1, 2. (a) Cinyi cinoita kuti mureremedze cipo camunonga mapaswa? (b) Ngei rusudzunuro cipo cikuru ca Mwari?

NDECIPI cipo cikuru camakambopaswa? Cipo acidikani kudhura maningi kuti mucireremedze. Cipo cinomupfadzai kana ciri ciro camaida kamare, zve zvirokwazvo munotenda maningi munhu wamupasewo.

² Pa zvipo zvese zvatakapaswa na Mwari, pano cimwe catinoda maningi kupinda zvese. I cipo cikuru ca Mwari ku anhu. Mu fundo ino ticaona kuti Djehovha akatuma Mwana wake, Djesu Kristu, kuti tirarame nokusikaperi. (Erengai Mateu 20:28.) Paakatuma Djesu kuti atifire, Djehovha akapangidzira kuti zve zvirokwazvo anotida.

3. Ngei anhu ecifa?

³ Rusudzunuro gwanza rinoseenzeswa na Djehovha kuti asudzunure anhu pa citema no rufu. (Aefeso 1:7) Kuti tizwisise kuti ngei kaidikanwa rusudzunuro tinodikana kuziya cinyi cakaitika mu nguwa ye kare-kare mu munda we Edheni. Madzibaba edu okutanga Adhamu na Evha akaita citema. Nge ndaa yazvo, awona akafa. Isusu tinofawo ngokuti takagara nhaka ye citema ca Adhamu na Evha.—Onai pakazwi Nyasai Kuzwisisa n.^o 8.

4. Adhamu ainga ari ani uye zvinyi zvainga akapaswa?

⁴ Djehovha paakasika munhu okutanga, Adhamu,  akamupasa ciro cakanaka maningi. Akamupasa upenyu wakakwana. Ndangariro dzake no muiri wake zvainga zvakakwana. Izvi zvinoreya kuti ainga asikazorhwari, kucembera kana kufa. Djehovha ndiye ainga asika Adhamu, hino ainga ari Baba kaari. (Ruka 3:38) Djehovha aireketa naye nguwa dzese. Ecimupanganidzira zvakadjeka zvaaidikana kuita uye akamupasa basa rinodakadza.—Genesi 1:28-30; 2:16, 17.

5. Bhaibheri ririkuda kureyei parinobhuya kuti Adhamu akasikwa ne “mufanikiso wa Mwari”?

⁵ Adhamu akasikwa ne “mufanikiso wa Mwari.” (Genesi 1:27) Djehovha akamusika ecikwanisa kumuteedzera pa zviro zvakadai hinga rudo, uzii, unatsi no simba. Akapasa Adhamu rusununguko re kusanangura zvaanoda kuita. Adhamu ainga asiripi hingana mucini. Mwari akamusika ecikwanisa kuita zvakanaka kana zvakashata. Kudai Adhamu akasanangura kuzwira Mwari aida kurarama mu Paradhizo nokusikaperi.

6. Adhamu na Evha paakatama kuzwira Mwari, akaruzei? Zvinotibatanidzawo kudini?

⁶ Paakatama kuzwira Mwari otongerhwa rufu, Adhamu akaruza zviro zvakawanda. Iyena akaruza ushamwari wakanakisisa na Djehovha, upenyu wakakwana uye muzi wake mu Paradhizo. (Genesi 3:17-19) Adhamu na Evha akasanangura kutama kuzwira Mwari, ngokudaro ainga asina kariro. Nge ndaa ye zvakaizwa na Adhamu “citema cakapinda mu nyika uye rufu rakapinda nge ndaa ye citema, ngokudaro rufu rakabararika ku anhu ese ngokuti ese ainga akaita citema.” (Aroma 5:12) Adhamu paakaita citema “akadzitengesa” iyena na isusu ku uranda wo citema no rufu. (Aroma 7:14) Asi kuno kariro katiri here? Honde, iriyo.

7, 8. Cinyi cinozwi rusudzunuro?

 ⁷ Soko rekuti rusudzunuro rinoreyei? Rusudzunuro rinobatanidza zviro zviiri. Cokutanga, rusudzunuro mutengo unoriphwa kuti pasudzunurhwe munhu kana kutengazve ciro. Cecipiri, rusudzunuro mutengo unofukidza kana kuripa ciro cinonga cagudjuka.

⁸ Apana munhu angakwanisa kuripa zvakakuwadzwa na Adhamu paakaita citema zvotiunzisira rufu. Asi Djehovha akatifunungurira gwanza kuti atisudzunure pa citema no rufu. Ngationei zvino kuti rusudzunuro rinoseenza kudini uye rinotibetsera kudini.

9. Rusudzunuro raidikanwa kuriphwa no munhu wakadini?

⁹ Apana kana na umwe wedu angakwanisa kuripa rusudzunuro ro upenyu wakakwana wakaruzwa na Adhamu. Ngei? Ngokuti tese tino citema. (Pisarema 49:7, 8) Rusudzunuro raidikanwa kuriphwa ne munhu ano upenyu wakakwana. Ndiyo ndaa rinozwi “rusudzunuro rinoenderana.” (1 Timoti 2:6) Rusudzunuro raidikana kuezana no mutengo wo upenyu wakaruzwa na Adhamu.

10. Djehovha akaripa kudini rusudzunuro?

¹⁰ Djehovha akaita kudini kuti rusudzunuro ririphwe? Djehovha akatuma mwana wake waanodisa kuti auye pa nyika. Mwana uu, Djesu, ndiye cisikwa cake cekutanga. (1 Juau 4:9, 10) Djesu ainga akagadzirira kusiya Baba ake no muzi wake wo kudenga. (Afiripi 2:7) Djehovha akacinja Djesu kudenga kuti auye pa nyika, uye Djesu akabarhwa hinga munhu akakwana, asina citema.—Ruka 1:35.

11. Zvingaita kudini kuti munhu umwe basi aripire anhu ese?

¹¹ Mwanarume okutanga, Adhamu, paakatama kuzwira  Djehovha akaita kuti anhu ese aruze upenyu wakakwana. Kodi pano munhu umweni here waizokwanisa kubvisa rufu ku ana ese a Adhamu? Honde. (Erengai Aroma 5:19.) Djesu asina kumboita citema akapasa upenyu wake kuti tisudzunurhwe. (1 Akorinti 15:45) Upenyu wake wainga wakasisira kuseenzeswa kuti ubvise rufu ku ana ese a Adhamu.—1 Akorinti 15:21, 22.

12. Ngei Djesu aidikana kushuphika maningi?

¹² Bhaibheri rinopanganidza matambudzikire akaita Djesu asati afa. Akabvengwa zve bvinga, akakhomerhwa pa mutanda wo kutambudzikira uye akaithwa kuti afe padoko-padoko zvinorhwadza. (Juau 19:1, 16-18, 30) Ngei Djesu aidikana kushuphika kudaro? Ngokuti Sathani ainga akareketa kuti apana munhu aizogara akatendeka kuna Mwari kudai ecisongana no miedzo dzakakura. Djesu akapangidza kuti munhu akakwana anokwanisa kugara akatendeka kunyazi eciedzwa zvakakura. Rangarirai kudada kakaita Djehovha paaiona Djesu ecirumbwa akatendeka!—Zvierengo 27:11; onai pakazwi Nyasai Kuzwisisa n.^o 14.

13. Rusudzunuro rakariphwa kudini?

¹³ Rusudzunuro rakariphwa kudini? Djesu akapasa Baba ake mutengo we upenyu wake. Mu gore ra 33, tsiku 14 ye mwedzi wa Nisani we Cidjudha, Djehovha akasiya kuti azondi a Djesu amuuraye. (Ahebheru 10:10) Mu masure me mazuwa matatu Djehovha akamutsa Djesu no muiri we mwiya, haiwa we nyama. Pedzepo Djesu akazohwirira kuna Baba ake kudenga, iyena akapasa upenyu wake wakakwana kuna Djehovha hinga rusudzunuro. (Ahebheru 9:24) Hino rusudzunuro zvarakariphwa, tino mukana wo kusudzunurhwa pa citema no rufu.—Erengai Aroma 3:23, 24.

14, 15. Cinyi catinodikana kuita kuti tirekererhwe zvitema zvedu?

¹⁴ Isusu zvino uno taakubetserhwa no cipo cikuru ca Mwari. Ngationei kuti tiri kubetsereka kudini zvino uye ticabetserhwa kudini mberiyo.

¹⁵ Kurekererhwa pa zvitema. Atikwanisi kuita zvakanaka nguwa dzese. Pamweni paya tinoshaisha uye nguwa dzimweni tinoreketa kana kuita zviro zvakashata. (Akorosi 1:13, 14) Tinodikana kuitei kuti tirekererhwe? Tinodikana kucinyuka zve zvirokwazvo pazviya zvatinoita zvakashata uye tecidzidodosa tokumbira kurekererhwa na Djehovha. Kana tikadaro tinonga taanorungodo rekuti zvitema zvedu zvarekererhwa.—1 Juau 1:8, 9.

16. Tinodikana kuitei kuti tigare no hana yakacena?

¹⁶ Tinogara no hana yakacena. Kana hana yedu yecititonga kuti taita ciro cakashata, tinodzipasa ndaa, pamweni paya tinotopera kariro kana kusazvireremedza. Asi atidikani kuzwa kudaro. Kana tikakumbira kurekererhwa na Djehovha, ngatigondei hedu kuti acatizwa uye acatirekerera. (Ahebheru 9:13, 14) Djehovha anoda kuti timubvunze zviri kutinesa no zviya zvatisikakwanisi kuita ngo mwazvo. (Ahebheru 4:14-16) Izvi zvicaita kuti tigare mu runyararo na Mwari.

17. Makomborero api aticapaswa nge ndaa ye rufu ra Djesu?

¹⁷ Tinogara no kariro yo kurarama nokusikaperi. “Ngokuti mubairo we citema rufu, asi cipo cinopiwa na Mwari eciseenzesa Djesu Kristu, Tenzi wedu, upenyu usikaperi.” (Aroma 6:23) Ngokuti Djesu akatifira, tinokwanisa kurarama nokusikaperi tino uthongo wakakwana. (Zvakapangidzwa 21:3, 4) Asi cinyi catinodikana kuita kuti tipaswe makomborero aya?

18. Tinoziya kudini kuti Djehovha anotida?

¹⁸ Cimborangarirai kuti mwoyo wenyu unozwa zvakadini kana munhu akamupasai cipo cakanakisisa. Rusudzunuro ndico cipo cakanakisisa kupinda zvese, ndiyo ndaa, tinodikana kutenda Djehovha no mwoyo wese. Juau 3:16 inoti: “Mwari akada maningi nyika, zvokuti akapasa Mwana wake umwe ega.” Honde, Djehovha anotida maningi zvokuti akatipasa Mwana wake wo pamwoyo, Djesu. Uye tinoziya kuti Djesu anotidawo ngokuti ainga akagadzirira kutifira. (Juau 15:13) Cipo ce rusudzunuro cinodikana kutigondesa kuti Djehovha na Djesu anotida zve zvirokwazvo.—Agaratiya 2:20.

19, 20. (a) Munodikana kuitei kuti mugare shamwari ya Mwari? (b) Mungapangidzira kudini kuti munotenda rusudzunuro?

¹⁹ Hino zvamapedza kufunda nge zve rudo rikuru ra Mwari, munodikana kuitei kuti mugare shamwari yake? Zvinoshupha kuda munhu wamusikazii. Juau 17:3 inoreketa kuti tinokwanisa kuguma pakuziya Djehovha. Pamunoita izvi, rudo renyu ricakura zvokuti mucada kuita zvaanoda, izvi zvicaita kuti mugare shamwari yake. Hino bambirai kufunda nge zva Djehovha muciseenzesa Bhaibheri.—1 Juau 5:3.

²⁰ Pangidzirai kuti munotenda cibairo ca Djesu. Bhaibheri rinoreketa kuti “anotenda Mwana acaona upenyu usikaperi.” (Juau 3:36) Kutenda Mwana zvinoreyei? Zvinoreya kuita zvese zvatakafundiswa na Djesu kuti tiite. (Juau 13:15) Azvikwani kureketa basi kuti tinotenda Djesu. Pano zvatinodikana kuita kuti tipangidze  kuti tinotenda cipo ce rusudzunuro. Pana Tiyago 2:26, panoti: “Kutenda kusina zviito kakafa.”

21, 22. (a) Ngei Tinodikana kupinda musangano we Cirangaridzo makore ese? (b) Mu Fundo 6 no 7 ticafundei?

²¹ Pindai misangano we cirangaridzo ce rufu ra Djesu. Usiku asati auraiwa, Djesu akatifundisa kuti tinodikana kuungana kuti tirangaridze rufu rake. Tinoita izvi makore ese zvecidainzwa Cirangaridzo kana “Kurarira ka Tenzi.” (1 Akorinti 11:20; Mateu 26:26-28) Djesu anoda kuti tiedzurire kuti akatipasa upenyu wake wakakwana. Iyena akati: “Rumbwai meciita izvi kuti mundirangarire.” (Erengai Ruka 22:19.) Kana mukapinda musangano we Cirangaridzo, mucapangidza kuti munorangaridza rusudzunuro no rudo rikuru rino Djehovha na Djesu katiri.—Onai pakazwi Nyasai Kuzwisisa n.^o 15.

²² Rusudzunuro cipo cikuru catingatambira. (2 Akorinti 9:14, 15) Cipo ici cakanakisisa cicatobetserawo zviuru no zviuru zve anhu akafa. Fundo 6 no 7 icapanganidza kuti izvi zvingaitika kudini?