1, 2. a) ¿Ima tunu cuyanara mas valishca an? b) ¿Imarasha quishpichinaga Dios mas valij cuyashca an?

¿IMA yapa valishca cuyanara can apishcangui? Shu cuyanara ashca cullquihua randishca ajllaira mana valishcachu an. Astaumbas canda cushiyachijpi, ministishca cuyana ajpi valishcami an.

² Yaya Dios tucui cuyanamanda, shu mas valishca cuyana tian. Paihua Churira ñucanchira quishpichichu cuca. Cai quishpichinaga Dios mas valij cuyashcami an. Cai cuyashcamanda ñucanchi huiñaigama causana ushanchimi (leapai Mateo 20:28). Jehová Dios, Jesusta cai Allpama cachamushcai, ñucanchira ashca llaquishcara ricuchica. Cai temai mas yachangaraunchi cai cuyanamanda.

3. ¿Imarasha huañunchi?

³ Yaya Dios runaunara uchamanda, huañuimanda llushpichingaj shu quishpirinara cuca (Efesios 1:7). Intindingahua imarasha cai quishpirinara ministishcami, yachana anchi imara tucuca huaranga huatauna ñaupai ali gustu pamba Edembi Adán Evahuas ñucanchi punda yayauna. Paiguna ucharashcamanda huañunuca. Ñucanchis Adán Eva huahuauna ashcamanda uchayuj pagarinchi, huañunchi (nota 9 ricungui).

4. a) Adán ¿pita aca? b) Adán ucha illaj ashcai ¿imasnara causaca?

 ⁴ Yaya Dios ñaupa punda runa Adanda ruraushcai shu sumaj ucha illaj causaira cuca. Paihua iyai, aicha uchara mana charicachu. Caita yachachin pai mana ima huras unguringachu, rucuyangachu, huañungachu. Jehová Adanda rurashcamanda paihua Yaya cuintami aca (Lucas 3:38). Yaya Dios Adanhua rimaj aca, paita yachachica imara rurana ashcara. Shinallara shu gustu tarbanara paita cuca (Génesis 1:​28-30; 2:​16, 17).

5. ¿Imasnara Jehová Adanda rurarca pai tunu ricurijta?

⁵ Jehová Adanda pai tunu ricurijta rurarca, paimanda pishi ushaiyujta (Génesis 1:27). Chiraigu Adán Jehová cuinta llaquinara, iyaiyuj anara, ali dirichu ranara, ushairas ricuchina ushaca. Adán shu animal cuinta mana rurashcachu aca. Animalguna aliras manaliras mana yachanunzhu. Yaya Dios Adanda rurarca paillara aliras o manaliras ajllachu. Adán Jehová Diosta casungaj ajllashcajpi, huiñaigama Paraisoibi causanmaca.

6. a) Adán Diosta mana casushcamanda ¿imara tucuca? b) Adán mana casushcamanda ñucanchi ¿imara tucucanchi?

⁶ Adán Diosta mana casushcamanda ashca llaquiunara tupaca. Jehová Dios ali amigo tucunara, ucha illaj causanaras chingachica, huasha Paraisomanda llucchishca tucuca (Génesis 3:​17-19). Adán mana casushcamanda ñucanchima ashca llaquiunara apamuca. Pai culpamanda “ucha mundui icuca, uchamanda huañuis icuca, shinallarami huañui tucui runaunama shamuca, paiguna tucui ucharashcamanda” (Romanos 5:12). Adán uchai urmashcamanda ñucanchi uchayuj  pagarinara, huañunaras chasquicanchi (Romanos 7:14). Adán Evandi Diosta mana casushcamanda huiñaigama causana ña mana ushanushcachu. Shinajpi ñucanchi ¿shu chapanara charinchichu? Ari. Quishpichingaj Jehová puruntuca.

7, 8. ¿Imara an shu quishpichina?

⁷ ¿Imara an shu quishpichina? Punda, shu runara quishpichingahua cullqui pagana cuintami an. Astaumbas, Bibliai yachachin tucui huajlichishcara pagana cuintami an.

⁸ Adán ucha illaj causai chingachishcara mana pis runa paganara ushashcachu. Shinajpi Jehová Dios ñucanchira uchamanda huañuimandas llushpichingaj shu quishpichinara puruntuca. Cuna ricushun imara an cai quishpichina, astaumbas imasnara yanapan.

9. ¿Ima tunu quishpichinara ministishca aca?

⁹ Tucui ñucanchi cai quishpichinara pagangaj mana ushacanchichu. ¿Imarasha? Tucuiguna uchayuj ashcamanda (Salmo 49:​7, 8). Astaumbas runaunara quishpichingahua shu ucha illaj causaira ministishca aca. Chiraigu Jesús “quiquinllara cuca, tucuira cuti randingaj”, paillarami ucha illaj causai charica, Adán cuinta ucha illaj chingarishca causai (1 Timoteo 2:6).

10. ¿Imara Jehová Dios rurarca ñucanchira quishpichingahua?

¹⁰ ¿Imara Jehová Dios rurarca ñucanchira quishpichingahua? Paihua llaquishca Churi Jesusta cai Allpama cachamuca (1 Juan 4:​9, 10). Jesusllami paihua Yayara, paihua causaira ahua pachai saquica (Filipenses 2:7). Jehová Diosga Jesús causaira María icsai churaca.  Shina rasha Jesús cai Allpai ucha illaj, runa cuinta pagarica (Lucas 1:35).

11. ¿Imasnara shu sapalla runa tucui runaunaras quishpichingaj ushaca?

¹¹ Ña ricushcanchi ñaupa punda runa, Jehová Diosta mana casushcamanda tucuigunama ucha illaj causaira chingachica. ¿Shu sapalla runa tucui runaunaras quishpichingaj ushacachu? Ari. Bibliaga cutipanmi Romanos 5:19​pi (leapai). Jesús mana ima huras uchacachu, chiraigu paihua ucha illaj causaira cuna ushaca, tucui Adanmanda pagarimujcunara huañuimanda quishpichingaj (1 Corintios 15:​21, 22, 45).

12. ¿Imarasha Jesús ashca turmindusgunara charica?

¹² Bibliaga yachachin imasnara Jesús turmindarica manara huañushcallaira. Paita azutinuca, shu caspii clavanuca, shu nanarishca huañui charica (Juan 19:​1, 16-18, 30; nota 15 ricungui). ¿Imarasha Jesús ashcara turmindarica? Satanás rimacami mana pis runa shinzhi turmindusgunara charisha Diosta chuyaj shunguhua sirvisha catinga. Shinajpi Jesús ricuchica ucha illaj runa ashca turmindusgunara charishas Diosta chuyaj shunguhua sirvina ushan. Jehová paihua Churi rashcaunamanda cushi sintirica (Proverbios 27:11).

13. ¿Imasnara cai quishpichinara pagana aca?

¹³ ¿Imasnara cai quishpichinara pagana aca? Huata 33​pi judiogunaj calendarioibi nisán quilla 14 punzhai, Jehová saquicami chijnijcuna Jesusta huañuchinuchu (Hebreos 10:10). Quinsa punzha huasha Jehová Dios Jesusta causachica. Espíritu sami causana aichai causachica, mana runa cuinta. Jesús ahua pachama tigraca pai ucha illaj causaihua quishpichingahua pagangaj  Yaya ñaupai shayarica (Hebreos 9:24). Quishpichinara pagashca huasha uchamanda huañuimandas llushpirina ushanchi (leapai Romanos 3:​23, 24).

14, 15. ¿Imara rurana anchi Jehová ñucanchira perdonachu?

¹⁴ Quishpichinaga ashca tunui yanapan. Ricushun imasnara caita cunan shinallara shamuj punzhaunais yanapashcara.

¹⁵ Perdonashca tucungaj ushanchi. Tucui huras alira rurana shinzhimi an. Tucuiguna pandarinchi huaquimbi manalira ruranchi o rimanchi. ¿Imasnara perdonai tucuna ushanchi? Shungumanda aripintirisha Jehová Diosta mansu shunguhua perdonahuai nisha mañana anchi. Shina rajpi, pai ñucanchira perdonangami nisha quirina ushanchi (Colosenses 1:​13, 14; 1 Juan 1:​8, 9).

16. ¿Imara rurana anchi ali rashca iyaihua Diospa ñaupai ricuringahua?

¹⁶ Ali rashca iyaihua Diospa ñaupai ricurina ushanchi. Ñucanchi iyaiguna manalira rurarcangui nisha culpayuj sintirinchi. Huaquimbi mana valishca cuinta sintirinchi. Shinajpi ama sambayashun. Jehová Diosta perdonahuai rugajpi pai ñucanchira uyangami perdonangami (Hebreos 9:​13, 14). Jehová munanmi ima problemara o turbarishcara charisha paita cuintachu (Hebreos 4:​14-16). Shina rasha Diospa ñaupai ali rashca iyaihua ricurina ushanchi.

17. Jesús huañushcamanda ¿ima bendiciongunara charina ushanchi?

¹⁷ Huiñai huiñai causana ushanchi. “Uchamanda pagana huañuimi, randi Dios yangamanda cuyashca  huiñai causaimi, ñucanchi Señor Jesucristoi” (Romanos 6:23). Jesús huañushcamanda ungüi illaj, huiñai causaira charina ushanchimi (Ricuchina 21:​3, 4). ¿Imara rurana anchi cai bendiciongunara charingaj?

18. ¿Imasnara yachanchi Jehová, Jesuspas ñucanchira llaquishcara?

¹⁸ Iyari, ñucanchira shu gustu cuyanara cuyajpi cushi sintirinchi. Quishpichinaga mas valij cuyashcami asha, Jehová Diosta ashcara pagarachuna anchi. Juan 3:16 nin “casnami Dios cai pachara llaquica, paihua sapalla Churira cuca, maicans paihuajpi quirisha ama chingarichu, astaumbas huiñai causaira charichu”. Jesús ñucanchimanda huañushcara ricuchin ashca llaquishcara (Juan 15:13). Quishpichinaga ricuchinmi Jehová, Jesuspas cierto pacha caran shujta llaquishcara (Romanos 5:8).

19. ¿Imara rurana angui Jehovapa amigo tucungaj?

¹⁹ Cuna Jehová imasna ñucanchira llaquishcara yachashaga, ¿imara rurana angui paihua amigo tucungaj? Mana ricsijta runara llaquina, shinzhi an. Shinajpi Juan 17:3 yachachin Jehová Diosta ricsina ushanchi. Casna rasha, paita mas llaquingui, paihua amigo tucunguimi. Chiraigu Bibliara estudiasha, Jehová Diosmanda yachasha catipai (1 Juan 5:3).

20. ¿Imasnara quishpirinai quirishcara ricuchina ushanchi?

²⁰ Quishpirinai quiringui. Bibliaga riman “Churii quirisha huiñai causaira charin” (Juan 3:36). ¿Imara an quishpirinai quirinaga? Jesús yachachishcasna ruranami an (Juan 13:15). Shimimandalla Jesuspi quirini nisha mana valinzhu. Ñucanchi rurashcauna  quishpirinai quirishcara ricuchina an. Santiago 2:26 nin “quirinas ali ranauna illaj huañushcami”.

21, 22. a) ¿Imarasha Jesús huañushcara iyaringaj tandarinama tucui huata rina anchi? b) Shamuj temagunai 6, 7​pi ¿imara ricushun?

²¹ Jesús huañushcara iyaringaj tandarinama ringui. Tutai manara huañushcaira Jesús nica paihua huañushcara iyarinami anchi. Caita ruranchi caran huata Jesús huañushcara iyaringaj tandarinama o “Señorba cenara” risha (1 Corintios 11:20; Mateo 26:​26-28). Jesús munanmi ñucanchi iyarichu pai ucha illaj causaira cuca ñucanchira quishpichingaj. Pai nica: “Caita raichi ñucara iyaringaj” (leapai Lucas 22:19). Jesús huañushcara iyaringaj tandarinama risha, quishpichinara, Jehová Dios, Jesús llaquinara pagarachunchi (nota 16 ricungui).

²² Quishpichinamanda shu mas valij cuyashca mana tianzhu (2 Corintios 9:​14, 15). Shamuj temagunai 6, 7​pi ricushun imasnara cai quishpichinaga huaranga huaranga huañushca runaunara yanapanga.