1, 2. a) Kèl kado na la valeur pou ou ? b) Pou kosa la ranson lé le plu gran kado ke Bondieu la donn a nou ?

KOSA i lé le plu gran kado ou la ganié dan out vi ? In kado la pa bezoin kout chèr pou avoir la valeur. Kan in kado i kontant vréman out keur ou lé vréman util pou ou, lé sur ke ou aprési a li in bonpe.

² Bondieu la donn a nou in bonpe kado. Mé néna in kado nou la vréman bezoin. Sé le plu gran kado ke Bondieu la donn bann domoun. Dann chapit la, nou va aprann ke Jéova la anvoiy Jézu su la tèr, pou ke nou gingn viv pou toultan (lir Matieu 20:28). Kan li la donn Jézu an ranson, li la montré ke li ièm a nou vréman.

3. Akoz nou mor ?

³ La ranson lé le moiyin ke Jéova la prévu pou libèr bann zumin le péché é la mor (Éfézien 1:7). Pou konprann pou kosa lavé bezoin la ranson, nou doi konèt kosa la éspasé néna bann milié d’zané dann jardin Lédèn. Nout premié paran, Adan é Èv la péché. É kom zot la péché, zot lé mor. É nou mor parske banna la transmèt a nou le péché (regard la not n^o 9).

4. Kisa lété Adan ? É kosa Jéova lavé donn a li ?

 ⁴ Jéova la kré le premié bonom, Adan, é la donn a li in nafèr ke na in bonpe la valeur : in vi parfé. Adan lavé in lintélijans parfé é in kor parfé. Li té tonm jamé malad, li té viéyi pa é li té doi pa konèt la mor. Kom Jéova lavé kré Adan, li lété kom in papa pou li (Luk 3:38). Jéova té i koz ansanm li souvan. La ésplik a li in fason bien klèr sak li té doi fé. É la donn a li in gayar travay (Jenèz 1:28-30 ; 2:16, 17).

5. La Bib i di ke Adan la été kréé « a la resanblans Bondieu ». Kosa sa i ve dir ?

⁵ Adan la été kréé « a la resanblans Bondieu » (Jenèz 1:27). Li la été kréé avèk bann joli kalité kom sak Bondieu : par égzanp lamour, la sajès, la justis é la puisans. Bondieu la donn a li osi la libèrté pou pran bann désizion. Adan lété pa in robo. Li té i pe choizi fé le bien ou le mal. Si li lavé choizi obéi Bondieu, li noré viv pou toultan dann paradi.

6. a) Kan Adan la dézobéi Bondieu, kosa li la pèrd ? b) Kosa la dézobéisans Adan i amèn pou nou ?

⁶ Kan Adan la dézobéi Bondieu, li la été kondané a mor. Li la pèrd bonpe zafèr : son gran lamitié avèk Bondieu, son vi parfé é le paradi ousa li té viv (Jenèz 3:17-19). Kom Adan é Èv la choizi dézobéi Bondieu, lavé pu léspoir pou zot. Akoz sak Adan la fé, « le péché lé rantré dan le monn é le péché la amèn la mor, é donk tout domoun i mor parske tout lavé péché » (Romin 5:12). Kan Adan la péché, li la « vann » a li kom lésklav pou le péché é la mor. É li la « vann » a nou kom lésklav an mèm tan ke li (Romin 7:14).  Èske néna in léspoir pou nou ? Oui. Jéova la donn in ranson !

7, 8. Kosa i lé in ranson ?

⁷ Kosa i lé in ranson ? In ranson lé le pri ki fo péyé pou libèr in moun ou pou rachèt in nafèr. Dan la Bib, in ranson lé osi le pri ki fo péyé pou répar bann déga.

⁸ Kan li la péché, Adan la provok bann gro déga é li la transmèt a nou la mor. Tout bann domoun lé inparfé. Donk, pèrsonn noré pu fourni le pri ki fo péyé pou répar bann déga la. Mé Jéova la donn le moiyin pou libèr a nou le péché é la mor. Alon voir koman li la donn la ranson é kèl bienfé sa i aport a nou.

9. Kosa té i fo doné an ranson ?

⁹ Okin moun anparmi nou noré gingn pèy la ranson. Akoz ? Parske nout tout lé inparfé (Psom 49:7, 8). É Adan lavé pèrd in vi parfé. Donk, la ranson té doi èt la vi in not moun parfé. Sé pousa ke i apèl sa la « ranson ki konvien » (1 Timoté 2:6). La ranson té doi avoir le mèm valeur ke la vi Adan lavé pèrd.

10. Koman Jéova la donn la ranson ?

¹⁰ Koman Jéova la donn la ranson ? Li la anvoiy su la tèr son Garson, ke li té ièm in bonpe é ke li lavé kréé an premié (1 Jan 4:9, 10). Jézu té dakor pou kit son Papa é le sièl, ousa li té viv (Filipien 2:7). Jéova la tir la vi Jézu dann sièl pou mèt su la tèr. Kan Jézu lé né, li lété in moun parfé, san péché (Luk 1:35).

11. Koman in seul moun lé devnu in ranson pou tout bann zumin ?

 ¹¹ Kom le premié bonom, Adan, la dézobéi Jéova, alor tout bann domoun lavé pu okin moiyin pou gingn in vi parfé. Mé èske in seul moun té i gingn sov tout bann désandan Adan d’la mor ? Oui (lir Romin 5:19). Jézu la jamé péché é li la donn son vi parfé an ranson (1 Korintien 15:45). Son vi parfé té i pe sov tout bann désandan Adan d’la mor (1 Korintien 15:21, 22).

12. Pou kosa té i fo ke Jézu i souf komsa ?

¹² La Bib i ésplik ke Jézu la soufèr in bonpe avan li mor. La donn a li koudfouèt avèk méchansté, la klout a li su in poto é la fé souf a li juskatank li mor an douleur (Jan 19:1, 16-18, 30) (regard la not n^o 15). Pou kosa té i fo ke Jézu té i souf komsa ? Parske Satan lavé di ke, si in moun i gingn bann koudkongn dur dan son vi, li va pa rès fidèl Bondieu. Jézu la prouvé ke in moun parfé i pe rès fidèl Bondieu, mèm kan li souf in paké. Lé sur, Jéova té resan in gran kontantman pou sak Jézu la fé ! (Provèrb 27:11).

13. Koman la ranson la été péyé ?

¹³ Koman la ranson la été péyé ? Dann lané 33, le 14 nizan (in moi dann kalandrié juif), Jéova la pèrmèt ke bann zènmi Jézu i tué a li (Ébreu 10:10). 3 jour aprésa, Jéova la résusit Jézu, mé pa pou artourn viv kom in moun su la tèr mé pou ke li redevien in lanj. Aprésa, Jézu lé retourné dann sièl é li la prézant Jéova la ranson : la valeur son vi parfé. Sétadir, li la donn Bondieu son droi pou viv kom in moun parfé su la tèr. É Bondieu la redonn  sa bann désandan Adan (Ébreu 9:24). Asteur ke la ranson lé péyé, nou pe èt libéré le péché é la mor (lir Romin 3:23, 24).

14, 15. Kosa nou doi fé pou ke nout péché lé pardoné ?

¹⁴ Nou pe profit le plu gran kado Bondieu depui koméla mèm, é nou poura osi an profité dan lavnir. Alon voir koman.

¹⁵ Nout bann péché lé pardoné. Lé pa fasil fé le bien toultan. Nou komèt bann fot, é nadfoi nou di oubien nou fé in nafèr ke lé mal. Kosa nou doi fé pou èt pardoné ? Nou doi vréman regrèt sak nou la fé. Avèk sa, nou doi pa mèt a nou su la oteur é demann Jéova pardonn a nou. Alor nou pe èt sur ke nout bann péché i sra pardoné (Kolosien 1:13, 14 ; 1 Jan 1:8, 9).

16. Kosa nou doi fé pou gingn in konsians klèr ?

¹⁶ Nou néna in konsians klèr. Kan nout konsians i di a nou ke nou la fé in mové zafèr, nou san a nou koupab. Défoi, nou pans mèm ke nou vo pa rien. Mé nou doi pa dékouraj a nou. Jéova i ve nou koz ansanm li nout bann poin fèb é nout bann problèm (Ébreu 4:14-16). Nou pe èt sur ke, si nou supli a li pou pardonn a nou, li va ékout a nou é li va pardonn a nou (Ébreu 9:13, 14). Nou pe alor èt an pé avèk Bondieu.

17. Gras la ranson, kèl bienfé nou pe ganié ?

¹⁷ Nou na léspoir viv pou toultan. « Le salèr péyé par le péché, sé la mor, mé le kado Bondieu i donn, sé la vi pou toultan par Kris Jézu » (Romin 6:23).  Kom Jézu lé mor pou nou, nou na léspoir viv pou toultan é gingn in santé parfé (Révélasion 21:3, 4). Mé kosa nou doi fé pou gingn bann bienfé la ?

18. Koman nou koné ke Jéova i ièm a nou ?

¹⁸ Kan i fé a nou in joli kado, sa i kontant vréman nout keur. La ranson na plus la valeur ke ninport kèl kado ke nou pe ganié. Donk, i frodré nou mont Jéova ke nou ièm bokou son kado. Jan 3:16 i di ke « Bondieu la tèlman émé le monn ke li la donn son seul Garson ». Jéova i ièm a nou tèlman ke li la donn a nou sak lavé plus la valeur pou li : son Garson. É kom Jézu lété paré pou mor pou nou, sa i mont ke li ièm a nou osi (Jan 15:13). La ranson i devré prouv a ou ke Jéova é Jézu i ièm a ou (Galat 2:20).

19, 20. a) Koman ou pe devnir kamarad Jéova ? b) Koman montré ke ou na la foi dan la ranson ?

¹⁹ Nou la aprann ke Jéova i ièm a nou in bonpe. Mé koman devnir son kamarad ? Lé pa fasil èm in moun ke nou koné pa. Jan 17:3 i di nou pe aprann konèt Jéova. Si ou aprann konèt a li, ou va èm a li ankor plu for, ou nora lanvi kontant son keur é ou va devnir son kamarad. Donk, kontinu étudié la Bib (1 Jan 5:3).

²⁰ Mèt out foi dan la ranson. La Bib i di ke « sak i mèt la foi dan le Garson na la vi pou toultan » (Jan 3:36). Kosa i ve dir « mèt la foi » dan la ranson ? Sa i ve dir fé sak Jézu i demann a nou (Jan 13:15). Fo pa rienk di èk la bouch ke nou kroi an Jézu. Nou doi  montré par nout bann zaksion ke nou na foi an li. Dann Jak 2:26, nou lir : « La foi san bann zaksion lé mor. »

21, 22. a) Pou kosa nou doi asis chak ané Mémoryal la mor Jézu ? b) Kosa nou va voir dann chapit 6 é 7 ?

²¹ Asis Mémoryal la mor Jézu. Jézu i ve ke nou rapèl a nou ke li la donn son vi parfé an ranson pou nou. Le soir avan li lé mor, li la di avèk son bann disip : « Kontinué fé sa an souvnir d’moin » (lir Luk 22:19). Sé sa mèm ke bann Témoin Jéova i fé tou lé zan. Zot i sélèb in lévènman ke i apèl « Mémoryal » ou « Repa le Sénieur » (1 Korintien 11:20 ; Matieu 26:26-28). Kan ou asis Mémoryal, ou mont ke ou na in gran léstim pou la ranson é le gran lamour ke Jéova é Jézu néna pou ou (regard la not n^o 16).

²² La poin in kado plu gran ke la ranson (2 Korintien 9:14, 15). Se kado ke na in gran valeur, va mèm aport bann bienfé pou domoun par milion ke lé mor. Bann chapit 6 é 7 va éspliké koman sa lé posib.