1, 2. (a) Se a te mea e fai ei ke tāua se meaalofa ki a koe? (e) Kaia e fai ei te togiola e pelā me ko te ‵toe meaalofa sili a te Atua?

SE A te ‵toe meaalofa gali ne maua ne koe? E se manakogina ke ‵togi ‵mafa ‵ki se meaalofa ko te mea ke fakatāua ne koe. Kafai e fiafia koe ki se meaalofa io me se mea telā e manako malosi koe ki ei, e loto fakafetai eiloa koe ki ei.

² Mai meaalofa katoa kolā ne tuku mai ne te Atua ki a tatou, e isi se meaalofa telā e manakogina malosi ne tatou i lō so se mea aka. Ko te ‵toe meaalofa sili a te Atua ki tino. I te mataupu tenei, ka tauloto tatou me ne uga mai ne Ieova tena Tama, ko Iesu Keliso, ko te mea ke mafai o ola tatou ki te se-gata-mai. (Faitau te Mataio 20:28.) I te ugamaiga ne ia Iesu ki te lalolagi e pelā me se togiola, ne fakamaoni mai ei ne Ieova me alofa tonu a ia ki a tatou.

3. Kaia e ‵mate ei a tino?

³ A te togiola ko te auala ne fakatoka ne Ieova ke faka‵sao ei a tino mai te agasala mo te mate. (Efeso 1:7) Ke malamalama i te pogai ne manakogina ei te togiola, e ‵tau o iloa ne tatou a te mea ne tupu i se fia afe tausaga ko ‵teka i te fatoaga o Etena. A ‵tou mātua muamua ko Atamu mo Eva ne agasala. Ona ko lāua ne agasala, ne ‵mate ei lāua. A tatou e ‵mate me ne maua ne tatou te agasala mai i a Atamu mo Eva.—Onoono ki te Fakamatalaga Fakaopoopo i te 9.

4. Ko oi a Atamu, kae se a te mea ne maua ne ia?

⁴ I te taimi ne faite ei ne Ieova te tagata muamua ko  Atamu, ne tuku atu ne ia se mea tāua ‵ki ki a ia. Ne tuku atu ne ia ki a Atamu a te ola ‵lei katoatoa. Ne maua ne ia se mafaufau telā e ‵lei katoatoa mo se foitino ‵lei katoatoa. A ia ka se masaki, ka se fano o matua, kae ka se mate eiloa. Ona ko te mea ne faite ne Ieova a Atamu, ne fai a Ia e pelā me se tamana ki tou tagata. (Luka 3:38) Ne faipati faeloa a Ieova ki a ia. Ne fakamatala faka‵lei atu ne te Atua ki a Atamu a mea e manako a ia ki ei ke fai ne ia kae tuku atu ki a ia se galuega fakafiafia ke fai ne ia.—Kenese 1:28-30; 2:16, 17.

5. Se a te uiga o pati i te Tusi Tapu me i a Atamu ne faite “ki te fakatusa o te Atua”?

⁵ A Atamu ne faite “ki te fakatusa o te Atua.” (Kenese 1:27) Ne tuku atu ne Ieova ki a ia a uiga e pelā mo Ana uiga, e aofia i ei te alofa, poto, fakamaoni mo te malosi. Ne tuku atu ne ia ki a Atamu te saolotoga ke fai ana filifiliga. A Atamu e sē se masini. Ne faite ne te Atua a ia ko te mea ke mafai o filifili a ia ke fai te mea tonu io me ko te mea sē tonu. Moi fai ne filifili aka Atamu ke fakalogo ki te Atua, penei e ola eiloa a ia ki te se-gata-mai i te lalolagi Palataiso.

6. I te taimi ne seki fakalogo ei Atamu ki te Atua, ne a mea ne ‵galo atu mai i a ia? E pokotia pefea tatou i te mea tenei?

⁶ I te taimi ne seki fakalogo ei a ia ki te Atua kae fakasala ki te mate, ne ‵galo mai i a Atamu a mea e uke ‵ki. Ne galo atu tena va fakataugasoa pili mo Ieova, tena ola ‵lei katoatoa, mo tena fale gali ko te Palataiso. (Kenese 3:17-19) Ne filifili aka ne Atamu mo Eva ke se faka‵logo lāua ki te Atua, tela la, ko seai eiloa se fakamoemoega mō lāua. Ona ko te mea ne fai ne Atamu, “ne oko mai ei te agasala ki te lalolagi, mo te mate e auala i te agasala tenā, i te auala tenā ne maua ei ne tino katoa te mate i te mea ko agasala a latou katoa.” (Loma 5:12) I te taimi ne agasala ei Atamu, ne “fakatau” atu ne ia a ia eiloa pelā foki mo tatou ke pologa ki  te agasala mo te mate. (Loma 7:14) E mata, e isi se fakamoemoega mō tatou? Ao, e isi.

7, 8. Se a te togiola?

⁷ Se a te togiola? E aofia i te togiola a mea e lua. Muamua la, a te togiola ko te ‵togi telā e ‵togi atu ke fakasaoloto ei se tino io me ke ‵togi mai se mea. Te lua, a te togiola ko te ‵togi telā e fetaui ‵lei mo te mea telā e ‵tau o ‵togi.

⁸ E seai se tino e mafai ne ia o ‵togi a te fakamaseiga lasi ‵ki telā ne fai ne Atamu i te taimi ne agasala ei a ia kae aumai te mate ki luga i a tatou. Kae ne fakatoka mai ne Ieova se auala ke fakasaoloto ei tatou mai te agasala mo te mate. Ke tauloto nei tatou ki te auala e fakagalue ei te togiola mo tena aoga ki luga i a tatou.

9. E mafai pefea o ‵togi te togiola?

⁹ E seai se tino i a tatou e mafai o ‵togi ne ia te togiola ke maua mai te ola ‵lei katoatoa telā ne galo i a Atamu. Kaia? Me i a tatou katoa ne tino se ‵lei katoatoa. (Salamo 49:7, 8) E manakogina se isi ola ‵lei katoatoa ke mafai o ‵togi a te togiola telā e manakogina ke ‵togi. Tenā te pogai e fakaigoa ei ki “se togiola telā e fetaui tonu.” (1 Timoteo 2:6) E ‵tau o ‵pau a te tāua o te togiola mo te tāua o te ola telā ne galo i a Atamu.

10. Ne fakatoka pefea ne Ieova te togiola?

¹⁰ Ne fakatoka pefea ne Ieova te togiola? Ne uga mai ne Ieova a tena Tama pele ki te lalolagi. A te Tama tenei ko Iesu ko tena mea muamua eiloa ne faite. (1 Ioane 4:9, 10) Ne loto fiafia a Iesu ke tiaki ne ia tena Tamana mo tena fale i te lagi. (Filipi 2:7) Ne aumai ne Ieova a Iesu mai te lagi ki te lalolagi, kae ne fanau mai a Iesu e pelā me se tino, e aunoa mo se agasala.—Luka 1:35.

11. E mafai pefea o fai se tino e tokotasi pelā me se togiola mō tino katoa?

 ¹¹ Ne galo atu i tino katoa a te ola ‵lei katoatoa ona ko te sē fakalogo o te tagata muamua ko Atamu ki a Ieova. E mata, e isi se suā tino e mafai o tapale kea‵tea ne ia te mate mai i tama‵liki a Atamu? Ao. (Faitau te Loma 5:19.) A Iesu, telā e seki agasala eiloa, ne tuku atu ne ia tena ola e pelā me se togiola. (1 Kolinito 15:45) Ko mafai o fakaaoga a tena ola ‵lei katoatoa ke tapale kea‵tea a te mate mai i tama‵liki a Atamu.—1 Kolinito 15:21, 22.

12. Kaia ne ‵tau ei o logo‵mae malosi a Iesu?

¹² E fakamatala mai i te Tusi Tapu a te lasi o te logo‵mae o Iesu kae koi tuai ei o mate. Ne ‵kini fakamasei a ia, ne ‵tuki ki te pou fakasaua, kae kufaki i te mate fakalogo‵mae. (Ioane 19:1, 16-18, 30) Kaia ne ‵tau ei o logo‵mae malosi a Iesu? Me ne ‵losi mai a Satani me seai se tino e mafai o tumau i te fakamaoni ki te Atua mai lalo i tofotofoga matagā. Ne fakamaoni mai ne Iesu me e mafai eiloa o tumau se tagata ‵lei katoatoa i te fakamaoni ki te Atua faitalia a toe tulaga fakalogo‵mae. Ke mafaufau la ki te lasi o te fakamatamata o Ieova ona ko Iesu!—Faataoto 27:11; onoono ki te Fakamatalaga Fakaopoopo i te 15.

13. Ne ‵togi atu pefea te togiola?

¹³ Ne ‵togi atu pefea te togiola? Ne tuku atu ne Iesu ki tena Tamana a te tāua o tena ola. I te tausaga ko te 33, i a Nisani 14 i te kalena faka-Iutaia, ne talia ei ne Ieova ke tamate a Iesu ne ana fili. (Epelu 10:10) E tolu aso mai tua, kae toe fakatu aka ne Ieova a Iesu ki te ola, e pelā me se tino faka-te-agaga, kae e se pelā me se tino. Fakamuli ifo i te fokiatuga a Iesu ki tena Tamana i te lagi, ne tuku atu ne ia te tāua o tena ola ‵lei katoatoa e pelā me se tino ki a Ieova ke fai pelā me se togiola. (Epelu 9:24) Nei la, ko oti ne ‵togi atu a te togiola, ko maua ei ne tatou te avanoaga ke fakasaoloto mai te agasala mo te mate.—Faitau te Loma 3:23, 24.

14, 15. Ne a ‵tou mea e ‵tau o fai ke magalo ‵tou agasala?

¹⁴ Ko oti ne maua ne tatou a mea aoga mai te ‵toe meaalofa sili a te Atua. Ke onoono nei tatou ki te aoga o te togiola ki a tatou i te taimi nei e pelā foki mo aso mai mua.

¹⁵ Ko magalo ‵tou agasala. Se mea faigata ke fai te mea tonu i taimi katoa. E fai ne tatou a mea ‵se, kae i nisi taimi e fai‵pati io me fai ne tatou a mea sē ‵tonu. (Kolose 1:13, 14) E mafai pefea o fakamagalo ‵tou agasala? E ‵tau mo tatou o salamō tonu ki te mea ‵se ko oti ne fai ne tatou kae fakamolemole atu mo te loto maulalo ki a Ieova ke fakamagalo tatou. Tenā ko mafai ei o maua ne tatou te loto talitonu me ko magalo ‵tou agasala.—1 Ioane 1:8, 9.

16. Ne a ‵tou mea e mafai o fai ke maua se loto lagona ‵ma?

¹⁶ E mafai o maua ne tatou se loto lagona ‵ma. Kafai e fai mai ‵tou loto lagona me ne fai ne tatou se mea ‵se, ko oko mai ei se lagonaga logosala, kāti ko te loto vāivāi io me ko te lagonaga me ko seai se aoga. Kae e seai se pogai e ‵tau ei mo koe o ‵fiu. Kafai e akai atu tatou ki a Ieova ke fakamagalo tatou, e mafai o mautinoa i a tatou me e fakalogologo mai a ia kae fakamagalo ne ia tatou. (Epelu 9:13, 14) E manako Ieova ke fai‵pati atu tatou ki a ia e uiga ki ‵tou fakalavelave mo vāivāiga. (Epelu 4:14-16) Mai te faiga penā, ka mafai ei o maua ne tatou se va filemu mo te Atua.

17. Ne a fakamanuiaga ko mafai o maua ona ko te mate o Iesu mō tatou?

¹⁷ Ko maua ne tatou te fakamoemoega ke ola ki te se-gata-mai. “Te ‵togi o te agasala ko te mate, kae ko te meaalofa telā e tuku mai ne te Atua ko te ola se-gata-mai i a Keliso Iesu te ‵tou Aliki.” (Loma 6:23) Ona ko Iesu ne mate mō tatou, ko mafai ei o ola tatou ki te se-gata-mai kae maua te malosi ‵lei katoatoa. (Fakaasiga 21:3, 4) Kae ne a ‵tou mea e ‵tau o fai ke maua a fakamanuiaga konā?

18. E iloa pefea ne tatou me e alofa mai a Ieova ki a tatou?

¹⁸ Ke mafaufau ki te otia o tou loto māfai ko tuku atu ne se tino se meaalofa gali ma koe. A te togiola ko te ‵toe meaalofa tāua eiloa, kae e ‵tau o lasi ‵ki te ‵tou loto fakafetai ki a Ieova mō te mea tenei. E fai mai te Ioane 3:16 me “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi.” Ao, e alofa malosi a Ieova ki a tatou tenā ne tuku mai ei ne ia tena Tama pele, ko Iesu. Kae e iloa ne tatou me e alofa mai foki a Iesu ki a tatou, me ne loto fiafia a ia ke mate mō tatou. (Ioane 15:13) E ‵tau o fakatalitonu atu ne te meaalofa ko te togiola me i a Ieova mo Iesu e a‵lofa tonu ki a koe.—Kalatia 2:20.

19, 20. (a) E mafai pefea o fai koe mo taugasoa o Ieova? (e) E fakaasi atu pefea ne koe me ko talia ne koe te taulaga togiola a Iesu?

¹⁹ Ko oti nei ne tauloto koe e uiga ki te lasi o te alofa o te Atua, kae e mafai pefea o fai koe mo fai tena taugasoa? E se faigofie ke alofa koe ki se tino telā e se iloa ne koe. E fai mai te Ioane 17:3 me e mafai o iloa ne tatou a Ieova. Kafai e fai koe penā, ka gasolo aka loa o ‵poko tou alofa mō ia, ka manako eiloa koe o fakafiafia a ia, kae ka fai koe mo fai tena taugasoa. Tela la, ke tumau i te tauloto e uiga ki a Ieova mai te sukesuke ki te Tusi Tapu.—1 Ioane 5:3.

²⁰ Ke talia te taulaga togiola a Iesu. E fai mai te Tusi Tapu me ko “te tino telā e fakaasi atu faeloa ne ia te fakatuanaki ki te Tama e maua ne ia te ola se-gata-mai.” (Ioane 3:36) Se a te uiga o te fakaasi atu faeloa te fakatuanaki? E fakauiga ki te faiga o mea kolā ne akoako mai ne Iesu ke fai ne tatou. (Ioane 13:15) E se mafai ne tatou o fai atu fua me e tali‵tonu tatou ki a Iesu. Ke talia te togiola, e isi ne mea e ‵tau o fai ne tatou ki ‵tou fakatuanaki. I te Iakopo 2:26, e fai‵tau  tatou penei: “Te fakatuanaki e mate māfai e seai ne galuega.”

21, 22. (a) Kaia e ‵tau ei o ‵kau atu tatou ki te Fakamanatuga o te mate o Keliso i tausaga katoa? (e) Ne a mea ka sautala tatou ki ei i te Mataupu e 6 mo te 7?

²¹ Kau atu ki te Fakamanatuga o te mate o Keliso. I te po mai mua o mate a Iesu, ne akoako mai a ia me e ‵tau o fakamanatu ne tatou tena mate. E fai ne tatou te mea tenei i tausaga katoa, kae e taku ko te Fakamanatuga io me ko “te ‵Kaiga a te Aliki i te Afiafi.” (1 Kolinito 11:20; Mataio 26:26-28) E manako Iesu ke masaua ne tatou me ne tuku atu ne ia tena ola ‵lei katoatoa e pelā me se togiola mō tatou. Ana muna: “Ke fai faeloa te mea tenei mo fai se fakamasauaga ki a au.” (Faitau te Luka 22:19.) Kafai e kau atu koe ki te Fakamanatuga, e fakaasi atu ei ne koe me e masaua ne koe te togiola mo te lasi o te a‵lofa o Ieova mo Iesu ki a tatou.—Onoono ki te Fakamatalaga Fakaopoopo i te 16.

²² A te togiola ko te ‵toe meaalofa sili e maua ne tatou. (2 Kolinito 9:14, 15) Ka aoga foki eiloa te meaalofa tāua tenā ki te fia miliona o tino kolā ko oti ne ‵mate. Ka fakamatala mai i te Mataupu e 6 mo te 7 a te aoga o te mea tenā.