1, 2. а) Кандыг белекти эң эки деп болур силер? б) Төлевирни Бургандан чүге эң үнелиг белек деп болур?

КАНДЫГ белекти эң эки деп болур силер? Ол белек силерни өөрткен база ёзулуг ажыктыг болган чадавас. Ооң өртээ албан аар болбас.

² Бурган биске хөй-ле белектерни берген. Ындыг-даа болза, оларның бирээзи онзагай, чүге дизе ол белек бүгү кижи төрелгетенге чугула херек турган. Бо эгеде Иегованың Бодунуң Оглун, Иисус Христосту, черже чоргусканын база кижилерни мөңге чурттазын дээш, Иисустуң амы-тынын төлевир кылдыр бергенин чугаалап турар. (Номчуптуңар: Матфей 20:28.) Иегова ону бис дээш кылган. Ынчалдыр Ол биске Бодунуң ынакшылын бадыткаан.

3. Кижилер чүге өлүп турар?

³ Төлевир дээрге Иегованың кижилерни бачыт биле өлүмден хостап алыр дээш төлээн өртээ-дир (Эфесчилерге 1:7). Бисти хостап алыры чүге негеттине бергенин билип алыр дээш, каш муң чыл бурунгаар Эдем сесерлиинге чүү болганын көрүптээлиңер. Бистиң өгбелеривис, Адам биле Ева, бачыт үүлгеткеш, өлүп калган. Шупту улус бачытты олардан салгап алган болгаш, өлүп турар. (9 дугаар Капсырылганы көрүңер.)

4. Адамның дугайында Библиядан чүнү билир бис?

 ⁴ Иегова бир дугаар кижини, Адамны, тергиин кылдыр чаяап каан. Ооң угааны болгаш мага-боду тергиин турган. Ол кажан-даа аарывас, кырывас, өлбес турган ийик. Иегова Адамны чаяаган, ынчангаш Ол ооң Адазы (Лука 3:38). Иегова Адам-биле үргүлчү чугаалажып турган. Ынчангаш Адам Бурганның негелделерин эки билир чораан. Бурган аңаа солун ажылды берген (Эге дөс 1:28—30; 2:16—17).

5. Адам кандыг уткалыг Бурганның «овур-хевиринге» дөмейлештир чаяаттынган?

⁵ Адам Бурганның «овур-хевиринге» дөмейлештир чаяаттынган (Эге дөс 1:27). Иегова аңаа Бодунда ышкаш шынарларны, оларның санында ынакшылды, мерген угаанны, чөптүг чорукту болгаш күштү берген. Бурган аңаа хостуг эргени база берген, ону робот дег кылдыр чаяаваан. Шын азы шын эвес алдынарын Адам боду шиитпирлеп болур турган. Бир эвес Адам Бурганга дыңнангыр арткан болза, ол кезээ-мөңгеде дываажаңга чурттаар ийик.

6. Адам Бурганны дыңнавайн баргаш, чүнү чидирип алган? Ол чүүл бистиң чуртталгавыска кандыг салдарлыг болган?

⁶ Ынчалза-даа Адам Бурганга дыңнангыр эвес болганындан Иегова-биле чоок найыралын болгаш дываажаңга тергиин чуртталгазын чидирип алган. Түңнелинде ону чүгле өлүм манап турган (Эге дөс 3:17—19). Адам биле Ева дыңнангыр эвес болганындан мөңге чурттаар идегелин кезээ-шагда ышкынган. Ынчалдыр «бачыт бо делегейже чаңгыс кижи дамчып кирип келген, а бачыт-биле кады — өлүм база; а өлүм бүгү улустуң салым-хуузу апарган, чүге  дээрге шупту улус бачыт үүлгеткен» (Римчилерге 5:12). Адам бачыт кылгаш, бодун-даа, бисти-даа бачыт биле өлүмнүң кулданыынга «садыпкан» (Римчилерге 7:14). Ынчаарга бисте идегел бар бе? Ийе, бар.

7, 8. Төлевир деп чүл ол?

⁷ Төлевир деп чүл ол? Төлевир дээрге бир-ле кижини кулданыгдан хостаарда азы кандыг-бир этти эгидип алырда төлээр өртек-тир. Төлевир чидиригниң өртек-үнезинге дең болур ужурлуг.

⁸ Адамның бачыт кылгаш чидирип алган тергиин чуртталгазын чаңгыс-даа бачыттыг кижи эгидип шыдавас. Ынчалза-даа Иегова бисти бачыт биле өлүмден хостаар арганы тып алган. Төлевирни канчаар төлээнин база бистиң чуртталгавыска ооң кандыг салдар чедирип болурун билип алыылыңар.

9. Төлевир кандыг болур ужурлуг турган?

⁹ Бистиң кайывыс-даа Адамның чидирип алган тергиин чуртталгазын катап эгидип шыдавас. Чүге? Чүге дээрге шупту тергиин эвес бис (Ырлар 48:8, 9). Библиядан алырга, төлевир кылдыр чүгле тергиин кижиниң амы-тыны херек турган. Ынчангаш Иисус «Бодун өргээн», чүге дизе ооң чуртталгазы Адамның чидирип алган тергиин чуртталгазынга дөмей (1 Тимофейге 2:6).

10. Төлевирни төлээр дээш, Иегова чүнү кылган?

¹⁰ Төлевирни төлээр дээш, Иегова чүнү кылган? Иегова Бодунуң бир дугаар чаяап алган эң  эргим Оглун, Иисус Христосту, черже чорудупкан (1 Иоанн 4:9, 10). Иисус Адазының чанынга дээрге чурттаар аргазындан эки туразы-биле ойталаан (Филипчилерге 2:7). Иегова Иисустуң чуртталгазын дээрден черже көжүрүптерге, ол тергиин кижи бооп төрүттүнген (Лука 1:34).

11. Кым-бир кижи бүгү улус дээш, төлевирни берип шыдаар турган бе?

¹¹ Адам Бурганны дыңнавайн баргаш, чүгле бодунуң эвес, а бүгү салгалдарының мөңге чурттаар аргазын ышкынган. Кым-бир кижи Адамның үре-салгалын өлүмден хостап шыдаан бе? Ийе. (Номчуптуңар: Римчилерге 5:19.) Ону Иисус Христос кылган. Ол бодунуң тергиин чуртталгазын төлевир кылдыр берген (1 Коринфичилерге 15:45). Ооң ачызында Адамның үре-салгалы өлүмден хосталып болур (1 Коринфичилерге 15:21, 22).

12. Иисус Христос чүге хилинчектенир ужурлуг турган?

¹² Иисус Христостуң өлүрүнүң мурнунда чүнү шыдажып эрткенин Библияда бижээн: ону каржы-дошкуну-биле кымчылап, чагыга хере шапкаш, хилинчектенип өлүр кылдыр арттырып каан (Иоанн 19:1, 16—18, 30). Иисус чүге ынчаар хилинчектенир ужурлуг турган? Чүге дизе шенелделерге таварышкаш, чаңгыс-даа кижи Бурганга бердинген бооп артып шыдавас деп, Эрлик чугаалаан. Тергиин кижи аар-берге шенелделерге-даа таварышкаш, Бурганга бердингенин кадагалап шыдаар деп, Иисус Христос бадыткаан. Иегованың Иисусту көргеш, кайы хире чоргаарланганын бодап көрүңер даан! (Чугаалар 27:11; 15 дугаар Капсырылганы көрүңер).

13. Төлевир канчаар төлеттингенил?

 ¹³ Төлевир канчаар төлеттингенил? Еврей календарь-биле алырга, б. э. 33 чылдың 14 нисанда Иисус өлүрткен (Еврейлерге 10:10). Иисусту шаажылаанының соонда, үшкү хүнде, Иегова ону кижи кылдыр эвес, а көзүлбес хуу-бот кылдыр диргизипкен. Ындыг-даа болза, Иисус чер кырынга тергиин кижи бооп чурттаар эргелиг арткан. Ол эргезин Иисус дээрде Адазынче эглип келгеш, Аңаа хүлээткен. Төлевир ынчаар төлеттинген (Еврейлерге 9:24). Иегова төлевирни хүлээп алырга, Адамның үре-салгалынга бачыт биле өлүмден хосталыр арга тыптып келген. (Номчуптуңар: Римчилерге 3:23, 24.)

14, 15. Бачыттарывыс дээш өршээлди алыр дизе, чүнү канчаар ужурлуг бис?

¹⁴ Төлевирни Бургандан эң үнелиг белек деп билип алдывыс. Төлевирниң төлеттингени амгы үеде чуртталгавысче база келир үевисче кандыг салдар чедирерин көрээлиңер.

¹⁵ Бачыттарның өршээттинери. Кезээде шын алдынары болдунмас деп чөпшээрежир боор силер. Бо-ла чазыптар бис: бир-ле багай чүүлдү чугаалап азы кылып болур бис (Колосчуларга 1:13, 14). Частырыгларывыс дээш өршээлди канчаар ап болур бис? Чазыпканывысты сеткиливистен хараадап, биче сеткилдии-биле Иеговадан өршээрин дилээр болзувусса, Ол бистиң бачыттарывысты өршээптеринге бүзүреп болур бис (1 Иоанн 1:8, 9).

16. Арын-нүүрүвүс арыг болзун дээш, чүнү кылыр ужурлуг бис?

 ¹⁶ Арыг арын-нүүр. Бир-ле шын эвес чүүлдү кылып турувуста, арын-нүүрүвүс бисти хилинчектеп эгелээр. Боттарывысты буруулуг кылдыр миннип, чүнү-даа эдип шыдавас бис деп бодаар бис. Ынчалза-даа шупту чүве ындыг-ла багай эвес. Бир эвес Иеговадан өршээлди чаннып дилээр болзувусса, Ол бисти дыңнаар база өршээр деп бүзүреп болур бис (Еврейлерге 9:13, 14). Бергелеривисти, кошкак талаларывысты база частырыгларывысты Аңаа чугаалаарын Иегова күзеп турар (Еврейлерге 4:14—16). Ынчаар кылгаш, Бурган-биле найыралывысты чидирбес бис.

17. Христостуң өргүлүнүң ачызында кандыг йөрээлдерни ап болур бис?

¹⁷ Мөңге чурттаар идегел. «Чүге дээрге бачыттың төлээн төлевири — өлүм, а Бурганның ачы-буянныг белээ — Дээргивис Христос Иисуска башкарткан мөңге амыдырал болгай» (Римчилерге 6:23). Христостуң өргүлүнүң ачызында кажан-даа аарып-аржывайн, мөңге чурттаар бис (Ажыдыышкын 21:3, 4). Ол йөрээлдерни алыр дизе, чүнү канчаар ужурлуг бис?

18. Иегова биске ынак деп кайыын билир бис?

¹⁸ Силерге бир-ле кижи белек бээрге, чүнү миннингениңерни сактып келиңер даан. Эң үнелиг белек — төлевир деп билип алдывыс. Ол дээш Иеговага өөрүп четтиргенивисти илередир ужурлуг бис. Иоанн 3:16-да мынча дээн: «Бурган Бодунуң  эр чаңгыс Оглун берипкен. Ооң бо делегейниң улузунга ынакшылы ол хире болган-дыр». Иегова биске дыка ынак болгаш, Бодунуң эргим Оглун, Иисус Христосту, бис дээш берипкен. Иисус база биске ынак деп билир бис, чүге дизе ол бис дээш амы-тынын бээрин чөпшээрешкен (Иоанн 15:13). Чигзиниг чок, Иегова биле Иисус төлевирни бергеш, биске ынаан бадыткааннар (Галатчыларга 2:20).

19, 20. а) Канчаар Иегованың өңнүү апарып болур бис? б) Христостуң бачыттан хостаар өргүлүнге бүзүреп турарывысты канчаар көргүзүп болур бис?

¹⁹ Чугаажок, Иегованың ынакшылын көргеш, Ооң өңнүү болур күзеливис оттуп келир. Ынчалза-даа эки билбезивис кижи-биле найырал тудары болдунмас. Иоанн 17:3-те Иегованың дугайында билиглер алыры чугула деп бижээн. Ынчангаш Библияны өөренирин уламчылаңар. Иеговага ынакшылыңар күштелген тудум, Ооң сеткилин өөртүр күзелиңер өзүп, чоорту Бурганның өңнүү апаар силер (1 Иоанн 5:3).

²⁰ Иисус Христостуң бачыттан хостаар өргүлүнге бүзүреңер. Библияда: «Оглунга бүзүрээн кижи мөңге амыдыралдыг болур» — дээн (Иоанн 3:36). Иисус Христоска «бүзүрээри» дээрге чүү дээни ол? Иисустуң өөреткени ёзугаар амыдырап-чурттаары-дыр (Иоанн 13:15). Иисуска бүзүреп турарывысты чүгле чугаа-сөзүвүс-биле эвес, а херек кырында көргүзер ужурлуг бис. «Бурганга бүзүрел база ажыл-херек чокта өлүг» — деп Иаков 2:26-да чиге сөглээн. Христостуң өргүлүнге бүзүреп турарывыс ажыл-херектеривистен көскү болур.

21, 22. а) Христостуң өлүмүнүң Сактыышкын кежээзинге чыл санында кээри чүге чугула? б) 6, 7 дугаар эгелерге чүнү сайгарар бис?

 ²¹ Христостуң өлүмүнүң Сактыышкын кежээзинче келиңер. Иисус бисти ооң өлүмүнүң хүнүн сактып чоруурун чагаан. Чыл санында Сактыышкын кежээзин, азы «Дээргиниң кежээки чемин», демдеглеп турар бис (1 Коринфичилерге 11:20; Матфей 26:26—28). Бодунуң тергиин чуртталгазын бис дээш төлевир кылдыр бергенин сактып чоруурувусту Иисус күзээн. Ол: «Мону Меңээ тураскаал кылдыр ынчаар кылып чоруңар» — дээн. (Номчуптуңар: Лука 22:19.) Сактыышкын кежээзинге келгенивис-биле төлевирни үнелеп турарывысты база Иегованың болгаш Иисус Христостуң ынакшылы дээш өөрүп четтиргенивисти көргүзер бис. (16 дугаар Капсырылганы көрүңер.)

²² Чигзиниг чок, төлевир кижилерге кайгамчык белек-тир (2 Коринфичилерге 9:14, 15). Ол чок апарган улуска безин идегелди берип турар. Ооң дугайында 6, 7 дугаар эгелерден билип алыр бис.