1, 2. a) Ginani gi girago giningwa gi wonega na giri ni lisima gwago? b) Khu ginani gudzegiswa gu gu giningwa nya gikhongolo ngudzu guvbindra satshavbo sa Nungungulu?

KHU gyevbi giningwa nya lisima ga satshavbo u thugidego u si hakha? Lisima nya giningwa kha li yeyedzwi khu gudhura gwagyo. Gyo ba giri gilo gi gu tsakisago mwendro u nga ba u gi vbweta ngudzu, u na mu bonga ngudzu oyu a gu ningidego.

² Ga siningwa satshavbo esi Nungungulu a hi ningidego, gyomo gimwegyo hi gi vbwetago ngudzu guvbindra satshavbo. Giningwa nya gikhongolo ngudzu gya Nungungulu guvbindra satshavbo a si ningidego vathu. Omu nya gipimo gegi, hi na hevbula gu khethu Jehovha rumede Gyanana gyaye, Jesu Kristo, gasi hi kodza gu vbanya kala gupindruga. (Leri Matewu 20:28.) Khu gu ba a hi rumelede Jesu mafuni kha nga ndziya nyo hi dzegise khiyo, Jehovha yeyedzide gu khuye a ngu hi haladza khu lisine.

3. Khu ginani vathu va fago?

³ Gudzegiswa ndziya eyi Jehovha a yi thumisago gasi gu tshula vathu gighohoni ni gufani. (Vaefeso 1:7) Gasi hi pwisisa gu khethu khu ginani gu nga ba gu vbwetega gudzegiswa, gu vbwetega gu hiti esi si nga dugeleya thembweni ga Edheni magumi mazana myaga hwane. Vavelegi vathu nyo pheye, Adhamu ni Evha, va di ghoha. Khu kotani nya isoso, va difa. Anethu hi ngufa kholu hi thapedwego khu gighoho gya Adhamu ni Evha. — Wona Tshamuselo 9.

4. A diri mani Adhamu, nigu ginani a nga ba a ningidwe?

 ⁴ Tepo Jehovha a vangidego muthu nyo pheye, Adhamu, mu ningide gilo nya lisima ngudzu. Ningide Adhamu womi nyo vbeleye. Adhamu a diri ni mapimo ni mili nyo vbeleye. Gima na sa dwala, gima na sa gumba nigu gima na safa. Khu kotani nya olu Jehovha a vangidego Adhamu, Nungungulu a diri nga babe waye. (Luka 3:38) Jehovha a di gu oloveya gu bhula naye. Nungungulu tshamusede Adhamu esi a nga ba a si vireya gwaye a bwe a mu ninga thumo nya wadi gasi gu wu gira. — Genesi 1:28-30; 2:16, 17.

5. Bhibhiliya yo vbweta khiyo ginani tepo yi gu khiyo Adhamu vangidwe “khu mufananiso” wa Nungungulu?

⁵ Adhamu vangidwe “khu mufananiso” wa Nungungulu. (Genesi 1:27) Jehovha a di mu ninga makhalelo nyo fane ni aya Yaye wutumbu, ma patago lihaladzo, wugengeli, gululama ni tshivba. Ningide Adhamu makodzelo nyo dzi hatheye. Adhamu kha nga ba ari mutshini. Nungungulu mu vangide ni makhalelo yoyo gasi a kodza gu dzi hatheya gu gira gululama mwendro guvivba. Nari khatshi Adhamu a di hathide gu engisa Nungungulu, na vbanyide kala gupindruga Paradhesini.

6. Khu gu ba a digide gu engisa Nungungulu, ginani egi Adhamu a luzidego? So hi khuha kharini isoso?

⁶ Tepo a nga diga gu engisa Nungungulu a bwe a konedwa gufa, Adhamu a di livba tengo nya wukhongolo ngudzu. Luzide wupari waye nyo hathege ni Jehovha, womi nyo vbeleye ni gaya gwaye nya Paradhesi. (Genesi 3:17-19) Adhamu ni Evha va di hatha gu mba engisa Nungungulu, khu kharato kha va divaledwa gighoho gyawe. Khu kotani nya esi Adhamu a giridego, “gighoho gi bede mafuni khu muthu moyo basi, gambe gighoho gi yade gufa. Khidzo kharato gufa gu enedzidego vathu vatshavbo kholu vatshavbo va ghohide.” (Varoma 5:12) Tepo Adhamu a nga ghoha, a di dzi ‘rengisa’ uye mune gumogo ni ethu wugumbini nya gighoho ni gufa. (Varoma 7:14) Ina yomo ndziya nyo divaledwe sighoho sathu? Ina, yomo.

7, 8. Ginani gudzegiswa?

 ⁷ Ginani gudzegiswa? Lito gudzegiswa lo pata ngudzungudzu silo sivili. Gupheya, gudzegiswa i tengo wu livbwago gasi gu tshudzisa muthu mwendro gu wuyisa gilogyo. Nya wuvili, gudzegiswa i tengo wu tshikedzago mwendro wu livbago gilo.

⁸ Mwalo muthu a nga hadzi gu si kodza gu livba nandru nya wukhongolo wu wusidwego khu Adhamu tepo a ghohidego a bwe a hi reseya gufa. Ganiolu Jehovha hi ningide ndziya nyo hi tshudzise gighohoni ni gufani. Hongoleni hi wona edzi gudzegiswa gu thumago khidzo ni edzi hi nga phasegago khidzo khugo.

9. Gu di gu vbwetega gu livbwa kharini gudzegiswa?

⁹ Gima mwalo ni moyo wathu a nga hadzi gu si khodza gu livba gudzegiswa nya womi nyo vbeleye owu Adhamu a wu luzidego. Khu ginani? Kholu hatshavbo kha ha vbeleya. (Dzindzimo 49:7, 8) Gudzegiswa gu di gu vbweta gu livbwa khu womi nya mumbe muthu nyo vbeleye. Bhibhiliya yari khiyo Jesu Kristo khuye “a nga ningelago guvbanya gwaye khu gufela gu vbanyisa vathu vatshavbo.” (1 Thimoti 2:6) Womi nyo vbeleye wu ningedwego khu Jesu wu diri ni lisima nyo fane ni womi wu luzidwego khu Adhamu.

10. Jehovha hi ningide kharini gudzegiswa?

¹⁰ Jehovha hi ningide kharini gudzegiswa? Jehovha a di rumeya mafuni Gyanana gyaye a gi haladzago ngudzu ga satshavbo. Gyanana gyogyo, Jesu, gi diri givangwa gyaye nyo pheye. (1 Johane 4:9, 10) Nya mba gurumedzwa, Jesu tshide Babe waye ni gaya gwaye ndzadzini. (Vafilipi 2:7) Jehovha a di rurisa Jesu khu ndzadzini ata mafuni, nigu khu kharato Jesu velegidwe kha nga muthu nyo vbeleye, nya mba na gighoho. — Luka 1:35.

11. So kodzega kharini gu muthu moyo a dzegisa vathu vatshavbo?

¹¹ Mwama nyo pheye, Adhamu, giride vathu vatshavbo  va luza womi nyo vbeleye tepo a digidego gu engisa Jehovha. Ina si di gu kodzega gu mumbe muthu a dusa gufa vbakari nya sanana satshavbo sa Adhamu? Ina. (Leri Varoma 5:19.) Jesu, oyu gima a nga mba ghoha, ningede womi waye nyo vbeleye gasi gu hi dzegisa. (1 Vakorinto 15:45) Womi waye nyo vbeleye wu di hadzi thumiswa gasi gu dusa gufa vbakari nya sanana satshavbo sa Adhamu. — 1 Vakorinto 15:21, 22.

12. Khu ginani gu vbwetegidego gu Jesu a tshaniseka ngudzu?

¹² Bhibhiliya yi ngu tshamuseya edzi Jesu a tshanisekidego khidzo na si gufi. Kwapidwe khu ndziya nya xapi, a khokhotedwa vbasimbotunu nya tshanisa a bwe a gurumedzwa gu timiseya gufa nyo nonoke, nyo vbise ngudzu. (Johane 19:1, 16-18, 30, NM) Khu ginani gu vbwetegidego gu Jesu a tshaniseka ngudzu kharato? Gighelo khu gu Sathane ganede gu khuye mwalo muthu a nga hadzi gu engisa Nungungulu o thuga a tshangana ni gilingo nyo vbise ngudzu. Jesu yeyedzide gu khuye muthu nyo vbeleye a nga si kodza gu engisa Nungungulu ambari o tshaniseka ngudzu. Nga dundrugeya matshandza a ma pwidego Jehovha khu Jesu! — Mavingu 27:11; wona Tshamuselo 15.

13. Gu livbidwe kharini gudzegiswa?

¹³ Gu livbidwe kharini gudzegiswa? Jesu ningede tengo nya womi waye ga Babe waye. Khu 14 nya Nisani nya mwaga nya 33 nya kalendaryu nya giJudha, Jehovha dzumelede gu valala va Jesu va mu songa. (Vahebheru 10:10) Hwane nya matshigu mararu na fude, Jehovha a di wusa Jesu, na siri kha nga muthu nya nyama, ganiolu kha nga muthu nya liphuvbo. Khu hwane nya tepo, Jesu bwelede ga Babe waye ndzadzini, a ya hendzeledza lisima nya womi waye nyo vbeleye ga Jehovha kha nga tengo nya gudzegise. (Vahebheru 9:24) Olu gudzegiswa gu livbidwego, ethu hi na ni lithomo nyo tshudwe gighohoni ni gufani. — Leri Varoma 3:23, 24.

14, 15. Ginani hi yelago gu gira gasi hi divaledwa sighoho sathu?

¹⁴ Ambari olu kamo hi ngu phasega khu giningwa gegi gya Nungungulu nya gikhongolo ngudzu ga satshavbo. Hongoleni hi wone edzi hi phasegago khidzo olu ni edzi hi na phasegago khidzo mindru wa tshigu.

¹⁵ Hi ngu divaledwa sighoho sathu. Kha si vbevbugi gu gira silo nyo lulame tepo yatshavbo. Hi ngu hosisa, nigu yimbe tepo hi ngu ganeya ni gu gira silo nyo vbivbe. (Vakolosi 1:13, 14) Si nga kodzega kharini gu hi divaledwa? Gu vbwetega gu hi dzi sola khu lisine khu silo nyo vivbe hi giridego hi bwe hi lomba Jehovha khu gudzinogisa gasi a hi divaleya. Khavbo hi kodzago gu tiyisega gu khethu hi divaledwe sighoho sathu. — 1 Johane 1:8, 9.

16. Ginani gi vbwetegago gu hi gira gasi hi mana livhalo nyo age?

¹⁶ Hi nga mana livhalo nyo age. Livhalo lathu lo hi embeya gu khilo hi giride gilo nyo vivbe, ho dzipwa nandru, gudzina saye hi dzi wona na hiri mwalo gutumba ambari lisima. Ganiolu gu mwalo gighelo nyo vbeye tshivba. Ho gombeya ga Jehovha gasi a hi divaleya gihoso gyogyo, hi nga tiyisega gu khethu a na hipwa a bwe a hi divaleya. (Vahebheru 9:13, 14) Jehovha o vbweta gu khuye hi mu embeya ni gevbini gi hi garadzago ambari ni esi si hi vbedzago tshivba. (Vahebheru 4:14-16) Tshatshazelo wakona khu gu hi dzipwa na hiri ni gurula ni Nungungulu.

17. Khu gu ba Kristo a hi fede, makategwa muni hi kodzago gu ma mana?

¹⁷ Hi na ni gutumba nyo vbanye kala gupindruga. “Handro nya gighoho khu gufa, aholu, giningwa hi gi manago ga Nungungulu khu guvbanya nya gupindruge, [khu, NM] Jesu Kristo, Pfhumu yathu.” (Varoma 6:23) Olu Jesu a hi fedego, hi nga kodza gu vbanya kala gupindruga hi bwe hi dzi buza khu womi nyo vbeleye. (Gutuledwa 21:3, 4)  Ganiolu, ginani gi vbwetegago gu hi gira gasi gu mana makategwa yoyo?

18. Ho dziti kharini gu khethu Jehovha a ngu hi haladza?

¹⁸ Dundrugeya edzi wu khuhwago khidzo monyo wago tepo u ningwago giningwa nyo mbure. Gudzegiswa giningwa nya lisima ngudzu guvbindra satshavbo, nigu gu vbwetega gu hi mu bonga ngudzu Jehovha khigyo. Johane 3:16 o hi embeya gu khuye “Nungungulu haladzide ngudzu litigo gu kala a ningela Mwanaye wa moyo.” Khu lisine, Jehovha a ngu hi haladza ngudzu avba nya gu a ningeya Jesu, Mwanaye nyo golege. Nigu hi ngu dziti gu khethu Jesu nuye a ngu hi haladza, kholu a hi fedego khu gudzina gwaye. (Johane 15:13) Giningwa nya gudzegiswe gu vbwetega gu gi gu gira u khodwa gu khuwe Jehovha ni Jesu khu lisine va ngu gu haladza. — Vagalatiya 2:20.

19, 20. a) U nga si kodza kharini gu khala pari ya Nungungulu? b) U nga yeyedza kharini gu khuwe u ngu wu dzumeya muphaso nya gudzegiswe?

¹⁹ Olu u hevbudego khu lihaladzo nya likhongolo la Nungungulu, u nga si kodza kharini gu khala pari ya Nungungulu? Kha si vbevbugi gu haladza muthu u si mu tigo. Johane 17:3 wari khuye hi nga si kodza gu muti Jehovha. Tepo u dzi garadzeyago gu muti, lihaladzo lago khuye li na dandra, u vbweta gu mu tsakisa, khavbovbo u khala pari yaye. Khu kharato, simama guti simbe khu Jehovha khu gu hevbula Bhibhiliya. — 1 Johane 5:3.

²⁰ Dzumeya muphaso nya gudzegise wa Jesu. Bhibhiliya yari khiyo “uye a khodwago ga Mwanaye a na ni guvbanya nya gupindruge.” (Johane 3:36) So thula ginani gu khodwa? So thula gu gira esi Jesu a hi hevbudzidego. (Johane 13:15) Kha si thuli gu ganeya basi khu likana gu khethu hi ngu khodwa ga Jesu. Gasi gu dzumeya gudzegiswa, gu  vbwetega gu hi gira gilogyo khu gukhodwa gwathu. Omu ga Jakobe 2:26, ho leri esi: “Gukhodwa, nyambana mithumo, gu fude.”

21, 22. a) Khu ginani gu vbwetegago gu hi manega Gidundrugisotunu nya gufe ga Kristo mwaga ni mwaga? b) Ginani hi na bhulago khigyo avba nya Sipimo 6 ni 7?

²¹ Manega Gidundrugisotunu nya gufe ga Kristo. Ga wutshigu nyo hegise Jesu na si gufi, hi hevbudzide gu khuye gu vbwetega gu hi dundruga gufa gwaye. Ho gu dundruga mwaga ni mwaga, nigu giphitsha gyogyo gyo ranwa pwani Gidundrugiso mwendro ‘Gilalelo gya Pfhumu.’ (1 Vakorinto 11:20; Matewu 26:26-28) Jesu o vbweta gu khuye hi dundruga gu khethu uye ningede womi waye nyo vbeleye gasi gu hi dzegisa. A di khuye: “Girani esi khu gialakanyo gyangu.” (Leri Luka 22:19.) Wo manega Gidundrugisotunu, wo yeyedza gu khuwe u ngu dundruga gudzegiswa ni lihaladzo nya likhongolo eli Jehovha ni Jesu va gu nalo khethu. — Wona Tshamuselo 16.

²² Gudzegiswa giningwa nya gikhongolo ga satshavbo esi hi kodzago gu si hakha. (2 Vakorinto 9:14, 15) Giningwa gyogyo nya lisima gi na phasa ambari dzimiliyoni nya vathu va fudego. Omu nya Sipimo 6 ni 7 hi na bhula khu edzi si na kodzegago khidzo isoso.