1, 2. a) Fanomeza manao akory ro vatan-draha aminao? b) Manino ty vilim-panavota ro fanomeza farany ze bevata baka amy Ndranahary?

INO ty fanomeza farany ze soa fa niazonao? Tsy voatery ho sarotsy ty vilini-fanomeza raiky vo ho vatan-draha aminao. Lafa mahasambatsy anao na tena ilànao raha zay le vatan-draha aminao.

² Maro ty raha fa namea-Ndranahary antsika, fa misy raiky tena ilàntsika. Io ty fanomeza farany ze bevata nameany ty olombelo. Hianarantsika amy toko toy ato, fa naniraky ani-Jesosy Kristy Anakilahiny Jehovah, mba hahavy antsika ho velo zisiky farany. (Vakio Matio 20:28.) Nasehoni-Jehovah fa teany vatany tsika, lafa naniraky ani-Jesosy an-tany etoy ie mba hatao vilim-panavota ho antsika.

3. Manino ty olombelo ro maty?

³ Fomba anafahani-Jehovah ty olombelo amy ota noho fahafatesa ty vilim-panavota. (Efesianina 1:7) Manino tsika ro mila vilim-panavota? Mila haintsika ty raha niseho tamy zariday Edena tao, an’arivony tao lasa zay mba hahaizantsika ani-raha zay. Nanota Adama noho Eva, azy baba noho renintsika voalohany rey. Lafa nanota rozy, le nimaty. Mpanota noho maty koa tsika satria nandova ota baka amy Adama noho Eva.—Henteo Fanazavà Hevitsy 9.

4. Ia Adama zao, le ino iaby ty raha nananany?

 ⁴ Lafa namoro ani-Adama, azy lahilahy voalohany iny Jehovah, le nanome azy raha tena lafovily. Nameany ay lavorary ie. Lavorary ty sainy noho ty vatany. Tsy ho narary na ho niantitsy, na ho nimaty mihintsy ie. Jehovah ro babani-Adama satria namoro azy. (Lioka 3:38) Niresaky tsy tampaky taminy Jehovah. Nihazavà-Ndranahary soa ty raha teany hataoni-Adama, sady nameany asa mahafa-po ie.—Genesisy 1:28-30; 2:16, 17.

5. Ino ty dikani-safà amy Baiboly ao hoe namboary “manahaky ty soraki-Ndranahary” Adama?

⁵ Namboary “manahaky ty soraki-Ndranahary” Adama. (Genesisy 1:27) Nameani-Jehovah toetsy mitovy amy ty Azy ie. Tafilitsy amy zay ty fitiava, fahendrea, fitiava ty rariny, noho hery. Nengàni-Jehovah hifily ze teany ie, fa tsy nataony manahaky robot io, amy zay afaky hifily na hanao raha soa na hanao raha raty. Laha nifily hanoriky ty safà-Ndranahary Adama, le ho niafaky niay zisiky farany tamy Paradisa tao.

6. Ino ty raha nafoini-Adama lafa tsy nanoriky ty safà-Ndranahary ie? Ino ty vokatsini-raha zay amintsika?

⁶ Vinilini-Adama sarotsy ty tsy fanorihany ty safà-Ndranahary satria voaozo ho maty ie. Nafoiny ty fifandrambesany manoka tamy Jehovah, noho ty ainy lavorary, voho ty Paradisa nipetrahany. (Genesisy 3:17-19) Nifily tsy hanoriky ty safà-Ndranahary Adama noho Eva. Vokatsini-raha zay, le ‘nilitsy tamy zao tontolo zao ty ota, sady tamy ota ro nilirani-fahafatesa, ka niparitaky tamin’olo iaby ty fahafatesa, satria samby fa nanota rozy iaby’, tsy nisy raha nitamàny sasy. (Romanina 5:12) Lafa nanota Adama, le sahala hoe ‘naviliny’ ty vatany noho ty taranakiny, le nanjary andevoni-ota  noho ty fahafatesa. (Romanina 7:14) Mbo misy raha tamàny va tsika? Eka, mbo misy.

7, 8. Ino vilim-panavota zao?

⁷ Ino vilim-panavota zao? Misy roe ty dikani-raha io. Voalohany, drala aloa hanavota olo na hiviliana raha fa ahinao avao taloha. Faharoe, drala anonera na andoava vilin-draha raiky.

⁸ Lafa nanota Adama, le nanjary maty tsika. Tsy misy olombelo afaky manonitsy raha farany raty nataony zay. Fe nisy raha nataoni-Jehovah mba hanafaha antsika amy ota noho fahafatesa io. Ndao hohenteantsika ty asani-vilim-panavota io noho ty soa rambesintsika baka aminy.

9. Vilim-panavota manao akory ro mahaonitsy ty aini-Adama?

⁹ Tsy misy amintsika afaky manonitsy ay lavorary nariani-Adama iny. Ino ty antony? Satria tsy lavorary iaby tsika. (Salamo 49:7, 8) Tsy maintsy ain’olo lavorary ro andoava ty vilim-panavota. Zay ro antony ivolana azy hoe “vilim-panavota mifandanja.” (1 Timoty 2:6) Tsy maintsy mitovy vily amy ay nariani-Adama ty vilim-panavota.

10. Manao akory ty nanomezani-Jehovah vilim-panavota io?

¹⁰ Manao akory ty nanomezani-Jehovah vilim-panavota io? Nalefani-Jehovah tan-tany etoy ty Anakilahiny farany ze teany. Tsy ia zay fa Jesosy, azy voalohany tamy raha niforoniny iny. (1 Jaona 4:9, 10) Nekeny an-tsitrapo ty hiala ani-Babany noho ty lanitsy nisy azy. (Filipianina 2:7) Nafindrani-Jehovah ho an-tany etoy Jesosy. Nanjary olombelo lavorary ie lafa nateraky, sady tsy nisy ota.—Lioka 1:35.

11. Manao akory ty hahavitàn’olo raiky hanavotsy ty olombelo iaby?

 ¹¹ Adama ro olombelo voalohany, ka lafa tsy nanoriky safà ie, le nanjary tsy lavorary iaby ty olo. Misy olo afaky manafaky ty olombelo amy fahafatesa va? Eka. (Vakio Romanina 5:19.) Tsy nanota mihintsy Jesosy, ka nameany hatao vilim-panavota ty ainy lavorary. (1 Korintianina 15:45) Azo ampiasà hanafaha ty fahafatesa mahazo ty olombelo iaby ty ay lavorarini-Jesosy.—1 Korintianina 15:21, 22.

12. Nanino Jesosy ro tsy maintsy nijaly marè?

¹² Resahini-Baiboly ty farèni-fijaleani-Jesosy talohani-nahafaty azy. Nifilary marè ie, nifantsihy tamy hazo fijalea, le niaritsy fijalea vo nimaty. (Jaona 19:1, 16-18, 30) Nanino Jesosy ro tsy maintsy nijaly marè ho zay? Satria nivola Satana, fa tsy hisy olombelo tsy hivaliky amy Ndranahary laha vo tratsini-fitsapà marè. Niporofoni-Jesosy fa afaky tsy hivaliky amy Ndranahary ty olo raiky lavorary ndre mijaly marè aza. Diniho moa ty hafaleani-Jehovah tamy Jesosy!—Ohabolana 27:11; henteo Fanazavà Hevitsy 15.

13. Nanao akory ty nandoava vilim-panavota?

¹³ Nanao akory ty nandoava vilim-panavota io? Nameani-Jesosy ani-Babany ty ainy lavorary. Nengàni-Jehovah nivonoani-fahavaloni-Jesosy reo ie tamy 14 Nisana, vola jiosy, tamy tao 33. (Hebreo 10:10) Nivelomini-Jehovah ndraiky ie telo andro tafarani-zay, fe fanahy fa tsy olombelo. Bakeo, lafa nimpoly tamy Babany tan-danitsy any ie, le natorony ani-Jehovah ty ainy lavorary mba ho vilim-panavota. (Hebreo 9:24) Voaloa ty vilim-panavota, le afaky amy fahotà noho fahafatesa tsika. Tombontsoa bevata raha zay.—Vakio Romanina 3:23, 24.

14, 15. Ino ty tokony hataontsika mba hanengà ty hadisoantsika?

¹⁴ Fa mandramby soa baka amy fanomeza bevata io sandrany tsika. Ndao hohenteantsika hoe ino ty soa rambesintsika henanizao noho amy hoavy.

¹⁵ Engà ty hadisoantsika. Sarotsy ty hanao raha soa avao zisiky farany. Manao hadisoa maro tsika, sady kindraiky mivola noho manao raha tsy mety. (Kolosianina 1:13, 14) Manao akory ty hanengà ty hadisoantsika? Tsy maintsy tena maneny amy ty raha tsy mety nataontsika tsika, le miambany noho mangataky fanengà hadisoa amy Jehovah. Matoky tsika amy zay, fa engà ty hadisoantsika.—1 Jaona 1:8, 9.

16. Ino ty tokony hataontsika mba hananantsika feoni-fieritsereta malio?

¹⁶ Afaky halio ty feoni-fieritseretantsika. Lafa mivola amintsika ty feoni-fieritseretantsika hoe nanao raha tsy mety tsika, le manome tsiny ty vatantsika tsika, na mety hieritseritsy ty vatantsika hoe tsy misy dikany na tsy misy raha tamàny sasy. Fe tsy tokony ho kivy tsika. Laha misoloho fanengà hadisoa amy Jehovah tsika, le ho azontsika antoky fa hijanjy antsika ie, sady hanenga ty hadisoantsika. (Hebreo 9:13, 14) Teani-Jehovah hiresaky aminy mikasiky ty raha manahira antsika noho ty handrantsika tsika. (Hebreo 4:14-16) Hahavy antsika hifandramby soa amy Ndranahary raha zay.

17. Ino iaby ty fitahia mety ho azontsika baka amy fahafatesani-Jesosy?

¹⁷ Afaky mitamà hiay zisiky farany tsika. “Fa fahafatesa ro karama azo baka amy ota, fa fiaina zisiky farany amy alalani-Kristy Jesosy Tompontsika ro fanomeza baka amy Ndranahary.” (Romanina 6:23) Nimaty ho  antsika Jesosy, ka afaky hiay zisiky farany noho ho salama soa tsika. (Apokalypsy 21:3, 4) Fe ino ty tokony hataontsika mba hahazoa fitahia reo?

18. Akory ty ahaizantsika fa tea antsika Jehovah?

¹⁸ Manao akory ty hafaleanao lafa misy olo manome fanomeza soasoa ho anao? Fanomeza farany ze lafovily ty vilim-panavota, ka tokony hanao mahavelo bevata ani-Jehovah tsika amy raha zay. Mivola ty Jaona 3:16 fa “bevata vatany ty fitiava-Ndranahary ani-zao tontolo zao, ka nameany ty Anakilahiny toka.” Tena teani-Jehovah biby tsika, ka nameany ani-Jesosy, azy Anaky teany marè iny. Teani-Jesosy koa tsika ka naneky ho maty ho antsika ie. (Jaona 15:13) Fanomeza ty vilim-panavota, ka tokony ho resy lahatsy iha, fa tea anao vatany Jehovah noho Jesosy.—Galatianina 2:20.

19, 20. a) Ino ty hahavy anao ho nama-Jehovah? b) Manao akory ty ampisehoanao fa maneky ty sorom-panavota nataoni-Jesosy iha?

¹⁹ Fa nianaranao henanizay ty habèni-fitiava-Ndranahary, ka manao akory ty hahavy anao ho namany? Sarotsy ty ho tea olo tsy hain-tena. Mivola Jaona 17:3 fa afaky hahay mikasiky ani-Jehovah tsika. Lafa ataonao raha zay, le ho tea azy marè iha, sady ta hampifalifaly azy, le hanjary namany. Tohizo avao ty fianaranao Baiboly, le hahay ani-Jehovah iha.—1 Jaona 5:3.

²⁰ Ekeo ty sorom-panavotani-Jesosy. Mivola ty Baiboly fa “ze mampiseho finoa ty Anaky, le mana fiaina zisiky farany.” (Jaona 3:36) Manao akory mampiseho finoa zao? Manao ze raha ampanovini-Jesosy antsika. (Jaona 13:15) Tsy afaky mivola avao tsika hoe mino ani-Jesosy. Tsy maintsy manao raha mifanaraky amy finoantsika  tsika laha maneky ty vilim-panavota. Hoy ty Jakoba 2:26: “Maty ty finoa laha tsy atoro amy ty atao.”

21, 22. a) Manino tsika ro tokony hamonjy ty Fahatiarova ty nahafatesani-Kristy santao? b) Ino ty horesahy amy Toko faha-6 noho faha-7 ao?

²¹ Mamonjea Fahatiarova ty nahafatesani-Kristy. Tamy haly talohani-nahafaty ani-Jesosy, le nivola ie fa tokony hahatiaro ty nahafatesany tsika. Santao tsika ro manao raha io, ka Fahatiarova na “Sakafo Harivani-Tompo” ro ikaiha azy. (1 Korintianina 11:20; Matio 26:26-28) Teani-Jesosy hotiarovintsika fa nanome ty ainy lavorary ie mba ho vilim-panavota ho antsika. Hoy ty asany: “Anovo avao ty manahaky zao ho fahatiarova ahy.” (Vakio Lioka 22:19.) Lafa mamonjy Fahatiarova iha, le hatoronao fa tiaronao vilim-panavota noho fitiava bevata nasehoni-Jehovah noho Jesosy tamintsika iny.—Henteo Fanazavà Hevitsy 16.

²² Mbo tsy nisy fanomeza farany ze soa niazontsika manahaky ty vilim-panavota. (2 Korintianina 9:14, 15) Handramby soa baka amy fanomeza lafovily io koa ndre ty olo an-tapitrisany fa nimaty. Horesahini-Toko faha-6 noho faha-7 hoe akory ty hampety raha zay.