaráysh huañuyninta yuyanayshta. Cayta sapa huata ’ruáysh, cá tantacuna, Jíshup Huañuyninta Yuyáypaj huajyacun o «Señorpa Cenan» (1 Corintios 11:20; Mateo 26:26-28). Jishu munan yuyanayshta paypa causaynin mana defectóyoj ckora ckeshpichiáyshpaj. Pay nera: «Nóckap yuyayniypi cayta ’ruas seguiychis» (Lucas 22:19 léey). Tantacunaman ’riptiyqui Jíshup huañuyninta yuyáypaj ckaachinqui yuyasckayquita chá regalu y Jehová y Jishu ckamta ashca múnay apisusckancunata (Ckáay Astaan yacháypaj 16, paginapi 214).

²² Jíshup huañuynin astaan atun regalu can ima chasquiyta atiyshman (2 Corintios 9:14, 15). Capitulospi 6 y 7 aprendesúysh imaina cá ancha súmaj regalu yanápaj ’rin ancha ashca persunastas huañusckas tiasckancunata.