1, 2. (α) Σο ισί οντουβά σο κερέλα εκ δώρος τι τθερέλ αξία τούκε; (β) Σόσκε ισί ο λύτρος ο πιο μπαρό δώρος ι Ντεβλέσκο;

ΚΑΒΑ ισί ο πιο λατσσό δώρος σο λιντάν ποτές τι ζωγιάτε; Εκ δώρος να χρειαζίντιβελα τι αβέλ πααλίς για τι τθερέλ αξία τούκε. Όταν εκ δώρος κερέλα-τουτ χαρούμενος ή ισί κάτι σο τθερέσα ανάγκη, εκτιμίνεσα-λες.

² Σαρέ κατά δώρα σο ντινάς-αμέν ο Ντεβέλ, υπαρχίντιβελα εκ δώρος σο χρειαζίντιβασα-λες πιο μπουτ κατά γιαβερά πράγματα. Ισί ο πιο μπαρό δώρος σο ντινάς ο Ντεβέλ κο τζενέ. Ανταλέ κεφαλαιόστε, κα σικλιάς ότι ο Ιεχωβά μπουτσσαντάς πι Τσσαβές, ι Ιησού Χριστός, για τι μπορίνας αμέν τι τζουβντιάς για πάντα. (Διάβανε Ματθαίος 20:​28) Όταν μπουτσσαντάς ι Ιησούς κι πφουβ για τι ντελ πι ζωή σαρ λύτρος, ο Ιεχωβά σικαντάς ότι μανγκέλα-αμέν μπαγιά.

3. Σόσκε μερένα ο τζενέ;

³ Ο λύτρος ισί οντουβά σο ντινάς ο Ιεχωβά για τι ελευθερώνελ ι τζενέν κατά αμαρτία ντα κατά μεριπέ. (Εφεσίους 1:7) Για τι αγαβάς σόσκε τθεράας ανάγκη ο λύτρος, πρέπει τι σικλιάς σο αβιλό-πες πριν από μπουτ μπρεσά κο κήπος της Εδέμ. Αμαρό πρώτος ντατ ντα αμαρί πρώτη ντάι, ο Αδάμ ντα η Εύα, αμαρτιντέ. Επειδή αμαρτιντέ, μουλέ. Αμέν-ντα επίσης μεράσα επειδή κληρονομιντάμ ι αμαρτία κατά Αδάμ ντα κατά Εύα.​—Ντικχ ι Σημείωση 9 κο παλαϊνέ σελίδες.

4. Κον ισινέ ο Αδάμ, ντα σο τθερέλας;

 ⁴ Όταν ο Ιεχωβά κερντάς ι πρώτε μουρσές, τον Αδάμ, ντινάς-λες κάτι σο τθερέλας μπαρί αξία. Ντινάς-λες τέλεια ζωή. Ο Αδάμ τθερέλας τέλεια γκοντί ντα τέλειος σώμας. Ποτές να κα νασφάλιβελας, ποτές να κα πφουρίλιβελας ντα ποτές να κα μερέλας. Επειδή ο Ιεχωβά κερντάς τον Αδάμ, ισινέ σαρ ντατ λέσκε. (Λουκάς 3:​38) Ο Ιεχωβά κερέλας λέσαρ λάφι. Ο Ντεβέλ βακερντάς ξεκάθαρα κο Αδάμ σο μανγκέλας λέσταρ ντα ντινάς-λες εκ μπουτί σο μπεϊντίνελας-λα μπουτ.​—Γένεση 1:​28-30· 2:​16, 17.

5. Σο μανγκέλα τι σικαβέλ η Αγία Γραφή όταν βακερέλα ότι ο Ντεβέλ κερντάς τον Αδάμ «τι μοιάζελ λέστε»;

⁵ Ο Ντεβέλ κερντάς τον Αδάμ «τι μοιάζελ λέστε». (Γένεση 1:​27) Ο Ιεχωβά ντινάς-λες ο ίδιες ιδιότητες σο τθερέλα Βοβ, σαρ ισί η αγάπη, η σοφία, η δικαιοσύνη ντα η ζορ. Ντινάς κο Αδάμ ο δικαίωμας τι αποφασίνελ κορκορό σο κα κερέλ πι ζωγιάτε. Ο Αδάμ να ισινέ σαρ εκ ρομπότ, σαρ εκ μηχάνημας σο κερέλα-λες κουμάντος κάποιος γιαβέρ. Ο Ντεβέλ κερντάς-λες με τρόπος σο κα μπορίνελας τι τραμπίνελ οντουβά σο ισί σωστός ντα οντουβά σο ισί λάθος. Άμα ο Αδάμ κα τραμπίνελας τι ντελ καν ι Ντεβλές, κα μπορίνελας τι τζουβντιόλ για πάντα κο Παράδεισος.

6. Όταν ο Αδάμ να ντινάς καν ι Ντεβλές, σο χασαρντάς; Σαρ επηρεάνελα-αμέν ανταβά;

⁶ Όταν ο Αδάμ να ντινάς καν ι Ντεβλές, ο Ντεβέλ βακερντάς λέσκε σο τιμωρία κα τθερέλας. Οντιά τιμωρία να ισινέ σάντε τι μερέλ, αλλά επίσης κα χασαρέλας πι λατσσί φιλία ι Ιεχωβάσαρ, πι τέλεια ζωή ντα ο Παράδεισος. (Γένεση 3:​17-19) Ο Αδάμ ντα η Εύα τραμπιντέ μα τι ντεν καν ι Ντεβλές, οτθάρ να υπαρχίντιβελας καέκ ελπίδα λένγκε. Οντουλέσαρ σο κερντάς ο Αδάμ, «αβιλί η αμαρτία κο ντουνιάς ντα κατά αμαρτία ο μεριπέ, ντα αντικάς ο μεριπέ γκιλό σαρέ κο τζενέ, επειδή σαρέ αμαρτιντέας». (Ρωμαίους 5:​12) Όταν αμαρτιντάς ο Αδάμ, “μπικιντάς” πο  νεαυτός ντα ι τζενέν για τι αβέν δούλοι ι αμαρτιάκε ντα ι μεριμάσκε. (Ρωμαίους 7:​14) Υπαρχίντιβελα ελπίδα αμένγκε; Βα, υπαρχίντιβελα.

7, 8. Σο ισί ο λύτρος;

⁷ Σο ισί ο λύτρος; Η λέξη λύτρος μανγκέλα τι βακερέλ ντούι πράγματα. Πρώτον, ο λύτρος ισί οντουβά σο ντιντιόλα για τι ελευθερώντιβελ κάποιος ή για τι κιντιόλ ξανά κάτι. Δεύτερον, ο λύτρος ισί οντουβά σο ντιντιόλα για τι ποκίντιβελ εκ ζημιά ντα τθερέλα ι ίδια αξία οντουλέσαρ σο χασάρντιλο ή χαλάντιλο.

⁸ Καέκ τζενό να κα μπορίνελας τι ποκινέλ ι μπαρί ζημιά σο κερντάς ο Αδάμ όταν αμαρτιντάς ντα αντάς οπρ’ αμέντε ο μεριπέ. Αλλά ο Ιεχωβά αντάς ι λύση για τι ελευθερώνελ-αμέν κατά αμαρτία ντα κατά μεριπέ. Ακανά κα σικλιάς σαρ ντινάς ο Ιεχωβά ο λύτρος ντα σαρ μπορίνασα αμέν τι βοηθίντιβας λέσταρ.

9. Σαρ κα μπορίνελας τι ντιντιόλ ο λύτρος;

⁹ Καέκ αμένταρ να κα μπορίνελας ποτές τι ποκινέλ ο λύτρος ι τέλειε ζωγιάκε σο χασαρντάς ο Αδάμ. Σόσκε βακεράσα-λες ανταβά; Επειδή σαρέ ισινάμ ατελείς. (Ψαλμός 49:​7, 8) Ο λύτρος σο έπρεπε τι ντιντιόλ ισινέ η ζωή εκχέ γιαβερέ τέλειε τζενέσκι. Οτθάρ, βακέρντιβελα «λύτρος σο τθερέλα ι ίδια αξία οντουλέσαρ σο χασάρντιλο». (1 Τιμόθεο 2:6) Ο λύτρος έπρεπε τι τθερέλ ι ίδια αξία σο τθερέλας η ζωή σο χασαρντάς ο Αδάμ.

10. Σαρ ντινάς ο Ιεχωβά ο λύτρος;

¹⁰ Σαρ ντινάς ο Ιεχωβά ο λύτρος; Μπουτσσαντάς κι πφουβ πι πιο αγαπημέ Τσσαβές. Ο Τσσαβό οντουβά, ο Ιησούς, ισινέ ο πρώτος σο κερντάς ο Ντεβέλ. (1 Ιωάννη 4:9, 10) Ο Ιησούς δεχτιντάς αντράλ πι γκίσταρ τι μουκχέλ πι Νταντές ντα πο κχερ κο ουρανός. (Φιλιππησίους 2:7) Οτθάρ, ο Ιεχωβά μπουτσσαντάς ι Ιησούς κατά ουρανός κι  πφουβ, ντα ο Ιησούς μπιάντιλο σαρ τέλειος τζενό, χωρίς αμαρτία.​—Λουκάς 1:35.

11. Σαρ κα μπορίνελας εκ τζενό τι αβέλ λύτρος σαρέ ι τζενένγκε;

¹¹ Όταν ο πρώτος μουρς, ο Αδάμ, να ντινάς καν ι Ιεχωβάς, κερντάς σαρέ ι τζενέν τι χασαρέν ι ευκαιρία τι τθερέν τέλεια ζωή. Κα μπορίνελας εκ γιαβέρ τζενό τι νασκιαρέλ ο μεριπέ σαρέ κατά τσσαβέ του Αδάμ; Βα. (Διάβανε Ρωμαίους 5:​19) Ο Ιησούς, σο να αμαρτιντάς ποτές, ντινάς πι τέλεια ζωή σαρ λύτρος. (1 Κορινθίους 15:​45) Λέσκι τέλεια ζωή κα μπορίνελας τι ντιντιόλ για τι νασκιαρέλ ο μεριπέ σαρέ κατά τσσαβέ του Αδάμ.​—1 Κορινθίους 15:​21, 22.

12. Σόσκε έπρεπε τι τσσίντελ αζόμ δυσκολίες ο Ιησούς;

¹² Η Αγία Γραφή βακερέλα καζόμ βασανιντέ ι Ιησούς πριν τι μερέλ. Νταπλέ-λες μπουτ, καρφωντέ-λες εκχέ καστέστε, ντα έπρεπε τι τσσίντελ μπουτ ντουκχ ενώ μερέλας. (Ιωάννης 19:1, 16-18, 30) Σόσκε έπρεπε τι τσσίντελ αζόμ μπουτ ο Ιησούς; Επειδή ο Μπενγκ βακερντάς ότι καέκ τζενό να κα ατσσόλας πιστός κο Ντεβέλ άμα κα νακχέλας μπουτ προβλήματα. Ο Ιησούς σικαντάς ξεκάθαρα ότι εκ τέλειος τζενό μπορίνελα τι ατσσόλ πιστός κο Ντεβέλ ατζέ-ντα άμα νακχέλα ο πιο μπαρέ δυσκολίες. Σκέφτινε καζόμ περήφανος ισινέ ο Ιεχωβά ι Ιησούσκε!​—Παροιμίες 27:​11· ντικχ ι Σημείωση 15 κο παλαϊνέ σελίδες.

13. Σαρ ντιντιλό ο λύτρος;

¹³ Σαρ ντιντιλό ο λύτρος; Κο μπρες 33, κο ντιβές 14 Νισάν κο Ιουδαϊκός ημερολόγιος, ο Ιεχωβά μουκχλάς ι Ιησούσκε ντουσμανίν τι μουνταρέν-λες. (Εβραίους 10:​10) Τριν ντιβεσά μετά ανταλέσταρ, ο Ιεχωβά αναστιντάς ι Ιησούς, όχι σαρ τζενό, αλλά με πνευματικός σώμας. Πιο σοράν, όταν ο Ιησούς γκιλό πάλι πι Νταντέστε κο ουρανός, αντάς ανγκλάλ κο Ιεχωβά σαρ λύτρος ι αξία σο τθερέλας λέσκι τέλεια ζωή σαρ τζενό. Γιαβερέ λαφίντζαρ, ντινάς κο Ντεβέλ ο δικαίωμας σο τθερέλας τι τζουβντιόλ σαρ τέλειος τζενό κι πφουβ, για τι μπορίνελ σοράν ο Ντεβέλ  τι ντελ-λες κο προσάγγονα του Αδάμ. (Εβραίους 9:​24) Ο Ιεχωβά χρησιμοποιηντάς οντουβά λύτρος για τι τθεράς ι ευκαιρία τι ελευθερώντιβας κατά αμαρτία ντα κατά μεριπέ.​—Διάβανε Ρωμαίους 3:​23, 24.

14, 15. Σο πρέπει τι κεράς για τι συγχωρίντιβεν αμαρέ αμαρτίες;

¹⁴ Ατζέ-ντα ακανά βοηθίντιβασα κατά πιο μπαρό δώρος σο ντινάς-αμέν ο Ντεβέλ. Για τι ντικχάς σαρ βοηθίντιβασα ακανά ντα σαρ κα βοηθίντιβας κο μέλλον.

¹⁵ Συγχωρίντιβενα αμαρέ αμαρτίες. Ισί δύσκολος τι κεράς συνέχεια ο σωστός. Κεράσα λάθη ντα μερικές φορές βακεράσα ντα κεράσα οντουβά σο νανέ σωστός. (Κολοσσαείς 1:​13, 14) Σαρ κα συγχωρίντιβεν αμαρέ αμαρτίες; Πρέπει τι μετανιώνας μπαγιά για το λάθη σο κερντάμ ντα τι μανγκάς ταπεινά κατά Ιεχωβά τι συγχωρίνελ-αμέν. Αντικάς μπορίνασα τι αβάς σίγουροι ότι ο Ιεχωβά συγχωριντάς αμαρέ αμαρτίες.​—1 Ιωάννη 1:8, 9.

16. Σο πρέπει τι κεράς για τι τθεράς πάκι συνείδηση;

¹⁶ Μπορίνασα τι τθεράς πάκι συνείδηση. Άμα αμαρί συνείδηση βακερέλα αμένγκε ότι κερντάμ κάτι λάθος, τθεράσα τύψεις ντα μπορεί τι πακιάσα ότι να υπαρχίντιβελα ελπίδα αμένγκε, ότι ισινάμ άχρηστοι. Αλλά δεν πρέπει τι μουκχάς ι προσπάθεια. Άμα μολίνασα ι Ιεχωβάς τι συγχωρίνελ-αμέν, μπορίνασα τι αβάς σίγουροι ότι βοβ κα ασουνέλ-αμέν ντα κα συγχωρίνελ-αμέν. (Εβραίους 9:​13, 14) Ο Ιεχωβά μανγκέλα τι βακεράς λέσκε σαρέ ο προβλήματα σο τθεράσα ντα ο λάθη σο κεράσα. (Εβραίους 4:​14-16) Άμα κα κεράς-λες ανταβά, κα τθεράς ειρήνη ι Ντεβλέσαρ.

17. Καλά ευλογίες μπορίνασα τι τθεράς επειδή ο Ιησούς μουλό αμένγκε;

¹⁷ Τθεράσα ι ελπίδα τι τζουβντιάς για πάντα. «Η αμαρτία ανέλα ο μεριπέ, αλλά ο δώρος σο ντέλα ο Ντεβέλ ισί τι τζουβντιάς για πάντα αντράλ κατά Ιησούς Χριστός, σο ισί αμαρό Κύριος». (Ρωμαίους 6:​23) Επειδή ο Ιησούς  μουλό αμένγκε, μπορίνασα τι τζουβντιάς για πάντα ντα μα τι νασφάλιβας ποτές. (Αποκάλυψη 21:3, 4) Αλλά σο πρέπει τι κεράς για τι τθεράς ανταλά ευλογίες;

18. Σαρ τζανάσα ότι ο Ιεχωβά μανγκέλα-αμέν;

¹⁸ Σκέφτινε καζόμ συγκινίντιβεσα όταν κάποιος ντέλα-τουτ εκ σουκάρ δώρος. Ο λύτρος ισί ο πιο σημαντικός σαρέ κατά γιαβερά δώρα, ντα πρέπει τι ευχαριστίνας ι Ιεχωβάς ανταλέσκε αντράλ αμαρέ γκίσταρ. Ο εδάφιος Ιωάννης 3:​16 βακερέλα αμένγκε ότι «ο Ντεβέλ μανγκλάς αζόμ μπουτ ι ντουνιάς, σο ντινάς πι μοναδικέ Τσσαβές». Βα, ο Ιεχωβά μανγκέλα-αμέν αζόμ μπουτ σο ντινάς αμένγκε πι αγαπημέ Τσσαβές, ι Ιησούς. Τζανάσα ότι ο Ιησούς-ντα μανγκέλα-αμέν, επειδή δεχτιντάς τι μερέλ αμένγκε. (Ιωάννης 15:​13) Ανταβά δώρος, ο λύτρος, πρέπει τι κερέλ-τουτ τι αβές σίγουρος ότι ο Ιεχωβά ντα ο Ιησούς μανγκένα-τουτ μπαγιά.​—Γαλάτες 2:20.

19, 20. (α) Σαρ μπορίνεσα τι αβές αμάλ ι Ιεχωβάσκο; (β) Σαρ μπορίνεσα τι σικαβές ότι δεχτίνεσα ι θυσία ι Ιησούσκι;

¹⁹ Ακανά σο σικλιλάν ότι ο Ντεβέλ μανγκέλα-τουτ μπουτ, σαρ μπορίνεσα τι αβές λέσκο αμάλ; Νανέ εύκολος τι μανγκές κάποιον σο να τζανέσα-λες. Ο εδάφιος Ιωάννης 17:3 βακερέλα ότι μπορίνασα τι σικλιάς ι Ιεχωβάσκε. Καζόμ κα κερές-λες ανταβά, η αγάπη σο τθερέσα λέσκε κα αβέλ ατζέκ πιο μπαρί, κα μανγκές τι ευχαριστίνες-λες ντα κα αβές λέσκο αμάλ. Οτθάρ, συνέχινε τι διαβάνες ι Γραφή, σόσκε αντικάς κα σικλιός ι Ιεχωβάσκε.​—1 Ιωάννη 5:3.

²⁰ Δέχτινε ι θυσία ι Ιησούσκι. Η Γραφή βακερέλα ότι «οντουβά σο πακιάλα κο Τσσαβό τζουβντιόλα για πάντα». (Ιωάννης 3:​36) Σο μανγκέλα τι βακερέλ τι πακιάς κο Ιησούς; Ανταβά μανγκέλα τι βακερέλ τι κεράς οντουλά σο σικλιαρντάς-αμέν. (Ιωάννης 13:​15) Να ερεσέλα σάντε τι βακεράς ότι πακιάσα κο Ιησούς. Για τι δεχτίνας ο  λύτρος, πρέπει τι κεράς πράγματα σο σικαβένα αμαρί πίστη. Κο εδάφιος Ιακώβου 2:​26, διαβάνασα: «Η πίστη . . . χωρίς τι κερέλ λατσσέ πράγματα ισί μουλί».

21, 22. (α) Σόσκε πρέπει τι τζας κι Ανάμνηση κάθε μπρες; (β) Σο κα ντικχάς κο Κεφάλαια 6 ντα 7;

²¹ Τι τζας κι Ανάμνηση για τι ντες-τουτ γκοντί ο μεριπέ ι Χριστόσκο. Ι τελευταία ιράτ πριν τι μερέλ ο Ιησούς, σικλιαρντάς-αμέν ότι πρέπει τι κεράς κάτι για τι ντας-αμέν γκοντί λέσκο μεριπέ. Ανταβά κεράσα-λες κάθε μπρες ντα βακέρντιβελα Ανάμνηση, ή γιαβέρτουλους «ο δείπνος ι Κυριόσκο». (1 Κορινθίους 11:​20· Ματθαίος 26:​26-28) Ο Ιησούς μανγκέλα τι ντας-αμέν γκοντί ότι ντινάς πι τέλεια ζωή σαρ λύτρος αμένγκε. Βοβ βακερντάς: «Συνεχίνεν τι κερέν-λες ανταβά για τι ντεν-τουμέν γκοντί μαν». (Διάβανε Λουκάς 22:​19) Όταν τζάσα κι Ανάμνηση, σικαβέσα ότι ντέσα-τουτ γκοντί ο λύτρος ντα ι μπαρί αγάπη σο τθερένα ο Ιεχωβά ντα ο Ιησούς αμένγκε.​—Ντικχ ι Σημείωση 16 κο παλαϊνέ σελίδες.

²² Ο λύτρος ισί ο πιο μπαρό δώρος σο κα μπορίναας τι λας. (2 Κορινθίους 9:​14, 15) Ανταβά σημαντικός δώρος κα βοηθίνελ ατζέ-ντα εκατομμύρια τζενέν σο μουλέ. Κο Κεφάλαια 6 ντα 7 κα ντικχάς σαρ μπορίνελα τι αβέλ-πες ανταβά.