1, 2. a) Etena kakɔna konga woshasha la nɛmɔ le yɛ? b) Lande na kele oshinga w’etshungwelo wekɔ woshasha woleki woke waki Nzambi?

WOSHASHA akɔna woleki woke wamboyolongolaka? Dia woshasha monga la nɛmɔ le yɛ, aha paka vɔ mbongi oshinga wolo. Etena kakɔngɛnyangɛnya woshasha ɔmɔtshi kana kewɔ ɛngɔ kɛmɔtshi keyɛ mɛtɛ l’ohomba, wɛ mongaka la lowando lo dikambo diawɔ.

² Lo weshasha tshɛ wakatosha Nzambi, ekɔ woshasha ɔmɔtshi weso lawɔ ohomba oleki ekina tshɛ. Ɔsɔ ekɔ woshasha woleki woke wakasha Nzambi anto. Lo tshapita nyɛ, tayɛna dia Jehowa akatome Ɔnande, Yeso Kristo dia sho nkondja lɔsɛnɔ la pondjo. (Adia Mateo 20:28.) Lo ntoma Yeso la nkɛtɛ oko oshinga w’etshungwelo, Jehowa akɛnya dia nde mɛtɛ tokaka ngandji.

3. Lande na kavɔ anto?

³ Oshinga w’etshungwelo wekɔ yoho yakasale Jehowa dia ntshungola anto oma lo pɛkato la nyɔi. (Ɛfɛsɔ 1:7) Dia nshihodia lande na kele oshinga w’etshungwelo waki ohomba, sho pombaka mbeya kɛnɛ kakatombe ambeta nunu di’ɛnɔnyi lo ekambɔ ka Ɛdɛna. Ambutshi aso wa ntondo, Adama la Eva wakasale pɛkato. Lam’ele vɔ wakasale pɛkato, vɔ wakavu. Sho lawɔ mvɔka, nɛ dia takahowɔ pɛkato oma le Adama la Eva.—Enda nɔtɛ ka la koma 9.

4. Adama akinde ndo kakɔna kakinde latɔ?

 ⁴ Etena kakatonge Jehowa pami ka ntondo Adama, nde akawosha ɛngɔ kɛmɔtshi ka nɛmɔ efula. Nde akasha Adama lɔsɛnɔ la kokele. Nde aki la yimba ya kokele ndo la demba dia kokele. Totondotata hemɔ, totondotshunda osombe ndo totondovɔ. Lam’ele Jehowa mbakatonge Adama, Nde aki oko ombutshi wa pami le nde. (Luka 3:38) Jehowa akasawolaka mbala la mbala la nde. Nzambi akalembetshiya Adama dimɛna kɛnɛ kakandalongamɛka oma le nde ndo akawosha olimu washa ɔngɛnɔngɛnɔ.—Etatelo 1:28-30; 2:16, 17.

5. Kakɔna kalanga Bible mbuta etena katatɔ ɔnɛ Adama akatongama ‘lo efanelo ka Nzambi’?

⁵ Adama akatongama ‘lo efanelo ka Nzambi.’ (Etatelo 1:27) Jehowa akawosha waonga wele oko Wande, mbidja ndo ngandji, lomba, losembwe ndo wolo. Nde akasha Adama lotshungɔ la nsala kɛnɛ kalangande. Adama komonga oko mashinyi wakoka nsala paka kɛnɛ kakawakongɛ dia vɔ salaka. Nzambi akootonge l’akoka wa nde nsɔna kɛnɛ kele ɔlɔlɔ kana kele kɔlɔ. Adama otondɔsɔna dia nkitanyiya Nzambi, tshike nde otɔsɛna pondjo pondjo lo paradiso.

6. Etena kakahindolɛ Adama Nzambi, kakɔna kakandashisha? Ndo dui sɔ ngande wediɔ la shɛngiya le so?

⁶ Etena kakandahindolɛ Nzambi ndo kakawofundɛ nyɔi, Adama akakondja dilanya dia wolo efula. Nde akashisha lɔngɛnyi la laande laki lam’asande la Jehowa, lɔsɛnɔ lande, ndo paradiso kakandadjasɛka lɔkɔ. (Etatelo 3:17-19) Adama la Eva wakasɔnɛ diaha monga la okitanyiya le Nzambi, ɔnkɔnɛ vɔ komonga nto l’elongamelo. L’ɔtɛ wa kɛnɛ kakasale Adama, ‘pɛkato kakɔtɔ l’andja ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.’ (Rɔmɔ 5:12) Etena kakasale Adama pɛkato, nde ‘akayasondja’ ndo akatosondja lo lɔhɔmbɔ la nsala pɛkato  ndo lo nyɔi. (Rɔmɔ 7:14) Onde elongamelo kɛmɔtshi kekɔ lo dikambo diaso? Eelo, tekɔ la elongamelo.

7, 8. Oshinga w’etshungwelo kɛdikɛdi na?

⁷ Oshinga w’etshungwelo kɛdikɛdi na? Oshinga w’etshungwelo koka nembetshiya awui ahende. Dui dia ntondo, oshinga w’etshungwelo wekɔ oshinga wafutama dia ntshungola onto ɔmɔtshi kana nsɔmbɔla ɛngɔ kɛmɔtshi. Dui dia hende, oshinga w’etshungwelo wekɔ oshinga wafutama dia nkomba kana mfuta oshinga wa ɛngɔ kɛmɔtshi.

⁸ Ndooko onto lakakoke mfuta kɔlɔ k’efula kakasale Adama etena kakandasale pɛkato ndo kakandatela nyɔi. Koko Jehowa akɔshi yɛdikɔ ya totshungola oma lo pɛkato la nyɔi. Tende woho w’oshinga w’etshungwelo wakakimɔ Jehowa ndo wahɔ wakokaso nkondja oma lɔkɔ.

9. Ngande wakahombe oshinga w’etshungwelo futama?

⁹ Ndooko onto l’atei aso lakakoke mfuta oshinga w’etshungwelo dikambo dia lɔsɛnɔ la kokele lakashisha Adama. Lande na? Nɛ dia sho tshɛ keema kokele. (Osambo 49:7, 8) Oshinga w’etshungwelo wakahombe futama akahombe monga lɔsɛnɔ lokina l’onto la kokele. Diakɔ dielamɛwɔ “oshinga w’etshungwelo wɛdimi.” (1 Timɔte 2:6) Oshinga w’etshungwelo wakahombe mbɛdima la lɔsɛnɔ lakashisha Adama.

10. Ngande wakakimɔ Jehowa oshinga w’etshungwelo?

¹⁰ Ngande wakakimɔ Jehowa oshinga w’etshungwelo? Jehowa akatome Ɔnande loleki nɛmɔ la nkɛtɛ. Ɔna ɔsɔ, mbuta ate Yeso mbakandatonge ntondo. (1 Joani 4:9, 10) Yeso aketawɔ dia kakitɔna la She ndo ntshika edjaselo kande ka l’olongo. (Filipɛ 2:7) Jehowa akasangola  lɔsɛnɔ la Yeso oma l’olongo oya la nkɛtɛ, ko Yeso akotɔ oko onto la kokele, aha la pɛkato.—Luka 1:35.

11. Ngande wakakoke onto ɔtɔi monga oshinga w’etshungwelo dikambo di’anto tshɛ?

¹¹ Onto la ntondo Adama akashishɛ anto tshɛ lɔsɛnɔ la kokele etena kakandahindolɛ Jehowa. Onde onto okina akakoke minyɛɛ ana w’Adama tshɛ nyɔi? Eelo. (Adia Rɔmɔ 5:19.) Yeso laki kosala pɛkato, akakimɔ lɔsɛnɔ lande la kokele oko oshinga w’etshungwelo. (1 Kɔrɛtɔ 15:45) Lɔsɛnɔ lande la kokele lakakoke minyɛɛ ana w’Adama tshɛ nyɔi.—1 Kɔrɛtɔ 15:21, 22.

12. Lande na kakasoyama Yeso efula?

¹² Bible kɔndɔlaka asui wakakikɛ Yeso la ntondo ka nyɔi kande. Nde akakɔmama la esehe tshɛ, wakɔɔkɔkɔla nsɛti l’otamba w’asui ndo nde akavu nyɔi ka paa efula. (Joani 19:1, 16-18, 30) Lande na kakahombe Yeso nsowa ngasɔ? Nɛ dia Satana akadje taamu dia ndooko onto layotshikala la kɔlamelo le Nzambi naka nde soyama wolo. Yeso akɛnya dia onto la kokele koka ntshikala la kɔlamelo le Nzambi oyadi kaanga nde soyama lo yɛdikɔ yoleki tshɛ. Ohokanyiya ɔlɔ wakahombe Jehowa monga lawɔ lo dikambo dia Yeso!—Tokedi 27:11; enda nɔtɛ ka la koma 15.

13. Ngande wakafutama oshinga w’etshungwelo?

¹³ Ngande wakafutama oshinga w’etshungwelo? Yeso akasha She nɛmɔ dia lɔsɛnɔ lande. Lo ɔnɔnyi wa 33 lo ngɔndɔ ka lo alamanaka w’ase Juda ka Nisana 14, Jehowa aketawɔ di’atunyi waki Yeso mbodiaka. (Hɛbɛru 10:10) Nshi shato l’ɔkɔngɔ, Jehowa akolola Yeso, aha oko onto, koko oko etongami ka lo nyuma. L’ɔkɔngɔ diko, etena kakakalola Yeso le She l’olongo, nde akatoshaka Jehowa nɛmɔ dia lɔsɛnɔ lande la kokele oko oshinga w’etshungwelo. (Hɛbɛru 9:24) Lam’ele oshinga w’etshungwelo wambofutamaka,  tambokondja diaaso dia ntshungɔ oma lo pɛkato la nyɔi.—Adia Rɔmɔ 3:23, 24.

14, 15. Ahombaso nsala dia pɛkato yaso dimanyiyama?

¹⁴ Tekɔ lo nkondja wahɔ oma lo woshasha wa woke waki Nzambi. Tende wahɔ wakondjaso kakianɛ ndo wayotokondja lo nshi yayaye.

¹⁵ Edimanyielo ka pɛkato yaso. Ekɔ wolo dia salaka kɛnɛ kele ɔlɔlɔ tena tshɛ. Sho salaka munga ndo tena dimɔtshi, sho mbutaka ndo salaka kɛnɛ kele kɔlɔ. (Kɔlɔsayi 1:13, 14) Ngande wakokaso dimanyiyama? Sho pombaka mɛtɛ ndjakiyanya l’ɔtɛ wa kɔlɔ kosadiso ndo nsɛngasɛnga Jehowa la okitshakitsha tshɛ dia nde todimanyiya. Oma laasɔ, sho koka monga l’eshikikelo dia pɛkato yaso yambodimanyiyama.—1 Joani 1:8, 9.

16. Ahombaso nsala dia monga la nkum’otema ka dimɛna?

¹⁶ Sho koka monga la nkum’otema ka dimɛna. Nkum’otema kaso totɛka dia tambosala dui dimɔtshi dia kɔlɔ, sho ndjaokaka dia tekɔ l’onongo ndo mbala mɔtshi oko anto wele bu l’elongamelo ndo w’anyanya. Koko hatohombe mpekɔ. Naka sho nsɛngasɛnga Jehowa dia nde todimanyiya, sho koka monga l’eshikikelo dia nde ayotohokamɛ ndo ayotodimanyiya. (Hɛbɛru 9:13, 14) Jehowa nangaka dia sho mbotɛ ekakatanu ndo wɛɔdu wele la so. (Hɛbɛru 4:14-16) Lo nsala ngasɔ, sho koka monga lo wɔladi la Nzambi.

17. Ɛtshɔkɔ akɔna wayotokondja oma lo woho wakatovwɛ Yeso?

¹⁷ Tekɔ l’elongamelo ka nsɛna pondjo pondjo. Rɔmɔ 6:23 mbutaka ɔnɛ: “Difuto dia pɛkato ele nyɔi, koko woshasha washa Nzambi ele lɔsɛnɔ la pondjo oma le Kristo Yeso Nkumɛso.” Lam’ele Yeso akavu dikambo diaso, sho koka nsɛna pondjo pondjo ndo monga la  yoonge ya kokele. (Ɛnyɛlɔ 21:3, 4) Ko ahombaso nsala dia nkondja ɛtshɔkɔ ɛsɔ?

18. Ngande weyaso dia Jehowa tokaka ngandji?

¹⁸ Ohokanyiya ɔlɔ watoyokaka etena kakosha onto ɔmɔtshi woshasha wa dimɛna efula. Oshinga w’etshungwelo mbele woshasha woleki tshɛ nɛmɔ, ndo sho pombaka monga la lowando l’efula otsha le Jehowa lo dikambo diawɔ. Joani 3:16 totɛka dia “Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote.” Eelo, Jehowa tokaka ngandji efula diakɔ diakandatosha Ɔnande la nɛmɔ efula Yeso. Ndo sho mbeyaka dia Yeso nde lawɔ tokaka ngandji, nɛ dia nde aketawɔ mvɔ lo dikambo diaso. (Joani 15:13) Woshasha w’oshinga w’etshungwelo pombaka koshikikɛ dia Jehowa nde la Yeso kokaka mɛtɛ ngandji.—Ngalatiya 2:20.

19, 20. a) Ngande wakokaso nkoma angɛnyi wa Jehowa? b) Ngande wakokayɛ mɛnya dia wɛ mbetawɔka olambo w’oshinga w’etshungwelo waki Yeso?

¹⁹ Etena kɛnɛ kamboyeka akambo wendana la ngandji k’efula ka Nzambi, ngande wakokayɛ nkoma ɔngɛnyi ande? Ekɔ wolo mboka onto lahayeye ngandji. Joani 17:3 mbutaka dia sho kokaka mbeka dia mbeya Jehowa. Etena kasalayɛ dui sɔ, ngandji kawokayɛ kayofula, wɛ ayolanga dia mbɔngɛnyangɛnya ndo wɛ ayokoma ɔngɛnyi ande. Ɔnkɔnɛ, tetemala mbeka akambo wendana la Jehowa lo mbekaka Bible.—1 Joani 5:3.

²⁰ Etawɔ olambo w’oshinga w’etshungwelo waki Yeso. Bible mbutaka dia “onto tshɛ lele la mbetawɔ le Ɔna ayokondja lɔsɛnɔ la pondjo.” (Joani 3:36) Kakɔna kalembetshiya monga la mbetawɔ? Dui sɔ nembetshiyaka nsala kɛnɛ kakatetsha Yeso dia nsala. (Joani 13:15) Hatokoke mbuta tsho dia tekɔ la mbetawɔ le Yeso. Dia mbetawɔ oshinga w’etshungwelo, sho pombaka nsala  dikambo dimɔtshi lo kɛnɛ kendana la mbetawɔ kaso. Sho mbadiaka lo Jakɔba 2:26 ɔnɛ: “Mbetawɔ kaha la etsha kambovɔ.”

21, 22. a) Lande na kahombaso mbɔtɔka lo Eohwelo ka nyɔi ka Yeso ɔnɔnyi tshɛ? b) Kakɔna kayɔtɛkɛtama lo tshapita 6 la 7?

²¹ Ɔtɔka lo Eohwelo ka nyɔi ka Yeso. La dikɔlɔ la ntondo ka Yeso mvɔ, nde akatetsha dia sho pombaka salaka Eohwelo ka nyɔi kande. Sho salaka dui sɔ ɔnɔnyi tshɛ ndo diɔ mbelamɛka Eohwelo kana “Dambo dia dikɔlɔ dia Nkumadiɔndjɔ.” (1 Kɔrɛtɔ 11:20; Mateo 26:26-28) Yeso nangaka dia sho mbohɔka dia nde akakimɔ lɔsɛnɔ lande la kokele oko oshinga w’etshungwelo dikambo diaso. Nde akate ate: “Kanyotshake ɔnkɔnɛ dia mbohɔkami.” (Adia Luka 22:19.) Etena kɔtɔyɛ lo Eohwelo, wɛ mɛnyaka dia wɛ mbohɔka oshinga w’etshungwelo ndo ngandji k’efula kakatoke Jehowa nde la Yeso.—Enda nɔtɛ ka la koma 16.

²² Oshinga w’etshungwelo mbele woshasha woleki tshɛ woke lo weshasha tshɛ wakokaso nongola. (2 Kɔrɛtɔ 9:14, 15) Woshasha wa nɛmɔ ɔsɔ wayonga la wahɔ ndo le miliyɔ y’anto wamboshilaka mvɔ. Tshapita 6 la 7 yayɛnya woho wakoka dui sɔ salema.