1, 2. a) ¿Náki jindeski sánderu ambakiti regalu engajtsï intsïnhaka cha? b) ¿Andisï euajpintskua sánderu ambakiti intsïmperakua máe engajtsïni Tata Diosï íntskuka?

¿NÁKI jindeski sánderu ambakiti regalu engajtsï intsïnhaka cha? Engaksïni regalu ma sési pʼikuastajka o ima ambeni engajtsï meru uétarhinchani japka, kánikuajtsï agradesidu pʼikuarherasïnga ini ambe jimbo.

² Iámindu ima amberi engajtsïni Tata Diosï intsïkuarhika, jarhasti ma engachi sánderu uétarhinchajka eska náki uéjki. Sánderu ambakiti intsïmperakua engajtsïni Tata Diosï íntskuka, jindesti enga axapka imeri Uájpani parajtsïni euajpintani. Ini euajpintskua jimbo, uákachi irekani para méntkisï (arhinta je Mateu 20:28). Enga ísï axaka Jesusini Echerirhu, Jeoba xarhatasti eskajtsïni kánikua xénchasïnga. Ini kapitulu jimbochi uánikua ambe jorhenguarhiaka i intsïmperakueri ambe.

3. ¿Andichisï uarhijki?

³ Euajpintskua, jindesti ambe ma enga Tata Diosï úrajka para pʼímutantaani kʼuiripuechani paraksï nóteru kʼamanharhintstinia ni uarhini (Efesu 1:7). Parachi kurhanguni andisï uétarhieni eskajtsïni nema euajpintapiringa, jatsiskachi para míteni ambe úkuarhispi ióntki jardini de Edenirhu, Adani ka Ebani jingoni, juchari orheta táticha. Imaksï pekarispti ka jimboksïsï uarhipti. Iámindu kʼuiripuechachi kérikuarhiska Adani ka Ebaeri pekaduni, jimbochisï uarhijka. (Exe je nota 9).

4. ¿Né jindespi Adani, ka na jásïspi imeri tsípikua enga perfektuepka?

⁴ Enga Jeoba kueraapka orheta kʼuiripuni Adanini, kánikua ambakiti ambe íntskuspti: tsípikua ma enga perfektuepka.  Adaniri kuerpu ka eratsekua perfektuespti. I ambe arhikuekasïrendi eska no méni pʼamenchapiringa, tʼarhepini ni uarhini. Jeoba ísïspti komu táti ma para Adani, jimboka ima kueraaspka (Lukasʌ 3:38). Tata Diosï someni uandontskuarhesïrendi Adani jingoni ka ístu, arhisïrendi ambe enga erokuarhienga Adaniri ambe. Ka ambakiti ánchikuarhita ma íntskuspti (Génesis 1:28-30; 2:16, 17).

5. ¿Ambe arhikuekasïni eska Adani ísï kueranhaspka eska Tata Diosï na jásïka?

⁵ Adani ísï kueraanhaspti eska Tata Diosï na jásïka (Génesis 1:27). I ambe arhikuekasïndi eska Jeoba úspka paraka úpiringa imani ambe xarhatani enga ima xarhatajka, komu uékpini, jánhaskatini ka jurhimbitini. Ístu, Adani no roboti máespti. Tata Diosï kueraaspti paraka úpiringa jandiajku erakuni ambe úni. Úpirindi erakuni ambakiti ambe úni o nómbe. Enga Adani erakupiringa kurhajchani Jeobani, irekapirindi para méntkisï Paraisurhu.

6. a) ¿Ambe úkuarhinchaspi Adani enga ísï no kurhajchapka Tata Diosïni? b) ¿Néna juchantsïni jamberi no sési úchiski?

⁶ Adani kánikua no sési jásï ambe úkuarhinchaspti enga ísï no kurhajchapka Tata Diosïni. Arhinhaspti eska uarhipiringa ka tsïtaspti ambakiti pájperakua enga Jeobani jingoni jatsipka. Nóteru perfektuesptia ka petanhantaspti Paraisurhu (Génesis 3:17-19). Enga Adani ísï no kurhajchapka Tata Diosïni, iáminduchi no sési ambe úkuarhinchaska. Biblia uandasïndi: “Ísï jimbo eska pekadu na juka parhakpinirhu, máechakua kʼuiripuni jimbo [Adani] ka pekaduni jimbo uarhikua, ka ísï uarhikua pakarani para iámindu kʼuiripuecha jimbokaksï iáminduecha pekadu úska” (Roma 5:12). Enga Adani pekaripka, ima ka ístu jucha jántspirichi úkuarhiska pekadueri ka uarhikueri (Roma 7:14). Para Adani ka Eba nóteru ma erokuarhikua jarhasptia, jimbokaksï erakuspka no kurhajchani Tata Diosïni. Peru ¿japirini erokuarhikua ma para jucha? Jo. Jeoba úspti ambe ma parajtsïni euajpintani.

7, 8. ¿Ambeski euajpintskua ma?

 ⁷ ¿Ambeski euajpintskua? Uáti tsimani ambeni. Orheta, euajpintskua jindesti meiampini na enga xáni uétarhiaka para jurajkunhani nema, o para intsïnhantani ambe ma. Segundu, Bibliarhu, euajpintskua arhikuekasïndi íntspintani ambe ma para meianhpintani na enga xáni uétarhiaka ambe ma jimbo enga no sési úkuarhika, ka jatsisti para májkueni jukaparhani eska ima ambe enga no sési úkuarhika.

⁸ No ma kʼuiripu enga kʼamanharhintstika úpirindi meiampintani o sési peentani iámindu imani no sési jásï ambe enga úkuarhipka jiáni enga Adani pekaripka ka engachi jimbo iásï niárajka uarhini. Peru Jeoba úspti ambe ma parajtsïni euajpintani parachi nóteru kʼamanharhintstinia ni uarhini. Ju je exeni néna úkuarhispi i euajpintskua ka nénajtsïni marhuachisïni.

9. ¿Ná jásï euajpintskua ma uétarhisïreni?

⁹ Paraksï kʼuiripuecha nóteru kʼamanharhintstinia ni uarhini, uétarhisïrendi meiampini na enga xáni jukaparhapka ima tsípikua enga Adani tsïtapka. Jimbosï ísï mítekateti komu “meiampini iáminduechani jimbo” xáni eska na xáni jukaparhapka (1 Timoteo 2:6). Ísï jimbo, uétarhisïrendi máteru kʼuiripueri tsípikua enga no ma kʼamanharhintskua jatsipiringa. Peru, eskachi na uandakia, juchachi no úpiringa meiampintani euajpintskuani. ¿Andi? Jimbokachi iáminduecha kʼamanharhintstiska (Salmo 49:7, 8).

10. ¿Ambe úspi Jeoba parajtsïni euajpintani?

¹⁰ ¿Ambe íntspispi Jeoba parajtsïni euajpintani? Axaspti Jesusini Echerirhu, imeri Uájpani enga sánderu xénchajka (1 Juanu 4:9, 10). Jesusi uékaspti jurajkuni Táti jembani ka ambe enga xáni jatsipka auandarhu (Filipusʌ 2:7). Jeoba, Marieri matrisirhu peeraspti Jesusiri tsípikuani. Ísï jimbo, Jesusi  niáraspti andajpenuni Echerirhu komu kʼuiripu ma enga no ma kʼamanharhintskua jatsipka (Lukasʌ 1:35).

11. ¿Nénachi míteski eska ma achamasïjku úpiringa euajpiantani iámindu kʼuiripuechani?

¹¹ Eskachi na exekia, orheta acheeti Adani, no kurhajchaspti Jeobani ka úspti eskachi iáminduecha tsïtapiringa ambakiti irekua ma. ¿Úpirini ma achamasïjku euajpiantani iámindu kʼuiripuechani? Jo. (Arhinta je Roma 5:19). ¿Néna úpirini ísï úni? Jesusi no méni no sési ambe úspti, jimbosï úpti íntspini imeri tsípikuani enga no ma kʼamanharhintskua jukarapka para úni eskaksï iámindu Adaniri uájpecha ma jurhiani nóteru uarhiakia (1 Korintu 15:21, 22, 45).

12. ¿Andisï Jesusi jatsipi para xáni kómu nitamakuarhini?

¹² Biblia uandasïndi na enga xáni kómu nitamapka Jesusi ante de uarhini. Nóksï sáni pʼamojkuspti atani, chkarirhuksï ma chaparhataspti ka kánikuaksï no sési kámaspti uándikuni (Juanu 19:1, 30, TDU). ¿Andisï Jesusi jatsipi para xáni kómu nitamakuarhini? Jimboka Satanasi uandaspka eska no ma kʼuiripu úpiringa marhuakuni Tata Diosïni enga kʼérati tsʼéjkukuechani jatsiapiringa. Peru Jesusi xarhataspti eska kʼuiripu ma enga no ma kʼamanharhintskua jatsika, uáka méntkisï marhuakuni Tata Diosïni nájkiruka jatsiaka para kánikua no sési nitamakuarhini. ¡Eranhaska je na enga xáni tsípini japka Jeoba Jesusini jimbo! (Proverbios 27:11). (Exe je nota 15).

13. ¿Ambe úkuarhispi para meiampinhani euajpintskua?

¹³ ¿Ambe úkuarhispi para meiampinhani euajpintskua? Jurhiatikua 14, ima kutsï jimbo engaksï judiuecha arhienga nisani uéxurhini 33 jimbo, Jeoba jurajkuspti eskaksï Jesusiri enemiguecha uándikupiringa Jesusini (Ebreu 10:10). Tanimu jurhiatikua tátsekua Jeoba tsítantaspti Jesusini. Tsítantaspti komueska espiritu ma, no komu kʼuiripu ma. Ka ambe enga últimu úkuarhipka para meiampintani euajpintskuani, Jesusi auandarhu níntaspti para Táti jemba jingoni jarhani (Ebreu 9:24). Tata Diosï jiókuarhispti ambe enga úpka  Jesusi enga ísï íntspipka imeri tsípikuani komueska kéjtsïtakua ma. Enga ísï meiampinhapkia euajpintskua, sésikuachi jatsiskia parachi ma jurhiani nóteru kʼamanharhintstinia ni uarhini (arhinta je Roma 3:23, 24).

14, 15. ¿Ambechi jatsiski para úni parajtsïni Jeoba puáchintani?

¹⁴ Euajpintskua, mámaru ambe jimbojtsïni marhuachisïndi. Ju je exeni néna engajtsïni i xáni ambakiti Tata Diosïri intsïmperakua marhuachijka iásï ka sánderu orhepani.

¹⁵ Úsïngachi puáminhantani pekaduechani. Úkua jukasti méntkisï sési ambe úni. No nema úsïndi jurhimbitku jámani ka ménichanisïchi úsïnga ka uandani imani ambe enga no sési jaka. Peru ¿nénachi uá puáminhantani? Jatsiskachi para mintsita jingoni moantani imani ambe jimbo engachi no sési úka ka kaxumbikua jingoni kurhakuni Jeobani eskajtsïni puáchintaaka. Engachi ísï uáka, uákachi seguru jarhani eskajtsïni Jeoba puáchintaaka (Kolosasi 1:13, 14; 1 Juanu 1:8, 9).

16. Parachi ambakiti konsiensia ma jatsini, ¿ambechi jatsiski para úni?

¹⁶ Uákachi ambakiti konsiensia ma jatsini. Engajtsïni juchari konsiensia arhijka eskachi no sési ambe úska, no sésichi pʼikuarherasïnga. Jamberichi asta ísï pʼikuarherani eskachi no ma ambe jukaparhakueska ka eskachi nóteru ambe ma uákia úni para sési péntani. Peru ju je no kuatantani. Engachi mintsita jingoni kómarhiska Jeobani eskajtsïni puáchintaaka, uákachi mintsikani eskajtsïni ima kurhauaka ka puáchintani (Ebreu 9:13, 14). Jeoba uékasïndi eskachi aianguaka náki uéjki uandanhiata ambe o imani ambe engachi no újka sési úni (Ebreu 4:14-16). Ísïchi uáka ambakiti konsiensia ma jatsini Tata Diosïni japarini.

17. Jesusiri uarhikua jimbo, ¿náki kóntperatechanchi uá jatsiani?

¹⁷ Uákachi irekani para méntkisï. “Meiampikua pekadueri jindes[ti] uarhikua, peru Diosïri intsïmperakua jindesti  tsípikua para méntkisï juchari tata Jesukristuni jimbo” (Roma 6:23). Enga Jesusi ísï uarhika, iásïchi erokuarhikua ma jatsiskia para irekani para méntkisï ka nóteru méni pʼamenchani (Jaŋaskuecha 21:3, 4). ¿Ambechi jatsiski para úni parachi ini kóntperatechani jatsiani?

18. ¿Andichisï seguru jaki eskajtsïni Jeoba xénchasïnga?

¹⁸ Miánta je na engachi xáni tsípijka engajtsïni nema sési jásï ambe intsïmbijka. Euajpintskua, intsïmperakua máesti enga sánderu jukaparhaka eska máteru regaluecha, ka jatsiskachi para kánikua agradeserikuni Jeobani indeni intsïmperakua jimbo. Juanu 3:16 uandasïndi: “Diosï xáni uéasti parhakpini anapuechani, ísï jimbosï íntspiti imeri máechakua Uájpani”. Ísïsti, Jeobajtsïni xáni uékasïndi enga íntspika imeri uájpani enga xáni xénchajka, Jesusini. Ka míteskachi eskajtsïni Jesusi ístu xénchasïnga, jimboka uékaspka uarhini juchantsïni jimbo (Juanu 15:13). Intsïmperakua enga jindeka euajpintskua xarhatachisïndijtsïni eskajtsïni Jeoba ka Jesusi meru xénchasïnga mándani arhini juchantsïni (Galasia 2:20).

19. ¿Ambejtsï uá úni parajtsï Jeobaeri amigueni?

¹⁹ Iásï engajtsï mítekia na engajtsïni xáni xénchajka Jeoba. ¿Ambejtsï uá úni cha parajtsï imeri amigueni? Míteni Jeobani. Úkua jukasïndi xénchani nemani engachi no míteaka. Jimbojtsïnisï Juanu 17:3 pʼímarhijti parachi míteni Jeobani. Engajtsï ísï úska, sánderujtsï xénchaaka, uékaakajtsï jaiapanherantani ka niáraati chári amigueni. Ísï jimbo, seguiri je sánderu sési míteni Jeobani Bibliaeri ambe jorhenguarhiparini (1 Juanu 5:3).

20. ¿Nénachi uá xarhatani eskachi jakajkusïnga euajpintskuani?

²⁰ Xarhata je eskajtsï jakajkusïnga euajpintskuani. Biblia arhisïndi eska ima enga “jakajkujka Diosïri Uájpani jatsis[ka] tsípikua para méntkisï” (Juanu 3:36). ¿Nénachi xarhatasïni eskachi jakajkusïnga? Imani ambe úparini enga Jesusi  jorhentpika (Juanu 13:15). No solu jindesti uandani eskachi jakajkusïnga Jesusini. Juchari úkuechaksï jatsisti para xarhatani eskachi jakajkusïnga euajpintskuani. Santiagu 2:26 uandasïndi eska “jakajkukua no jindesïnga jakajkukua enga nómbe úkuechani jingonijka”.

21, 22. a) ¿Andichisï jatsi para nirani mándani uéxurhini tata Jesukristueri uarhikueri Miántskuarhu? b) ¿Ambechi exea kapitulu 6 ka 7 jimbo?

²¹ Ní je tata Jesukristueri uarhikueri Miántskuarhu. Ima chúrikua ante de uarhini, Jesusi uandaspti eskachi miántapiringa imeri uarhikuani. Ka ísïchi úsïnga engachi mándani uéxurhini nirajka Miántskuarhu o ‘Tateeri Senarhu’ (1 Korintu 11:20; Mateu 26:26-28, TNM). Jesusi uékasïndi eskachi miántaaka eska ima íntspeska imeri tsípikuani parajtsïni euajpintani. Ima uandaspti: “Ú je ini ambe jíntsïni miántsparini” (arhinta je Lukasʌ 22:19). Engachi nirajka Miántskuarhu, xarhatasïngachi eskachi miásïnga euajpintskuani ka na engajtsïni xáni xénchajka Jeoba ka Jesusi. (Exe je nota 16).

²² No ma intsïmperakua jarhasti enga sánderu jukaparhakueka eska euajpintskua (2 Korintu 9:14, 15). Kapitulu 6 ka 7 jimbo, exeakachi néna enga euajpintskua ístu marhuakuauaka imani xáni uánikua kʼuiripuechani engaksï uarhikia.