1, 2. (1) Ima regalopas ancha chaninniyuq kananpaqqa, ¿achka qullqiwanraqchu rantina? (2) ¿Imatam Diosmanta chaskirqanchik regalota hina?

¿IMA chaskisqayki regalom aswan chaninniyuq karqa? Chay regalo ancha chaninniyuq kananpaqqa, manam achka qullqiwanraqchu rantina. Chayta kusisqa qusuptikiqa hinaspa imapas munasqayki kaptinqa, anchatam chaninchanki.

² Diosqa tukuy imatam quwanchik, ichaqa churinta ñuqanchikrayku wañunanpaq kachamusqanmi imamantapas ancha chaninniyuq regaloqa. Chayraykum wiñaypaq kawsayta atisunchik (qaway Mateo 20:28). Churinta kay pachaman kachamusqanwanmi Jehova Diosqa ancha kuyawasqanchikta qawachiwanchik. Chayta ruwasqanmantam astawan kay yachachikuypi yachasunchik.

3. ¿Imanasqam wañunchik?

³ Diosqa churin Jesuspa wañukusqanwanmi huchamantawan wañuymanta librawanchik (Efesios 1:7). Imanasqa chayta ruwasqanmanta yachanapaqqa, yuyarinanchikmi waranqantin watakuna ñawpaqta Eden huertapi ima pasakusqanta. Adanwan  Evaqa Diosta mana kasukusqankuraykum wañurqaku. Paykunapa miraynin kasqanchikraykum ñuqanchikpas huchallikunchik hinaspa wañunchik (qaway 9 kaq willakuyta).

4. ¿Imaynataq Adanqa karqa? ¿Imaynataq karqa mana pantaq kaspanqa?

⁴ Diosqa lliw runakunamanta puntatam Adanta unancharqa. Adanqa mana pantaq runam karqa, chaymi mana unqunanchu nitaq wañunanchu karqa. Jehova Diosqa Adanpa taytanmi karqa unanchasqanrayku (Lucas 3:38). Diosqa Adanmanmi yachachirqa allinta kawsakunanpaq. Chaymantapas kusikunapaq sumaq llamkaytam qurqa (Genesis 1:28-30; 2:16, 17).

5. ¿Ima ninantaq “kikinman rikchakuqtam” Adanta unancharqa nisqanqa?

⁵ Diosqa “kikinman rikchakuqtam” Adantaqa unancharqa (Genesis 1:27). Kaywanqa nichkanmi Adantaqa kuyakuqta, yachayniyuqta hinaspa allin ruwaqta Jehova Dios unanchasqanmanta. Adanqa manam maquina hinachu karqa. Diosmi unancharqa imatapas kikin tanteakuy atiqta. Payqa atinmanmi karqa allin kaqta utaq mana allin kaqtapas akllakuyta. Jehova Diosta kasukuspanqa, Adanqa sumaq huertapim wiñaypaq kawsakunman karqa.

6. (1) ¿Imam Adanta pasarurqa Diosta mana kasukusqanrayku? (2) Adan mana kasukusqanrayku, ¿imaynam kachkanchik?

⁶ Adanqa Diosta mana kasukusqanraykum wañurqa hinaspapas manañam Jehova Dioswanqa kuyachikurqachu. Pantaq runaña karuspanmi sumaq huertamantapas qarqurachikurqa (Genesis 3:17- 19). Adan mana kasukusqanraykum “lliw runakuna huchayuq rikurirurqa, huchawantaqmi wañuypas rikurirurqa. Chaynapim wañuyqa lliw runakunaman mirarurqa lliw huchallikurusqankurayku” (Romanos 5:12). Adan huchallikuruptinmi, llapanchik huchapa hinaspa wañuypa munaychakusqan kanchik (Romanos 7:14). Adanwan Evapas Diosta mana kasukusqankuraykum chayna karqaku. Ichaqa, ¿atichwanchu chaykunamanta librakuyta? Arí, Jehova Diosmi churinta ñuqanchikrayku kachamurqa.

7, 8. ¿Imaynatam yachachiwaq ñuqanchikrayku Jesuspa wañusqanmanta?

⁷ ¿Imaynatam yachachiwaq ñuqanchikrayku Jesuspa wañusqanmanta? Kaytaqa tupachichwanmi pitapas libranapaq pagayman. Chaynataq imatapas manuyaruspa kutichipuyman.

⁸ Pantaq runaqa manam Adanpa huchanmantaqa hinaspa wañuymantaqa librayta atiwachwanchu. Ichaqa Jehova Diosmi churinta kachamurqa huchamantawan wañuymanta librawananchikpaq. Qatiqninpim yachasun ñuqanchikrayku Jesuspa wañusqan imaynata yanapawasqanchikmanta.

9. ¿Imayna runataq librawananchikpaq wañunan karqa?

⁹ Wañuymanta librawananchikpaqqa, mana pantaq runam wañunan karqa (1 Timoteo 2:6). Ichaqa yachamusqanchikman hinam, mana mayqanninchikpas lliw runakunapa rantinpiqa wañuyta  atichwanchu. ¿Imanasqa? Llapanchik pantaq runakuna kasqanchikraykum (Salmo 49:7, 8).

10. Huchanchikmanta librawananchikpaq, ¿imatam Jehova Diosqa ruwarqa?

¹⁰ Jehova Diosqa kuyasqan churintam kay pachaman kachamurqa ñuqanchikrayku wañunanpaq (1 Juan 4:9, 10). Jesusqa hanaq pachapi taytanwan kuska kawsakusqanta saqiykuspanmi hamurqa (Filipenses 2:7). Runa hina nacenanpaqmi Jehova Diosqa Mariapa wiksanman atiyninwan hinaykurqa. Chaynapim Jesusqa mana pantaq hinaspa mana huchayuq nacerqa (Lucas 1:35).

11. ¿Imaynatam huk runallapa wañusqan llapanchikta librawanchik?

¹¹ Yachamusqanchikman hinam Adanqa Diosta mana kasukurqachu, chayraykum llapanchik huchayuq kanchik. ¿Atinmanchu karqa huk runalla llapanchikpa rantinchikpi wañuyta? Arí. ¿Imaynatam chayta yachanchik? Qaway Romanos 5:19 nisqanta. Jesusqa manam haykapipas huchallikurqachu, chaymi Adanpa mirayninkunata wañuymanta librayta atirqa (1 Corintios 15:21, 22, 45).

12. ¿Imanasqam Jesusqa anchata ñakarinan karqa?

¹² ¿Imanasqam Jesusqa anchata ñakarinan karqa? Satanasmi nirqa pi runapas ñakarispanqa Diosman sunqu kayta mana atinanmanta. Ichaqa maynataña ñakarispanpas Jesusqa Diosman sunqum hinalla karqa. Jesus chayna kasqanwanmi Jehova Diosqa kusikurqa (Proverbios 27:11). Bibliapim willawanchik manaraq wañuchkaspan Jesuspa ñakarisqanmanta. Mana llakipayaspam Jesustaqa azoterqaku,  qirupi clavowan takarurqaku, hinaptinmi nanaywan ñakarispan wañukurqa (Juan 19:1, 16-18, 30; qaway 15 kaq willakuyta).

13. Huchanchikmanta librawananchikpaq, ¿imakunatam Jehova Diosqa ruwarqa?

¹³ ¿Imakunatam Jehova Diosqa ruwarqa huchanchikmanta librawananchikpaq? 33 kaq watapim nisan killapa 14 punchawninpi, chiqniqnin runakuna Jesusta wañuchiptinku Jehova Diosqa mana harkakurqachu (Hebreos 10:10). Kimsa punchawmantañataqmi Jehova Diosqa espiritu cuerpoyuqtaña Jesusta kawsarichirqa. Chaymantam Jesusqa hanaq pachaman kutirqa hinaspam taytanta nirqa runakunata yawarninwan rantisqanmanta (Hebreos 9:24). Jesuspa chayna ruwasqanwanmi atichwan huchamantawan wañuymanta librakuyta (qaway Romanos 3:23, 24).

14, 15. Jehova Dios pampachawananchikpaq, ¿imatam ruwananchik?

¹⁴ Ñuqanchikrayku Jesuspa wañusqanqa anchatam yanapawanchik. Qawasun imaynatam kunanpas hinaspa hamuq tiempopipas yanapawachwan.

¹⁵ Huchanchikmantam pampachawanchik. Sasam allin kaqkunallata ruwayqa, chaymi llapanchik rimaspapas utaq ruwaspapas pantanchik. ¿Imaynatam pampachasqa kachwan? Sunqumantam wanakunanchik imapas mana allin ruwasqanchikmanta hinaspam Jehova Diosta mañakunanchik pampachaykuwananchikpaq. Chaynata  ruwaspanchikqa, manam iskayrayasunchu pampachawananchikmantaqa (Colosenses 1:13, 14; 1 Juan 1:8, 9).

16. Sunqunchikpi hawka tarikunanchikpaq, ¿imatam ruwananchik?

¹⁶ Hawkam sunqunchikpi tarikunchik. Sunqunchikpi imapas mana allin kasqanta musyakuspanchikqa, hukmanmi tarikunchik. Ichapas mana kaqpaqpas hapikuspanchik wañuytaña munachwan. Ichaqa ama hukmanyasunchu, pampachaykuwananchikpaq Jehova Diosta mañakuptinchikqa payqa uyariwasunmi (Hebreos 9:13, 14). Jehova Diosqa munanmi imapas sasachakuyninchikta payman willakunanchikta (Hebreos 4:14-16). Chaynata ruwaspanchikqa hawkam Diospa qayllanpipas tarikusun.

17. Jesus wañukusqanrayku, ¿imayna kawsakuytam atisunchik?

¹⁷ Wiñaypaq kawsakuytam atisunchik. “Huchapa pagonqariki wañuymi, Diospa regalonmi ichaqa señorninchik Cristo Jesusrayku wiñaypaq kawsakuy” (Romanos 6:23). Jesus wañusqanraykum atisunchik mana unquspa wiñaypaq kawsakuyta (Apocalipsis 21:3, 4). ¿Imatam ruwananchik chayna kawsakuyta chaskinanchikpaq?

18. ¿Jehova Dioswan Jesusqa kuyawanchikchu? ¿Imanasqam chaynata ninki?

¹⁸ Kaypi yuyaymanay: Pipas sumaq regalota quykuwaptinchikqa kusisqam tarikunchik. Chay regalota hinam Jehova Diosqa churinta ñuqanchikrayku quwarqanchik, chaymi Diostaqa anchata agradecekunanchik. Juan 3:16 nin: “Diosqa ancha-anchatam  runakunata kuyarqa chaymi sapallan churinta qumurqa”, nispa. Jesuspas kuyawanchikmi, chaymi ñuqanchikrayku wañurqa (Juan 15:13). Ñuqanchikrayku Jesuspa wañusqanpim, sutillata qawanchik sapakamata Jehova Dios hinaspa churinpas anchata kuyawasqanchikta (Galatas 2:20).

19. Jehova Dioswan kuyachikunaykipaq, ¿imatam ruwanayki?

¹⁹ Jehova Dios kuyawasqanchikmantam kunan yacharunchik, ¿imatam ruwawaq paywan kuyachikunaykipaq? Jehova Diostam riqsinayki. Sasam pitapas mana riqsispa kuyayqa. Ichaqa Juan 17:3 yachachiwanchik Jehova Dios riqsiyta atinanchikmanta. Chayta ruwaspaykiqa astawanmi kuyanki, munasqanman hinam kawsanki hinaspa astawan paywan kuyachikunki. Chaynaqa hinalla kallpanchakuy bibliamanta yachanaykipaq, chayta ruwaspaqa Jehova Diosmantam yachanki (1 Juan 5:3).

20. ¿Imaynatam Jesuspa wañukusqanpi iñisqaykita qawachiwaq?

²⁰ Jesuspa wañukusqanpim iñinanchik. Bibliam nin: “Churipi iñiqqa wiñay kawsayniyuqmi”, nispa (Juan 3:36). ¿Ima ninantaq iñiyniyuq kayqa? Jesuspa yachachisqanta ruwaymi (Juan 13:15). ¿Imaynatam Jesuspa wañukusqanpi iñisqaykita qawachiwaq? Ruwasqanchikwanmi qawachinanchik, manam Jesuspim iñini niyllachu. Santiago 2:26 nin: ‘Iñiyninchikpas wañusqam kachkan allin kaqkunata mana ruwaptinchikqa’, nispa.

21, 22. (1) Jesuspa wañukusqan punchawta yuyarinapaq huñunakuyman, ¿imanasqam sapa wata rinanchik? (2) ¿Imamantam yachasunchik 6 hinaspa 7 kaq yachachikuykunapi?

²¹ Jesuspa wañukusqan punchawtam yuyarinanchik.  Wañukunanpaqña kachkaspanmi Jesusqa nirqa chay punchawta yuyarinanchikpaq. Chaytam ruwanchik “señorninchikta yuyarinapaq” huñunakuyman sapa wata rispa (1 Corintios 11:20; Mateo 26:26-28). Jesusqa munanmi ñuqanchikrayku wañusqanta yuyarinanchikta. Paymi nirqa: “Hinallayá kayta ruwaychik ñuqata yuyariwaspa”, nispa (qaway Lucas 22:19). Jesuspa wañukusqan punchawta yuyarinapaq huñunakuyman rispanchikqa, payta mana qunqasqanchiktam qawachichkanchik hinaspa Jehova Diostawan Jesusta anchata kuyasqanchiktapas (qaway 16 kaq willakuyta).

²² Ñuqanchikrayku Jesuspa wañusqanmi ima regalomantapas aswan chaninniyuqqa (2 Corintios 9:14, 15). Qatiqnin 6 hinaspa 7 kaq yachachikuykunapim yachasunchik waranqantin wañukuq runakunata Jesuspa wañusqan yanapasqanmanta.