1–2. a) Sostar si kuch tuke variso, so den tut? b) Sostar si tuke o parujimo o majkuch kathar o Del?

SO SI o majkuch tuke, so dine tut? So den tu, na kathar kodo avla kuch, ke but love kerel. Kana lossh del tut, vaj zurales trubul tut, atunchi andar tyo jilo najisis les.

² O Del but das amen, de si jekh, so majfeder trubul amen, sar le majbut kaver. Kado si o majkuch, so o Del das le manushenge. Andar kado kotor shaj zhanas, ke o Jehova bishaldas peske Shaves, le Jezush Kristushes, ame kade te trajinas, te na meras. (Ginav: Mate 20:28!) Kodolesa ke bishaldas peske Shaves pe phuv, kothe te del pesko trajo, sar parujimo, o Jehova sikadas, ke zurales kamel amen.

3. Sostar meren le manusha?

³ O Jehova le parujimasa slobodisarel le manushen kathar o bezex, thaj kathar o meripe (Efezush 1:7). Te hatyaras, sostar trubundas o parujimo, trubul te zhanas, so pelas but ezera bershenca majanglal ando Edeno. O Adam, thaj e Eva bezex kerde, anda kado mule. Vi ame meras, ke von bezex dine perdal amenge. (Dikh: Informaciovo 9, Bezex.)

4. Kon sas o Adam, thaj so das les o Del?

⁴ Kana o Jehova kerdas le anglune manushes, le Adames, variso baro das les: bidoshako trajo. Bidoshako sas, zhi kathar pesko shero, zhi kaj pesko punro, thaj vi  leski godyi bidoshaki sas. Soha chi trubundo te nasvajvel, te phurol, thaj te merel. Ke o Jehova kerdas le Adames, anda kado kasavo sas leske, sar lesko dad (Lukach 3:38). O Jehova butivar vorbilas lesa. Uzhes phendas, ke so zhukarel lestar, thaj lashi butyi das les (1Mozesh 1:28–30; 2:16, 17).

5. So sikavel, ke o Adam kade sas kerdo, te cirdel po Del?

⁵ O Adam kade sas kerdo, te cirdel po Del (1Mozesh 1:27). Kade kerdas les o Jehova, kasavo t’avel sar voj. Vi ande leste t’avel kamipo, godyaveripo, chachipo, thaj zor. Thaj vi slobodipe das le Adames, ke nas roboto. Kade sas kerdo, te zhanel, so kamel te kerel, o lasho, vaj o nasul. Muj te patyando le Devleske, kade shaj trajindo, te na merel.

6. Soski ahor potyindas o Adam, anda kodo, ke chi patyandas muj? Sar resel amen kado?

⁶ Ke o Adam chi patyandas le Devlesko muj, anda kadi trubundas te merel, thaj kadalasa but xasardas. Pala kado, aba nas le Jehovasko drago amal, xasardas pesko bidoshako trajo, thaj pesko shukar than, kaj beshelas (1Mozesh 3:17–19). Ke o Adam thaj e Eva chi patyande muj le Devleske, chi zhukardas pe lende khanchi lasho. So o Adam kerdas kodolesa „avilas andre ande luma o bezex, thaj le bezexesa o meripo, thaj kade o meripo pe sakone manusheste perdal gelas, ke sakono bezex kerdas” (Roma 5:12). Kana o Adam bezex kerdas, vi amen, thaj vi pes bikindas te avas le bezexake, thaj le merimaske slugi (Roma 7:14). De chi ame nashtig zhukaras khanchi lasho? Nichi!

7–8. So si o parujimo?

⁷ So si o parujimo? Duj butya xutyilel kethane. O parujimo anglunes kodi ahor si, so anda kodo potyinen,  varikas slobodo te mukhen, vaj variso palpale te kinen. O dujto kodi ahor si, kana avri potyinen jekh dosh, kana varikon dosh kerdas.

⁸ Chi jekh manush chi zhanel te potyinel kodi bari dosh, so o Adam kerdas kodolesa, ke bezex kerdas, thaj meripo andas pe amende. O Jehova grizhindas pe kodo, te shaj slobodisajvas kathar o bezex, thaj kathar o meripo. Dikhas, sar sas avri potyindo o parujimo, thaj sar shaj avla amenge majlasho.

9. Sosko parujimo trubundas?

⁹ Mashkar amende khonyik chi zhanelas avri te potyinel o parujimo, anda bidoshako trajo, so o Adam xasardas. Sostar? Ke savorazhene doshale sam (Asharimata 49:7, 8). Jekh kaver manushesko trajo trubundas parujimaske, so bidoshako sas. Anda kado phenen, ke kado jekh si kodolesa, thaj lasho parujimo si (1Timoteus 2:6). Jekh kasavo kuch trajo trubundas, sar so o Adam xasardas.

10. Sar grizhindas o Jehova pa parujimo?

¹⁰ Sar grizhindas o Jehova pa parujimo? Bishaldas peske majdrago Shaves pe phuv. Kado Shavo o Jezush sas, kas majanglunes kerdas (1Janosh 4:9, 10). Gata sas kothe te mukhel peske Dades thaj o cheri, kaj so beshelas (Filippi 2:7). O Jehova perdal shutas le Jezushesko trajo andar o cheri pe phuv, thaj kothe sar bidoshako manush kerdyilas (Lukach 1:35).

11. Sar das jekh manush parujimo anda sakoneste?

¹¹ Anda kodo, ke o angluno manush, o Adam, chi patyandas le Jehovasko muj, kade chi jekh manush naj bidoshako. Si kasavo manush, kon shaj zhutilas le Adameske  shavoren, te na trubul te meren? Ova. (Ginav: Roma 5:19!) O Jezush, kon soha na kerdas bezex, kothe das pesko bidoshako trajo (1Korintus 15:45). Anda kado, le Adameske intregi shavora shaj muntunpe kathar o meripo (1Korintus 15:21, 22).

12. Sostar trubundas le Jezushes but dukha t’aven?

¹² E Biblia tele iskiril, ke le Jezushes bare dukha sas angla pesko meripo. Zurales marde les chunyasa, po kasht kecinde les, thaj lokhes, dukhasa trubundas te merel (Janosh 19:1, 16–18, 30). Sostar trubundas kasave but dukha t’aven les? Anda kodo, ke o Beng kodo tordyardas, ke chi jekh manush, chi avla patyivalo karing o Del, kana zurales zumado si. O Jezush andre sikadas, ke jekh bidoshako manush, inke vi atunchi shaj avel patyivalo karing o Del, kana zhi po agor zumaven les. Gindin, o Jehova che barimango shaj sas po Jezush! (Godyaver Vorbi 27:11; dikh: Informaciovo 15, Trushul.)

13. Sar sas avri potyindo o parujimo?

¹³ Sar sas avri potyindo o parujimo? Pala Kristush, ando 33, sar e biboldengo kalendariumo ando nisan shon 14 dyes o Jehova mukhlas le Jezusheske xojardenge te mudaren les (Heberenge 10:10). Po trito dyes o Jehova opre ushtyardas le Jezushes, de aba na sar manush te trajil, kade sar duxo. O Jezush palpale gelas ando cheri pasha o Del, andre te sikavel, ke tele potyindas o parujimo (Heberenge 9:24). O Del jekh hatyardas kodolesa, ke o Jezush kothe das pesko trajo. Anda kodo, ke avri potyindas o parujimo, drom puterdas, te slobodisajvas kathar o bezex, thaj kathar o meripo. (Ginav: Roma 3:23, 24!)

14–15. So trubul te keras, ke o Del te jertil amare bezexa?

¹⁴ Aba akanak lashoj amenge o majkuch, so o Del das amen. Dikhas, soske but lashimata del amen vi akanak, thaj vi majdur.

¹⁵ O Del jertisarel amare bezexa. Pharo si, mindig kodo te keras, so lashoj. Dosha keras, unyivar phenas, thaj keras kasave, so nasul si (Kolosse 1:13, 14). So trubul te keras, o Del te jertisarel amare bezexa? Andar amaro jilo trubul te sununas kana nasul kerdam, thaj tele trubul te bandyuvas angla o Jehova, jertimo te mangas. Kade te keras, shaj patyas, ke o Del jertil amare bezexa (1Janosh 1:8, 9).

16. So trubul te keras, uzho t’avel amaro jilo?

¹⁶ Uzhe jilesa zhanas angla o Del te ashas. Kana amaro jilo sikavel, ke variso nasul kerdam, doshaleske shaj hatyaras amen, shajke kodo gindinas, ke chi sam lashe pe khancheste. De naj slobodo opre te das! Kana andar amaro jilo zurales rudyinas karing o Jehova te jertil amenge, voj shunel amen, thaj vi jertila (Heberenge 9:13, 14). O Jehova kodo kamel, pa amare sako gindura thaj pa amare kovlimata te vorbinas lesa (Heberenge 4:14–16). Kadal sa trubun pasha kodo, ande pacha t’avas lesa.

17. So shaj avel amaro, ke o Jezush mulas anda amende?

¹⁷ Chi trubul te meras. „Ke le bezexesko potyinipo o meripo si, de so o Del jive del, trajo so chi nachola, anda o Jezush Kristush anda amaro Raj” (Roma 6:23). Anda kodo, ke o Jezush pesko trajo das anda amende, biagoresko, thaj sasto trajo shaj avel amen (Sikadyimaski 21:3, 4). De so trubul te keras, te shaj resas kado?

18. Kathar zhanas, ke o Jehova kamel amen?

¹⁸ Gindin pe kodo, kabor lossh del, kana varikon variso shukar del tut! O parujimo o majkuch si, so o Del das, thaj zurales trubul te najisaras les le Jehovaske. O Janosh 3:16 kodo phenel, ke „o Del kade kamelas e luma, ke peske Shaves das”. Chaches, o Jehova kade kamel amen, ke kothe das peske majdrage Shaves, le Jezushes anda amende. Thaj zhanas, ke vi o Jezush kamel amen, ke gata sas, te merel anda amende (Janosh 15:13). So o Jehova das, o parujimo, sikavel, ke o Jehova thaj o Jezush chaches kamen tut (Galacia 2:20).

19–20. a) Sar shaj aves le Jehovasko amal? b) Sar shaj sikaves, ke kuch si tuke o parujimo?

¹⁹ Akanak, ke zhanglan, sar kamel tut o Del, shajke palpale kames te des lesko kamipo. De pasha kodo, te kames varikas, thaj lesko amal t’aves majanglal trubul te pinzhares les. O Janosh 17:3 kodo iskiril, ke shaj pinzhares le Jehovas. Majbut te zhanesa pa leste, majfeder kamesa les. Lossh kamesa te keres leske, thaj lesko amal kamesa t’aves. Sityuv e Biblia, majfeder te pinzhares le Jehovas (1Janosh 5:3).

²⁰ T’avel tuke kuch le Jezushesko parujimo. E Biblia kado phenel: „Kon patyal ando Shavo, kodo chi merel” (Janosh 3:36). So sikavel, ke patyas ando Shavo? Ke kodo keras, pe soste o Jezush sityardas amen (Janosh 13:15). Naj dosta feri te phenas, ke patyas ando Jezush. Avri si te sikavas amaro patyajimo. Sar o Jakab 2:26 phenel: „o patyamo muloj, te na keresa khanchi”.

21–22. a) Sostar t’avas kothe sako bersh pe le Jezushesko meripesko dyes? b) Pe soste avla vorba ando 6. thaj 7. kotor?

 ²¹ Av kothe pe le Jezushesko meripesko dyes. Angla peski paluni ratyi o Jezush kodo phendas, te gindinas palpale pa lesko meripo. Ande sako bersh kade keras, thaj kado baro dyes le Jezusheske meripeske dyeseske vaj le Rajeske ratyake phenas (1Korintus 11:20; Mate 26:26–28). O Jezush kodo kamel, te gindinas palpale pe kodo, ke parudas pesko bidoshako trajo anda amende. Kado phendas: „Majdur kado te keren, kana pe muro meripo gindinen.” (Ginav: Lukach 22:19!) Vi tu kothe te avesa pe kado baro dyes, kodolesa avri sikaves, ke chi bistres o parujimo, thaj kodo, ke sar kamel amen o Jehova thaj o Jezush. (Dikh: Informaciovo 16, Le Jezushesko meripesko dyes.)

²² O parujimo o majkuch si, so dine ame ando trajo (2Korintus 9:14, 15). Kado inke vi kodole bute milliovura manushenge lasho avla, kon aba mule. Ando 6. thaj 7. kotor avri sikadyola, ke sar.