1, 2. a) I yini lexi yendlaka leswaku xihiwa xi va xa lisima ka wena? b) Hi mhaka muni nkutsulu ku li xihiwa xa lisima swinene lexi taka hi ka Xikwembu?

HI XIHI xihiwa xa lisima swinene lexi unga tshama uxi yamukela? Leswaku xihiwa xi va xa lisima, aswi lavi kuva xi dura. Loko xihiwa xiku tsakisa kumbe ku li nchumu lexi awuxi lava swinene, waxi tlangela.

² Kuhambana ni swihiwa swotala leswi Xikwembu se xihi nyikeke, ku ni xihiwa xin’we lexi hinkwerhu hixi lavaka kutlula hinkwaswu. I xihiwa xa lisima swinene lexi Xikwembu xihi nyikeke. Ka ndzima leyi, hita djondza leswaku Xikwembu xi rhumele n’wana wa xona, Yesu Kreste, leswaku hi kota kuhanya hilaha kunga heliki. (Lerha Matewu 20:28.) Hi kurhumela Yesu amisaveni leswaku a va nkutsulu, Yehovha a kombise leswaku wahi rhandza hakunene.

3. Hi mhaka muni vanhu va fa?

³ Nkutsulu i ndlela leyi Yehovha ayi tirhiseke leswaku a tshunxa vanhu ka xidjoho ni lifu. (Vaefesa 1:7) Leswaku hi twisisa xivangelo lexi yendlaka hi lava nkutsulu, hi fanele hi tiva leswi yendlekeke ka malembe yotala lama hundzeke le jaradi la Edeni. Vapsali va hina vosungula Adamu na Evha, va djohile. Hi mhaka ya leswi va djoheke, va file. Na hina ha fa hi mhaka leswi hinga tluletiwa xidjoho hi Adamu na Evha. — Vona Nhlamuselo 9.

4. Adamu a ali mani naswona Yehovha amu nyike yini?

⁴ Loko Yehovha a tumbuluxa wanuna wosungula Adamu,  amu nyike nchumu xa lisima swinene. A nyike Adamu wutomi lohetiseka. A ani miri ni mimpimiso leyi hetisekeke. Aangata tshuka a vabya, a guga, hambi ku li kufa. Leswi Yehovha a tumbuluxeke Adamu, Yena a ali b’ava ka Adamu. (Luka 3:38) Yehovha a avulavula na Adamu minkama hinkwayu. Xikwembu xi hlamusele Adamu hi ndlela leyi twisisekaka leswi axiswi nyimela ka yena naswona ximu nyike ntirho wotsakisa. — Genesa 1:28-30; 2:16, 17.

5. Bibele li lava kuvula yini loko li ku Adamu a vumbiwe “hi xifaniso xa Xikwembu”?

⁵ Adamu a tumbuluxiwe “hi xifaniso xa Xikwembu”. (Genesa 1:27) Yehovha a nyike Adamu wumunhu lofana ni la Yena; wumunhu lolelo li katsa lirhandzu, wutivi, wululami ni ntamu. A tlhele amu nyika tshunxeko wa kutilangela. Phela Adamu aanga fani ni reboti. Xikwembu ximu tumbuluxe ni wuswikoti la kulanga kuyendla leswinene kumbe leswobiha. Loko Adamu a alange kuyingisa Xikwembu, a ata va a hanye hilaha kunga heliki aParadeyisi laha misaveni.

6. A luzekeliwe hi yini Adamu hi kunga yingisi Xikwembu? Swihi khumbisa kuyini leswo?

⁶ Loko Adamu a lange kunga yingisi Xikwembu ivi a khatisiwa hi lifu, a koke kuvava swinene. A luzekeliwe hi wuxaka lohlawuleka leli a ali na lona na Yehovha, wutomi la yena lohetiseka ni munti wa yena wa Paradeyisi. (Genesa 3:17-19) Akungaha na tshembo ka Adamu na Evha hi leswi vanga langa kunga yingisi Xikwembu. Hi mhaka ya leswi Adamu aswi yendleke, ‘kudjoha kunghene misaveni hi munhu ali mun’we, na lona lifu linghenile hikolaho ka kudjoha, hi mukhuva wolowo lifu litlulele vanhu hinkwavu, hikuva hinkwavu vadjohile.’ (Varhoma 5:12) Loko Adamu a djohile, ati ‘xavisile’ a tlhela a xavisa  hinkwerhu ka wukarawa la xidjoho ni lifu. (Varhoma 7:14) Kunga va leswaku ku ni tshembo ka hina? Ina, wu kona.

7, 8. I yini nkutsulu?

⁷ I yini nkutsulu? Nkutsulu wu katsa swilo swimbirhi. Xosungula, i male leyi hakeliwaka leswaku kutshunxiwa munhu wokarhi kumbe kuhakeliwa nchumu xokarhi. Xa wumbirhi, i male leyi hakelaka ntsengo wa nchumu xokarhi.

⁸ Aku na munhu ni mun’we lweyi aata kota kuhakela leswi Adamu aswi yendleke loko a djohile ivi ahi tisela lifu. Kambe Yehovha a lunghiselele ndlela ya kuhi tshunxa ka xidjoho ni lifu. Ahi djondzeni hi ndlela leyi nkuntsulu wu tirhaka hi yona ni ndlela leyi wungahi pfunaka hi yona.

9. Nkutsulu awu ta hakelisiwa kuyini?

⁹ Aku na munhu ni mun’we ka hina lweyi aata kota kuhakela wutomi leli hetisekeke lelinga luziwa hi Adamu. Hi mhaka muni? Hikusa hinkwerhu ahi hetisekanga. (Tipisalema 49:7, 8) Nkutsulu awu fanele wu hakeliwa hi wutomi lin’wana leli ali hetisekile. Hi mhaka leyo kuvuliwa leswaku i ‘muponisi wa vanhu hinkwavu’. (1 Timotiya 2:6) Nkutsulu awu fanele wu va ni lisima leli fanaka ni wutomi lelinga luziwa hi Adamu.

10. Yehovha a yendle yini leswaku a lunghiselela nkutsulu?

¹⁰ Yehovha a yendle yini leswaku a lunghiselela nkutsulu? Yehovha a rhumele n’wana wa yena wa lisima swinene laha misaveni. Yesu aali xivumbiwa xosungula xa Yehovha. (1 Yohane 4:9, 10) Yesu aati nyimisele kusiya B’ava wa yena ni kaya la yena atilweni. (Vafilipiya 2:7) Yehovha a hundzisele wutomi la Yesu kusukela atilweni leswaku ata laha misaveni, ivi a psaliwa tani hi munhu wohetiseka, lweyi aanga na xidjoho. — Luka 1:35.

11. Aswita yendlekisa kuyini kuva munhu mun’we a va nkutsulu ka vanhu hinkwavu?

 ¹¹ Loko wanuna wosungula Adamu, a lange kunga yingisi Yehovha, a yendle leswaku vanhu hinkwavu va luzekeliwa hi wutomi leli hetisekeke. Akuta va ni munhu mun’wana lweyi aata susa lifu ka vana hinkwavu va Adamu? Ina. (Lerha Varhoma 5:19.) Yesu, lweyi a kalaka anga yendlanga xidjoho, a nyikele wutomi la yena lohetiseka tani hi nkutsulu. (1 Vakorinto 15:45) Wutomi la yena lohetiseka alita tirhisiwa leswaku li susa lifu ka vana hinkwavu va Adamu. — 1 Vakorinto 15:21, 22.

12. Hi mhaka muni Yesu a dlisiwe mbhinyeto?

¹² Bibele li hlamusela ndlela leyi Yesu a hluphekeke hi yona na angese fa. A biwe hi ndlela ya tihanyi, a gongondzeliwa amhandzini ya nxaniso ni kufa hakatsongokatsongo hi ndlela yovava. (Yohane 19:1, 16-18, 30) Hi mhaka muni Yesu a dlisiwe mbhinyeto? Hikusa Sathana a vule leswaku aku na munhu ni mun’we lweyi aata kota kutshembeka ka Xikwembu loko a li ka xiyimu xa kutika. Yesu a kombise leswaku munhu wohetiseka angaswi kota kutshembeka ka Xikwembu hambi a kumana ni swiyimu swotika. Pimisa hi ndlela leyi Yehovha ati bumeke hi yona loko a vona Yesu a tshembeka. — Swivuriso 27:11; vona Nhlamuselo 15.

13. Wu hakelisiwe kuyini nkutsulu?

¹³ Wu hakelisiwe kuyini nkutsulu? Yehovha a pfumelele leswaku valala va Yesu vamu dlaya hi 14 ka Nisani wa lembe la 33. (Vaheveru 10:10) Ndzhaku ka masiku manharhu, Yehovha a pfuxe Yesu tani hi munhu wa moya, kunga li wa nyama. Ndzhaku ka leswo, loko Yesu a tlhelele ka B’ava wa yena tilweni, a nyikele wutomi la yena lohetiseka ka Yehovha tani hi nkutsulu. (Vaheveru 9:24) Leswi nkutsulu se wunga hakeliwa, hi ni lunghelo lotsunxiwa ka xidjoho ni lifu. — Lerha Varhoma 3:23, 24.

14, 15. Hi fanele hi yendla yini leswaku swidjoho swa hina swi rivaleliwa?

¹⁴ Hakunene nkutsulu i xihiwa xa lisima lexi taka hi ka Xikwembu. Ahi voni tindlela leti hinga pfunekaka ha tona swoswi ni ka nkama lowu taka.

¹⁵ Hi rivaleliwa swidjoho swa hina. Swa karhata kuyendla leswinene minkama hinkwayu. Hi yendla swihoxo naswona minkama yin’wana hi vula hi tlhela hi yendla swilo swobiha. (Vakolosa 1:13, 14) Swidjoho swa hina swinga rivaleliwa hi ndlela yihi? Hi fanele hi tisola hi mbilu hinkwayu hi swihoxo leswi hiswi yendlaka, hi tlhela hi kombela ka Yehovha hi kutiveka hansi leswaku ahi rivalela. Loko hi yendla leswo, hinga tiyiseka leswaku swidjoho swa hina swita rivaleliwa. — 1 Yohane 1:8, 9.

16. Hi fanele hi yendla yini leswaku hi va ni lipfalu leli baseke?

¹⁶ Hita va ni lipfalu leli baseke. Loko lipfalu la hina lihi byela leswaku hi yendle swilo swobiha, hi titwa nandzu, hi heleliwa hi ntshembo kumbe hi titwa hi li swikangalafula. Kambe ahi fanelanga hi godola. Loko hi kombela ka Yehovha hi kuphindaphinda leswaku ahi rivalela, hinga tiyiseka leswaku atahi yingisa ni kuhi rivalela. (Vaheveru 9:13, 14) Yehovha a lava leswaku hi vulavula na yena hi swikarhato leswi hi kumanaka na swona ni loko hi hele ntamu. (Vaheveru 4:14-16) Loko hi yendla leswo, hita va ni kurhula na Yehovha.

17. Leswi Yesu angahi fela, hinga tikhorisa hi minkateko yihi ya kona?

¹⁷ Hi ni tshembo wa kuhanya hilaha kunga heliki. ‘Hakelo ya xidjoho i lifu, kambe nyiko leyinyikiwaka ntsena, leyihumaka ka Xikwembu, i vutomi lelingaheliki, ha Yesu Kriste Hosi ya hina.’ (Varhoma 6:23) Leswi Yesu angahi fela, hinga hanya hilaha kunga heliki hi tlhela hi  tikhorisa hi lihanyu la kahle. (Nhlavutelo 21:3, 4) Kambe hi fanele hi yendla yini leswaku hi tikhorisa hi minkateko yoleyo?

18. Hiswi tivisa kuyini leswaku Yehovha wahi rhandza?

¹⁸ Pimisa ndlela leyi u titwaka hi yona loko munhu wokarhi aku nyika xihiwa xa kusaseka. Nkutsulu i xihiwa xa lisima kutlula swilo hinkwaswu, kutani hi fanele himu tlangela Yehovha hi mbilu ya hina hinkwayu. Buku la Yohane 3:16 li vula leswaku “Xikwembu xirhandzile misava, lakakuva, xinyikele N’wana wa xona wa mun’we”. Ina, Yehovha ahi rhandza swinene lakakuva a nyikele N’wana wa yena wa lisima Yesu tani hi nkutsulu. Haswi tiva leswaku Yesu na yena wahi rhandza tani hi leswi hi kuswi rhandza a pfumeleke kutahi fela. (Yohane 15:13) Xihiwa xa nkutsulu xi fanele xiku tiyisekisa leswaku Yehovha na Yesu vaku rhandza hakunene. — Vagalatiya 2:20.

19, 20. a) Unga yendla yini leswaku u va munghanu wa Yehovha? b) Ungaswi kombisisa kuyini leswaku u ni lipfumelo ka nkutsulu?

¹⁹ Leswi se unga djondza hi lirhandzu leli Yehovha angahi kombisa lona, unga yendla yini leswaku u va munghanu wa yena? Aswi vevuki kurhandza munhu lweyi u kalaka ungamu tivi. Buku la Yohane 17:3 li vula leswaku swa koteka kutiva Yehovha. Loko u yendla leswo, lirhandzu la wena hi yena lita ya li kula, uta lava kumu tsakisa naswona uta va munghanu wa yena. Tama u djondza hi Yehovha ka Bibele. — 1 Yohane 5:3.

²⁰ Vana ni lipfumelo ka nkutsulu. Bibele li vula leswaku ‘lweyi apfumelaka ka N’wana a ni wutomi lelingaheliki’. (Yohane 3:36) Swi vula yini kuva ni lipfumelo? Swi vula kuyendla leswi Yesu ahi djondziseke. (Yohane 13:15) Ahi fanelanga hi vula ntsena leswaku ha kholwa ka Yesu. Kuva hi yamukela nkutsulu, hi fanele hi yendla xokarhi hi  lipfumelo la hina. Ka buku la Yakobo 2:26, hi kuma marito lamange: “Kupfumela nakona lokungahava mintirho kufile.”

21, 22. a) Hi mhaka muni hi fanele hiva kona ka Xitsundzuxu xa lifu la Yesu lembe ni lembe? b) Hita bula hi yini ka Ndzima 6 ni 7?

²¹ Yana ka Xitsundzuxu xa lifu la Yesu. Ka wusiku leli anga fa hi lona, Yesu a vule leswaku hi fanele hi khumbuka lifu la yena. Hi yendla leswo lembe ni lembe, naswona xiyendlakalo lexo xi vitaniwa Xitsundzuxu kumbe “Xilalelo xa Hosi”. (1 Vakorinto 11:20; Matewu 26:26-28) Yesu a lava kuva hi khumbuka leswaku a nyikele hi wutomi la yena tani hi nkutsulu. A te: ‘Yendlani leswi hi kuniyanakanya.’ (Lerha Luka 22:19.) Loko uva kona ka xitsundzuxu xa lifu la yena, u kombisa leswaku wawu khumbuka nkutsulu ni lirhandzu leli Yehovha na Yesu vanga na lona hi hina. — Vona Nhlamuselo 16.

²² Nkutsulu i xihiwa xa lisima swinene lexi hinga nyikiwaka xona kutlula hinkwaswu. (2 Vakorinto 9:14, 15) Xihiwa lexo xita pfuna vanhu votala lava se vanga fa. Ka Ndzima 6 ni 7 hita bula hi ndlela leyi leswo swinga kotekaka hi yona.