1, 2. (a) Nyen la asara si mbeni cadeau ayeke kota na lê ti mo? (b) Ngbanga ti nyen la ye so a futa ti zi azo ayeke kota cadeau so Nzapa amû na e?

CADEAU wa la mbeni zo amû na mo so ayeke kota mingi na lê ti mo? A yeke pëpe ngere ti mbeni cadeau la asara si ayeke kota na lê ti mo. Tongana mbeni cadeau azia ngia na bê ti mo wala ayeke mbeni ye so mo yeke na bezoin ni, mo yeke kiri singila ndali ni.

² Na popo ti acadeau kue so Nzapa amû na e, mbeni ayeke dä so e yeke na bezoin ni mingi ahon atanga ni. A yeke kota cadeau so Nzapa amû na e azo. Na yâ ti chapitre so, e yeke manda so Jéhovah atokua lani Molenge ti lo, Jésus Christ, tongaso si e lingbi ti ngbâ na fini lakue lakue. (Diko Matthieu 20:28.) So Jéhovah atokua Jésus na sese tongana ye so a futa ti zi azo, lo fa so lo ye e mingi.

3. Azo ayeke kui ngbanga ti nyen?

³ Ye so a futa ti zi azo ayeke ye so Jéhovah amû ti zi azo na gbe ti siokpari nga na kuâ (aÉphésien 1:7). Ti hinga ndani so e yeke lani na bezoin ti ye so a futa ti zi azo, a lingbi e hinga ye so asi na yaka ti Éden a sara angu saki mingi awe. Kozo babâ ti e Adam na kozo mama ti e Ève asara lani siokpari. Ndali ti so ala sara siokpari, ala kui. E nga kue e yeke kui ndali ti so e wara siokpari ti Adam na Ève.​—Bâ Kete tënë 9.

4. Adam ayeke lani zo wa? Tongana Jéhovah asara lo lani, lo yeke tongana nyen?

 ⁴ Na ngoi so Jéhovah asara kozo koli, Adam, lo mû na lo mbeni ye ti ngangu ngere. Lo sara Adam mbilimbili-kue. Apensé ti lo nga na terê ti lo ayeke lani mbilimbili-kue. Lo lingbi lani lâ oko pëpe ti tï kobela, ti ga mbakoro wala ti kui. Ndali ti so Jéhovah la asara Adam, lo yeke tongana babâ ti lo (Luc 3:38). Jéhovah ayeke sara lani lisoro na lo lakue. Nzapa afa na Adam polele ye so lo ye ti tene lo sara, nga lo mû na lo mbeni pendere kua ti sara.​—Genèse 1:28-30; 2:16, 17.

5. Tongana Bible atene so Nzapa asara Adam “na image ti lo wani,” a ye ti tene nyen?

⁵ Nzapa asara lani Adam “na image ti lo wani”. (Genèse 1:27). Jéhovah amû na Adam asarango ye so lo wani lo yeke na ni, so na popo ni a yeke wara ndoye, ndara, mbilimbili nga na ngangu. Lo mû na lo liberté ti soro ye. Lo yeke pëpe tongana mbeni masini so asara gï ye so a leke ni ti sara ni. Nzapa asara Adam na fason so lo lingbi ti soro ti sara ye so ayeke nzoni wala sioni. Tongana Adam asoro lani ti mä yanga ti Nzapa, lo lingbi ti ngbâ na fini lakue lakue na yâ ti Paradis.

6. Na ngoi so Adam ake yanga ti Nzapa, aye wa la lo girisa ni? A ndu e tongana nyen?

⁶ Na ngoi so Adam ake yanga ti Nzapa, nga Nzapa adë ngbanga ti kuâ na li ti lo, Adam agirisa aye mingi. Lo girisa songo ti lo na Jéhovah so ayeke nde, lo yeke mbilimbili-kue encore ape nga lo girisa ndo ti lo na Paradis (Genèse 3:17-19). Adam na Ève asoro ti ke yanga ti Nzapa, tongaso mbeni beku ndali ti ala ayeke dä pëpe. Ndali ti ye so Adam asara, “siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.” (aRomain 5:12). Na ngoi so Adam asara siokpari,  lo “kä” lo wani na e kue na siokpari nga na kuâ tongana angbâa (aRomain 7:14). Mbeni beku ayeke dä ndali ti e? En.

7, 8. Ye so a futa ti zi azo aye ti sara tënë ti nyen?

⁷ Ye so a futa ti zi azo aye ti sara tënë ti nyen? A ye mbilimbili ti sara tënë ti aye use. Kozo ni, a ye ti sara tënë ti ye so a futa ti zi mbeni zo wala ti kiri ti vo mbeni ye. Use ni, a ye ti sara tënë ti ye so a mû, wala so a futa ndali ti mbeni ye so abuba.

⁸ Mbeni zo ti sese alingbi pëpe ti futa ye ndali ti kota ye so Adam abuba na ngoi so lo sara siokpari na lo ga na kuâ na ndö ti e. Me Jéhovah azi lege na e ti sigi na gbe ti siokpari na kuâ. Zia e bâ ambeni nzene nzene ye na ndö ti ye so a futa ti zi azo nga tongana nyen la e lingbi ti wara aye ti nzoni na lege ni.

9. Tongana nyen la a lingbi lani ti futa ye ti zi azo?

⁹ Zo oko na popo ti e alingbi ti futa mbeni ye na Nzapa ndali ti fini so ayeke mbilimbili-kue so Adam agirisa ni lani so pëpe. Ngbanga ti nyen? E kue e yeke mbilimbili-kue pëpe (Psaume 49:7, 8). A lingbi ye so a futa ti zi azo aduti fini ti mbeni zo so ayeke mbilimbili-kue. Ndani la a iri ni “ye so alingbi na ni so a futa ti zi azo”. (1 Timothée 2:6). A lingbi ye so a futa ti zi azo alingbi na fini so Adam agirisa ni lani.

10. Tongana nyen la Jéhovah amû ye so a futa ti zi azo?

¹⁰ Tongana nyen la Jéhovah amû ye so a futa ti zi azo? Jéhovah atokua lani na sese Molenge ti lo so lo ye lo mingi. Molenge ni so, Jésus, ayeke lani kozo ye so lo leke (1 Jean 4:9, 10). Jésus ayeda lani ti zia Babâ ti lo nga na ndo ti lo na yayu (aPhilippien 2:7). Jéhovah amû fini ti Jésus na yayu kâ lo tokua ni na sese na a dü lo tongana mbeni zo so  ayeke mbilimbili-kue so siokpari ayeke na terê ti lo pëpe.​—Luc 1:35.

11. Tongana nyen la zo oko alingbi ti duti ye so a futa ti zi azo kue?

¹¹ Na ngoi so kozo koli, Adam, ake yanga ti Jéhovah, lo sara si azo kue agirisa fini so ayeke mbilimbili-kue. Mbeni zo alingbi ti zi kuâ na ndö ti amolenge ti Adam kue? En. (Diko aRomain 5:19.) Jésus, so asara siokpari lâ oko pëpe, amû lani fini ti lo so ayeke mbilimbili-kue tongana ye so afuta ti zi azo (1 aCorinthien 15:45). A lingbi ti sara kua na fini ti lo so ayeke mbilimbili-kue ti zi kuâ na ndö ti amolenge ti Adam kue.​—1 aCorinthien 15:21, 22.

12. Ngbanga ti nyen la a lingbi Jésus abâ pasi mingi tongaso?

¹² Bible afa tongana nyen la Jésus abâ lani pasi mingi kozo si lo kui. A pika lo na zaza sioni, a pika lo na pointe na ndö ti keke nga a lingbi lo gbu ngangu ti gue yeke yeke ti kui mbeni kuâ ti ngangu (Jean 19:1, 16-18, 30). Ngbanga ti nyen la a lingbi Jésus abâ pasi mingi tongaso? Ngbanga ti so Satan atene lani so zo oko ayeke ngbâ be-ta-zo pëpe na Nzapa na gbe ti ngangu tara. Jésus afa so mbeni zo so ayeke mbilimbili-kue alingbi ti ngbâ be-ta-zo na Nzapa même tongana lo bâ pasi ngangu. Tara ti bâ tongana nyen la bê ti Jéhovah anzere na Jésus lani.​—aProverbe 27:11; bâ Kete tënë 15.

13. A mû lani ye so a futa ti zi azo tongana nyen?

¹³ A mû lani ye so a futa ti zi azo tongana nyen? Na lango 14 ti Nisan, ngu 33 na calendrier ti aJuif, Jéhovah azia lege na awato ti Jésus ti fâ lo (aHébreu 10:10). Lango ota na pekoni, Jéhovah akiri na Jésus na fini, tongana zo ti mitele pëpe, me tongana zo ti yingo. Ye oko, Jésus ayeke lani lakue na droit ti ngbâ na ndö ti sese tongana zo ti mitele so ayeke mbilimbili-kue. Me na ngoi so Jésus akiri na terê ti Babâ ti lo na yayu, lo kiri na droit so na Nzapa tongaso si Nzapa alingbi ti sara kua na ni ti kiri ti vo ahale ti Adam  (aHébreu 9:24). Jéhovah ayeda na ye so Jésus afuta ti zi azo, ni la e yeke na pasa ti tene a zi e na gbe ti siokpari na kuâ.​—Diko aRomain 3:23, 24.

14, 15. Nyen la a lingbi e sara ti tene a pardonné asiokpari ti e?

¹⁴ E wara ye ti nzoni awe na lege ti kota cadeau so Nzapa amû. Zia e bâ tongana nyen la e yeke wara ye ti nzoni na lege ni laso nga kekereke.

¹⁵ A pardonné asiokpari ti e. A yeke ngangu ti sara ye lakue na lege ni. E yeke sara afaute nga na ambeni ngoi e yeke tene sioni tënë nga e yeke sara mbeni sioni ye (aColossien 1:13, 14). A lingbi ti pardonné e tongana nyen? A lingbi e sara vundu ndali ti sioni ye so e sara nga e sara terê ti e kete ti hunda Jéhovah ti pardonné e. Na pekoni, e lingbi ti duti na confiance so a pardonné siokpari ti e awe.​—1 Jean 1:8, 9.

16. Nyen la a lingbi e sara ti duti na nzoni conscience?

¹⁶ E lingbi ti duti na nzoni conscience. Tongana conscience ti e atene na e so e sara mbeni sioni ye, e yeke bâ so tënë ayeke na li ti e, peut-être e yeke bâ même so mbeni ye ti sarango ni ndali ti e ayeke dä pëpe nga e yeke ye oko pëpe. Me a lingbi bê ti e anze pëpe. Tongana e hunda Jéhovah ti pardonné e, kite ayeke dä pëpe so lo yeke mä e nga lo yeke pardonné e (aHébreu 9:13, 14). Jéhovah aye ti tene e sara tënë ti akpale ti e nga na afaute ti e kue na lo (aHébreu 4:14-16). Ye so ayeke sara si e lingbi ti duti na siriri na Nzapa.

17. Aye ti nzoni wa la e lingbi ti wara ndali ti so Jésus akui teti e?

¹⁷ E yeke na beku ti duti na fini lakue lakue. “Futa ti peko ti siokpari ayeke kuâ, me matabisi so Nzapa amû ayeke fini ti lakue lakue na lege ti Christ Jésus Seigneur ti e.”  (aRomain 6:23). Ndali ti so Jésus akui ndali ti e, e lingbi ti duti na fini lakue lakue nga na seni so ayeke mbilimbili-kue (Apocalypse 21:3, 4). Me nyen la a lingbi e sara ti wara aye ti nzoni so kue?

18. E hinga tongana nyen so Jéhovah aye e?

¹⁸ Gbu li ti mo na ndö ti fason so mbeni pendere cadeau so mbeni zo amû na mo andu bê ti mo. Ye so a futa ti zi azo ayeke cadeau so ayeke kota ahon acadeau kue, na a lingbi e kiri singila mingi na Jéhovah ndali ni. Jean 3:16 atene: “Nzapa andoye tâ azo ti dunia so mingi si lo mû gï oko Molenge ti lo.” Biani, Jéhovah aye e mingi la si lo mû Molenge ti lo, Jésus, so lo ye lo mingi ndali ti e. E hinga nga so Jésus aye e mingi ndani la lo yeda ti kui ndali ti e (Jean 15:13). A lingbi mo hinga so ye so a futa ti zi azo, so ayeke mbeni cadeau, afa so Jéhovah na Jésus aye mo mingi.​—aGalate 2:20.

19, 20. (a) Mo lingbi ti ga kamarade ti Jéhovah tongana nyen? (b) Tongana nyen la mo lingbi ti fa so mo mä na bê na ye so Jésus afuta ti zi azo?

¹⁹ So fadeso mo manda ye na ndö ti kota ndoye ti Jéhovah awe so, tongana nyen la mo lingbi ti ga kamarade ti lo? A yeke ngangu ti tene mo ye mbeni zo so mo hinga lo pëpe. Jean 17:3 atene so e lingbi ti hinga Jéhovah. Tongana mo sara ni mo yeke ye lo mingi, mo yeke ye ti zia ngia na bê ti lo nga mo yeke ga kamarade ti lo. Tongaso, ngbâ ti manda ye na ndö ti Jéhovah na lege ti mandango Bible.​—1 Jean 5:3.

²⁰ Mä na bê na ye so Jésus afuta ti zi azo. Bible atene so “zo so amä na bê na Molenge ni ayeke na fini ti lakue lakue.” (Jean 3:36). Tënë so aye ti tene nyen? A ye ti tene ti sara ye so Jésus afa na e ti sara (Jean 13:15). E lingbi gï pëpe ti tene na yanga so e mä na bê na Jésus. Ti mä na bê na ye so  a futa ti zi azo a lingbi e sara ye alingbi na mabe ti e. Jacques 2:26 atene: “Mabe so ayeke na akusala pëpe akui awe.”

21, 22. (a) Ngbanga ti nyen la a lingbi e gue na Dango bê na kuâ ti Christ ngu oko oko? (b) Chapitre 6 na 7 ayeke sara tënë na ndö ti nyen?

²¹ Gue na Dango bê na kuâ ti Christ. Na bï so aga kozo na kuâ ti Jésus, lo fa na e so a lingbi e dabe ti e na kuâ ti lo. E yeke sara ni ngu oko oko na a iri ni Dango bê na kuâ ti Christ, wala “Kobe ti Seigneur”. (1 aCorinthien 11:20; Matthieu 26:26-28). Jésus aye ti tene e dabe ti e so lo mû lani fini ti lo so ayeke mbilimbili-kue tongana ye so a futa ti zi e. Lo tene: “Ala ngbâ ti sara ye so ti dabe ti ala na mbi.” (Diko Luc 22:19.) Tongana mo gue na Dango bê na kuâ ti Christ, mo yeke fa so mo dabe ti mo na ye so a futa ti zi azo nga na kota ndoye so Jéhovah na Jésus ayeke na ni na mbage ti e.​—Bâ Kete tënë 16.

²² Ye so a futa ti zi azo ayeke kota cadeau so lâ oko ade e wara mara ni pëpe (2 aCorinthien 9:14, 15). Kota cadeau so alingbi même ti ga na ye ti nzoni na azo kutu mingi so akui awe. Chapitre 6 na 7 ayeke fa tongana nyen la a lingbi ti sara ni.