1, 2. a) Inogne ty mahavy ty fagnomezagne raike ho sarobily? b) Inogne ty maha lahibey ty solovoigne nimey i Jehovah?

INOGNE ty fagnomezagne tsy misy hoe’e niazo’o ampara izay? Tsy ty halafo vily i fagnomezagney ro maha sarobily aze ama’o. Fa sarobily ama’o reke naho mahasambatse azo ndra paliae’o.

² Maro ty raha nimein’Andrianagnahare antikagne, faie ty raike ama’e ro fara’e miambake. Io ty fagnomezagne lahibey nimei’e hoahy o ndatio. Hianarantikagne amy ty toko toy, fa nagnirake i Jesosy Kirisity Ana’e ty Jehovah, mba hahazoantikagne havelogne nainai’e. (Vakio Matio 20:28.) Ty nandefasa i Jehovah i Jesosy hisolovoigne an-tane etoy ty magnaporofo fa teà’e vata’e tikagne.

3. Inogne ty mahavy o ndatio ho mate?

³ Fomba nagnafaha i Jehovah o ndatio amy ty ota naho ty fate o solovoigne zao. (Efesianina 1:7) Mba hahavy antikagne hahafantatse ty anto’e ipaliagne aze, le toko’e ho fantantikagne ty raha niseho fa agnarivo’e taogne lasa zay, tamy i tonda Edenay ao. Nimate ty Adama naho i Eva rae aman-drenentikagne voaloha’e, fa nanota. Mate ka tikagne fa nandova ota boake amy i Adama naho i Eva.—Henteo ty Fagnazavagne 9.

4. Ia o Adama zao, sady inogne iaby ty raha nanagna’e?

 ⁴ I Adama ty lahilahy voaloha’e namboare i Jehovah. Nimea’e raha sarobily reke, le ty fiaignagne, ty saigne naho ty vatagne voririke. Tsy ho narare, tsy ho niantetse naho tsy ho nimate reke. Nitovy amy ty rae i Adama ty Jehovah fa namboatse aze. (Lioka 3:38) Nisaontsy tama’e tsy tapake ty Jehovah. Nihazavae’e soa ty raha nitamae’e tamy i Adama sady nimea’e asa mahafinaritse reke.—Genesisy 1:28-30; 2:16, 17.

5. Inogne ty teà ty Baiboly horehafegne amy tihoe manahake ty “vintan’Andrianagnahare” ty Adama?

⁵ Manahake ty “vintan’Andrianagnahare” ty namboara’e i Adama. (Genesisy 1:27) Nimea’e toetse fanjaka manahake ty Aze ka reke. Agnisa izay ty hatea, ty hilala, ty fanoagne raha vantagne naho ty hery. Nimea’e safily malalake ty Adama. Namboaren’Andrianagnahare hahay hifily ty soa naho ty raty ty Adama fa tsy natao’e manahake ty raha mipay komandiegne. Ho niaigne nainai’e avao amy i Paradisay ao ty Adama naho nifily ty hagnorike an’Andrianagnahare.

6. Ino ty nafoe i Adama naho fa tsy nagnorike ty fagnanaran’Andrianagnahare, sady ino ty voka izay amantikagne?

⁶ Vinily i Adama lafo ty tsy fagnoriha’e ty fagnanara i Jehovah, fa nahavy aze ho mate. Nafoe’e ty fifandrambesa’e amy i Jehovah, ty fiai’e voririke naho i Paradisay. (Genesisy 3:17-19) Tsy nisy nitamaegne sasa ty fiaigna iareo naho fa nandietse an’Andrianagnahare. Nanota ty Adama, le ‘nizilike amy ty tontolo toy ty ota, le boake amy ty ota ty niziliha o fateo, le niparitake amy ze kila ndaty o fateo, fa sambe nanota iareo iaby.’ (Romanina 5:12) ‘Navaro’ i Adama ho ndevo ty ota naho ty fate ty vata’e naho ty antikagne naho fa  nanota reke. (Romanina 7:14) Mbe misy azontikagne tamaegne vao? Eka, mbe misy.

7, 8. Inogne o solovoigne zao?

⁷ Misy dika’e roe ty atao tihoe solovoigne. Voaloha’e, drala aloa hagnafahagne ndaty, ndra hiviliagne raha toe fa niantegna taloha. Faharoe, drala aloa hagnoneragne vilin-draha raike.

⁸ Tsy misy ndaty mahaonetse ty hasimbagne naho ty fate nampibabé i Adama antikagne naho fa nanota reke. Faie i Jehovah raike avao ty nahavita nagnafake antikagne amy ty ota naho ty fate. Andao tikagne handineke i solovoigney naho ty soa rambesentikagne ama’e.

9. Solovoigne manao akore ty nimeigne?

⁹ Tsy misy amantikagne mahaonetse ty aigne voririke nafoe i Adama. Inogne ty anto’e? Sambe tsy voririke tikagne. (Salamo 49:7, 8) Fiay o ndaty voririke ty tsy maintsy atao solovoigne. Izay ty anoagne aze tihoe “solovoigne mifanandrife.” (1 Timoty 2:6) Tsy maintsy aigne mifanandrife amy ty aigne nafoe i Adama ty atao solovoigne.

10. Akore ty nagnomea i Jehovah i solovoigney?

¹⁰ Akore ty nagnomea i Jehovah i solovoigney? Nalefa i Jehovah an-tane etoy i Ana’e teà’ey. I Jesosy o Ana’e iohoe sady ie ty namboare’e taloha ze kila raha. (1 Jaona 4:9, 10) Sitrapò i Jesosy ty nienga an-dRae’e naho i lagnitse nisy azey. (Filipianina 2:7) Nazotso i Jehovah an-tane etoy ty Jesosy sady voririke reke naho fa naterake fa tsy mpanota.—Lioka 1:35.

11. Akore ty hahavy ty ndaty raike hahavotse ndaty maro?

 ¹¹ Nagnary ty aigne voririke ho niahy o ndatio ty Adama naho fa tsy nagnorike ty fagnanara i Jehovah. Misy ndaty afake magnafake o fateo amy ty tarana i Adama vao? Eka. (Vakio Romanina 5:19.) Nagnomey ty ai’e voririke ho solovoigne ty Jesosy. (1 Korintianina 15:45) Voririke ty Jesosy, le mete naho ie ty magnafake o fateo amy ty tarana i Adama.—1 Korintianina 15:21, 22.

12. Inogne ty mahavy i Jesosy nijale mafe?

¹² Hazavae ty Baiboly fa nijale mafe ty Jesosy taloha ty nimateza’e. Natao jera biby reke, nipehegne tamy ty hazo fijaleagne sady naharey ty mangirifiry vaho izay nimate. (Jaona 19:1, 16-18, 30) Inogne ty nahavy i Jesosy tsy maintsy nijale mafe? Ty anto’e, nirehake ty Satana fa hivalike aman’Andrianagnahare o ndatio, naho misy raha mafe manjò aze. Nagnaporofo ty Jesosy tie afake tsy mivalike ty ndaty voririke ndra tie mijale mafe. Eretsereto hey ty hafalea i Jehovah amy ty tsy fivaliha i Jesosy!—Ohabolana 27:11; henteo ty Fagnazavagne 15.

13. Akore ty nagnomeagne i solovoigney?

¹³ Akore ty nagnomeagne i solovoigney? Nimey i Jesosy an-dRae’e ty vily ty fiai’e. Nengà i Jehovah ho vonoe ty fahavalo’e ty Jesosy tamy ty 14 Nisana taogne 33, amy ty volagne Jiosy. (Hebreo 10:10) Nivelome i Jehovah ty Jesosy naho fa niafake telo andro, faie nahere’e ho fagnahy reke fa tsy ndaty. Nanolotse ty vily ty ai’e voririke tamy i Jehovah Rae’e ty Jesosy naho fa niheregne an-dagnitse agne. (Hebreo 9:24) Mitamà ho votsotse amy ty ota naho ty fate tikagne hinane zao, fa nisy nagnomey solovoigne ho antikagne.—Vakio Romanina 3:23, 24.

14, 15. Inogne ty toko’e hataontikagne naho te hahazo famelan-keloke?

¹⁴ Fa mandrambe soa boake amo o fagnomezagne nimein’Andrianagnahare iohoe tikagne. Andao hodinehentikagne ty soa rambesentikagne manomboke amy izao naho amy ty hoavy.

¹⁵ Voavela ty hakeontikagne. Sarotse ty manao ty maregne lognandro. Manao hadisoagne tikagne, ndra amy ty rehantikagne ndra amy ty raha atao. (Kolosianina 1:13, 14) Akore ty hahazoantikagne famelan-keloke? Toko’e hanegnegne tikagne naho nanao hadisoagne sady hiambane naho fa mangatake famelan-keloke amy i Jehovah. Izay ty hahavy antikagne hatoky fa hahazo famelan-keloke.—1 Jaona 1:8, 9.

16. Inogne ty tsy maintsy ataontikagne naho te halio eretseretse?

¹⁶ Afake managne eretseretse malio tikagne. Tsy mandre ty eretserentikagne naho fa nanao raty. Va’e hahatsiaro ho diso tikagne, hamoe fo, hihevetse ty vatantikagne ho tsy misy dika’e. Faie tsy toko’e hamoe fo tikagne. Matoky tikagne fa hijanjigne antikagne sady hamela heloke ty Jehovah, naho mihalale sady mangatake famelan-keloke ama’e tikagne. (Hebreo 9:13, 14) Teà i Jehovah horehafentikagne ama’e ty raha manahiragne antikagne naho ty fahalementikagne. (Hebreo 4:14-16) Amy izay tikagne hilamin-tsaigne naho fa mifandrambe amy i Jehovah.

17. Inogne ty fitahiagne ho azontikagne amy ty nahafate i Jesosy?

¹⁷ Mitamà fiaignagne nainai’e tikagne. “O fateo ro vale ty ota, faie i Jesosy Kirisity Tompontikagne ty agnomean’Andrianagnahare havelogne nainai’e.” (Romanina 6:23) Tsy harare sady hiaigne nainai’e tikagne fa nimate ho antikagne ty Jesosy. (Apokalypsy  21:3, 4) Faie inogne ty tsy maintsy ataontikagne mba hahazoagne o fitahiagne rehoe?

18. Akore ty ahafantarantikagne fa teà i Jehovah vata’e tikagne?

¹⁸ Eretsereto ty hafalea’o naho fa misy ndaty magnomey raha fanjaka azo. Fagnomezagne tsy misy hoe’e i solovoigney sady toko’e hahavy antikagne hisaotse i Jehovah. Hoe ty Jaona 3:16: “Lako loatse ty hatean’Andrianagnahare ty tontolo toy, kanao nimei’e i Ana-dahi’e bakotokagney.” Maregne zay. Teà i Jehovah vata’e tikagne kanao nimea’e i Ana’e teà’ey. Fantantikagne ka fa tea antikagne ty Jesosy kanao nahafoe ty fiai’e ho antikagne. (Jaona 15:13) Toko’e hahavy azo ho resy lahatse amy ty hatea i Jehovah naho i Jesosy azo i solovoigney.—Galatianina 2:20.

19, 20. a) Akore ty hahavy azo ho ragne i Jehovah? b) Akore ty anoroa’o fa mino i solovoigney rehe?

¹⁹ Fa nianara’o tie bey hatea vata’e ty Andrianagnahare. Akore areke ty hahavy azo ho ragne’e? Sarotse ty hiteà’o ty ndaty tsy fanta’o. Rehafe ty Jaona 17:3 fa afake mahafantatse i Jehovah tikagne. Hihamafe ty hatea’o aze, le hagniry te hampifale aze rehe amy izay sady hanjare ragne’e. Tohizo avao areke ty fianara’o miomba i Jehovah agnate Baiboly ao.—1 Jaona 5:3.

²⁰ Manoroa finoagne ty solovoigne nimey i Jesosy. Rehafe ty Baiboly fa “ze manoro ty finoa’e i Anakey ro hanagne havelogne nainai’e.” (Jaona 3:36) Inogne ty dika tihoe manoro finoagne? Ty dika’e, manao ze raha nampianare i Jesosy antikagne. (Jaona 13:15) Tsy vita an-drehake avao ty finoagne i Jesosy naho i solovoigney, fa atoro amy ze raha atao. Treantikagne amy ty Jakoba 2:26, “fa mate ty finoagne naho tsy atoro amy ze raha atao.”

21, 22. a) Nagnino tikagne ro toko’e hagnatreke isan-taogne ty Fahatsiarovagne ty nahafate i Kirisity? b) Inogne ty ho hazavae ty Toko faha-6 naho faha-7?

 ²¹ Magnatreha ty Fahatsiarovagne ty nahafateza i Kirisity. Ty hariva taloha ty himateza i Jesosy, le nampianatse reke tie toko’e hahatsiaro ty nimateza’e tikagne. Mankalaza o Fahatsiarovagne iohoe isan-taogne tikagne. Io ty atao tihoe “Mahakama Hariva i Tompo.” (1 Korintianina 11:20; Matio 26:26-28) Teà i Jesosy hotsiarontikagne fa nagnomey ty fiai’e voririke ho solovoigne ho antikagne reke. Hoe reke: “Tohizo avao zao ho fahatsiarovagne ahy.” (Vakio Lioka 22:19.) Ty fagnatreha’o i Fahatsiarovagney ty anoroa’o, fa mahatsiaro i solovoigney naho ty hatea i Jehovah naho i Jesosy antikagne rehe.—Henteo ty Fagnazavagne 16.

²² I solovoigney ty fagnomezagne lahibey niazontikagne hatrake amy izay. (2 Korintianina 9:14, 15) Mandrambe soa amo o fagnomezagne iohoe ka ndra ty ndaty an-tapetrisa’e fa nimate. Hagnazava ty miomba izay ty Toko faha-6 naho faha-7.