1, 2. a) Can minishtishca regalota cucpiga imasata sintiringuima. b) Ñucanchita quishpichingahua, Jesusta Dios cachashcaga imahuata balic regalo an.

CANDAGA can munashca regalota cui tucushcanguichu. Regalashca mana caru balic regalo acpihuas can minishtishcata regalacpiga, chi runata canga cushiyasha pagrachungui.

² Dios tucui cumbirashcamanda shuc regalomi astahuan minishtirishca an. Dios partimanda balishca regalo man. Paiba churita ñucanchita quishpichingahua cachara. Pai quishpichicta cachashcamanda huiñai causaita charishun (Mateo 20:28 leipai). Jesusta cai Allpama cachashami Jehova ñucanchita sirtu llaquishcata ricuchira. Cai capituloibiga cai regalomandami yachashun.

3. Imaraicuta huañunchi.

³ Diosca runagunata uchamanda, huañuimanda lugaryachingahua shuc quishpichicta cachara (Efesios 1:​7). Imahua quishpichina minishtirishca acta intindingahua, ashca huaranga huata huashama ima tucushcata intindina anchi. Adan y Eva imata rashcata yachashun. Paigunaga, uchata rashcamanda huañunaura. Runagunaga Adan y Eva mirai ashami, uchayuc  tucushcanchi. Chiraicumi tucuiguna huañunchi (nota 9​ta ricui).

4. Adan ucha illac causaita charishcaibiga imasa tara.

⁴ Adanga Dios punda rashca runa mara. Diosca Adanda rashaga ucha illac causaita, yuyaita cura. Astahuanbas ucha illac ali aichayuc mara. Chimandami mana ungusha, mana rucuyasha, mana huañusha causana anaura. Jehovaga, Adanda rashcamanda paiba yaya shina mara (Lucas 3:​38). Diosca caran uras Adanhuan cuintanacuc mara. Adan imata rana ashcata Diosca pagllaibi rimac ara. Chimandahuas ali gustu tarabanata cura (Genesis 1:​28-​30; 2:​16, 17).

5. Diosca Adanda “pai shina angahua rara” nishcaga imata nisha nin.

⁵ Diosca Adanda “pai shina angahua rara” (Genesis 1:27). Jehovaga pai shina llaquic, alita rac, ushayucta rara. Chasnallata Adanga mana animal shina chara. Diosca, Adanllata alita mana alita anllangahua rara. Adan Jehovata casushca ashaga, paraiso Allpaibi huiñai causana mara.

6. a) Adan Diosta mana casushcamanda imata tucura. b) Adan mana casushcamanda, imasata saquiriranchi.

⁶ Adanga Diosta mana casushcamanda huañuna tucura. Chasnallata ña mana Jehovahua amigo anata usharachu. Uchayuc tucucpi jardin de Edenmanda Jehova llucshichisha cachara (Genesis 3:​17-​19). Adan mana casushcamanda huinguna “chi urasmanda cunangama tucui runaguna uchata rashcamanda huañunchi” (Romanos 5:12). Adan uchai urmashcamanda ñucanchihuas, ucha mandashcacuinta huañuna saquiriranchi (Romanos 7:​14). Diosca Adan y Eva mana casushcamanda paigunata mana yanapana usharachu.  Chasna ashahuas Diosca ñucanchita yanapangami. Jehovaga paihua churita ñucanchita quishpichingahua cachara.

7, 8. Jesusca imasata runagunata quishpichira.

⁷ Jesusca imasata runagunata quishpichira. Jesus huañusha paiba causaihuan runagunata uchamanda lugaryachira. Chasnallata, Adanba uchamanda runaguna dihuiyuccuinta saquiriranchi. Chimandami Jesusca paiba causaita cusha chi dihuita pagasha ñucanchita quishpichira.

⁸ Adan uchata rashcaibi runagunaga huañunallata saquirinaura. Uchayuc ashcamandami mana maican runahuas Adan rashcata pagasha quishpichina ushara. Chiraicu Jehova uchamanda, huañuimanda quishpichingahua Jesusta cachara. Cunanga, Jesus ñucanchimanda imahua huañuna ashcata yachashun. Chimandahuas pai huañushca imasata yanapai tucunchi. Caita yachashun.

9. Ima tunu quishpichinatata minishtiranchi.

⁹ Quishpichic runaga Adan pirdishca shina ucha illac causaita charina mara. Chiraicu, uchamanda ñucanchi quishpichishca tucungahua shuc quishpichic runa minishtirira (1 Timoteo 2:​6). Cai quishpichic runaga ucha illac ana mara. Chasna ashahuas ñaupa rimashca shina tucuiguna uchayuc ashcamanda, mana maican runahuas quishpichinata ushanaurachu (Salmo 49:​7, 8).

10. Jehovaga quishpichingahua imata rara.

¹⁰ Jehovaga quishpichingahua imata rara. Jehovaga  paiba llaquishca shuclla churita cachara (1 Juan 4:​9, 10). Jesusca cieloibi causanata saquisha, paiba Yayatahuas saquisha shamura (Filipenses 2:​7). Jehovaga Jesuspa causaita Mariahua huicsaibi churara. Chimandami, Jesusca cai Allpaibi ucha illac pagarira (Lucas 1:​35).

11. Shuc runalla tucui runagunata quishpichina ushashcata imasata yachanchi.

¹¹ Ña ricushca shina, punda rashca runaga Jehovata mana casusha paiba miraigunata uchata chimbachira. Shuclla runaga tucui uchayuc runagunata quishpichina usharachu. Yachangahua Romanos 5:​19​ta leipai. Jesusca mana ima uraspas uchaibi urmarachu, chiraicu paiba ucha illac causaita tucui runagunata quishpichingahua cuna ushara (1 Corintios 15:​21, 22, 45).

12. Jesusca imahuata tucuita turmintarina ara.

¹² Mana huañushallata Jesus imasa turmintarishcata Biblia cuintan. Jesustaga manacaillata libachinaura, shuc caspibi clavanaura, chimandahuas manacaillata turmintachisha huanchinaura (Juan 19:​1, 16-​18, 30, NM; nota 15​ta ricui). Jesusca imahuata tucuita turmintarina ara. Supaiga nirami, runaguna llaquigunata charisha Diosta mana casungaunachu nisha. Chasna ashahuas Jesusca huañunagama atun llaquita charishahuas Diosta casuibaglla acta ricuchira. Jehovaga paiba churimanda ashcata cushiyara (Proverbios 27:11).

13. Jesusca quishpichingahua imata rana ara.

¹³ Jesusca quishpichingahua imata rana ara. Judioguna quillaibi 14 de nisan 33 huataibimi, Jehovaga paiba enemigoguna Jesusta huanchinauchun nisha saquiralla (Hebreos 10:10). Quimsa punzha huasha, Jehova Diosca cieloibi causangahua Jesusta causachira.  Chi huasha, Jesusca cieloma tigrasha pai ucha illac causaita cusha quishpichishcata Yaya Diospa ñaupacpi ricuchira (Hebreos 9:​24). Jesus quishpichishcamandami, uchamanda, huañuimandas lugaryashunchi (Romanos 3:​23, 24 leipai).

14, 15. Jehova perdonachunga imata rana anchi.

¹⁴ Jesus quishpichishcaga ashcata yanapai tucunchi. Dios quishpichingahua cachashca imasa yanapashcata, shamungarauc punzhaibihuas imasa yanapanata ricushun.

¹⁵ Perdonai tucushun. Alita ranaga sinzhi man. Tucuigunami pandarinchi, imasaibiga mana alita rasha, mana alita rimanchi. Uchagunamanda perdonachunga imata rana anchi. Perdonachunga mana alita rashcata shungumanda aripintirisha, Jehovata perdonahuai nisha mañana anchi. Chasna racpiga Jehova perdonai tucushunmi (Colosenses 1:​13, 14, NM; 1 Juan 1:​8, 9).

16. Ucha illac yuyaita charingahua imatata rana anchi.

¹⁶ Ucha illac yuyaita charina ushanchimi. Mana alita racpiga ñucanchi yuyaiga mana alitachu rashcangui nin, chasnallata culpayuc shina sintirinchi. Mana imaraicuhuas balinichu nishachari yuyanchi. Chasna yuyana randiga Jehovata perdonahuai nisha mañana anchi. Paiga uyasha perdonai tucushunmi (Hebreos 9:​13, 14). Jehovaga ima problemaguna tiyacpi, mana alita rana yuyai tiyacpiga paita cuintachun munan (Hebreos 4:​14-​16). Chasna rashami Diospa ñaupacpi ucha illac yuyaita charishun.

17. Jesus huañushcamanda ima bendiciongunata charishun.

 ¹⁷ Huiñaimi causashun. ‘Uchamanda paganaga huañui man. Astahuanbas Dios llaquisha cushca Jesucristomanda huiñai causashunʼ (Romanos 6:23). Jesus huañushcamanda mana ungusha, huiñai causaita charina ushanchi (Apocalipsis 21:​3, 4). Casna alita causangahuaga imata rana anchi.

18. Imaraicuta Jehova y Jesus llaquitucunchimi ninchi.

¹⁸ Maican runa, ñucanchi munashca regalota cucpi cushiyanchimi. Jesus huañusha quishpichingahua shamushca ali regalo man. Chiraicu Jehovata shungumanda pagrachuna anchi. Juan 3:16 nin “Diosca cai pachai causac runagunata yapa llaquishcamandami paiba sapalla [o shuclla] churita caima” cachara. Jesuspas llaqui tucuranchimi, chiraicu ñucanchimanda huañura (Juan 15:13). Jehova y Jesus ñucanchita yapa llaquishcamandami quishpichi tucuranchi (Galatas 2:​20).

19. Jehovahua amigo tucungahua imata rana angui.

¹⁹ Cunanga Jehova yapa llaquishcata yachasha, paiba amigo tucungahua imata rana angui. Jehovata ricsi. Mana ricsishcataga mana llaquibac chan. Chasna ashahuas Juan 17:​3 nin Jehovata ricsina ushanchimi nisha. Can Jehovata ricsishaga paita mas llaquisha, paita casusha paiba amigo tucungui. Chiraicu Bibliata estudiasha Jehovamanda mas ricsisha cati (1 Juan 5:​3).

20. Jesus huañushcaibi imasata feta charishcata ricuchishun.

²⁰ Jesus huañushcata quirina angui. Bibliaga nin “Diospa churita quiricca huiñai causaitami charin” nisha (Juan 3:​36). Jesuspi feta charinaga ima tan. Jesus yachachishcata ñucanchi causaibi pactachinata nin (Juan 13:15). Feta charinaga mana Jesuspi quirinimi  ninalla chan. Astahuanbas ñucanchi rashcagunahuan Jesus huañushcaibi quirishcata ricuchina anchi. Santiago 2:26 nin, feta charisha “ali rashcagunata mana rashaga huañushca cuinta man”.

21, 22. a) Imahuata caran huataibi Jesus huañushcata yuyaringahua tandarina anchi. b) Capitulo 6 y 7 imata yachashun.

²¹ Jesus huañushcata yuyarina punzha tandarinama rina manchi. Huañuna tuta pactariushcaibi, Jesusca pai huañushcata yuyaringuichi nira. Chiraicu caran huataibi Jesus huañushcata yuyaringahua tandarinchi (1 Corintios 11:20; Mateo 26:​26-​28). Jesusca pai ucha illac causaita cusha quishpichishcata yuyarichun munan. Paiga nirami: “Ñucata yuyaringahua casnallata rasha catinguichi” (Lucas 22:19 leipai). Jesus huañushcata yuyaringahua tandarishaga, Jehova y Jesus ñucanchita llaquisha quishpichishcata mana cungarishcata ricuchinchi (nota 16​ta ricui).

²² Jehova ñucanchita yapa llaquisha yanapashcamanda pagrachuna anchi (2 Corintios 9:​14, 15). Capitulo 6 y 7bi Jesus huañushca, imasa ashca huaranga huañushca runagunata yanapanata yachashun.