1, 2. (a) Prezente hanesan saida mak diʼak liu ba Ita? (b) Tanbasá Jesus nia sakrifísiu mak prezente furak liu hotu husi Maromak?

SAIDA mak prezente diʼak liu hotu neʼebé Ita simu ona? Bainhira ema ruma fó ba Ita buat neʼebé Ita presiza duni, Ita sente kontente no agradese tebes ba ema neʼe.

² Husi prezente hotu neʼebé Maromak fó ona mai ita, iha prezente ida neʼebé ita hotu presiza tebes. Neʼe mak prezente neʼebé diʼak liu hotu. Iha kapítulu neʼe, ita sei aprende katak Maromak Jeová haruka ninia Oan-Mane Jesus Kristu mai toʼo mundu atu ita bele moris ba nafatin. (Lee Mateus 20:28.) Liuhusi Jesus nia sakrifísiu, Jeová hatudu ninia domin boot mai ita.

3. Tanbasá mak ema mate?

³ Maromak Jeová fó Jesus nia moris nuʼudar sakrifísiu hodi salva ema husi sala no mate. (Éfeso 1:7) Atu komprende tanbasá mak ita presiza Jesus nia sakrifísiu, ita tenke hatene uluk buat neʼebé akontese ona iha jardín Eden. Tinan rihun ba rihun liubá, ita-nia beiʼala primeiru, Adão no Eva, halo sala no ikusmai mate. Nuʼudar Adão no Eva nia bei-oan, ita mós halo sala no ikusmai mate.​—Haree Apéndise 9.

4. Sé mak Adão? Ninia moris mak hanesan saida?

 ⁴ Bainhira Jeová kria ema primeiru Adão, Jeová fó moris neʼebé perfeitu nuʼudar prezente folin-boot ba Adão. Adão iha isin no neon neʼebé perfeitu. Nia sei nunka sai moras, katuas no mate. Tanba Jeová mak kria Adão, sira hanesan aman ho oan. (Lucas 3:38) Jeová koʼalia beibeik ba Adão. Jeová mós esplika ho klaru ninia hakarak ba Adão no fó serbisu neʼebé bele halo Adão kontente.​—Génesis 1:28-30; 2:16, 17.

5. Bíblia hatete katak Maromak kria Adão “tuir ninia ilas”. Neʼe katak sá?

⁵ Jeová kria Adão “tuir ninia ilas”. (Génesis 1:27) Neʼe katak Jeová kria Adão ho hahalok sira neʼebé hanesan Ninian, inklui domin, matenek, justisa no kbiit. Jeová mós fó ba Adão liberdade atu foti desizaun rasik. Maromak kria Adão laʼós hanesan robot neʼebé book an tuir deʼit ninia naʼin nia hakarak. Adão bele halo desizaun kona-ba buat neʼebé loos ka sala. Se Adão hili atu halo tuir Maromak, nia bele moris ba nafatin iha mundu paraízu.

6. Bainhira Adão la halo tuir Maromak, nia lakon saida deʼit? Oinsá mak ida-neʼe kona ita?

⁶ Bainhira Adão la halo tuir Maromak no hetan kastigu-mate, nia lakon ona buat neʼebé folin-boot. Nia lakon relasaun espesiál ho Jeová, moris perfeitu, no hela-fatin neʼebé furak. (Génesis 3:17-19) Adão ho Eva hili atu kontra Maromak, tan neʼe sira la iha tan esperansa ba futuru. Rezultadu husi Adão nia hahalok mak “sala tama iha mundu . . . no mate tanba sala. Nuneʼe ema hotu mate tanba ema hotu halo ona sala.” (Roma 5:12) Hodi halo sala, Adão “faʼan ona”  ninia moris no ninia bei-oan hotu nia moris nuʼudar atan ba sala no mate. (Roma 7:14) Neʼe katak ita lakon ona esperansa ka lae? Lae, tanba Maromak fó ona Jesus nuʼudar sakrifísiu.

7, 8. Jesus nia sakrifísiu neʼe kumpre buat importante saida?

⁷ Jesus nia sakrifísiu neʼe kumpre buat importante saida? Sakrifísiu neʼe sai nuʼudar folin atu sosa fali buat ruma, no mós atu selu buat neʼebé estraga ona.

⁸ Ema neʼebé sala-naʼin la iha kbiit atu selu fali buat neʼebé Adão halakon ona. Maibé Jeová loke dalan mai ita atu salva ita husi sala no mate. Oinsá mak Jeová arranja sakrifísiu neʼe? No ida-neʼe lori benefísiu saida mai ita? Mai ita aprende hamutuk.

9. Saida mak bele sosa fali buat neʼebé Adão halakon ona?

⁹ Ita hotu la iha kbiit atu sosa fali moris perfeitu neʼebé Adão halakon ona. Tanbasá? Tanba ita hotu mak sala-naʼin. (Salmo 49:7, 8) Só ema perfeitu nia moris deʼit mak bele sosa fali ida-neʼe. Jesus nia moris perfeitu mak iha “folin neʼebé hanesan” ho moris perfeitu neʼebé Adão halakon ona.​—1 Timóteo 2:6.

10. Oinsá mak Jeová arranja Jesus nia sakrifísiu?

¹⁰ Oinsá mak Jeová arranja Jesus nia sakrifísiu? Nia haruka ninia Oan-Mane doben Jesus mai toʼo mundu. Jesus mak Maromak nia kriasaun primeiru. (1 João 4:9, 10) Jesus kontente atu halo tuir ninia Aman no husik ninia hela-fatin iha lalehan. (Filipe 2:7) Jeová muda Jesus nia moris husi lalehan ba rai atu moris nuʼudar ema perfeitu, neʼebé la iha sala.​—Lucas 1:35.

11. Oinsá mak ema ida bele salva ema hotu?

 ¹¹ Bainhira Adão la halo tuir Jeová, nia halakon moris perfeitu ba ema hotu. Maibé iha ema ida neʼebé bele salva Adão nia bei-oan hotu husi mate ka lae? Iha. (Lee Roma 5:19.) Jesus, neʼebé nunka halo sala, mak fó ninia moris perfeitu nuʼudar sakrifísiu. (1 Korinto 15:45) Ninia moris perfeitu neʼe bele halakon mate hodi salva Adão nia oan no bei-oan hotu.​—1 Korinto 15:21, 22.

12. Tanbasá mak Jesus tenke hetan terus?

¹² Bíblia esplika terus neʼebé Jesus hetan antes nia mate. Ema baku nia ho xikote, prega nia iha ai-riin kastigu nian, no nia sente moras tebes ba oras balu toʼo mate. (João 19:1, 16-18, 30) Tanbasá mak Jesus tenke hetan terus hanesan neʼe? Satanás duun katak ema sei la laran-metin ba Maromak se sira hetan koko neʼebé makaʼas. Jesus hatudu ho klaru katak ema neʼebé perfeitu bele laran-metin nafatin ba Maromak maski hasoru susar barak. Maromak Jeová sente kontente tebes tanba Jesus hatudu laran-metin!​—Provérbios 27:11; haree Apéndise 15.

13. Oinsá mak Jesus nia sakrifísiu bele sosa fali ema?

¹³ Oinsá mak Jesus nia sakrifísiu bele sosa fali ema? Jesus iha direitu atu moris ba nafatin nuʼudar ema perfeitu, maibé Jesus fó ninia direitu neʼe ba Aman. Iha tinan 33 EC, iha loron 14 Nisan tuir ema Judeu nia kalendáriu, Jeová husik ema oho Jesus. (Ebreu 10:10) Loron tolu liutiha, Jeová halo Jesus moris filafali nuʼudar kriatura espíritu ida. Ikusmai bainhira Jesus fila fali ba lalehan, nia entrega ninia direitu atu moris nuʼudar ema perfeitu ba Jeová hodi bele sosa  fali ema sala-naʼin sira. (Ebreu 9:24) Rezultadu mak ita iha oportunidade atu sai livre husi sala no mate.​—Lee Roma 3:23, 24.

14, 15. Atu hetan perdua ba ita-nia sala, ita presiza halo saida?

¹⁴ Maromak nia prezente furak neʼe lori benefísiu ba ita. Mai ita buka-hatene benefísiu saida deʼit mak ita bele hetan agora no iha futuru.

¹⁵ Hetan perdua ba ita-nia sala. Nuʼudar sala-naʼin, susar ba ita atu halo buat neʼebé loos. Ita hotu halo sala beibeik ho ita-nia hahalok no liafuan. Oinsá mak ita bele hetan perdua? Ita presiza arrepende an kona-ba sala neʼebé ita halo ona, no ho haraik an husu Jeová nia perdua. Hodi halo nuneʼe, ita bele fiar katak ita hetan perdua ba ita-nia sala.​—Koloso 1:13, 14; 1 João 1:8, 9.

16. Atu hakbesik ba Maromak ho laran moos, ita presiza halo saida?

¹⁶ Bele hakbesik ba Maromak ho laran moos. Kuandu ita halo sala ruma, ita-nia konxiénsia fó-sala ba ita, no karik ita mós sente la iha folin no lakon esperansa. Maibé ita la presiza rende an. Se ita husu perdua ba Jeová ho laran, ita bele fiar katak nia rona no perdua ita. (Ebreu 9:13, 14) Jeová hakarak ita atu koʼalia ba nia hodi fó sai ita-nia fraku no problema naran deʼit. (Ebreu 4:14-16) Rezultadu mak ita bele sente dame ho Maromak.

17. Jesus nia mate loke dalan saida mai ita?

¹⁷ Iha esperansa atu moris ba nafatin. “Sala nia kolen mak mate, maibé prezente neʼebé Maromak fó mak moris rohan-laek liuhusi Kristu Jesus ita-nia  Naʼi.” (Roma 6:23) Jesus nia mate loke dalan ba ita atu moris ba nafatin ho saúde neʼebé perfeitu. (Apokalipse 21:3, 4) Maibé saida mak ita presiza halo atu bele hetan bensaun sira-neʼe?

18. Oinsá mak ita bele hatene katak Jeová hadomi ita?

¹⁸ Ita sente oinsá se ema ruma fó prezente furak ba Ita? Jesus nia sakrifísiu mak prezente neʼebé furak liu hotu, no ita presiza fó agradese ba Maromak Jeová neʼebé fó prezente neʼe mai ita. João 3:16 hatete: “Maromak hadomi tebes mundu toʼo fó nia Oan-Mane mesak.” Sin, domin mak book Jeová fó ninia Oan doben Jesus mai ita. Ita fiar katak Jesus mós hadomi ita tanba nia prontu atu mate ba ita. (João 15:13) Jesus nia sakrifísiu neʼe halo ita fiar metin katak Jeová no Jesus hadomi tebes ita.​—Galásia 2:20.

19, 20. (a) Oinsá mak ita bele sai Jeová nia belun? (b) Saida mak ita presiza halo atu hatudu fiar ba Jesus nia sakrifísiu?

¹⁹ Ita aprende ona katak Maromak hadomi tebes ita, maibé oinsá mak Ita bele sai ninia belun? Se Ita la hatene didiʼak Maromak, susar ba Ita atu hadomi nia. João 17:3 hatete katak ita bele hatene didiʼak Jeová. Hodi halo nuneʼe, ita-nia domin ba nia sei sai boot liután, ita hakarak atu halo nia kontente, no ita sei sai ninia belun. Tan neʼe, kontinua aprende kona-ba Jeová hodi estuda Bíblia.​—1 João 5:3.

²⁰ Hatudu fiar ba Jesus nia sakrifísiu. Bíblia hatete katak “ema neʼebé hatudu fiar ba Oan-Mane hetan moris rohan-laek”. (João 3:36) “Hatudu fiar” katak sá? Neʼe katak halo tuir buat neʼebé Jesus hanorin ita. (João 13:15) Hatete deʼit “haʼu fiar Jesus”, neʼe la toʼo.  Ita presiza hatudu ita-nia fiar ba Jesus nia sakrifísiu liuhusi hahalok. Tiago 2:26 hatete: “Fiar neʼebé la hamutuk ho hahalok mak mate.”

21, 22. (a) Tanbasá mak tinan-tinan ita presiza tuir komemorasaun ba Kristu nia mate? (b) Ita sei aprende saida iha Kapítulu 6 no 7?

²¹ Tuir komemorasaun ba Kristu nia mate. Kalan antes Jesus mate, nia haruka ninia dixípulu sira atu komemora ninia mate. Tinan ida dala ida, ita halaʼo komemorasaun ba Jesus nia mate, ka “Naʼi nia Han-Kalan”. (1 Korinto 11:20; Mateus 26:26-28) Jesus hakarak ita atu hanoin-hetan katak nia fó ninia moris perfeitu hodi salva ita. Nia hatete: “Kontinua halo ida-neʼe hodi hanoin haʼu.” (Lee Lucas 22:19.) Hodi tuir komemorasaun neʼe, Ita hatudu katak Ita hafolin Jesus nia sakrifísiu no domin neʼebé Jeová no Jesus hatudu mai ita.​—Haree Apéndise 16.

²² Jesus nia sakrifísiu mak prezente neʼebé furak liu hotu. (2 Korinto 9:14, 15) Iha Kapítulu 6 no 7, ita sei aprende oinsá mak prezente neʼe sei lori mós bensaun ba ema rihun ba rihun neʼebé mate ona.